Galat 3 - Eka Eswhī

Mɛ́ enéŋ ntē ánɛ mbé kɛɛ ánɛ Klísto ō?

¹ Pɛ epuɔ Ŋgalati, pɛ gɔ̄ áa wɔ tee‑athū kɛ. Pɛ ke gaā mvéŋ ŋ́gɛ, mɛ́ ekʉ̄lɛ leghi tsɛ́ ɛ́? Tɛ́ mbɔ meŋ ke kɛʼté eshúŋ á wɛ́, á ŋiŋ yīi Yɛɛ́so Klísto, páʼ mɛ́ le kwɛtē á yí ánɛ mbaŋne paŋné, a ewiɛ́.

² Pɛ elɛ mbwɛ̄t anu jʉɔ eshúŋ á gá. Ndém a le gē eyá Azwakne zí á mbū pɛ péʼe, á gɔ́ melaʼ mīi pɛ kuʼteé mbé mí, kɛ á gɔ́ melaʼ mīi, pɛ le júʼ ŋke mbɔŋ, ḿvéŋ ŋ́?

³ Athū zɛ́ á te pɔŋté á lepī tɛ ntshí páʼa á. Pɛ pīi, pɛ ke gē ezi, ŋ́gwɛ̄ mete Azwakne Ndém, pɛ piīŋ ŋgɔ́ tsetsɔŋɔ, ńcʉ́ʼɛ efāʼa áa lelɔk mete mɛ́ méŋwɛ̄t, ŋ́gʉɔ tɛ ŋkó lɛ́?

⁴ Azwakne Ndém á le sóʼo ánɛ pɛ, ŋ́ghʉ̄ menu membɔŋ á nnɔ pɛ páʼā, á gɔ́ áa ndémndēm kɛ? Meŋ ka kwāŋ ŋ́gɛ á lɛ ndémndēm ɛ́.

⁵ Ndém a le gē eyá Azwakne zí á mbū pɛ, ŋ́gē eghʉ meŋkʉʼne anu á nnɔ pɛ páʼā, a te efhó ánɛ wɛ́ á lekūʼte mbé mí í. A le fhó ánɛ páʼ pɛ le júʼ ŋke mbɔŋ, ḿvéŋ.

⁶ Pɛ enáʼ ŋkwāŋte á Ablaham, a le fɛ́ nnɛ̄t zi ŋgyá á mbū Ndém, Ndém á jʉ́ɔ épúp, ńtɔ́ŋ á yí lɛ ŋiŋ ndeŋ ndeŋ.

⁷ Pɛ echʉ́ nnɛ̄t njúʼ á mbɔŋɔ́. Epuɔ pīi é fɛɛ́ nnɛ̄t ŋgyá á mbū Ndém, pɔ́ mé si ŋgɔ́ epɔ̄ Ablaham.

⁸ Ndém a le té njhʉ̄, ńdé á ntē aŋwaʼne yí ŋ́gɛ, yí e láʼ eghʉ, epuɔ pīi é té epuɔ Yúda á, e ecʉ́ʼ epuɔ ndeŋ ndeŋ, éfhó ánɛ wɔ́p á lefɛ̄ nnɛ̄t ŋgyá á mbū yí. A le lé épúp, ńtswī ŋke mbɔŋ wuɔ á mbū Ablaham ŋ́gɛ, yí e láʼ ezápa ánɛ yí, énéŋ mbwɛ́né ánɛ elāʼ ntsem.

⁹ Púp, epuɔ pīi pɔ́ fɛɛ́ nnɛ̄t ŋgyá á mbū Ndém, a neéŋ mbwɛ́né ánɛ pɔ́p, ndeŋ ndeŋ páʼ Ablaham a le fɛ́ nnɛ̄t ŋgyá á mbū yí, á néŋ mbwɛ́né ánɛ yí.

