Jáak 1 - Eka Eswhī

Atsaʼte

¹ Meŋ Jáak, ŋ́gɔ́ á njuʼ‑nchu Ndém, mbɔɔ eyi Atsyapuɔ Yɛɛ́so Klísto, meŋ mé tíi ndɔkɔ ntsāʼtɛ epuɔ, ánɛ etseŋ ŋgyā Islaɛl ntsɔp pīa mé legēm, épi pɔ́ naŋteé á nzem apɛ́.

Ndém a yaá azhɛ̄‑anu, á mbū wɔ fɛ́‑nnɛ̄t ŋgyá á mbū yí

² Epɔ̄ memía pá á nzem Klísto, ntií ntiī ŋgʉɔ̄ʼ e nɔŋ mbúu nzwíʼɛ á wɛ́, pɛ enáŋ áa me lekāk á ntē pɛ,

³ melaʼ mīi, azō á nɔɔ̄ŋ nzwíʼɛ á wú, o ezɛ́t efíɛ́ nnɛ̄t ŋgyáa áa mbū Klísto páʼā, ńtswiʼne ntēte ánɛ lefɛ̄ nnɛ̄t mɛ́t.

⁴ Táʼ, pɛ eké ntswiʼne ŋkúʼte á letete mɛ́t á mbɔŋɔ́, tɛ́ ndɔk ŋgɔ́ tɛ ntsékne, páʼ Ndém a á si ŋkɔ̄ŋɔ, ŋ́gɔ́ té alɔ́ʼ.

⁵ Azhɛ̄‑anu á nɔŋ ŋkíŋɛ á mbū ŋiŋ wɛ, ŋgaŋ á lɔ́ á Ndém, á yá á yí. A yaá azō á mbū ŋiŋ té cʉ nzem, té thú alɔ́ʼ zí.

⁶ Ńdaʼ ŋ́gɛ, a eké ndɔ́ mé táʼ ntē. Té pú nnáʼ ḿmīʼte, melaʼ mīi, ŋiŋ yīi a miʼteē, a á páʼ menē ntshi mīi, afēm á cʉʼɛ, ńdɔkɔ mbʉ̄ɛ̄ ndɔkɔ ncúu lā.

⁷ Ndɛ́ʼ ntií ŋiŋ jʉɔ mɛ́t, á kwaŋ ŋ́gɛ, Atsyapuɔ a gɔ eyá a yí tɛ mbɔɔ akɔ̄ lɛ́.

⁸ Ŋiŋ wuɔ mɛ́t, á wɛɛ̄ ntɔ̄ŋ epīa, ńzéŋ te ndeŋ ndeŋ ánɛ meziŋɛ́ mí ntsem ɛ́.

Mbūŋ pɔ́ ŋgaŋ azō

⁹ Méŋ mɔ́ yīi, a á te kuʼ ánɛ azō, a egáŋte ánɛ páʼ, Ndém a á si ŋkɔ́ʼnɛ nzwiŋ yí.

¹⁰ Eyi a á ŋgaŋ azō, a egáŋte ánɛ páʼ, Ndém a á kok nzwiŋ yí, melaʼ mīi, a a láʼ emi á azí, páʼ aflúwa zīi, á saa, ńdiɛ njúɔ́ lā.

¹¹ Pɛ ejʉ́ɔ páʼ, nu a saáʼe, ŋ́kyá, ńtɔ̄ mvēŋ, aflúwa zí á zó, ŋ́gwhʉ̄, ḿbiŋ te zéŋ mbɔ̄ŋ ɔ́. Ndeŋ ndeŋ épúp, ŋgaŋ azō a a shʉʼ ezó á azí épúp, á tsetsɛlɛ mefaʼ mí.

Anu ánɛ metáté

¹² Eshhʉ̄ mbɔŋ a á si ŋgɔ́ á ŋiŋ yīi, ŋgʉɔ̄ʼ e zwiíʼ á yí, á kwɛ́t ntē. A pikɛ te ntó ánɛ ŋgʉɔ̄ʼ mɛ́t, mbɔ Ndém a a shʉʼ eyá yí ntaŋá, e egɔ́ á yí á leta a lezēŋ yí, páʼ a le laʼnē á mbū epuɔ pīi, é kɔɔ̄ŋ á yí.

¹³ Metáté é shʉʼɛ ánɛ ŋiŋ, ndɛ́ʼ ŋgaŋ á lé ŋ́gɛ: «Ndém mé tátɛ á gá,» melaʼ mīi, amɔ̄ʼ azō á gɔ́ le tshóne á Ndém, á leghʉ anu tepɔŋ ɔ́. Ndém a piŋɛ ŋgɔ́, a á le ŋiŋ táte.

¹⁴ Mekwaŋte tepɔŋ mé fhoó á ntē awíɛ awíɛ, ńzɔ́pte á yí, ńtshóne á yí, á whʉ ánɛ táté.

¹⁵ Mekwaŋte mɛ́t, é zīi nnáŋ á ntē ŋiŋ, ńzí, ńcʉ́ʼ mefa. Mefa é kó ŋgáʼ, ŋ́ghʉ̄, ŋgaŋ á kwhʉ́.

