Galat 4 - Eka Eswhī

Epuɔ Yɛɛ́so é si ŋgɔ́ epɔ̄ Ndém, pɔ́ té zɛ́t ŋkwa lepé ɛ́

¹ Meŋ á páʼā ndɔkɔ ndʉ́ɛ́ ŋ́gɛ, ŋiŋ yīi a á ge ejhʉ́ ŋgyā, ńzɛ́t á méŋ agáʼ mɔ́, pɔ́ ŋkwa é té azō gap. Tɛ́ yí mé ké mbīŋ ŋgɔ́ á ŋwɛ́t etsō tsem tsīi a á jhʉ́.

² A zɛɛ́t á mɔ́ páʼā, ḿbɔ́ŋte á lejūʼ á mbū epuɔ pīi é kɔ́ʼtɛ á yí. Mbɔɔ á mbū epuɔ pīi pɔ́ tɛ́nɛ menu mí. Tɛ eláʼ etshí ánɛ afʉʼ zīi, mɔʼɔ́ yi a le zapáā.

³ Á zeéŋ ŋgɔ́ ndeŋ ndeŋ épúp, á mbū pímpɛ. Á lɛ afʉʼ zīi ḿpɛ le zɛ́t páʼ ewɔŋkhʉ̄ lā, ḿpɛ nɔ̄ɔŋ nnáŋa páʼ ntií lewuʼte melém e é si ŋkɔ̄ŋɔ ŋ́gɛ, ḿpɛ enáŋ épúp. Ŋ́gɔ́ meŋkwa mɔ́p.

⁴ Táʼ, afʉʼ zīi Ndém a le ké mbiŋ ńzápa, á shʉʼ nnáŋ tɛ ŋkūʼ, á tó á Méŋ yi á ndo esī atsetsáʼ. Taʼ menzwí mé zhí á yí, mɔ́ mɛ́t á náŋ ánɛ páʼ lepé Mɔɔ́sɛ é si nzɛ́ttɛ.

⁵ Ńtó á yí épúp, ŋ́gɛ a eshʉʼ ncūʼ epuɔ pīi, pɔ́ é si ŋgɔ́ meŋkwa lepé Mɔɔ́sɛ. Púp, ḿpɛ epúu ncʉ́ʼ epɔ̄ Ndém.

⁶ Meŋ á gɛ epɔ̄ Ndém, pɛ zi ŋgɔ́ á kwaʼ epiɛ́. Ndém a le gē etswi á légɛ, pɛ é si ŋgɔ́ á kwaʼ epiɛ́, ńtó á Azwakne Méŋ yi á ntē pímpɛ. Aziɛ́ mé tshoneé á yímpɛ, ḿpɛ lāa ntɔ́ŋ á Ndém é lɛ Abba, ńdɔkɔ ŋ́gɛ Mɔ́ʼɔ.

⁷ Á páʼā, o lɔ̄kɔ te nzɛ́tɛ ŋkwa amɔ̄ʼ azō ɔ́. O lɔ̄kɔ ncʉ́ʼɛ áa méŋ Ndém. Páʼ o ó piŋ ncʉ́ʼ á méŋ Ndém lā, a a shʉʼ eyá á wú ajū mīi a feéŋ á mbū epɔ̄ pí.

Pɔ́ɔl a á si mbɔ́kɔ ŋ́gɛ ndɛ́ʼ epuɔ Galati é zéŋ ncʉ́ʼ meŋkwa lepé

⁸ Á lɛ afʉʼ zīi pɛ le zɛ́t te zhɛ́ á Ndém, pɛ gɔ́ meŋkwa melém, tɛ́ pɔ́ zi te á Ndém ɛ́.

⁹ Tsetsɔŋɔ, pɛ é si ŋké nchʉ́ɛ nnɛ̄t nzhɛ́ɛ á kwaʼ Ndém. Á ŋgɔ́ éyi a ke gɔ́, meŋ ndé ŋghʉ̄ áa lɛ, yí mé si nchʉ́ɛ nnɛ̄t nzhɛ́ɛ á wɛ́, pɛ gɔ epīiŋ ŋgāa, ńzéŋ mbīŋ á mbū melém pīi, é té ecū ɔ́, ńzi mbú te mete wɛ ɛ̄? Pɛ é si nɔŋ ŋkɔ̄ŋɔ, á lezēŋ ncʉ́ʼ meŋkwa mɔ́p leswhī leswhī lɛ́?

¹⁰ Pɛ kuʼteé emɔ̄ʼ meleʼé lekāk, ŋ́kúʼte emɔ̄ʼ mesaŋ, ŋ́kúʼte emɔ̄ʼ mefʉʼ alāʼ, ŋ́kúʼte emɔ̄ʼ meŋguʼ alāʼ tɛ é te.

