Jáaŋ 14 - Eka Eswhī

Yɛɛ́so a á mɛnzhɛ yīi, mɛ́ tsiā éwú tɛ́ njʉ́ɔ á Ndém, á Mɔʼɔ́

¹ Yɛɛ́so á zéŋ ndé á mbū nnɔ yí ŋ́gɛ: «Ndɛ́ʼ azō á ták leghi tsɛ́, pɛ é si fíɛ́ nnɛ̄t ŋgyáa á mbū Ndém, pɛ ezéŋ efɛ́ nnɛ̄t ŋgyá á mbū meŋ.

² Ejʉʼ é ŋgyā Mɔʼɔ́ ga tɛ nzá. Á ŋgwíʼe á té épúp ɔ́, mbɔ a ke gɔ́ meŋ nde lé á mbū pɛ ŋ́gɛ, meŋ gʉɔ mé ncuŋtē ejʉʼ tsīi, pɛ e shʉʼ enáŋte éwú ú.

³ Meŋ shʉʼɛ ŋgʉ̄ɔ tɛ ncūŋte ejʉʼ mɛ́t á mbū pɛ, meŋ ezéŋ eshʉ̄ʼ efāʼ á wɛ́, ḿpɛ mé cʉ́ʼɛ ŋgɔ́ɔ, tɛ ajʉʼ zīi, meŋ á éwú, pɛ egɔ́ azɛ́ éwú.

⁴ Ŋ́gɔ́ mé ajʉʼ zīi, meŋ gʉɔ mé éwú, mbɔ pɛ é si nzhɛ́ɛ á mɛnzhɛ. »

⁵ Tomási á lé á mbū yí ŋ́gɛ: «Mɔʼɔ́ wek, pek te si nzhɛ́ɛ ajʉʼ zīi, o gʉɔ mé éwú ú. Pek gɔ epīiŋ ŋgāa tɛ́ nzhɛ́ á mɛnzhɛ ɛ̄?»

⁶ Yɛɛ́so á pwɛt á mbū yí ŋ́gɛ: «Meŋ á si ŋgɔ́ á mɛnzhɛ, ŋ́gɔ́ á anuúnē, ŋ́gɔ́ á ŋiŋ yīi, a ghʉɛ mɛ́ gɔ́ɔ éwú. Ŋiŋ a gɔ le gʉ̄ɔ njʉ́ɔ á Mɔʼɔ́, té gɔ́ yīi, a á zápa áa ánɛ meŋ ɛ́.

⁷ Páʼ pɛ é si nzhɛ́ɛ á gá lā, pɛ e zéŋ ezhɛ́ á Mɔʼɔ́ ga. Tɛ efhó tsetseŋɔ, pɛ é si nzhɛ́ɛ á yí, pɛ é ndáʼ njʉ́ɔ á yí. »

⁸ Fílíio á lé á mbū yí ŋ́gɛ: «Mɔʼɔ́ wek, lɛ ntswī á wék á Mɔʼɔ́, a elɛ ŋkūʼ á mbū pek. »

⁹ Yɛɛ́so á lé á mbū yí ŋ́gɛ: «Ŋgia é éwú yīi, ḿpɛ é nnɔ. O piīŋ la á gá zhɛ́ ɛ́ lɛ̄ Fílíio? Ŋiŋ yīi a á jʉ́ɔ á gá, a á páʼā ndɔkɔ njʉ́ɔ á Mɔʼɔ́ ga. Melaʼ akɔ̄ o lʉ́ɛ́ ŋ́gɛ: “Tswi á wék á Mɔʼɔ́ ɔ́?”

¹⁰ O te si mvéŋɛ ŋ́gɛ meŋ á ntē nnɛ̄t Mɔʼɔ́, Mɔʼɔ́ ga á zéŋ ŋgɔ́ á ntē nnɛ̄t meŋ ɛ́ lɛ̄? Meshuŋne mīi meŋ shúŋɔ á wɛ́, é té fhɔ́ɔ á mbū meŋ ɛ́. Á gɔ́ áa lɛ, páʼ Mɔʼɔ́ a á ntē nnɛ̄t meŋ lā, yí mé lɔkɔ á gá ŋghʉ̄ɛ mefaʼ mí.

