Jáak 3 - Eka Eswhī

Awɔ́ lɛ́, a epēkne alē zí á nchu, tɛ́ eshúŋne

¹ Epɔ̄ memía pá á nzem Klísto, ndɛ́ʼ epuɔ tɛ nzá, é gɔ́ wɔ zíʼne‑anu Ndém á mbū epuɔ. Pɛ é si nzhɛ́ɛ á légɛ, Ndém a a láʼ elɔk azāŋalɔ́ŋ, tɛ́ záʼ ntsaŋ zek, mégaŋ aziʼne.

² Ḿpɛ metsem é puú ŋgɔ́ á lelʉɛ afʉʼ, ńnɔŋ efāte fate. Ŋiŋ a lʉ́ɛ́ ŋ́gɛ, yí gɛ te ŋgē eshúŋnɛ, ŋ́kwātɛ ɛ́, mbɔ ŋgaŋ a á kwaʼ ŋiŋnɔŋ. Ŋ́kūʼ á yí á lekūʼte nnɛ̄t zi ntsem.

³ Ḿpɛ enáʼ mbɛ́ efʉʼ ánɛ melʉ́ɔ́. Ḿpɛ neéŋ á kwáŋ á nchu pɔ́p páʼā, ńdɔkɔ ŋ́gɛ, pɔ́ ezīŋ páʼ ḿpɛ é si ŋkɔ̄ŋɔ. Á épúp páʼā, ŋ́gɔ́ éyi ḿpɛ gɔ elɔ̄ɔk á wɔ́p, ŋ́gʉ̄ɔ á ajʉʼ zīi, ḿpɛ é kɔŋ.

⁴ Pɛ ezéŋ njʉ́ɔ memɛtúa ntshi, é faŋteé ezi ntií, mía afēm á shʉʼ ntúʼ á wɔ́p lɛ akɔ̄ lɛ́, méŋ agáʼ azō lɛ mé ké ŋghʉ̄, é ziŋ ŋgʉ̄ɔ mé ajʉʼ zīi, ŋiŋ yīi a shuŋɔ, a á si ŋkɔ̄ŋɔ.

⁵ Ndeŋ ndeŋ épúp, alē á si ŋgɔ́ á méŋ agáʼ ajʉʼ nnɛ̄t ŋiŋ, ŋ́ké ŋkūʼ á yí á lelē ŋ́gɛ, yí ghʉʉ̄ memía menu. Pɛ ejʉ́ɔ páʼ, esesaʼ mmók é gɛ ntɔ̄ɔ á mía mía mbīŋ.

⁶ Alē á zéŋ ŋgɔ́ páʼ mmók lā, ŋ́gwɛ̄ á ntií ntiī anu tepɔŋ. Á ánɛ mejʉʼ nnɛ̄t mímpɛ ntsem, yí mé nɔŋ ŋghʉ̄ɛ, mbe nnɛ̄t zímpɛ ntsem, é kʉɛ epe. Yí mé nɔŋ ndɔ̄kɔ mmók yīi, é fhɔ́ɔ á alāʼ ŋgʉɔ̄ʼ, ńtɔ̄ɔ á lenāŋ yímpɛ.

⁷ Ŋiŋnɔŋ a kuūʼ á leswɛt á ntií ntiī na mbaʼ, kɛ́ á séŋ, kɛ́ á na yīi, a shuŋɔ levem tsí á esī, kɛ́ á na yīi, a túɔ́ á ntshi.

⁸ Táʼ, ŋ́gɔ́ mé alē, mbɔ ŋiŋnɔŋ a gɔ le kūʼ á leghʉ tɛ, á cʉ́ʼɛ njúʼɔ áa mbū yí í. Alē á wɛɛ̄ á ntií ntiī anu tepɔŋ, ḿbiŋ te ŋímne nnáŋ á. Ŋ́gwɛ̄ á ntií ntiī eseŋ zīi, e gɔ ezwhí á ŋiŋ.

