Jáak 4 - Eka Eswhī

Pɛ efók ntē ánɛ tsitsi ŋgɔŋ, ńtsé á nzem Ndém

¹ Mentsaŋ pɔ́ mekwɛt, é fhɔ́ɔ egɔ́ á tsetsɛlɛ pɛ ɛ̄? É té efhɔ́ɔ ánɛ mekwaŋte tepɔŋ mīi, é ntē pɛ ntshónɛ á wɛ́ efʉʼ metsem, á lewɛ tsitsi ŋgɔŋ wuɔ ɔ́ lɛ̄?

² Pɛ é si shʉ́ɛ́ etsō, ḿbiŋ nnɔ̄ŋ te ŋgwīɛ̄. Ńcʉ́ʼɛ nzwhítɛ áa epuɔ. Ŋ́gwɛ̄ á kegʉɔʼ ánɛ ajūɔ ŋiŋ, ḿbiŋ te azō mɛ́t wɛ. Ńcʉ́ʼɛ ntáka áa mentsaŋ, ńdhʉ̄ɛ mekwɛt. Nɔ́ŋɔ pɛ te ŋgwīɛ̄ ajūɔ páʼā, á gɔ́ melaʼ mīi, pɛ kaá ndɔ́ á mbū Ndém ɛ́.

³ Pɛ é si ndɔ́ɔ azō á mbū Ndém, ḿbiŋ nnɔ̄ŋ te ŋgwīɛ̄ azō mɛ́t ɛ́, melaʼ mīi, akwaŋte zīi, pɛ lɔkɔ ndɔ́ɔ azō mɛ́t, á té pɔŋ. Pɛ é si ndɛ ndɔ́ɔ áa ajū mīi, pɛ e wɛ, elɔk ejúʼ á mbɔŋɔ́, á mbe nnɛ̄t pɛ.

⁴ Pɛ é páʼ megaŋ agā wɔnzwí lā, pɛ te si nzhɛ́ɛ á légɛ, ŋiŋ a neéŋ ntē yí áa ánɛ tsitsi ŋgɔŋ wuɔ páʼā, ńdɔkɔ ŋgɔ́ á ŋgaŋ mbo Ndém ɛ́ lɛ̄? Ŋiŋ a nɔŋ ŋkɔ̄ŋɔ á yí á lelɔk tsitsi ŋgɔŋ wuɔ, ŋ́kwɛ́t ntwɛt yí, á zhɛ́ á légɛ, yí é ŋgaŋ mbo Ndém.

⁵ Pɛ é kwaŋ ŋ́gɛ, anu zīi aŋwaʼne Ndém á leé lā, á lɛɛ̄ ŋgɔ́ áa ndémndēm lɛ́? Á leé ŋ́gɛ: «Ndém a te pú ŋkɔ̄ŋ ŋ́gɛ, pɔ́ ŋiŋ e etɔ̄ʼne Azwakne zí zīi, a le néŋ á ntē pímpɛ ɛ́. »

⁶ Táʼ, Ndém a á si ŋké ŋghʉ̄ɛ á mbɔŋɔ́, apɔŋɔ́ ntē te ndhʉ zīi, a wɛɛ̄ ánɛ pímpɛ, á faáŋ ntsyā ajūɔ tsem. É melaʼ épúp tɛ́, aŋwaʼne Ndém á leé ŋ́gɛ: «Ndém a teém nzem wɔ ŋáʼte‑nnɛ̄t. Ḿbiŋ ntswī apɔŋɔ́ ntē zí, á mbū wɔ nɔŋ‑nnɛ̄t á esī. »

⁷ Púp, pɛ enɔ̄ŋ nnɛ̄t zɛ á esī á mvhɔ Ndém, ḿbiŋ ntē athʉ́ á mbū Sɛ́ta, a efhó á lezēŋ pɛ, ŋgʉ̄ɔ tɛ ŋgia e esāk.

⁸ Pɛ emāʼ ŋgua zɛ ŋgyá á mbū Ndém, a egɔ́ mé pɛ. Pɛ megaŋ mefa, pɛ esōk lenāŋ tsɛ́. Pɛ wɔ afho nzem pīa. Pɛ esōk ntē wɛ́.