¹⁰ Ndém a a láʼ enéŋ ndɔ á athū epuɔ metsem pīi, pɔ́ kuʼteé lepé, éfāʼa á legɔ̄ ndeŋ ndeŋ á mvhɔ yí. Ndém a le lé á ntē aŋwaʼne yí ŋ́gɛ, yí e láʼ enéŋ ndɔ á athū ŋiŋ ntsem yīi, a te kuʼté mbé ntsem, efʉʼ metsem ɛ́. Á ŋiŋ ntsem yīi, a te si nzīŋɛ ánɛ mbé ntsem mīi, mɛ́ le tí á ntē aŋwaʼne mbé ɛ́.

¹¹ Á anuúnē á légɛ, Ndém a te fhó ánɛ ŋiŋ á lekūʼte mbé, tɛ́ ntɔ́ŋ á yí lɛ ŋiŋ ndeŋ ndeŋ ɛ́. Á anuúnē épúp melaʼ mīi, a leé á ntē aŋwaʼne yí ŋ́gɛ, ŋiŋ yīi yí tɔɔ́ŋ á yí lɛ ŋiŋ ndeŋ ndeŋ, melaʼ mīi ŋgaŋ a á fɛ́ nnɛ̄t ŋgyá á mbū Ndém, a a láʼ ekwaʼ egɔ́ éwú.

¹² Ŋiŋ a piŋɛ njʉ́ɔ ŋ́gɛ, yí e kúʼte áa lepé, ŋgaŋ á zhɛ́ á légɛ, lefɛ̄ nnɛ̄t ŋgyá á mbū Ndém pɔ́ lepé é té azō wɛ. Á gɔ́ páʼ mɛ́ zeéŋ ntí á ntē aŋwaʼne Ndém ŋ́gɛ: «Ŋiŋ yīi a kuʼteé mbé ntsem, mbé mɛ́t mé láʼ eghʉ tɛ́ a egɔ́ éwú. »

¹³ Páʼ lekūʼte mbé a le ghʉ̄ʉ̄, ḿpɛ é kʉɛ ndɔ lā, Klísto a le ké mbiŋ eshʉ̄ʼ ńtshí á ajʉʼ pímpɛ, Ndém á néŋ ndɔ á athū yí. A le ghʉ̄ épúp, tɛ́ ndɔk nzó á athū zímpɛ, tɛ ŋgɔ́ yīi, Ndém a gɔ le zéŋ nnéŋ ndɔ, á athū pímpɛ ɛ́. Éfhó ánɛ páʼ mɛ́ tií á ntē aŋwaʼne Ndém ŋ́gɛ: «Ŋiŋ yīi mɛ́ le kɔʼné á yí ŋkwɛ̄ ánɛ athʉ́, yí tɛ́ Ndém a le néŋ ndɔ á athū yí. »

¹⁴ Klísto a le ghʉ̄ épúp, ńdɔkɔ ŋ́gɛ, etsō mbɔŋ tɛ nzáne tsīi, Ndém a le phʉ́ á mbū Ablaham, a efhó ánɛ páʼ epuɔ pīi, é té epuɔ Yúda á, é fɛɛ́ nnɛ̄t ŋgyá á mbū Yɛɛ́so Klísto, ŋ́gyá etsō mbɔŋ mɛ́t á mbū pɔ́p azɔ́p. Klísto a lɛɛ́ nzéŋɛ ndɔkɔ ŋ́gɛ, páʼ ḿpɛ é fɛɛ́ nnɛ̄t ŋgyá á mbū yí lā, Ndém a eyá á yímpɛ Azwakne zí zīi, a le phʉ́ʉ̄.

Anu ánɛ lepé mbɔɔ ánɛ ajū mīi Ndém a le phʉ́ʉ̄

¹⁵ Epɔ̄ memía, meŋ a pɛ́ efʉʼ ánɛ menu mīi, ḿpɛ é si njʉ́ɔ eleʼé tsem, élɔk ekɛ́ʼte, éshúŋ á wɛ́. Ŋiŋ pɔ́ ŋiŋ é cuŋteē anu á mbɔŋɔ́ tɛ nzyɛ̄t péʼe, ŋ́gɔ́ éyi ŋiŋ a gɔ eshʉ̄ʉʼ mbík anu mɛ́t e? Ŋ́gɔ́ éyi ŋiŋ a gɔ eshʉ̄ʉʼ ntswīʼne anu éwú u?

