Jáaŋ 10 - Eka Eswhī

Ashuŋne lepúʼ ánɛ mpfɛnne‑memvhō

¹ Yɛɛ́so á zéŋ ndé á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́. Ŋiŋ a gɔ te lɔ̄k nchu akɛ tɛ́ ŋkó á ŋgē ɛ́, ḿbīŋ ndɔ̄k emɔ̄ʼ eshhʉ̄ akɛ tɛ́ nzíʼ ŋkó éwú, mbɔ ŋiŋ wuɔ mɛ́t a á ntsɔ́ŋ, ŋ́gɔ́ á efwɛ̄t.

² Ŋiŋ a ké mbīŋ ndɔ̄k nchu akɛ tɛ́ ŋkó á ŋgē, mbɔ ŋgaŋ a á si ŋgɔ́ á mpfɛnne‑memvhō.

³ Mbɔ ŋiŋ yīi, a pípɛ nchu ŋkāʼ, a a tsɔ́ʼe, a ekó á ŋkāʼ, memvhō mí e eyīŋ ŋghi zi, a etɔ́ŋ eziɛ́ lɛ́ mé lezēŋ tsí, ńdɔ̄k á wɔ́p ntó.

⁴ Afʉʼ zīi a á lɔk a wɔ́p ntó tɛ pɔ́ mi, a egɔ́ mvhɔ nzīŋɛ, pɔ́ egɔ́ nzem nzhɛ̄nɛ á yí melaʼ mīi, pɔ́ zi nzhɛ́ ŋghi zi.

⁵ Pɔ́ piŋɛ mbú ŋgɔ́ le á ŋge zhɛ̄ne. A cʉ́ʼɛ épúp, pɔ́ kʉ á yí kʉʉ, melaʼ mīi, pɔ́ té si ŋgīŋɛ ŋghi zi í. »

⁶ Yɛɛ́so a le shúŋ ashuŋne lepúʼ jʉɔ mɛ́t, epuɔ ké te júʼ ajū mīi a lɔkɔ ndʉ́ɛ́ ɛ́.

⁷ Yɛɛ́so á zéŋ ndé ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, meŋ á si ŋgɔ́ nchu ŋgē mvhō.

⁸ Epuɔ metsem pīi, é le té njhʉ̄ eshʉ̄ʼ tɛ́ meŋ eshʉ̄ʉʼ, pɔ́ gɔ́ áa metsɔ́ŋ, ŋ́gɔ́ mefwɛ̄t. Memvhō é le ké te ŋghi zɔp yīiŋ.

⁹ Meŋ mé si ŋgɔ́ nchu akɛ. Ŋiŋ a zápa ánɛ meŋ tɛ́ ŋkó á ŋkāʼ, mbɔ a a láʼ egɔ́ éwú, ékó, étó páʼ a á kɔŋ, éwɛ á ajūɔ tsem zīi, a gɔ epfɛ́t.

¹⁰ Ntsɔ́ŋ a shʉʉ̄ʼ azí áa njʉʉ̄, ézwhí, énéŋ mepí. Meŋ ke ké eshʉʼe, ŋ́gɛ epuɔ menɔŋ e eláʼ ŋgɔ́ éwú, ŋ́gɔ́ éwú tɛ ntsékne.

¹¹ Meŋ á si ŋgɔ́ á mbɔŋ mpfɛnne‑memvhō. Mbɔŋ mpfɛnne‑memvhō a lɔɔ̄k athū nnɛ̄t zí ntá á pí, melaʼ memvhō mí.

¹² Ŋiŋ yīi, a lɛɛ̄ ŋgɔ́ áa asaʼa‑ntsé á mbaʼ, ńzi te kwaʼ mpfɛnne‑memvhō ɔ́, memvhō é piŋ nzī te emí í, a lɛɛ̄ ŋge ejʉ́ɔ á tsho á leshʉʼ, ŋ́gwáʼ memvhō ŋkʉ̄, tsho á lɛ eshʉ̄ʼ ŋgwhʉ̄ á nnɔ memvhō, ḿbú ŋŋwāŋ á wɔ́p.

¹³ Ŋiŋ wuɔ mɛ́t, a wáʼa memvhō ŋkʉ̄ʉ melaʼ mīi, athū zí á lɛɛ̄ ntshí áa ánɛ ŋkāp, a te si ntsáa memvhō ɔ́.

¹⁴ Meŋ á si ŋgɔ́ á mbɔŋ mpfɛnne‑memvhō. Meŋ zhɛɛ́ memvhō má, memvhō é zéŋ nzhɛ́ á gá,

¹⁵ ńdeŋ ndeŋ páʼ Mɔʼɔ́ ga a zhɛɛ́ á gá, meŋ zéŋ nzhɛ́ á yí lā. Meŋ ndɔɔ̄k athū nnɛ̄t zá ntá á pí, melaʼ memvhō má.