⁹ Pɛ ezhɛ́ ŋgeŋge zīi pɛ é ntē éwú, ńtshí lewhʉ̄ ndā. Ndɛ́ʼ pɛ ezéŋ nzwī, pɛ elā la, lekāk wɛ a esɛ̄t ncʉ́ʼ á lemek.

¹⁰ Pɛ esóʼne nnɛ̄t zɛ mé esī á mvhɔ Atsyapuɔ, a epīŋ ŋkɔ́ʼne á wɛ́.

Ndɛ́ʼ pɛ esɛ́ʼ á ŋiŋ

¹¹ Epɔ̄ memía, ndɛ́ʼ pɛ esɛ́ʼne mennɛ̄t mɛ́. Ŋiŋ a sɛɛ́ʼ mmɔʼ páʼā, ká á lezāʼ ntsaŋ mmɔʼ páʼā, ńdɔkɔ esɛ́ʼɛ lepé, ńdɔkɔ nthúɔ́ alɔ́ʼ lepé Ndém. Ŋiŋ a piŋɛ nthú alɔ́ʼ lepé, mbɔ a á páʼā, ńdɔkɔ ncʉ́ʼɛ páʼ ŋiŋ yīi, a le néŋ lepé, ŋ́ké te á nneŋ‑lepé mɛ́t ɛ́.

¹² Ndém ndaʼ mé piīŋ ŋgɔ́ á nneŋ‑lepé, nzéŋ ŋgɔ́ á nzaʼ‑ntsaŋ. Ŋ́gɔ́ á ŋiŋ yīi, a gɔ eghʉ̄ʉ, ŋiŋ á láʼ ŋgɔ́ éwú, páʼ a gɔ eghʉ̄ʉ, ŋiŋ á láʼ ndákne. O ó páʼa, ḿbiŋ ŋgɔ́ á awɔ́, tɛ́ nthúɔ alɔ́ʼ ŋiŋ ŋ̄?

Ndɛ́ʼ ŋiŋ á leŋia

¹³ Pɛ etéŋɛ metuúŋ njúʼ, pɛ pīi pɛ lʉ́ɛ́ ŋ́gɛ: «Kɛ ayáʼa, kɛ ezɔ́ lɛ́ɛ, pek egʉ̄ɔ á mɛ́kiki tésɔŋ, ńnáŋ éwú á taʼ ŋguʼ, ńnɔŋ ntáŋa esaá, ńdɔk ŋgwɛ̄ ŋkāp. »

¹⁴ Pɛ é si ndʉ́ɛ́ épúp páʼā, ńnɔ̄ŋ te nzhɛ́ɛ páʼ, ezɔ́ a a shʉʼ egɔ́ épúp ɔ́. Ńnɔŋ te nzhɛ́ɛ páʼ legɔ̄ wɛ, a a shʉʼ egɔ́ épúp ɔ́. Pɛ ezhɛ́ á légɛ, legɔ̄ wɛ, a á si ŋgɔ́ páʼ alɔ zīi, á whʉɛ á méŋ afʉʼ, ńdiɛ nzéŋɛ ńtáka lā.

¹⁵ Á gɔ́ éyi, a ke gɔ́ pɛ elé ŋ́gɛ: «Atsyapuɔ Ndém a véŋɛ, pek enáŋ á ŋgɔŋ, ŋ́gʉɔ ŋghʉ̄ á ajʉɔ ká á azi. »

¹⁶ Pɛ é si mbiŋɛ njúʼɔ ŋkūʼɔ, ńdɔkɔ ŋŋīaa. Ntií lejūʼ ŋkūʼ jʉɔ mɛ́t, e é si ŋgɔ́ té pɔŋ.

¹⁷ Púp, ŋiŋ a nɔŋ nzhɛ́ɛ á leghʉ anu mbɔŋ, ḿbīŋ te ghʉ̄ʉ, mbɔ a á páʼa, ńdɔkɔ efāa.