Jáak 5 - Eka Eswhī

Pɛ megaŋ azō, pɛ enáʼ mbá

¹ Pɛ megaŋ azō, pɛ etéŋɛ metuúŋ njúʼ, pɛ echʉ́ nnɛ̄t ndā mé nte, melaʼ ŋgʉɔ̄ʼ zīi, e é si nzwíʼtɛ á wɛ́.

² Lewūʼ tsɛ́ é ndáʼ mbú ńdʉ́, ayíŋ á jhʉ́ menzhó mɛ́.

³ Avlɛká á si mbúu njhʉ́ɛ á gɔ́ɔl pɔ́ ŋkāp zɛ. Avlɛká mɛ́t á páʼa, ńdɔkɔ eshúŋɔ á wɛ́ anu zīi, a shʉʼ eghʉ á wɛ́. A shʉʼ ezéŋ ejhʉ́ mbe nnɛ̄t zɛ, tɛ e epú mbék, páʼ mmók é tɔɔ azō tɛ á pékɛ lā. Pɛ lē ncup lewūʼ á afʉʼ zīi, ŋgɔŋ e gɔ á mmiī.

⁴ Pɛ le lʉ̄ʼ á lepɛ̄ megaŋ afaʼ pīi, pɔ́ le ghʉ̄ afaʼ á meŋkāʼ pɛ. Megaŋ afaʼ puɔ mɛ́t, é kɔ́ á zɔ ánɛ ŋkāp zɔp, ŋ́gyá nchu tɛ Atsyantsɔp Ndém á júʼ.

⁵ Pɛ é ndo esī atsetsáʼ, ńnɔŋ ŋkʉ̄ɔ ŋgɔŋ, mepɔŋ etsō é nɔŋ te ŋkíŋɛ á mbū pɛ ɛ́. Pɛ lɔ̄ɔk etsō nnéŋ nnɛ̄t zɛ́, éfáŋ páʼ mena pīi, mɛ́ e láʼ aleʼé ezwhíte lā.

⁶ Pɛ le záʼ ŋ́gɛ, mɛ́ ezwhíte wɔ te fa, pɔ́ té kūʼ á lelhʉ athū zɔ́p ɔ́.

Pɛ ekwɛ́t ntē ŋŋímne nnáŋ

⁷ Epɔ̄ memía, ndɛ́ʼ pɛ ezéŋ ŋgákne, tɛ Atsyapuɔ a eláʼ eshʉ̄ʼ. Pɛ ejʉ́ɔ á njʉʼ‑ŋgɔ̄ŋ. A zwiʼteé té gákne ŋ́gɛ, ecū mīi a ke jʉ́ʼē, e etswhí. A zwiʼteé tɛ e láʼ efaʼ mvhɔ etsō mbɔŋ, ézéŋ efaʼ nzem.

⁸ Pɛ azɛ́, ndɛ́ʼ pɛ ezéŋ ŋgákne. Pɛ ekwɛ́t ntē wɛ́, ńzhɛ́ á légɛ Atsyapuɔ, a cʉ́ʼɛ eshʉʼ shʉʼe.

⁹ Epɔ̄ memía, ndɛ́ʼ pɛ ezéŋ nzwɛ́tte á tsetsɛlɛ pɛ. Ḿbɔ́k á Ndém á lezāʼ ntsaŋ ŋ́gɛ, pɛ é pí. Pɛ ejúʼ, nzaʼ‑ntsaŋ, a á ndáʼ eshʉʼ tɛ mbáte, a ayi a tshií á menchu ŋgyā pɛ lā.

¹⁰ Epɔ̄ memía, pɛ ekímte metswi‑ŋke Ndém. Pɔ́ le shuŋné ánɛ lezēŋ Atsyapuɔ Ndém. Ńnɔŋ njʉ́ɔ ŋgʉɔ̄ʼ lɛ akɔ̄ lɛ́, ŋ́ké te gákne. Pɛ epɛ́ efʉʼ ánɛ pɔ́p.

¹¹ Pɛ ejʉ́ɔ. Ḿpɛ tɔɔ́ŋ epuɔ pīi, é kwɛɛ́t ntē lɛ, meshhʉ̄ mbɔŋ. Pɛ́ lé júʼ páʼ Jɔ́ɔb a le kwɛ́t ntē épúp, ńzhɛ́ anu zīi, Atsyapuɔ Ndém a le gē emakne, ŋ́ghʉ̄ ánɛ yí. Atsyapuɔ a wɛɛ̄ á mía apɔŋɔ́ ntē, ńzéŋ ŋgɔ́ á ntsaa‑mezeŋɛ.