¹⁶ Epɔ̄ memía, ńzéŋ ŋgɔ́ megaŋ ŋkɔŋ pá, ndɛ́ʼ ŋiŋ á pɔpte á wɛ́.

¹⁷ Ajūɔ tsem zīi, á teē nzwiŋ, ńzéŋ ŋgɔ́ té alɔ́ʼ, á fhoó á lephū á mbū Ndém, á mbū Mɔʼɔ́ meŋkaʼ mīi é lephū, tɛ́ esóʼo. A te kúmne, a te sɛ̄t nnéŋ epuɔ á ntē nzém ɛ́.

¹⁸ A le fhó ánɛ lekɔŋ yi, ńdɔ̄k ashuŋne anuúnē, ŋ́ghʉ̄ ḿpɛ é gɔ́ éwú. Ŋ́ghʉ̄ɛ épúp páʼā, ŋ́gɛ ḿpɛ egɔ́ á mbū yí, ńtshí mvhɔ, ánɛ ajū mīi a á pɔ́.

Ŋiŋ a eghʉ̄ páʼ ashuŋne Ndém á si ndʉ́ɛ́

¹⁹ Epɔ̄ memía pá pīi meŋ kɔɔ̄ŋ, pɛ e si nzhɛ́ɛ páʼ awíɛ a pɔŋteé á legākne á lejūʼ ashuŋne Ndém, ḿbiŋ ŋkúʼte nnɛ̄t, ánɛ leshūŋne. Ndɛ́ʼ ŋiŋ á gákne nzáŋ á lɔ́ŋ,

²⁰ melaʼ mīi, ŋiŋ yīi a zaáŋ á lɔ́ŋ, a te ghʉ̄ ajū mīi, á ndeŋ ndeŋ, á mvhɔ Ndém ɛ́.

²¹ Melaʼ épúp tɛ́, pɛ epú ŋgwáʼ á ntií ntiī nchʉ́, ŋ́gwáʼ á ntií ntiī esɔ̄, ḿbiŋ nnɔ̄ŋ nnɛ̄t á esī njúʼ ashuŋne zīi, Ndém a le phī á ntē pɛ. Ashuŋne mɛ́t mé kuūʼ á leghʉ pɛ etswɛ́t, ńdáʼ ŋgɔ́ éwú.

²² Ndɛ́ʼ pɛ lɛ nzwíʼte ashuŋne Ndém zwíʼte. Pɛ eghʉ̄ páʼ ashuŋne mɛ́t, á si ndʉ́ɛ́ épúp. Tɛ á té épúp ɔ́, mbɔ á páʼā, pɛ lɔ̄kɔ mbɔ̄ptɛ áa mennɛ̄t mɛ́,

²³ melaʼ mīi, ŋiŋ a júʼɔ ashuŋne Ndém, ḿbīŋ te ghʉ̄ páʼ ashuŋne mɛ́t, á si ndʉ́ɛ́ épúp ɔ́, mbɔ ŋgaŋ a swhií á ŋiŋ yīi, a á cʉte eshhʉ̄ yí á ntē ajʉɔ‑eshhʉ̄, ńjʉ́ɔ páʼ é épúp.

²⁴ Ŋiŋ a cʉteē eshhʉ̄ yí á ntē ajʉɔ‑eshhʉ̄, ńdɛ ŋgē etém nzem, ńdēkne páʼ a á zi njʉ́ɔ, é gɔ́ épúp.

²⁵ Ḿbiŋ ŋgɔ́ mé ŋiŋ yīi, a kuʼteé lepé Ndém, lépé mɛ́t tsīi, é ghʉʉ̄ mɛ́ ziŋ esa saá, ńzéŋ nnɔŋ ncūŋtɛ ŋghʉ̄ɛ páʼ, lepé mɛ́t é si ndʉ́ɛ́ épúp, tɛ a te lɛ̄ ŋgɔ́ áa júʼ júʼ ndaʼ á, ńzéŋɛ ŋghʉ̄ɛ páʼ lepé mɛ́t, é si ndʉ́ɛ́ épúp. Mbɔ Ndém a a shʉʼ enéŋ mbwɛ́né, ánɛ ajūɔ tsem zīi, ŋiŋ wuɔ mɛ́t a ghʉɛ.

²⁶ Ŋiŋ a nɔŋ ŋkwāŋa ŋ́gɛ, yí é si nzīŋɛ á nzem Ndém, ḿbiŋ te tsāʼ ashuŋne zí méŋwɛ̄t ɛ́, mbɔ a pɔptɛ athū nnɛ̄t zí. A gɛ yí é si nzīŋɛ á nzem Ndém páʼā, á gɔ́ áa anu te athū.

²⁷ Legɔ̄ á kwaʼ ŋiŋ Ndém ndeŋ ndeŋ, páʼ Mɔʼɔ́ yímpɛ Ndém, a á si ŋkɔ̄ŋɔ, á si ŋgɔ́ á letūŋne epɔ̄ metsɛɛ́h pɔ́ mepfók á ntē ŋgʉɔ̄ʼ zɔp. Ḿbiŋ ntshí á akhu ŋgīŋne, ḿbɔ́k menu ŋgɔŋ á leghʉ, o efā nzhɛ.