¹¹ Meŋ á ntē nnɛ̄t Mɔʼɔ́, Mɔʼɔ́ á zéŋ ŋgɔ́ á ntē nnɛ̄t meŋ. Pɛ evéŋ épúp. A zi ŋgɔ́ éyi, pɛ te e véŋ ashuŋne zá á, pɛ tsɔ efhó ánɛ mefaʼ mīi, pɛ é si njʉ́ɔ meŋ eghʉ̄ɛ, ḿvéŋ.

¹² Kwaʼ anuúnē anuúnē, meŋ shúŋɔ á wɛ́, ŋiŋ a fíɛ́ nnɛ̄t ŋgyá mé meŋ, mbɔ a a zéŋ eghʉ azí mefaʼ mīi, meŋ á si ŋghʉ̄ɛ. Mbɔ a á zéŋ eghʉ emi, é faáŋ ntsya emi, meŋ á si ŋghʉ̄ɛ, melaʼ mīi, meŋ gʉɔ mé lezēŋ Mɔʼɔ́.

¹³ Ajūɔ tsem zīi, pɛ é lɔk lezēŋ tsá ndɔ́, meŋ a ghʉ á mbū pɛ. Tɛ́ a etsīa épúp, mɛ́ ezápa ánɛ lezēŋ Mɔ́, ŋ́gūʼte á Mɔʼɔ́.

¹⁴ Pɛ lɔkɔ lezēŋ tsá ndɔ́ á gá azō, mbɔ meŋ a ghʉ azō mɛ́t á mbū pɛ.

Yɛɛ́so a á ega ndāʼnɛ ŋ́gɛ, Ndém a a shʉʼ eyá Azwakne zí

¹⁵ «A gɔ́ éyi, pɛ kɔɔ̄ŋ á gá, pɛ enéŋ athū zɛ́ á leziŋ páʼ anu zīi, meŋ shúŋɔ á wɛ́, á si ndʉ́ɛ́ épúp.

¹⁶ Meŋ a shʉʼ eswíŋte á Mɔʼɔ́, a eyá á wɛ́ mmɔʼ ŋkʉɛ‑anɔŋɔ́‑mɛnzhɛ, pɛ a pɔ́p mé ecʉ́ʼɛ ŋgɔ́ɔ, á lemiʼɛ.

¹⁷ Ŋkʉɛ‑anɔŋɔ́‑mɛnzhɛ mɛ́t, a gɔ́ á Azwakne Ndém, yí mé kwaʼ ntswī á wɛ́ á ŋiŋ yīi, Ndém a á ewiɛ́. Epuɔ ŋgɔŋ puɔ, é gɔ le kūʼ á letswi á yí í, melaʼ mīi, pɔ́ zi te si njʉ́ɔ á yí í, ńzi nnɔ̄ŋ te nzhɛ́ɛ á yí í. Pɛ pwɔ̄, pɛ é si ŋké nzhɛ́ɛ á yí. A á lezēŋ pɛ efʉʼ metsem, a á ntē nnɛ̄t pɛ efʉʼ metsem.

¹⁸ Meŋ te shʉʼ etshi á wɛ́ nnéŋ, pɛ ecʉ́ʼ páʼ epɔ̄ metshɛɛ́ lā á. Meŋ a shʉʼ ezéŋ eshʉʼ mé lezēŋ tsɛ́.

¹⁹ Á cʉ́ʼ á méŋ agáʼ afʉʼ lɛ, epuɔ ŋgɔŋ puɔ, é le zéŋ á gá njʉ́ɔ ɔ́. Pɛ pwɔ̄, é ké eshʉʼ ezéŋ ejʉ́ɔ á gá, meŋ gɔ́ nte. Púp, pɛ ezéŋ ŋgɔ́ azɛ́ éwú leswhī leswhī.

²⁰ Aleʼé mɛ́t, pɛ ezhɛ́ á légɛ, meŋ á ntē nnɛ̄t Mɔʼɔ́ ga, ḿpɛ é a pɔ́p é piŋ mbú ŋgɔ́ á taʼ nchu.

²¹ «Ŋiŋ yīi a juúʼ anu zīi meŋ shúŋɔ, ŋ́ghʉ̄ épúp, ŋgaŋ a kɔɔ̄ŋ á gá. Ŋiŋ a piŋɛ ŋkɔ̄ŋ á gá, mbɔ Mɔʼɔ́ ga, a ezéŋ ekɔŋ á yí azí, meŋ ezéŋ ŋkɔ̄ŋ á yí azá, ńtswī á yí páʼ, meŋ á épúp. »

²² Yúdas, mɛ́ té ndʉ́ɛ́ á Yúdas Iskaliɔkt ɛ́, á lé mé Yɛɛ́so ŋ́gɛ: «Mɔʼɔ́ wek, o gɔ eghʉ lɛ akɔ̄, tɛ́ etswi nnɛ̄t ju áa á mbū pek, o ó le tswī á mbū epuɔ ŋgɔŋ puɔ ɔ̄?»