¹⁶ Meŋ zɛɛ́t ŋgwɛ emɔ̄ʼ memvhō mīi, pɔ́ té á ŋgē ega á. Á si nzɛ́ttɛ ŋ́gɛ, meŋ egʉɔ efāʼ emiɛ́ mɛ́t, ńdɔk eshʉ̄ʼ azɔ́p. Pɔ́ e shʉʼ ejúʼ ŋghi za, a etsīa épúp, taʼ akɛt memvhō mé egɔ́ á esī, taʼ mpfɛnne‑memvhō mé egɔ́ éwú.

¹⁷ Mɔʼɔ́ ga a kɔɔ̄ŋ á gá, melaʼ mīi, meŋ ndɔɔ̄k athū nnɛ̄t zá, ńtá á pí, tɛ́ eshʉʼ ezéŋ etswí.

¹⁸ Ŋiŋ a gɔ̄ le kūʼ á lezwhī á gá á. Meŋ méŋwɛ̄t mé kɔŋɔ, ŋ́gyáa á athū nnɛ̄t zá. Meŋ wɛɛ̄ mete á lelɔk ŋgyá athū nnɛ̄t zá, ńzéŋ ŋgwɛ̄ mete á lelɔk ŋgɔ́ éwú leswhī leswhī. Á páʼa ŋgɔ́ á mɛnzhɛ yīi, Mɔʼɔ́ ga a le kīā, ŋ́gɛ meŋ ezīŋ áa éwú. »

¹⁹ Epuɔ Yúda é júʼ ajʉɔ ashuŋne mɛ́t, nchu nchu á pú nzéŋ ŋ́kó á tsetsɛlɛ pɔ́p.

²⁰ Epuɔ tɛ nzáne é nɔŋ ndʉ́ɛ́ ŋ́gɛ: «Esī e é ánɛ yí, a á pía, a lʉ́ɛ́ akɔ̄ tɛ pɛ é júʼɔ ɔ̄?

²¹ Emɔ̄ʼ epuɔ é nɔŋ ndʉ́ɛ́ ŋ́gɛ: «É té meshuŋne ŋiŋ yīi, esī e lē ŋgɔ á yí í. Esī e gɔ eghʉ̄ʉ tɛ menēk ŋiŋ é ŋáʼa a?»

Mɛ́ é ega nnɔ̄ŋ ndʉ́ɛ́ ŋ́gɛ, Yɛɛ́so a á zɔte á Ndém

²² Mɛ́ lɛ á Yelósalɛm, ŋ́ghʉ̄ɛ lekāk, á lelɔk ŋkímte páʼ, mɛ́ le zéŋ ncuŋte á Mía Ŋgyā Ndém. Á gɔ́ afʉʼ mbeŋ.

²³ Yɛɛ́so á gɔ́ á Mía Ŋgyā Ndém, ánɛ amɔ̄ʼ apuúŋ zīi, mɛ́ tɔ́ŋɔ lɛ Salomɔŋ, ńzīŋtɛ.

²⁴ Epuɔ Yúda é kɛ́nne á yí nnéŋ á sɔŋ, ńdé á mbū yí ŋ́gɛ: «Pek e láʼ ezwíʼte á wú tɛ etshí eséŋɛ́, tɛ́ o eshúŋ á wék á ŋiŋ yīi, o ó ewiɛ́ ɛ́? O gɔ́ ŋké ŋgɔ́ á Nzaʼ‑Ŋkhʉ, o esīa eshúŋ á wék. »

²⁵ Yɛɛ́so á tsɔ́ʼ á mbū pɔ́p ŋ́gɛ: «Meŋ ke láʼ eshúŋ á wɛ́, pɛ pīiŋ te véŋ. Mefaʼ mīi meŋ á si ŋghʉ̄ɛ ánɛ lezēŋ Mɔʼɔ́ ga, é si ntswīi á ŋiŋ yīi, meŋ á ewiɛ́.

²⁶ Pɛ piīŋ te si mvéŋɛ melaʼ mīi, pɛ te ánɛ nnɔ memvhō má á.

²⁷ Memvhō má é juúʼ anu zīi meŋ ndʉ́ɛ́. Meŋ nzhɛɛ́ á wɔ́p, pɔ́ piŋ ŋgɔ́ á nzem meŋ.

²⁸ Meŋ ghʉʉ̄ pɔ́ gɔ́ éwú, éfú ntā á lezēŋ Ndém. Pɔ́ gɔ́ le fú mbí í. Ŋiŋ a piŋɛ ŋgɔ́, a á le fú aleʼé, éfhó á mbū meŋ ŋkú á wɔ́p ɔ́.