¹⁶ Á zeéŋ ŋgɔ́ ndeŋ ndeŋ épúp, á mbū Ndém. A le ghʉ̄ alaʼne á mbū Ablaham, ńzéŋ ŋghʉ̄ á mbū taʼ ŋiŋ ánɛ ndhu zi. Aŋwaʼne Ndém á té lé ŋ́gɛ, Ndém a le ghʉ̄ alaʼne á mbū Ablaham, mbɔɔ á mbū nzwɛt zi ntsem, tɛ á gɔ́ páʼ á le ghʉ̄ á mbū athū atʉtʉ epuɔ, ánɛ nzwɛt zi lā á. Mɛ́ le tí ŋ́gɛ, á mbū taʼ ŋiŋ ánɛ nzwɛt ju, ńdɔkɔ ndʉ́ɛ́ á Klísto.

¹⁷ Anu zīi meŋ ndɔkɔ ndʉ́ɛ́ a ajʉɔ. Ndém pɔ́ Ablaham é le té njhʉ̄, éshúŋ anu á mbɔŋɔ́ tɛ nzyɛ̄t. Á tɔ́k ŋguʼ ŋkhʉ lekua mé megēm tɛ́t, á tó mbé ŋgyá á mbū epuɔ Islaɛl. Mbé é piŋ te anu mɛ́t pík. Tɛ ŋgɔ́ yīi é le pík, mbɔ á lɔkɔ ŋ́gɛ, anu zīi Ndém a le laʼnē á mbū Ablaham, á gɔ́ áa ŋŋiké.

¹⁸ Á ŋgwíʼe ŋgɔ́ éyi, Ndém a gē eyá á ŋiŋ azō, éfhó ánɛ páʼ ŋgaŋ a kuʼteé lepé, mbɔ á lɔkɔ ndʉ́ɛ́ ŋ́gɛ, a te ŋgyáa á ŋiŋ azō melaʼ mīi, a le laʼnēē ɛ́. Táʼ, Ndém a le gē etswi apɔŋɔ́ ntē te ndhʉ zí á mbū Ablaham, á gɔ́ páʼ a le laʼnē épúp.

¹⁹ Ŋiŋ a gɔ epīiŋ nzɛ́tte ŋ́gɛ, á piŋ ŋgɔ́ épúp, mbɔ Ndém a lɛɛ́ ŋgyáa mbé, á mbū epuɔ Islaɛl melaʼ akɔ̄? Ndém a lɛɛ́ ŋgyáa mbé á mbū pímpɛ, ńdɔkɔ ŋ́gɛ, ḿpɛ ezhɛ́ ajūɔ tsem zīi, á mbū yí, á té pɔŋ. A lɛɛ́ ŋgyáa ńdɔkɔ ŋ́gɛ, ḿpɛ ekúʼte ndɔk nzwíʼte á afʉʼ zīi, taʼ ŋiŋ ánɛ nzwɛt Ablaham mɛ́t, éyi alaʼne á cʉteē á yí, a a láʼ eshʉʼe. Ndém a le yá mbé á mbū mecɔʼ pí ŋ́gɛ, pɔ́ egʉɔ eshúŋ á mbū epuɔ menɔŋ. Taʼ mɛmekém á gɔ́ á tsetsɛlɛ epuɔ menɔŋ pɔ́ a Ndém, éshúŋ á wɔ́p.

²⁰ Mɛmekém a gɛ mbīŋɛ ŋgɔ́ áa tsetsɛlɛ tsɔ epuɔ mémpīa, a te eyi taʼ ŋiŋ ɛ́. Ndém yíléyī mé le pīŋ ŋghʉ̄ alaʼne, á mbū Ablaham.

Melaʼ akɔ̄ Ndém le yá mbé á mbū pímpɛ ɛ̄?

