Jáak 2 - Eka Eswhī

Epuɔ metsem é puú ŋgɔ́ áa taʼ azō á mvhɔ Ndém

¹ Epɔ̄ memía pá á nzem Klísto, páʼ pɛ lē efɛ́ nnɛ̄t zɛ ŋgyá á mbū Atsyapuɔ Yɛɛ́so Klísto, ŋgaŋ shʉ́shɔ́k lā, ndɛ́ʼ pɛ etɛ̄ʼte epuɔ.

² Ḿpɛ elɛ ndé ŋ́gɛ, epuɔ mémpīa é shʉʼɛ ŋkó á ŋgyā aswiŋte pɛ, mmɔʼ á zwík mekwáŋ pīi, é teē nzwiŋ, ḿmāʼ memía menzhó. Eyi mmɔʼ á gɔ́ á mbūŋ, ḿmāʼ, metsyak nzhó.

³ Pɛ elɛ̄ ncʉ̄te áa ŋiŋ yīi, a á nzwík memía menzhó, ńdé á mbū yí ŋ́gɛ: «Lɛ eshʉ̄ʼ nnáŋ ánɛ mbɔŋ ajʉʼ wuɔ. » Ḿbīŋ ndé á mbū mbūŋ ŋ́gɛ: «Gʉɔ ntshí é ege, ŋ́ké te épúp ɔ́, o egʉ̄ɔ nnáŋ á ajʉʼ zīi, meŋ tshítɛ mekhu má éwú. »

⁴ Mbɔ pɛ ghʉɛ épúp páʼā, ńdɔkɔ te ŋgɔ́ɔ megaŋ atɛʼte á nnɔ pɛ ɛ́ lɛ̄? Á té páʼā mbɔ pɛ é lɔk akwaŋte tepɔŋ, ńcʉ̄te á ŋiŋ ɛ́ lɛ̄?

⁵ Epɔ̄ memía pá pīi meŋ kɔɔ̄ŋ á wɔ́p, pɛ etéŋɛ metuúŋ njúʼ. Ndém mé lɛ te tsɔ́ʼ epuɔ pīi, epuɔ menɔŋ é kwaāŋ ŋ́gɛ, pɔ́ é mepūŋ, ŋ́ghʉ̄ pɔ́ fɛ́ nnɛ̄t ŋgyá á mbū Yɛɛ́so Klísto, ńdɔkɔ ncʉ́ʼɛ megaŋ azō ɔ́ lɛ̄? Ńzéŋ ŋghʉ̄ pɔ́ wɛ lepɔŋ tsīi, é ntē Lefɔ Ndém, páʼ a le laʼnē épúp, á mbū epuɔ pīi pɔ́ kɔɔ̄ŋ á yí lɛ̄?

⁶ Pɛ ké mbiŋ ŋgɔ́ á si ŋgwáka mepūŋ, tɛ́ megaŋ azō mé piŋ nnɔ̄ŋ nnáŋa á athū pɛ. Pɔ́ mé té zéŋ nnɔŋ eshūŋnɛ á wɛ́, ńdɔkɔ ŋgʉ̄ɔ mé mvhɔ asāʼ á lɛ̄?

⁷ Pɔ́ mé zéŋ nnɔ̄ŋ ntsēŋtɛ á mɛgém lezēŋ yīi, Ndém a le gɛ mɛ́ etɔ́ŋ á athū pɛ.

⁸ A gɔ́ éyi pɛ kuʼteé lepé Ndém, á kwaʼ efɔ yímpɛ, páʼ mɛ́ le tí á ntē aŋwaʼne épúp, ŋ́gɛ: «Kɔŋ á ŋiŋ ntsem, páʼ athū nnɛ̄t jú lā. » Mbɔ pɛ é si ŋghʉ̄ɛ á mbɔŋɔ́.

⁹ Ŋ́ké mbiŋ ŋgɔ́ éyi, pɛ é megaŋ atɛʼte, mbɔ á épúp páʼā, pɛ elɔ̄kɔ efāa. Pɛ elɔ̄kɔ ncʉ́ʼɛ megaŋ mefa, melaʼ mīi pɛ é whʉ lepé.