⁹ Ḿpɛ lɔɔ̄k á aziɛ́, tɛ́ ŋgūʼte á Atsyapuɔ Mɔʼɔ́. Ńzéŋ ndɔ̄k áa aziɛ́, tɛ́ nnéŋ ndɔ á athū epuɔ menɔŋ, tɛ́ pɔ́ ké ŋgɔ́ páʼā, ŋ́gɔ́ ayiŋne Ndém.

¹⁰ Meshuŋne mbwɛ́né pɔ́ meshuŋne ndɔ, é toó ánɛ taʼ nchu. Epɔ̄ memía pá, á té pɔŋté á legɔ̄ épúp ɔ́.

¹¹ Taʼ lesaʼá‑ntshi, é gɔ le nɔ̄ŋ ndɔ̄kɔ á taʼ lephʉ̄, ŋ́gyáa ntshi mbɔŋ, ńzéŋ nnɔŋ ndɔ̄kɔ áa etsiɛ́, ŋ́gyáa eyi tepɔŋ ɔ́.

¹² Epɔ̄ memía pá, tɛ mɛ́ gɔ ekáp ŋgem, ánɛ athʉ́ levho o? Ŋ́káp á mbhʉɛ́, ánɛ athʉ́ ŋgem m? Ntshi mbɔŋ é gɔ le tó ánɛ lesaʼá‑ntshi tepɔŋ ɔ́.

Azhɛ̄‑anu zīi á fhɔ́ɔ á mbū Ndém

¹³ Ŋiŋ a gɔ́ɔ á nnɔ pɛ, ŋ́kwāŋ ŋ́gɛ, yí wɛɛ̄ azhɛ̄‑anu, ńzéŋ ŋgwɛ̄ leghi, á lɔk atswhī mbɔŋ zí ntswī, ńzéŋ ndɔ̄k mefaʼ mīi, a ghʉɛ, mé lesōʼne nnɛ̄t ŋgyá á esī, ńtswī.

¹⁴ Ŋiŋ a piŋɛ ŋgɔ́ á nnɔ pɛ, ŋ́gwɛ̄ á sɛ́h ntē, tɛ ntē yí é séŋ lɛ cʉʉ́ʉ́, ŋ́gɔ́ efʉʼ metsem, ńnɛ́tte nɛtté, ndɛ́ʼ ŋgaŋ á zéŋ ŋŋīa ŋ́gɛ, yí é ŋgaŋ azhɛ̄‑anu. Ŋiŋ a ghʉɛ épúp, ŋgaŋ á lɔkɔ esɛ̄tɛ anuúnē, á cʉ́ʼɛ mela.

¹⁵ Ntií azhɛ̄‑anu jʉɔ mɛ́t, á té fhɔ́ɔ á lephū á mbū Ndém ɛ́. Á fhɔ́ɔ á esī atsetsáʼ, Azwakne Ndém á zi te éwú ú, éfhɔ́ɔ á mbū mesī.

¹⁶ Ajʉʼ zīi epuɔ menɔŋ é éwú, ŋ́gwɛ̄ á sɛ́h ntē, ńzéŋ ŋgɔ́ megaŋ anɛte, tákátáká pɔ́ ntií ntiī menu tepɔŋ, é éwú.

¹⁷ Táʼ, ŋiŋ yīi a wɛɛ̄ azhɛ̄‑anu zīi, á fhɔ́ɔ á mbū Ndém, ntē ŋgaŋ é laneé, á wɛ apwɛne, ésóʼne nnɛ̄t mé esī, ŋ́gɔ́ á nziŋ‑ekém, ŋ́gwɛ̄ atsāmezeŋɛ té ndhʉ, ŋ́ghʉ̄ anu mbɔŋ efʉʼ metsem, té tɛʼte á ŋiŋ, ŋ́gɔ́ te afho nzem epīa á.

¹⁸ Ŋiŋ a lɔkɔ apwɛne nnáŋ, ḿbhī apwɛne mɛ́t á nnɔ epuɔ, mbɔ a tswhí, a epiŋɛ nnáŋa ŋkápa ntá, é egɔ́ á yí, á legɔ̄ á ŋiŋ ndeŋ ndeŋ, á mvhɔ Ndém.