Galat 5 - Eka Eswhī

Epuɔ Yɛɛ́so é té pɔŋté á wɔ́p á legɔ̄ ŋkwa lepé ɛ́

¹ Klísto a le kɛʼɛ́ ŋkhʉ apuʼ á ntɔ̄ŋ pímpɛ, ńdɔkɔ ŋ́gɛ, ḿpɛ enáŋ á ŋga athū pímpɛ. Pɛ ekāk ete, ndɛ́ʼ pɛ evéŋ, mɛ́ zéŋ nnéŋ akʉɔʼté meŋkwa, á ntɔ̄ŋ pɛ.

² Meŋ Pɔ́ɔl, meŋ shúŋɔ á wɛ́. Pɛ véŋɛ ŋ́gɛ mɛ́ etém á wɛ́, pɛ lɔ̄kɔ mvéŋɛ ŋ́gɛ, anu zīi Klísto a le ghʉ̄ á mbū pɛ, á puú te si ntswítɛ á wɛ́ ɛ́.

³ Meŋ á si nzéŋɛ ntswɛ̄tɛ á ŋiŋ ntsem yīi, a á véŋ tɛ mɛ́ tém á yí, ŋ́gɛ a eké nzéŋ ŋ́kúʼte mbé Mɔɔ́sɛ ntsem, té tsya emɔ̄ʼ.

⁴ Pɛ pīi, pɛ é si ŋkwāŋa ŋ́gɛ, pɛ é epuɔ ndeŋ ndeŋ á mvhɔ Ndém, melaʼ mīi pɛ é kuʼteé mbé Mɔɔ́sɛ, pɛ ezhɛ́ á légɛ, pɛ lē efak nnɛ̄t ánɛ Klísto. Púp pɛ lɔ̄kɔ ntémɛ nzem, ŋ́gɛ ndɛ́ʼ Ndém á ghʉ anu mbɔŋ té ndhʉ ánɛ pɛ.

⁵ Ŋ́gɔ́ mé pek, mbɔ pek é si nzwíʼtɛ ŋ́gɛ, Ndém a eshʉʼ ntɔ́ŋ á wék lɛ epuɔ ndeŋ ndeŋ á mvhɔ yí, melaʼ mīi pek lē efɛ́ nnɛ̄t zek ŋgyá á mbū Klísto. Azwakne Ndém mé si ntswítɛ á wék á lezwīʼte épúp.

⁶ Ńdɔkɔ ŋ́gɛ, ŋiŋ a lɛtnɛ ánɛ Yɛɛ́so Klísto, mbɔ letēm á ŋiŋ pɔ́ legɔ̄ le á yí tém, é pú ŋgɔ́ le á yí tswíte. Mía anu a gɔ́ áa á yí á lefɛ̄ nnɛ̄t ŋgyá á mbū Klísto, lefɛ̄ nnɛ̄t mɛ́t á tshóne á yí á lekɔŋ epuɔ menɔŋ.

⁷ Pɛ kɛ si nzīŋɛ á mbɔŋɔ́ péʼe, awɔ́ a á si mbīŋɛ mvɛ́nɛ á wɛ́, á lezēŋ nzīŋ ánɛ mɛnzhɛ anuúnē mɛ́t é?

⁸ Anu zīi mɛ́ lɔkɔ efāʼa a lesɛt á wɛ́, á té efhɔ́ɔ á mbū ŋiŋ yīi, a le tɔ́ŋ á wɛ́ ɛ́.

⁹ Ashuŋne lepúʼ á leé ŋ́gɛ: «Méŋ agáʼ levwi páʼa, mé gɛ ŋghʉ̄ɛ tɛ́ mblɛ é kɔ́ʼɔ. »

¹⁰ Páʼ ḿpɛ puú ntsóʼne áa ánɛ Atsyapuɔ lā, meŋ á tém nzem za ŋgyá mé pɛ, ńnɔŋ nzhɛ́ á légɛ, pɛ gɔ le lɔ̄k mmɔʼ nzhɛ ndɛʼɛ, té gɔ́ ezi meŋ ke tswī á wɛ́ ɛ́. Ŋiŋ yīi a á si mmāʼa atāk á tsetsɛlɛ pɛ, azi mbú ŋgɔ́ áa awɔ́ lɛ́, mbɔ Ndém a a láʼ etswá á yí ŋgʉɔ athʉ́ lepé.