¹⁰ Ŋiŋ a zi mbú ŋkúʼte mbé Ndém ntsem, ḿbīŋ ŋgwhʉ̄ ánɛ taʼ ndaʼ, mbɔ a á pú ŋgwhʉ̄ mbé Ndém ntsem.

¹¹ Á épúp melaʼ mīi, Ndém a le lé ŋ́gɛ: «Ndɛ́ʼ ŋiŋ á gɔ́ aleʼé ŋghʉ̄ agā. » Ńzéŋ ndé ŋ́gɛ: «Ńdɛ́ʼ ŋiŋ a gɔ́ aleʼé nzwhí á ŋiŋ. » Ŋiŋ a piŋɛ te agā ghʉ, ńzwhí á ŋiŋ, mbɔ a á fa áa lepé.

¹² Pɛ nɔŋ eshúŋnɛ, ńnɔ̄ŋ ŋghʉ̄ɛ tɛ mbɔɔ akɔ̄ lɛ́, pɛ ezhɛ́ á légɛ, Ndém a a fú egē ezáʼ ntsaŋ awɔ́ lɛ́, éfhó ánɛ lepé tsīi, é ghʉɛ, ŋiŋ á ziŋɛ esa saá.

¹³ Púp, ŋiŋ a gɔ́ɔ á te tsá‑mezeŋɛ, mbɔ aleʼé zīi, Ndém a záʼa ntsaŋ ŋgaŋ, a ezéŋ ŋgɔ́ azí á te tsá‑mezeŋɛ. Ŋiŋ a gɔ́ɔ á ntsaa‑mezeŋɛ, a á le zéŋ mbɔ́k á lewhʉ asāʼ á.

Mefaʼ ŋiŋ mé tswiī á légɛ, ŋgaŋ lē efɛ́ nnɛ̄t

¹⁴ Epɔ̄ memía pá, ŋiŋ a lʉ́ɛ́ ŋ́gɛ, yí fɛɛ́ nnɛ̄t zi ŋgyá á mbū Yɛɛ́so Klísto, ḿbiŋ te ghʉ̄ mefaʼ ndɔ̄k ntswīi, mbɔ a tswíte á yí ánɛ akɔ̄? Ejʉɔ ntií lefɛ̄ nnɛ̄t mɛ́t, e gɔ eghʉ̄ʉ, ŋgaŋ á láʼ ntswɛ́t e?

¹⁵ Ḿpɛ elɛ ndé ŋ́gɛ, taʼ méŋ mɔ́ eyi mbaŋa kɛɛ́ eyi menzwí lɛ́, a te wɛ̄ nzhó zīi a a maʼ á, ńzéŋ te wɛ̄ ecū mīi, a gɔ epfɛ́t, ánɛ aleʼé alāʼ á.

¹⁶ Ŋiŋ nnɔ wɛ á piŋ ndé á mbū yí ŋ́gɛ: «Gʉ̄ɔ́ nda nda, ŋ́kó ndɔ̄k nzhó ndōte nnɛ̄t ju, ńzéŋ mpfɛ́t azō tɛ nzwɛ́t. » Té yá á yí ecū mīi, é mbū yí ŋkíŋɛ. Ŋiŋ a ghʉɛ épúp, á jhʉ́ apɛ akɔ̄?

¹⁷ Ndeŋ ndeŋ épúp, ŋiŋ a gɛ yí é si efíɛ́ nnɛ̄t ŋgyáa á mbū Yɛɛ́so Klísto, ḿbiŋ nnɔ̄ŋ te ŋghʉ̄ɛ mefaʼ, ńdɔkɔ ntswīi, mbɔ lefɛ̄ nnɛ̄t mɛ́t, a gɔ́ áa akwhʉɛ́‑azō.