²⁹ Mɔʼɔ́ ga mé le yá á wɔ́p mé meŋ. A faáŋ ntsya ajūɔ tsem. Ŋiŋ a gɔ le kūʼ á lefhō á mbū Mɔʼɔ́ ga, ŋ́kú á azō ɔ́.

³⁰ Pek Mɔʼɔ́ ga é puú ŋgɔ́ áa taʼ. »

³¹ Á lé épúp, epuɔ Yúda é zéŋ mbɛ́te metɔ́ ŋgɔ̄ elɔk etémte á yí ezwhí.

³² Yɛɛ́so á lé á mbū pɔ́p ŋ́gɛ: «Meŋ ke ghʉ̄ mefaʼ membɔŋ tɛ nzáne mīi, Mɔʼɔ́ ga a ke yá á gá mete á lelɔk ŋghʉ̄, pɛ jʉ́ɔ. Á shʉʉ̄ʼ ánɛ mefaʼ mɛ́t, aziɛ́ á ghʉɛ, tɛ́ pɛ faʼa á lelɔk metɔ́ ntémte á gá nzwhí í?»

³³ Pɔ́ pwɛt á mbū yí ŋ́gɛ: «É té melaʼ mefaʼ membɔŋ mīi o ke ghʉ̄ʉ̄, tɛ́ pek faʼa á lelɔk metɔ́ ntémte á wú nzwhí ɛ́. É melaʼ mīi, ó o si ŋgɔ́ á ŋiŋnɔŋ, ḿbiŋ nnɔ̄ŋ ndʉ́ɛ́ ŋ́gɛ, o ó Ndém, púp, ńdɔkɔ nzɔ̄tɛ á Ndém. »

³⁴ Yɛɛ́so á tsɔ́ʼ á mbū pɔ́p ŋ́gɛ: «Mɛ́ lɛ te tí á ntē aŋwaʼne lepé Mɔɔ́sɛ ŋ́gɛ, Ndém a á lé ŋ́gɛ, “pɛ é si ŋgɔ́ melém ɛ́ lɛ̄?”

³⁵ Ŋiŋ a piŋɛ ŋgɔ́, a á le anu ánɛ ashuŋne Ndém kúmne. Pɛ ejʉ́ɔ páʼ Ndém a le tɔ́ŋ epuɔ pīi, pɔ́ le nzwiʼté ashuŋne zí lɛ melém.

³⁶ Á gɔ́ épúp mbɔ, meŋ yīi, Mɔʼɔ́ ga Ndém a ke pīŋ nchʉ́ á gá, ńtó á ŋgɔŋ, pɛ é gaá ndé ŋ́gɛ, meŋ á si nzɔ̄tɛ á yí í, páʼ meŋ á véŋ ŋ́gɛ, meŋ á si ŋgɔ́ á Méŋ yi í?

³⁷ A gɔ́ éyi, meŋ te si ŋghʉ̄ɛ mefaʼ Mɔʼɔ́ ga á, ndɛ́ʼ pɛ efɛ́ nnɛ̄t ŋgyá á mbū meŋ.

³⁸ A piŋɛ ŋgɔ́ éyi, meŋ á si ŋghʉ̄ɛ, ńzī ŋgɔ́ éyi pɛ te efɛ́ nnɛ̄t eyá mé meŋ ɛ́, pɛ etsɔ mvéŋ mefaʼ mɛ́t, púp, ńdɔk ncūŋte ńzhɛ́ á mbɔŋɔ́ á légɛ, Mɔʼɔ́ ga a á ntē nnɛ̄t meŋ, meŋ gɔ́ á ntē nnɛ̄t yí. »

³⁹ Yɛɛ́so á shúŋne épúp, pɔ́ zéŋ nzī á lefaʼ eshhʉ̄ á legɔ á yí, á lɛ ŋgʉ̄ɔ.

⁴⁰ Yɛɛ́so á piŋ nzem, á nzéŋ ntshi Juldɛŋ, ńnáŋ éwú, á ajʉʼ zīi Jáaŋ a le té njhʉ̄ nnōʼ epuɔ á ntshi éwú.

⁴¹ Epuɔ tɛ nzáne é shʉʼ á njʉ́ɔ á yí, ńnɔŋ ndʉ́ɛ́ á tsetsɛlɛ pɔ́p ŋ́gɛ: «Jáaŋ a lɛ te ŋkʉʼne anu ghʉ̄ʉ, táʼ, anu ntsem zīi, a le ké ndé ánɛ ŋiŋ wuɔ, á si ŋgɔ́ anuúnē. »

⁴² Epuɔ tɛ nzáne ánɛ epuɔ pīi, é lɛ á ajʉʼ mɛ́t, é fɛ́ nnɛ̄t ŋgyá á mbū Yɛɛ́so.