¹² Tɛ́ mbɔ, epɔ̄ memía pá, ndɛ́ʼ pɛ eshúŋ anu tɛ ŋkā. Ndɛ́ʼ pɛ elɔ̄ɔk lephū ŋkā anu. Ndɛ́ʼ pɛ elɔ̄ɔk esī atsetsáʼ ŋkā. Ndɛ́ʼ pɛ ezi mbú ndɔ̄k mmɔʼ ntií ndɛʼɛ, ŋ́kā anu. O nɔŋ eshúŋnɛ, o gē egɛ ŋ́ŋ, á gɔ́ yīi, o lɔkɔ mvéŋɛ á leghʉ. Ŋ́gē égɛ ŋgáŋ, á gɔ́ yīi, o lɔkɔ ndʉ̄ʼɛ á leghʉ. Ḿbɔ́k á Ndém á lenēŋ ndɔ á athū pɛ.

Aswiŋte

¹³ Ŋiŋ a gɔ́ɔ á nnɔ pɛ, ńnɔ̄ŋ njʉ́ɔ ŋgʉɔ̄ʼ, á swíŋte á Ndém. Ńnɔ̄ŋ ŋkáka, á zɔp ntshi ndɔ̄k ŋgūʼte á Ndém.

¹⁴ Ŋiŋ a gɔ́ɔ á nnɔ pɛ, ńnɔ̄ŋ ŋgɔ̄ɔ, á tswi mɛ́ tɔ́ŋ epɔ̄ melʉɛ, á ntē alúŋ epuɔ Yɛɛ́so, pɔ́ shʉʼ ndɔ̄k mevɛ̄t, ńcɔ̄ʼ á yí ánɛ lezēŋ Atsyapuɔ Yɛɛ́so, éswíŋte á Ndém á athū yí.

¹⁵ Pɔ́ ge eswíŋte á Ndém épúp, éfɛ́ nnɛ̄t ŋgyá á mbū yí, mbɔ aswiŋte jʉɔ mɛ́t, a ghʉ, ŋgɔ a ezāŋne. Mbɔ Atsyapuɔ a a ghʉ, ŋgɔ a etē. Mefa mīi a le ghʉ̄ʉ̄, Ndém a elēkne ŋgyá á mbū yí.

¹⁶ Púp, pɛ evéŋ mefa mɛ́ á tsetsɛlɛ pɛ, ńzeŋne zeŋné, éswíŋte á Ndém á tsetsɛlɛ pɛ, ńzeŋne zeŋné, Ndém a eghʉ̄, pɛ etē. Aswiŋte ŋiŋ yīi, a á ndeŋ ndeŋ á mvhɔ Ndém, á gɛ esáa á tɔ́.

¹⁷ Eli a lɛ ŋiŋ páʼ pímpɛ lā, éswíŋte á Ndém mé taʼ ntē ŋ́gɛ, ndɛ́ʼ mbeŋ é lú. Mbeŋ e te á esī atsetsáʼ lú, tɛ á gɔ́ ŋguʼ tɛ́t mé mesaŋ ntokó.

¹⁸ Á zéŋ eswíŋte á Ndém leswhī leswhī, mbeŋ é fhó á lephū ndú, etsō é zém á ndo esī atsetsáʼ.

¹⁹ Epɔ̄ memía pá, a gɔ́ éyi, ŋiŋ nnɔ wɛ, á lē efhó ánɛ mɛnzhɛ anuúnē, ńtó ŋgʉ̄ɔ tɛ ŋgia é sak, mɛ́ ghʉ, á pīŋ nzem.

²⁰ Pɛ ezhɛ́ á légɛ, ŋiŋ yīi, a á ghʉ, taʼ ŋgaŋ mefa á fhó ánɛ mɛnzhɛ tepɔŋ mbīŋ nzem, a á páʼā, ńdɔkɔ ntswítɛ á yí, á lelāʼ ntā á lezēŋ Ndém. ńzéŋɛ ndɔkɔ ntswítɛ á yí ŋ́gɛ, Ndém a elēkne á tɛnzá mefa yi.