¹¹ Meŋ á si mbɔ́kɔ tɛʼ, ánɛ ajū mīi pɛ é si ŋghʉ̄ɛ lā. Ḿbɔ́kɔ ŋ́gɛ, ndɛ́ʼ afaʼ zīi, meŋ ke ghʉ̄ á tsetsɛlɛ pɛ, á tó ndémndēm.

¹² Páʼ meŋ ndē ncʉ́ʼ páʼ pɛ lā, pɛ eké mbiŋ mbɛ́ efʉʼ ánɛ meŋ, ánɛ menu muɔ mɛ́t, meŋ á swíŋte á wɛ́ me epɔ̄ memía. Tɛ efhó páʼ meŋ nde zɛ́t á tsetsɛlɛ pɛ, pɛ eláʼ te tsɔ méŋ anu tepɔŋ ánɛ meŋ ghʉ̄ʉ.

¹³ Pɛ é si ncuŋtɛ nzhɛ́ɛ páʼ meŋ nde gē etswi ŋke mbɔŋ á mbū pɛ, ánɛ mvhɔ legʉɔ, éfhó ánɛ páʼ meŋ nde nɔ̄ŋ ŋgɔɔ.

¹⁴ Agɔ á le tswá á gá tɛ mbe nnɛ̄t é pú mbék, pɛ ké ndáʼ te á gá ŋyaŋne, ńdáʼ te á gá wáʼ. A cʉ́ʼɛ épúp, mbɔ pɛ le kokné á gá, páʼ mɛ́ kóknɛ cɔʼ Ndém épúp, ŋ́kókne á gá, páʼ mɛ́ kóknɛ á Yɛɛ́so Klísto lā.

¹⁵ Á lɛ afʉʼ mɛ́t, ŋgɔŋ é pú mbɔ̄ŋ á wɛ́, tɛ pɛ é gɔ́ mé letsɔ̄ʼ menēk mɛ́ ŋgyá mé meŋ. Meŋ nde chʉ́ nnɛ̄t, ńdɔ̄k menēk má njʉ́ɔ, lekāk wɛ mɛ́t, a ke pīŋ ŋghʉ páʼ lā mmī í?

¹⁶ Á páʼā, tsetseŋɔ, meŋ ndɔ̄kɔ ncʉ́ʼɛ á ŋgaŋ mbo wɛ, éfhó ánɛ páʼ meŋ ke shúŋ á wɛ́ anuúnē lɛ́?

¹⁷ Wɔ zíʼne á wɛ́ menu é si ŋkhʉ́nɛ á letswi á wɛ́ á légɛ, pɔ́ zíʼnɛ wɛ́ páʼā, ńdɔkɔ ŋkɔ̄ŋɔ á wɛ́. Pɔ́ té ndɔkɔ ŋgɔ̄ á efʉʉ́ʼ pɛ anu mbɔŋ ɔ́. Pɔ́ faʼa áa lelɔk efhó á nzem meŋ efók á wɛ́, pɛ cʉ́ʼɛ ŋkɔ̄ŋɔ áa wɔ́p.

¹⁸ Ajū mīi á mbɔŋ á lezhɛ̄, á lɛ: á mbɔŋ á lekhʉ̄ne á leghʉ anu mbɔŋ, ŋ́ké ŋghʉ̄ áa efʉʼ metsem. Pɛ é le lɛ̄ ŋghʉ̄ áa afʉʼ zīi, meŋ á tsetsɛlɛ pɛ ɛ́.

¹⁹ Ewɔŋkhʉ̄ pá, meŋ á si nzéŋɛ njʉ́ɔ ŋgʉɔ̄ʼ, páʼ menzwí yīi, a jʉ́ɔ ŋgʉɔ̄ʼ ŋgɔ̄ á nzhíɛ lā. Éláʼ ejʉ́ɔ ŋgʉɔ̄ʼ mɛ́t épúp, tɛ eláʼ etshí ánɛ afʉʼ zīi, pɛ é kuʼ á wɛ́ á leziŋ ánɛ mekhu Nzaʼ‑Ŋkhʉ.

²⁰ Ásɛ, á tsetsɔŋɔ páʼa, meŋ nɔ̄ɔŋ ntsáa á gá á legɔ̄ á tsetsɛlɛ pɛ, tɛ́ ndɔk nzhɛ́ ntií zīi, meŋ gɔ elɔ̄ɔk eshúŋne á mbū pɛ, melaʼ mīi meŋ ncʉʼɛ́ ŋkwaŋa menu mɛ́, ńtāpne tapne.

Anu Agaa pɔ́ anu Saala á si nzíʼnɛ akɔ̄?

