Galat 6 - Eka Eswhī

Pɛ etwíte mennɛ̄t mɛ́ nzeŋne zeŋné

¹ Epɔ̄ memía, ŋiŋ a kemɛ á ŋiŋ, á nɔ̄ŋ ŋghʉ̄ɛ mefa, mbɔ pɛ pīi, Azwakne Ndém mé si ntsāŋa á wɛ́, pɛ mé pɔŋteé á leghʉ, ŋgaŋ á fhó ánɛ mɛnzhɛ tepɔŋ ntó. Ŋ́ké ŋgē eghʉ épúp, ńdɔ̄k áa apwɛne. Ńnɔŋ mbáa azɛ́ athū, melaʼ mīi, táté a gɔ ezéŋ ntshóne á wú ajú, ńnéŋ á ntē mefa.

² Pɛ ekʉ̄ɛ apiʼ zɛ́ mbīʼ nzeŋne zeŋné. Pɛ ghʉɛ épúp, á gɔ́ yīi pɛ lɔkɔ nzīŋɛ ánɛ lepé tsīi, Klísto a le néēŋ.

³ Ŋiŋ a gɔ́ɔ te azō ɔ́, ḿbīŋ nɔŋ ŋkwāŋa ŋ́gɛ, yí kūʼe, mbɔ ŋgaŋ a á páʼā, ńdɔkɔ mbɔ̄ptɛ áa athū nnɛ̄t zí.

⁴ Awíɛ awíɛ mé pɔŋteé á letsaʼ ŋghʉʉ́‑anu tsí, ŋ́gɔ́ éyi a á jʉ́ɔ ajū mīi, a gɔ elɔ̄ɔk ŋkāʼte, mbɔ lekaʼte yi mɛ́t, a fhɔ́ɔ áa ánɛ ajū mīi, a á jʉ́ɔ, a té fhɔ́ɔ ánɛ páʼ, a á si ndēŋtɛ ŋghʉʉ́‑anu tsí, ánɛ etsi emɔ̄ʼ epuɔ ɔ́,

⁵ melaʼ mīi, awíɛ awíɛ a pɔŋteé á leghʉ menu mīi, Ndém a le tsekné á mbū yí.

⁶ Ŋiŋ yīi, mɛ́ é si nzíʼnɛ á yí menu Ndém, a pɔŋteé á legap ajū mīi a wɛ̄ɛ, ŋ́gyá azi ŋiŋ yīi a zíʼnɛ á yí.

⁷ Ndɛ́ʼ ŋiŋ á pɔp athū nnɛ̄t zí, ndɛ́ʼ ŋiŋ á kwaŋ ŋ́gɛ, yí gɔ eŋɛne á Ndém. Ŋiŋ a kaáp áa ntá athʉ́ zīi, a le phīī.

⁸ A gɔ́ éyi ŋiŋ a le phī ajū mīi, a lɛ elɔk etswíte áa mbe nnɛ̄t zi, mbɔ a a láʼ ezéŋ ekáp áa ajū mīi, á fhɔ́ɔ ánɛ mbe nnɛ̄t, azō mɛ́t á gɔ́ á lekwhʉ̄ ŋkó ŋ́kwhʉ́. Ḿbīŋ ŋgɔ́ éyi ŋiŋ a le phī ajū mīi, á gɔ epɔ̄ɔŋ Azwakne Ndém, mbɔ a a láʼ ezéŋ ekáp ajū mīi, á fhɔ́ɔ á mbū Azwakne Ndém, azō mɛ́t, á gɔ́ á lefū ntā á lezēŋ Ndém.

⁹ Ndɛ́ʼ ḿpɛ eká á yímpɛ, á leghʉ anu mbɔŋ. Ḿpɛ nɔŋ ŋghʉ̄ɛ anu mbɔŋ ndɔkɔ ŋgʉ̄ɔ mé mvhɔ, mbɔ afʉʼ a fú ekuʼe, Ndém a eghʉ̄, ḿpɛ ekáp ntá mbɔŋ.

