Jáaŋ 1 - Eka Eswhī

Ŋiŋ yīi mɛ́ tɔɔ́ŋ á yí lɛ ashuŋne

¹ Amɔ̄ʼ azō a le pú nzɛ́t té gɔ́ éwú, ŋiŋ yīi, mɛ́ tɔɔ́ŋ á yí lɛ Ashuŋne, á gɔ́ áa éwú. Ŋiŋ mɛ́t yīi, a á Ashuŋne lā, pɔ́ Ndém mé nnɔ. Ashuŋne mɛ́t á gɔ́ á Ndém.

² Ŋiŋ mɛ́t yīi a á Ashuŋne lā, pɔ́ Ndém mé nnɔ, tɛ efhó á nzií etsō tsem.

³ Ndém a le lɔ̄k á yí, tɛ́ ŋghʉ̄ etsō tsem. Ndém a lɛ te ghʉ̄ amɔ̄ʼ azō, té lɔk áa yí tɛ́ ŋghʉ̄ ɛ́.

⁴ Yí mé ghʉʉ̄, mɛ́ gɔ́ éwú. Leghʉ, epuɔ menɔŋ é gɔ́ éwú, á gɔ́ ŋkaʼ á mbū pɔ́p.

⁵ Ŋkaʼ é le nɔ̄ŋ ŋkɛʼɛ epuɔ, á ntē nzém, epuɔ menɔŋ á ntē nzém mɛ́t, é té véŋ ŋ́gɛ, e ekɛ̄ʼɛ á wɔ́p ɔ́.

⁶ Ndém a le tó á taʼ ŋiŋ á ŋgɔŋ, lezēŋ tsí é gɔ́ lɛ Jáaŋ.

⁷ A le shʉʼē, ŋ́gɔ́ á njhʉɛ‑njʉ́ɔ, ŋ́gɔ̄ á eshúŋ ajū mīi, a á si nzhɛ́ɛ ánɛ ŋkaʼ mɛ́t, tɛ́ epuɔ metsem e ezápa ánɛ ashuŋne zí, éfɛ́ nnɛ̄t ŋgyá á mbū ŋkaʼ mɛ́t.

⁸ Jáaŋ mé lɛ te ŋkaʼ á, táʼ, a lɛɛ́ ŋgɔ̄ á eshúŋ ajū mīi, a á si nzhɛ́ɛ ánɛ ŋkaʼ.

⁹ Ŋiŋ yīi a á Ashuŋne lā, mé lɛ á kwaʼ ŋkaʼ. Éshʉ̄ʼ á ndo ŋgia, á ŋkɛʼɛ̄ ŋiŋ ntsem.

¹⁰ Ŋiŋ mɛ́t yīi a á Ashuŋne, a le shʉ̄ʼ á ŋgɔŋ. Epuɔ menɔŋ é piŋ te yí véŋ, mbɔ Ndém a le ké ndɔk á yí, tɛ́ ŋghʉ̄ ŋgɔŋ.

¹¹ A le shʉ̄ʼ á alāʼ pɔ́p, epuɔ alāʼ pɔ́p, é piŋ te yí kókne.

¹² Epuɔ pīi é le kokné á yí, épuɔ pīi é le fɛ́ nnɛ̄t ŋgyá mé yí, a le yá á wɔ́p mete á lelɔk ncʉ́ʼ epɔ̄ Ndém.

¹³ Mɛ́ té ndʉ́ɛ́ á lecʉ̄ʼ epɔ̄ Ndém, ánɛ ntií zīi, epuɔ menɔŋ é lɔkɔ nzhíɛ ewɔŋkhʉ̄ lā á. Pɔ́ té cʉ́ʼ epɔ̄ Ndém ánɛ lekɔŋ ŋiŋnɔŋ ɔ́. Ŋiŋnɔŋ mé té kɔ̄ŋ ŋ́gɛ, pɔ́ ecʉ́ʼ epɔ̄ Ndém ɛ́. Ndém mé kɔɔ̄ŋ, ńdɔ̄k á wɔ́p ŋghʉ̄ epɔ̄ pí.