²¹ Á páʼā ndɔkɔ ndʉ́ɛ́ ŋ́gɛ, mbé pɔ́ ajū mīi Ndém a le phʉ́ á yímpɛ, é tshií áa nzéŋ nzéŋ lɛ́? É puú te á nzéŋ nzéŋ tshí. Á ŋgwíʼe ŋgɔ́ éyi Ndém a lɛɛ́ ŋgyáa mbé á mbū epuɔ, ŋ́gɛ e eghʉ̄ mɛ́ egɔ́ éwú, mbɔ epuɔ pīi é kuʼteé mbé mɛ́t, é si ŋgɔ́ epuɔ ndeŋ ndeŋ, á mvhɔ Ndém.

²² Ndém a leé á ntē aŋwaʼne yí ŋ́gɛ, epuɔ metsem á ndo esī atsetsáʼ, é si ŋgɔ́ apuʼ mefa, tɛ́ Ndém a etsīa épúp, ŋ́gyá ajū mīi, a le laʼnēē, á mbū epuɔ pīi, é fɛɛ́ nnɛ̄t ŋgyā á mbū Yɛɛ́so Klísto.

²³ Á lɛ afʉʼ mvhɔ, mɛnzhɛ á lelɔk efɛ́ nnɛ̄t ŋgyá me Klísto, á zɛ́t te gɔ́ éwú á mbū pímpɛ, ḿpɛ é gɔ́ ŋkwa lepé, tɛ ndáʼ ntshí ánɛ afʉʼ zīi, Ndém a le tó á Yɛɛ́so Klísto, ŋ́gɛ mɛ́ efɛ́ nnɛ̄t ŋgyá á mbū yí.

²⁴ Á lɛ páʼā, lepé é lɔk ŋgɔ́ páʼ ŋiŋ yīi, a tshií lezēk tsí ánɛ pímpɛ, ńdɔkɔ nzwíʼtɛ afʉʼ zīi, Klísto a a láʼ eshʉʼe, éghʉ ḿpɛ e efhó ánɛ lefɛ̄ nnɛ̄t yímpɛ ŋgyá á mbū yí, ŋ́gɔ́ epuɔ ndeŋ ndeŋ á mvhɔ Ndém.

²⁵ Táʼ, tɛ efhó páʼ ḿpɛ é le zī á lefɛ̄ nnɛ̄t ŋgyá á mbū Klísto, ḿpɛ te pɔŋté á lezēŋ njúʼ á mbū ŋiŋ mɛ́t ɛ́.

²⁶ Pɛ metsem é zi ŋgɔ́ epɔ̄ Ndém, éfhó ánɛ páʼ pɛ lɛtneē ánɛ Yɛɛ́so Klísto, éfɛ́ nnɛ̄t zɛ ŋgyá á mbū yí.

²⁷ Á épúp, melaʼ mīi, mɛ́ le nōʼ á wɛ́ metsem á ntshi páʼā, ńdɔkɔ ntséknɛ á wɛ́ á mbū Klísto. Pɛ lɔ̄kɔ ncʉ́ʼɛ azɛ́ ndeŋ ndeŋ, páʼ Klísto a á épúp.

²⁸ Á tsia épúp, pɛ metsem lɔkɔ ncʉ́ʼɛ á taʼ azō á mvhɔ Ndém, tɛ mɛ́ le zéŋ ntɛ̄ʼte ŋ́gɛ, ŋiŋ Yúda a awuɔ, ŋiŋ Glɛk á gɔ́ ewuɔ ɔ́. Ŋ́gɛ ŋkwa e ejʉɔ, ŋiŋ yīi a naáŋ á ŋga athū yí á gɔ́ ewuɔ ɔ́. Ŋ́gɛ menzwí a awuɔ, ŋiŋ mbaŋa á gɔ́ ewuɔ ɔ́, mbɔ pɛ é zápa ánɛ Yɛɛ́so Klísto, ńcʉ́ʼ á taʼ.

²⁹ Páʼ pɛ é ndáʼ ŋgɔ́ epuɔ Klísto lā, pɛ é páʼa, ńdɔkɔ ncʉ́ʼɛ ndhu Ablaham. Ńcʉ́ʼ wɔ wɛ‑ajūɔ tsem zīi, Ndém a le laʼnē á leyā mé pɔ́p.