²³ Yɛɛ́so á pwɛt á mbū yí ŋ́gɛ: «Ŋiŋ yīi a kɔɔ̄ŋ á gá, a ziīŋ páʼ ashuŋne zá á si ndʉ́ɛ́ épúp. Mɔʼɔ́ ga á kɔŋ á yí. Pek e shʉʼ eshʉʼ á mba yí, élɔk mba zi, éghʉ lenaŋá tsék.

²⁴ Ŋiŋ yīi a te gá kɔŋ, a te zīŋ páʼ ashuŋne zá á si ndʉ́ɛ́ épúp ɔ́, ashuŋne jʉɔ zīi, pɛ piŋɛ njúʼɔ la, á té fhɔ́ɔ á mbū meŋ ɛ́, á fhɔ́ɔ á mbū Mɔʼɔ́ ga, mbɔ yí mé le tó á gá.

²⁵ Meŋ á shúŋ á wɛ́ emuɔ menu, á afʉʼ zīi meŋ zɛɛ́t á lezēŋ pɛ.

²⁶ Ŋkʉɛ‑anɔŋɔ́‑mɛnzhɛ, Ázwakne Ndém, á ŋiŋ yīi, Mɔʼɔ́ ga a a shʉʼ etó á mbū pɛ ánɛ lezēŋ tsá, a a shʉʼ ezíʼne á wɛ́ á ajūɔ tsem, éghʉ pɛ ezéŋ ŋkímte ajūɔ tsem zīi, meŋ á shúŋ á wɛ́.

²⁷ «Meŋ á tsya apwɛne á mbū pɛ. Meŋ á yá apwɛne zá á mbū pɛ. Meŋ te ŋgyáa ánɛ ntií zīi, epuɔ ŋgɔŋ puɔ, é lɔɔ̄k ŋgyá apwɛne ɛ́. Ndɛ́ʼ além zɛ́ á zéŋ ntsɔ́ʼɔ, ndɛ́ʼ pɛ ezéŋ ncɔ̄ʼ.

²⁸ Pɛ ke júʼ páʼ, meŋ ke shúŋ á wɛ́ ŋ́gɛ: “Meŋ á si ŋgʉ̄ɔ gʉɔ, éké eshʉʼ ezéŋ epiŋ mé lezēŋ tsɛ́.” Á ŋgwíʼe ŋgɔ́ yīi, pɛ kɔɔ̄ŋ á gá, mbɔ pɛ é kák páʼ, meŋ gʉɔ mé lezēŋ Mɔʼɔ́ ga lā, Mɔʼɔ́ ga a faáŋ ntsya á gá.

²⁹ Meŋ á té njhʉ̄ eshúŋne á mbū pɛ tsetsɔŋɔ, tɛ́ emuɔ menu mɛ́t e e shʉʼ eshʉ̄ʼ. Ńzhɛ́ á légɛ afʉʼ zīi é piŋ eshʉ̄ʼ, pɛ efɛ́ nnɛ̄t ŋgyá á mbū meŋ.

³⁰ Te efhó tsetsɔŋɔ, ḿpɛ te e zéŋ etswhi eshúŋnɛ ɛ́, melaʼ mīi, efɔ ŋkaŋ‑ŋgɔŋ, a á shʉʼ, táʼ, a ké ŋgɔ́ a á le ánɛ meŋ kūuʼ.

³¹ Á ké mbɔ̄ŋ ŋ́gɛ, ŋgɔŋ tsem e ezhɛ́ á légɛ, meŋ kɔɔ̄ŋ á Mɔʼɔ́ ga, ḿbiŋɛ ŋghʉ̄ɛ akɔ̄ lɛ́, ndeŋ ndeŋ páʼ a le kīa épúp. » Yɛɛ́so á shúŋne épúp, ńdé á mbū nnɔ yí ŋ́gɛ: «Pɛ elū á esī, ḿpɛ efhó ega ŋgʉ̄ɔ. »