¹⁴ Ashuŋne jɔ̄, a le sɛ̄t ncʉ́ʼ á kwaʼ ŋiŋnɔŋ, tɛ nnáŋ á tsetsɛlɛ pek, ŋ́gɔ́ á ŋgaŋ apɔŋɔ́ ntē te ndhʉ, ŋ́gɔ́ á ŋgaŋ anuúnē tɛ nzōko. Pek jʉ́ɔ á shʉ́shɔ́k yi, shʉ́shɔ́k wuɔ mɛ́t, Mɔʼɔ́ yímpɛ Ndém mé le yá á mbū tséŋ Méŋ yi mɛ́t.

¹⁵ Jáaŋ a le shúŋ ajū mīi, a á si nzhɛ́ɛ ánɛ ŋiŋ mɛ́t, ésáʼ mé ŋghi teté ŋ́gɛ: «Ŋiŋ wuɔ a á si ŋgɔ́ á ŋiŋ yīi, meŋ ke lé ánɛ yí ŋ́gɛ, ŋiŋ a á nzem meŋ eshʉ̄ʼɛ, ńtsyā á gá, melaʼ mīi, mɛ́ le gē ezhí á gá, á gɔ́ áa éwú. »

¹⁶ Páʼ a á ŋgaŋ apɔŋɔ́ ntē te ndhʉ lā, a le kēm ephʉ yímpɛ metsem. Ŋ́kem ntswīʼne ŋkēm.

¹⁷ Ndém a le zapá ánɛ Mɔɔ́sɛ, tɛ́ ŋgyá mbé á mbū pímpɛ. Ḿbiŋ nzápa ánɛ Yɛɛ́so Klísto, tɛ́ ntswī á apɔŋɔ́ ntē te ndhʉ zí, ńzápa ánɛ yí, tɛ́ ŋghʉ̄ mɛ́ zhɛ́ anuúnē.

¹⁸ Ŋiŋ a la pú ntshí lezēk ánɛ Ndém ɛ́. Tséŋ Méŋ Ndém, ńzéŋ ŋgɔ́ azí á Ndém, pɔ́ Ndém Mɔʼɔ́, é ziŋ á taʼ akhu, yí mé le ghʉ̄ʉ̄, mɛ́ zhɛ́ páʼ Ndém a á épúp.

Jáaŋ nnoʼ‑epuɔ á ntshi a á ega eshúŋɔ anu ánɛ yí méŋwɛ̄t

¹⁹ Á lɛ amɔ̄ʼ aleʼé, mekém epuɔ Yúda é lɛ fhó á Yelósalɛm, ńtó wɔ nɔŋ‑epɔʼ mbɔɔ emɔ̄ʼ epuɔ ánɛ nzwɛt Levi, ŋ́gɛ pɔ́ egʉɔ nzɛ́tte á Jáaŋ ŋ́gɛ, a á páʼā ŋgɔ́ á awɔ́ lɛ́. Anu zīi Jáaŋ a le léē, a ajʉɔ.

²⁰ A le tsɔ́ʼ á mbū pɔ́p ésia sia, té miʼte, ńdé ŋ́gɛ: «Meŋ mé té á Nzaʼ‑Ŋkhʉ á ntɔ̄ŋ apuʼ yīi, Ndém a le laʼnē ɛ́. »

²¹ Pɔ́ zéŋ nzɛ́tte á yí ŋ́gɛ: «Tɛ o gɔ́ áa awɔ́? O ó Eli lɛ́?» Á pwɛt ŋ́gɛ: «Meŋ te á yí í. » Pɔ́ zéŋ nzɛ́tte á yí ŋ́gɛ: «O ó ntswi‑ŋke Ndém yīi, mɛ́ zwíʼtɛ lā lɛ́?» Á gɛ: «Ŋgáŋ. »

²² Pɔ́ zéŋ nzɛ́tte á yí ŋ́gɛ: «Tɛ o gɔ́ áa awɔ́? Á mbɔŋ ŋ́gɛ, pek etsɔ́ʼ apiŋ á mbū epuɔ pīi, pɔ́ ntó á wék. Wu méŋwɛ̄t é si ndʉ́ɛ́ ŋ́gɛ, o ó awɔ́?»