²¹ Pɛ pīi pɛ kɔŋɔ ŋ́gɛ, mbé Mɔɔ́sɛ mé esáʼ á wɛ́, pɛ eshúŋ á gá. Pɛ te si ncūŋtɛ nzhɛ́ɛ ajū mīi, mbé mɛ́t é lʉ́ɛ́ ɛ́.

²² Mɛ́ le tí á ntē aŋwaʼne mbé mɛ́t ŋ́gɛ, Ablaham a le wɛ̄ ewɔŋkhʉ̄ mémpīa, mmɔʼ á gɔ́ mbɔ a le zhí ánɛ ŋkwa zi, eyimɔʼ á gɔ́ mbɔ pɔ́ kwaʼ nzwí yi mé le zhíī.

²³ Mɔ́ yīi ŋkwa a le zhíī, menzwí pɔ́ ŋiŋ mbaŋa mé le kɔ̄ŋ nzhí á yí. Eyi kwaʼ nzwí yi a le zhíī, mɛ́ le gē ezhí á yí, á fhó ánɛ páʼ, Ndém a le laʼnē épúp á mbū Ablaham.

²⁴ Anu jʉɔ mɛ́t á lɛ páʼā, ńdɔkɔ ŋgɔ́ɔ á ashuŋne lepúʼ: wɔnzwí puɔ mémpīa é páʼā, ńdɔk ŋgɔ́ ayiŋne eka ntií pīa. Agáa, á menzwí yīi a lɛ ŋkwa lā, a á páʼā ndɔkɔ ŋgɔ́ ayiŋne eka yīi, Ndém pɔ́ Mɔɔ́sɛ é le kʉɔ́ʼ á ndo lekwɛ̄t tsīi, mɛ́ tɔɔ́ŋ lɛ Sinayi. Ndhu ŋkwa jʉɔ mɛ́t, é zéŋ ŋ́gɔ́ azɔ́p meŋkwa.

²⁵ Lekwɛ̄t Sinayi cʉ̄ɔ mɛ́t, é ntē apak ŋgɔŋ Alabi. Tésɔŋ Yelósalɛm ayáʼa, a á páʼā ndɔk ŋgɔ́ páʼ Agaa lā, melaʼ mīi epuɔ metsem pīi, pɔ́ naŋteé éwú, pɔ́ é si mbúu ŋgɔ́ meŋkwa.

²⁶ Mmɔʼ Yelósalɛm ndɛʼɛ a piīŋ ŋgɔ́ éwú, ŋ́gɔ́ á athʉ́ lephū, ńnáŋ á ŋga athū yí. Yelósalɛm mɛ́t, mé si ŋgɔ́ á mía wek.

²⁷ Á lɔk ŋgɔ́ páʼ mɛ́ le tí á ntē aŋwaʼne Ndém ŋ́gɛ: «Ŋkíŋ menzwí, á menzwí yīi a la zhí ɛ́, a enáŋ mé lekāk. Menzwí yīi, mɔ́ a zi laá nzáŋ á yí í, a ekák tɛ ŋghi zi e ekɔ́ʼ á athʉ́. Ewɔŋkhʉ̄ menzwí yīi mɛ́ lē ŋgwáʼ á yí, e shʉʼ ezá, étɔ́k epi menzwí yīi a á me ndō. »

²⁸ Éshʉ̄ʼ ánɛ pɛ me epɔ̄ memía, pɛ é si ŋgɔ́ ewɔŋkhʉ̄, mɛ́ zhí á wɛ́ ánɛ páʼ Ndém a le laʼnēē, ńdeŋ ndeŋ páʼ Izak lā.

²⁹ Á lɛ efʉʼ mvhɔ, mɔ́ yīi ŋiŋ mbaŋa pɔ́ menzwí mé kɔŋ nzhí, á gɔ́ efʉʼ metsem, ńdʉɔ́ʼɔ éyi Azwakne Ndém á le tswī tɛ́ mɛ́ zhí. Á zeéŋ ŋgɔ́ épúp, tɛ ntshí ayáʼa.

³⁰ Aŋwaʼne Ndém á piīŋ ndé ŋ́gɛ akɔ̄? Á leé ŋ́gɛ, mɛ́ ejūŋ á menzwí yīi a á ŋkwa, pɔ́ méŋ yi. Á ka pɔ̄ŋ ŋ́gɛ, méŋ ŋkwa a ewɛ̄ atekɛ́ páʼ méŋ menzwí yīi, a á ŋgyā á.

³¹ Púp me epɔ̄ memía, ḿpɛ é té si ŋgɔ́ ewɔŋkhʉ̄ menzwí yīi, a á ŋkwa á. Ḿpɛ é si ŋgɔ́ ewɔŋkhʉ̄ menzwí yīi, a á ŋgyā.