¹¹ Ŋ́gɔ́ mé meŋ me epɔ̄ memía, á ŋgwíʼe ŋgɔ́ á anuúnē á légɛ, meŋ nzɛɛ́t nzíʼnɛ á mbū epuɔ á légɛ, mɛ́ pɔŋteé á letēm á wɔ́p, mbɔ mɛ́ té pɔŋté á lezēŋ ndʉɔ́ʼ á gá á. Púp, legɔ̄ yīi Klísto a le kwhʉ́ ánɛ mbaŋne paŋné lā, á lɔkɔ te nzɛ́t ŋgēnɛ á ŋiŋ ɛ́.

¹² Epuɔ pīi, pɔ́ maʼa atāk á tsetsɛlɛ pɛ, pɔ́ egʉɔ ŋghʉ̄ mɛ́ eshʉ́ á wɔ́p mbɔɔ shʉʉ́.

Pɛ evéŋ ŋ́gɛ Azwakne Ndém mé ecʉ́ʼɛ ntsāŋa á wɛ́

¹³ Ŋ́ké ŋgɔ́ mé pɛ me epɔ̄ memía, mbɔ Ndém a lɛɛ́ ntɔ́ŋɔ á wɛ́ páʼā, ŋ́gɛ pɛ enáŋ á ŋga athū pɛ. Ńdaʼ ŋ́gɛ, ndɛ́ʼ pɛ elɔ̄ɔk á légɛ, pɛ naáŋ á ŋga athū pɛ, ńcʉ́ʼɛ ŋghʉ̄ɛ ajū mīi, mbe nnɛ̄t zɛ é si ntshónɛ á wɛ́ ŋ́gɛ pɛ eghʉ̄. Tɛ ncʉ́ʼ épúp, pɛ elɔ̄ɔk páʼ ŋkɔŋne e é tsetsɛlɛ pɛ lā, ńtswíte mennɛ̄t mɛ́,

¹⁴ melaʼ mīi, lepé tsīi é puú ŋkwɛ́t athū mbé ntsem, é gɔ́ áa ndaʼ lɛ̄ɛ: «Kɔŋ á ŋiŋ ntsem, páʼ athū nnɛ̄t jú lā. »

¹⁵ A piŋɛ ŋgɔ́ éyi, pɛ é si ndʉɔ́ʼɔ tɛ mpfɛ́nɛ mennɛ̄t mɛ́, pɛ epá. A te épúp ɔ́, mbɔ pɛ e láʼ ege emakne, épú epík mennɛ̄t mɛ́.

¹⁶ Meŋ á páʼa, ńnɔŋ ŋ́gɛ, pɛ elɔ̄k á leziŋ páʼ Azwakne Ndém á si ndʉ́ɛ́ épúp, ŋgʉ̄ɔ mé mvhɔ. Púp, pɛ é le zéŋ ŋghʉ̄ ajū mīi, mbe nnɛ̄t é si ntshónɛ á wɛ́ ŋ́gɛ pɛ eghʉ̄ ɛ́.

¹⁷ Menu mīi mbe nnɛ̄t ŋiŋ e tshoneé á yí ŋ́gɛ a eghʉ̄, é té si ŋgɔ́ emi, Azwakne Ndém á si ŋkɔ̄ŋɔ ŋ́gɛ, á eghʉ̄ ɛ́. Emi Azwakne Ndém á si ŋkɔ̄ŋɔ, é gɔ́ te emi mbe nnɛ̄t e é si ŋkɔ̄ŋɔ ɔ́. Pɔ́ efʉʼ metsem nnɔŋ ndʉ̄ʼne lʉʼne. Aziɛ́ mé ghʉ̄ʉ, pɛ eghʉ̄ʉ ajū mīi, pɛ te si ŋkɔ̄ŋɔ.

¹⁸ Táʼ, pɛ ké mvéŋ ŋ́gɛ Azwakne Ndém á ezɛ́t ntswiʼnɛ ntsāŋa á wɛ́, mbɔ lepé é té zéŋ mbɔ́ŋte é lesāʼ á wɛ́ ɛ́.