²³ Jáaŋ á lɔk anu zīi Izayi ntswi‑ŋke Ndém a le léē, ḿbwɛ̄t ŋ́gɛ: «Meŋ á si ŋgɔ́ ŋghi ŋiŋ yīi, a á késáatswɛt, ńdʉ́ɛ́ mé ŋghi teté ŋ́gɛ: “Pɛ esāŋte á mɛnzhɛ Atsyapuɔ, a enɔ̄ŋ ndeŋ ndeŋ.” »

²⁴ Epuɔ pīi, mɛ́ le tó á wɔ́p á mbū Jáaŋ lā, é lɛ epuɔ Falísia.

²⁵ Pɔ́ zɛ́t ntswīʼnɛ ŋŋāka á Jáaŋ ŋake, ńzɛ́tte á yí ŋ́gɛ: «A gɔ́ éyi, o te á Nzaʼ‑Ŋkhʉ ɛ́, ŋ́gɔ́ te Eli í, ŋ́gɔ́ te á ntswi‑ŋke Ndém yīi, mɛ́ é si nzwíʼtɛ ɛ́, mbɔ melaʼ akɔ̄, o piŋɛ nnōʼo epuɔ á ntshi ī?»

²⁶ Jáaŋ á pwɛt á mbū pɔ́p ŋ́gɛ: «Meŋ á si nnōʼo epuɔ á ntshi ndaʼ. Mmɔʼ ŋiŋ a piīŋ ŋgɔ́ á nnɔ pɛ, pɛ enɔ̄ɔŋ te zhɛ́ɛ á ŋiŋ yīi, a á ewiɛ́ ɛ́.

²⁷ Azá anu a tɔ́ke, azí mé eshʉ̄ʼ. Meŋ zi mbú te kūʼ yīi, meŋ gɔ ekɛ́ʼɛ ŋkhʉ meláŋ mí í. »

²⁸ Emuɔ menu é lɛɛ́ ntɔ́kɔ páʼa, á akap alāʼ Betani, á nzéŋ ntshi Juldɛŋ, mé eshhʉ̄ mbuʼ esaáʼ‑nu, á ajʉʼ zīi, Jáaŋ a le nɔ̄ŋ nnoʼo epuɔ á ntshi éwú.

Yɛɛ́so a á si ŋgɔ́ á Mɔ́ njʉnjhʉ Ndém

²⁹ Njhʉ̄ é lá, Jáaŋ á jʉ́ɔ á Yɛɛ́so, á nɔŋ eshʉ̄ʼɛ mé lezēŋ tsí, á lé ŋ́gɛ: «Mɔ́ njʉnjhʉ Ndém yīi, a lɔkɔ esōko mefa epuɔ menɔŋ, a ewuɔ.

³⁰ A á yí tɛ́ meŋ kɛɛ́ eshúŋɔ anu ánɛ yí, páʼ meŋ ke lé ŋ́gɛ: “Ŋiŋ a á nzem meŋ eshʉ̄ʼɛ, ńtsyā á gá, melaʼ mīi, mɛ́ le gē ezhí á gá, á gɔ́ áa éwú.”

³¹ Meŋ méŋwɛ̄t é le zī nnɔŋ te nzhɛ́ á yí í. Táʼ, meŋ ke shʉ̄ʼ azá á nnoōʼ epuɔ á ntshi páʼā, ŋ́gɛ epuɔ Islaɛl e elɔk nzhɛ́ á ŋiŋ yīi, a á ewiɛ́. »

³² Jáaŋ á zéŋ eshúŋ ajū mīi, a á si nzhɛ́ɛ ánɛ Yɛɛ́so, ńdé ŋ́gɛ: «Meŋ ke jʉ́ɔ̄, Azwakne Ndém, á fhó á lephū esóʼo páʼ akepēŋ lā, ḿbú ntā ánɛ yí.