¹⁰ Ńdɔkɔ ŋ́gɛ, efʉʼ metsem yīi esa e é tsɔ́ʼɔ, ḿpɛ elɔ̄ɔk ŋghʉ̄ afaʼ zīi, a etswíte epuɔ metsem, áfaʼ zīi a tswhi etswíte epuɔ pímpɛ pīi, pɔ́ lé fɛ́ nnɛ̄t ŋgyá á mbū Klísto.

Legɔ̄ yīi Yɛɛ́so a le kwhʉ́ nzéŋ ńzím mé si ŋgɔ́ á mía azō

¹¹ Tsetsɔŋɔ, pɛ ejʉ́ɔ páʼ emuɔ menēk akɛtte é faŋteé épúp ánɛ ajʉɔ ajʉʼ, é páʼā meŋ méŋwɛ̄t mé lɔkɔ apū zá ntíi.

¹² Epuɔ pīi pɔ́ é si ŋíŋɛ ŋ́gɛ, mɛ́ eláʼ ntém á wɛ́, é si ŋgɔ́ epuɔ pīi, pɔ́ kɔŋɔ ŋ́gɛ, epuɔ menɔŋ e eshúŋne á mbɔŋɔ́ ánɛ pɔ́p. Ndaʼ ajū mīi, pɔ́ é si efāʼa, á si ŋgɔ́ á légɛ, ndɛ́ʼ mɛ́ lʉɔ́ʼ á wɔ́p. Pɔ́ shúŋɔ anu ánɛ Klísto páʼ mɛ́ le kwɛtē á yí ánɛ mbaŋne paŋné, mbɔ mɛ́ e lʉɔ́ʼ á wɔ́p.

¹³ Epuɔ puɔ mɛ́t pīi, pɔ́ ŋíŋɛ lā, pɔ́ zi te si ŋkúʼtɛ azɔ́p lepé ɛ́. Pɔ́ é si ŋké ŋkɔ̄ŋɔ ŋ́gɛ, mɛ́ etém á wɛ́, tɛ́ a etsīa épúp, pɔ́ elɔk ŋŋīa á légɛ, pɔ́ mé ke tswī tɛ́ mɛ́ tém á wɛ́.

¹⁴ Ŋ́ké ŋgɔ́ mé meŋ, mbɔ amɔ̄ʼ azō á gɔ le ghʉ̄, meŋ eŋīa té gɔ́ áa páʼ, mɛ́ le kwɛtē á Atsyapuɔ yímpɛ Yɛɛ́so Klísto, ánɛ mbaŋne paŋné ɛ́. Mɛ́ le kwɛtē á yí páʼā, ajūɔ tsem á lɔk mbú ńcʉ́ʼ á mbū meŋ, ŋ́gɔ́ áa páʼ apfhō azō lā. Meŋ méŋwɛ̄t azá, meŋ zéŋ ncʉ́ʼ páʼ apfhō azō lā, á mbū epuɔ ŋgɔŋ puɔ.

¹⁵ Ajū mīi á mbū meŋ ŋgɔ́ á mía azō, á té si ŋgɔ́ á letēm ŋiŋ, kɛ á legɔ̄ le á yí tém lɛ́ ɛ́. Á si ŋgɔ́ áa lewɛ lenāŋ leswhī.

¹⁶ Ŋ́gɔ́ á mbū epuɔ pīi, pɔ́ é si nzīŋɛ páʼa mɛ́t, ŋ́gɛ Ndém a elɛ ŋgyá á wɔ́p apwɛne, ńtswíte á wɔ́p á leghʉ anu mbɔŋ, ńtswíte epuɔ Islaɛl azɔ́p, á kwaʼ alāʼ Ndém.

¹⁷ Tɛ efhó tsetsɔŋɔ, ndɛ́ʼ ŋiŋ á zéŋ ŋghʉ̄ meŋ jʉ́ɔ ŋgʉɔ̄ʼ. Melák meféŋ mīi é zi ŋgɔ́ á mbe nnɛ̄t meŋ, é si ntswīi á légɛ, meŋ á ŋiŋ Yɛɛ́so.

¹⁸ Epɔ̄ memía, ŋ́gɛ Atsyapuɔ yímpɛ Yɛɛ́so Klísto, a elɛ ŋghʉ̄ anu mbɔŋ té ndhʉ ánɛ pɛ, ŋ́gɔ́ mé pɛ efʉʼ metsem. Á páʼa.