¹⁹ Mɛ́ é si ncuŋtɛ nzhɛ́ɛ menu mīi, mbe nnɛ̄t e tshoneé á ŋiŋ á leghʉ: é si ŋgɔ́ á lefaʼ mbaŋa ká wɔnzwí. Ŋ́gɔ́ á leghʉ menu mīi, o o kʉɛ epe éwú. Ŋ́gɔ́ á leghʉ agā.

²⁰ Ŋ́gɔ́ á lewuʼte ajūɔ tsem zīi, á té Ndém ɛ́. Ŋ́gɔ́ á lewɛt lekaŋ. Ŋ́gɔ́ á lekɔ mbo. Ŋ́gɔ́ á lewɛ ndʉʼne. Ŋ́gɔ́ á lewɛ sɛ́h ntē. Ŋ́gɔ́ á lezāŋ á lɔ́ŋ. Ŋ́gɔ́ á lenɛ̄te. Ŋ́gɔ́ á lenēŋ mefakne á nnɔ epuɔ. Ŋ́gɔ́ á lenēŋ mefakne ánɛ menɔ.

²¹ Ŋ́gɔ́ á lewɛ á kegʉɔʼ. Ŋ́gɔ́ á lenū meluʼ tɛ mbía. Ŋ́gɔ́ á lewɛ agege. Ŋ́gɔ́ á lepū nzéŋ ŋ́ghʉ̄ emɔ̄ʼ menu, páʼ emi meŋ á zi nté lā. Meŋ ke zī eshúŋ á wɛ́, meŋ zéŋɛ ntswɛ̄tɛ á wɛ́ ŋ́gɛ, epuɔ pīi, pɔ́ fʉʼteē ejʉɔ ntií menu, pɔ́ té láʼ éwɛ lepɔŋ tsīi é ntē Lefɔ Ndém ɛ́.

²² Pɛ eké njʉ́ɔ ntá zīi, Azwakne Ndém á ghʉ̄ʉ, ŋiŋ á zém. Á ghʉʉ̄, ŋiŋ á wɛ ŋkɔŋne. Ŋ́ghʉ̄, ŋiŋ á náŋ mé lekāk. Ŋ́ghʉ̄, ŋiŋ á náŋ mé apwɛne. Ŋ́ghʉ̄, ŋiŋ a te gákne nzáŋ á lɔ́ŋ ɔ́. Ŋ́ghʉ̄, ŋiŋ á wɛ apɔŋɔ́ ntē. Ŋ́ghʉ̄, ŋiŋ tswíte emɔ̄ʼ epuɔ. Ŋ́ghʉ̄, ŋiŋ á gɔ́ ŋiŋ yīi, mɛ́ gɔ etém nzem ŋgyá á mbū yí.

²³ Ŋ́ghʉ̄, ŋiŋ á gɔ́ ŋgwāŋ á lɔ́ŋ. Ŋ́ghʉ̄, ŋiŋ á kuʼ á lekūʼte mbe nnɛ̄t zi. Mmɔʼ lepé, é te si mvɛ́nɛ á ŋiŋ á leghʉ ecʉɔ etsō mɛ́t ɛ́.

²⁴ Epuɔ pīi, pɔ́ lɛtneē ánɛ Klísto, pɔ́ lē mbú ŋgwáʼ ajūɔ tsem zīi, mbe nnɛ̄t e gɔ etshóne á wɔ́p á leghʉ. Menu mīi mbe nnɛ̄t e gɔ etshóne á wɔ́p á letshī ntē éwú, mbɔɔ a leghʉ, pɔ́ lē mbú ntó éwú.

²⁵ Páʼ Azwakne Ndém mé si ŋghʉ̄ɛ ḿpɛ gɔ́ɔ éwú lā, ḿpɛ ecʉ́ʼ, Azwakne mɛ́t, mé ezɛ́t ntswiʼnɛ ntsāŋa á yímpɛ.

²⁶ Ndɛ́ʼ ḿpɛ ezéŋ ŋŋīa, Ndɛ́ʼ ḿpɛ ezéŋ ŋgwɛ̄ á tákté á tsetsɛlɛ pímpɛ, ndɛ́ʼ ḿpɛ ezéŋ ŋgwɛ̄ á kegʉɔʼ á tsetsɛlɛ pímpɛ.