³³ Meŋ nde nɔ̄ŋ te nzhɛ́ á yí í. Táʼ, ŋiŋ yīi a le tó á gá ŋ́gɛ, meŋ egʉɔ nnōʼ epuɔ á ntshi, yí mé le lé me meŋ ŋ́gɛ: “Ŋiŋ yīi o o shʉʼ ejʉ́ɔ, Azwakne Ndém a esóʼo mbú ńtā ánɛ yí, yí mé shʉʼ enéŋ Azwakne Ndém ánɛ epuɔ.”

³⁴ Meŋ méŋwɛ̄t é njʉ́ɔ, ńchʉ́ nnɛ̄t mvéŋ á légɛ, ŋiŋ mɛ́t mé si ŋgɔ́ á Méŋ Ndém. »

Mvhɔ epuɔ pīi é le tsé á nzem Yɛɛ́so

³⁵ Mmɔʼ njhʉ̄ é zéŋ ndá, Jáaŋ pɔ́ emɔ̄ʼ megaŋ nnɔ pí mémpīa, é zéŋ ŋgɔ́ á ajʉʼ zīi, a ke zī ŋgɔ́ éwú lā.

³⁶ Á jʉ́ɔ á Yɛɛ́so, á nɔŋ ntɔ́kɔ, á pʉ́ʼɛ menēk ntshí ánɛ yí, ńdé ŋ́gɛ: «Mɔ́ njʉnjhʉ Ndém a ewuɔ. »

³⁷ Megaŋ nnɔ pí pwɔ̄ é júʼ á yí á lelē épúp, ńtsé á nzem Yɛɛ́so.

³⁸ Yɛɛ́so á pekne nnɛ̄t, ńjʉ́ɔ páʼ pɔ́ é si nzhɛ̄nɛ á yí, ńdé á mbū pɔ́p ŋ́gɛ: «Pɛ faʼa akɔ̄?» Pɔ́ pwɛt ŋ́gɛ: «Lábi, ńdɔkɔ ŋ́gɛ: ńziʼnɛ. O naáŋ egɔ́?»

³⁹ Yɛɛ́so á pwɛt á mbū pɔ́p ŋ́gɛ: «Pɛ eshʉʼ ŋkó ńjʉ́ɔ. » Á gē egɔ́ épúp, mbɔ ajūɔ menu lekua mbwɛɛ́t‑njhʉ̄ á kuʼ. Pɔ́ a pɔ́p é lɛ ŋgʉ̄ɔ, pɔ́ kó njʉ́ɔ á ajʉʼ zīi, Yɛɛ́so a naáŋ éwú. Ḿbú ntā á lezēŋ yí, tɛ aziɛ́ aleʼé á mi.

⁴⁰ Mmɔʼ ŋiŋ ánɛ epuɔ mémpīa pīi, é le júʼ ŋke Jáaŋ, ńtsé á nzem Yɛɛ́so lā, a lɛ lɛ Aŋdlɛya, ŋ́gɔ́ á ŋgik Simɔŋ Piɛ.

⁴¹ Aŋdlɛya wuɔ mɛ́t, á zi mvhɔ, ŋ́gʉɔ njʉ́ɔ á ntsiʼnzem yi Simɔŋ, ńdé á mbū yí ŋ́gɛ: «Pek é njʉ́ɔ á Nzaʼ‑Ŋkhʉ. » Ńdɔkɔ ndʉ́ɛ́ á Klísto.