¹⁸ Ŋiŋ a gɔ elé ŋ́gɛ: «Emɔ̄ʼ epuɔ é éwú, éfɛ́ nnɛ̄t ŋgyá á mbū Yɛɛ́so Klísto. Emɔ̄ʼ é ghʉ mefaʼ tɛ́ ndɔk ntswī. » Mbɔ meŋ a tsɔ́ʼ á mbū yí égɛ: «Tswi á gá ewu lefɛ̄t nnɛ̄t, té lɔk mefaʼ. Meŋ mbīŋ ndɔ̄k mefaʼ, ńtswī á wú á légɛ, meŋ fɛɛ́ nnɛ̄t ŋgyá á mbū Yɛɛ́so Klísto. »

¹⁹ O zhɛɛ́ á légɛ, taʼ Ndém mé éwú. Á gɔ́ épúp, ŋ́gɔ́ mbɔŋ. Mesī é zéŋ nnɔ̄ŋ nzhɛ́ɛ azɔ́p épúp, ńnɔŋ mvɛ̄tɛ. »

²⁰ Atsetseŋ, o ó si ŋkɔ̄ŋɔ ŋ́gɛ, mɛ́ etswī á wú á légɛ, ŋiŋ a fíɛ́ nnɛ̄t ŋgyá á mbū Yɛɛ́so Klísto, té lɔk mefaʼ ntswī, mbɔ lefɛ̄ nnɛ̄t mɛ́t, a gɔ́ áa ŋŋiké lɛ́?

²¹ Pɛ ekímte á maŋgānjʉʼ yímpɛ Ablaham. Ndém a le gē etɔ́ŋ á yí lɛ ŋiŋ ndeŋ ndeŋ, éfhó ánɛ akɔ̄? A lɛ te fhó ánɛ páʼ, a le tswíʼ á méŋ yi Izak, ńzápa á ndo ajʉʼ nnɔɔ̄ŋ‑epɔʼ, ŋ́gɔ̄ á nzwhíɛ, élɔk enɔŋ epɔʼ ɔ́ lɛ̄?

²² Púp, lɔkɔ nzhɛ́ á légɛ, yí lefɛ̄ nnɛ̄t pɔ́ leghʉ mefaʼ ndɔ̄k ntswī, é le zīŋ á taʼ nnɔ. Yí leghʉ mefaʼ ndɔ̄k ntswī á légɛ yí fɛɛ́ nnɛ̄t, mé si ŋgɔ́ á lefɛ̄ nnɛ̄t ŋgyá á mbū Ndém tɛ ntsékne.

²³ Á lɛ épúp páʼā, tɛ́ á lɔk mbō páʼ, mɛ́ le tí á ntē aŋwaʼne Ndém ŋ́gɛ: «Ablaham a le fɛ́ nnɛ̄t ŋgyá á mbū Ndém, Ndém á jʉ́ɔ épúp, ńtɔ́ŋ á yí lɛ ŋiŋ ndeŋ ndeŋ, ńtɔ́ŋ á yí lɛ esoó yi. »

²⁴ Pɛ elɔ̄kɔ njʉ́ɔ á légɛ, mefaʼ ŋiŋ mé ghʉʉ̄, Ndém á véŋ ŋ́gɛ, ŋiŋ a á ŋiŋ ndeŋ ndeŋ. A te lɛ̄ ŋgɔ́ áa lefɛ̄ nnɛ̄t ndaʼ á.

²⁵ Á zéŋ ŋgɔ́ ndeŋ ndeŋ épúp ánɛ Lahab, ŋgaŋ agā menzwí. Ndém a lɛ te jʉ́ɔ mefaʼ mí, páʼ a le kokné wɔ mɛnāŋ epuɔ Yúda, ḿbiŋ ŋghʉ̄ pɔ́ lɔk nzhɛ ndɛʼɛ ŋkʉ̄, tɛ́ mvéŋ ŋ́gɛ, a á ŋiŋ ndeŋ ndeŋ ɛ́ lɛ̄?

²⁶ Ńdɔkɔ ŋ́gɛ, a lɛ ŋgɔ́ éyi, mbe nnɛ̄t té azwakne, e é si ŋgɔ́ apfhō azō lɛ akɔ̄ lɛ́, mbɔ lefɛ̄ nnɛ̄t té ghʉ mefaʼ ndɔ̄k ntswī, a zeéŋ ŋgɔ́ azí áa épúp.