⁴² Ńdé épúp, ńdɔk á yí ŋgʉ̄ɔ mé lezēŋ Yɛɛ́so. Yɛɛ́so á kó ndɛ̄ ŋgē ejʉ́ɔ á yí, ńcʉ̄ á yí lɛ kɔ́ɔ́ɔ́, ńdé á mbū yí ŋ́gɛ: «O ó lɛ Simɔŋ, ŋ́gɔ́ á méŋ Jáaŋ. Mɛ́ e fú ecʉ́ʼɛ etɔ́ŋɔ á wú lɛ, Sefas. » A lɛɛ́ ntɔ́ŋɔ yí lɛ Sefas páʼa, ńdɔkɔ ŋ́gɛ tɔ́.

⁴³ Njhʉ̄ é lá, á pʉ́ʼɛ á athū Yɛɛ́so, á legʉɔ mé apak ŋgɔŋ Ŋgaliléa. Á kó á mɛnzhɛ, ḿbōte á Fílíio, ńdé á mbū yí ŋ́gɛ: «Tsé á nzem meŋ. »

⁴⁴ Fílíio wuɔ mɛ́t, a lɛ á mɔ́ Betsayída, á tésɔŋ wɔ Aŋdlɛya pɔ́ Piɛ.

⁴⁵ Fílíio á gʉɔ njʉ́ɔ á Natanayɛl, ńdé á mbū yí ŋ́gɛ: «Pek é njʉ́ɔ á ŋiŋ yīi, mɛ́ le tí menu ánɛ yí, á ntē aŋwaʼne lepé Mɔɔ́sɛ, mbɔɔ á ntē aŋwaʼne metswi‑ŋke Ndém lā. Ŋiŋ mɛ́t a á Yɛɛ́so ŋiŋ Naázalɛt, ŋ́gɔ́ á méŋ Yosɛ́p. »

⁴⁶ Natanayɛl á zɛ́tte á yí ŋ́gɛ, á ŋiŋ Naázalɛt e? Akɔ̄ mbɔŋ á gɔ etó á Naázalɛt e?» Fílíio á pwɛt á mbū yí ŋ́gɛ: «Shʉʼɛ ŋkó ńjʉ́ɔ. »

⁴⁷ Natanayɛl á gʉɔ tɛ ndɛ̄ ŋgē epáte á Yɛɛ́so, Yɛɛ́so á lé ánɛ yí ŋ́gɛ: «Kwaʼ ŋiŋ Islaɛl a a wuɔ páʼa, a puú ŋgɔ́ á ŋgaŋ anuúnē. »

⁴⁸ Natanayɛl á júʼ, ńzɛ́tte á yí ŋ́gɛ: «O ó si nzhɛ́ɛ á gá égɔ́?» Yɛɛ́so á pwɛt ŋ́gɛ: «Meŋ á nzi nté njhʉ̄ njʉ́ɔ á wú, o gɔ́ á letseŋ athʉ́ fiŋge, tɛ́ Fílíio á tɔ́ŋ á wú. »

⁴⁹ Natanayɛl á zéŋ ŋ́gɛ: «Ńziʼnɛ, o ó si ŋgɔ́ á Méŋ Ndém. O ó si ŋgɔ́ á efɔ epuɔ Islaɛl. »

⁵⁰ Yɛɛ́so á tsɔ́ʼ á mbū yí ŋ́gɛ: «O ó fɛ́ nnɛ̄t ŋgyá mé meŋ tsetsɔŋɔ, melaʼ mīi, meŋ á lé á mbū wu ŋ́gɛ, meŋ á njʉ́ɔ á wú á letseŋ athʉ́ fiŋge. O o shʉʼ ezéŋ ejʉ́ɔ emɔ̄ʼ menu, e efáŋ ntɔ́k emuɔ mɛ́t. »

⁵¹ Ńzéŋ ntswiʼne ndé ŋ́gɛ: «Kwaʼ anuúnē anuúnē meŋ shúŋɔ á wɛ́ ŋ́gɛ, pɛ e shʉʼ ejʉ́ɔ, lephū e etsɔ́ʼɔ ntshí, mecɔʼ Ndém é enɔŋ mbʉ̄ɛ̄, ńzéŋɛ esóʼo, á lezēŋ Méŋ‑Ŋiŋnɔŋ wuɔ. »