Galat 2 - Eka Eswhī

Meziŋ‑ntō Yɛɛ́so pɔ́ á Pɔ́ɔl é gɔ́ á taʼ nchu

¹ Á fhó épúp, ńtɔ́k ŋguʼ ntsɔp lekua mé legēm, pek Baanabas é zéŋ mbē mé Yelósalɛm, ŋ́gē egʉɔ, pek a Tíit é gɔ́ nnɔ.

² Meŋ nde gē epe egʉɔ épúp, mbɔ Ndém mé sia eshúŋ á gá. Meŋ kó éwú, pek a wɔ tshí‑mvhɔ ánɛ alúŋ epuɔ Yɛɛ́so, é ghʉ acuʼte. Meŋ kó ánɛ acuʼte mɛ́t, ŋ́kɛ́ʼte ŋke mbɔŋ yīi, meŋ á si ntswīi á tsetsɛlɛ epuɔ Yɛɛ́so pīi, é té epuɔ Yúda á, eshúŋ á wɔ́p, ḿbɔ́k afaʼ zīi, meŋ ke ghʉ̄ʉ̄, mbɔɔ azi meŋ á tsetsɔŋɔ ŋghʉ̄ɛ, á lege ezoko, ńtó ndémndēm.

³ Mɛ́ piŋ te ŋíŋ ŋíŋ ŋ́gɛ, mɛ́ eláʼ ntém á Tíit ŋgaŋ akhu ga á, tɛ́ á gɔ́ á ŋiŋ Glɛk.

⁴ Tɛ mbɔɔ páʼ wɔ táŋ‑mela ŋ́gɛ pɔ́ é epuɔ Yɛɛ́so, é kɛ si ŋŋíŋɛ ŋ́gɛ mɛ́ etém á yí. Wɔ wɛtɛ‑ŋkó puɔ mɛ́t, é le ŋɛté ŋkó á nnɔ pek, ŋ́gɔ̄ á mbápnɛ, éjʉ́ɔ páʼ, pek naáŋ á ŋga athū pek melaʼ mīi, pek lɛtneē ánɛ Yɛɛ́so. Ézéŋ eghʉ, pek epiŋ ncʉ́ʼ epuʼ lepé epuɔ Yúda.

⁵ Pek lɛ te véŋ á mbū epuɔ puɔ mɛ́t ɛ́, tɛ tsɔ méŋ agáʼ lɛ, ńdɔkɔ mbɔ́kɔ á wɔ́p á lekūmne anuúnē zīi, pek kuʼteé ánɛ ŋke mbɔŋ melaʼ pɛ.

⁶ Ŋ́gɔ́ mé epuɔ pīi mɛ́ jʉɔ́ á wɔ́p páʼ wɔ tshí‑mvhɔ, mbɔ epuɔ puɔ mɛ́t, é lɛ te tshí amɔ̄ʼ apiʼ ndɛʼɛ, á athū meŋ ɛ́. Ajū mīi pɔ́ lɛ aziɛ́, á pú te si eshúŋɔ á gá azō ɔ́. Ńzi te épúp ɔ́, mbɔ Ndém a te cʉtē á ajʉʼ zīi, ŋiŋ a tshií éwú ú.

⁷ Epuɔ puɔ mɛ́t, é le jʉ́ɔ páʼ Ndém a le tsekné á letswi ŋke mbɔŋ á mbū epuɔ pīi, é té epuɔ Yúda á, á mbū meŋ, ńdeŋ ndeŋ páʼ, a le tsekné á letswi ŋke mbɔŋ á mbū epuɔ Yúda, á mbū Piɛ.

⁸ Ndém yīi a le yá mete á mbū Piɛ, á cʉ́ʼ á nziŋ‑ntō yi á mbū epuɔ Yúda, a le zéŋ ŋgyá mete á mbū meŋ, meŋ ncʉ́ʼ á nziŋ‑ntō yi, á mbū epuɔ pīi, é té epuɔ Yúda á.

⁹ Jáak pɔ́ Piɛ mbɔɔ Jáaŋ, é le fhó épúp, ńzhɛ́ apɔŋɔ́ ntē te ndhʉ zīi, Ndém a wɛɛ̄ ánɛ meŋ, á wɔ́p pīi, pɔ́ é si ŋgɔ́ mentɔ̄ ánɛ alúŋ epuɔ Yɛɛ́so. Pɔ́ le zhɛ́ épúp, ńtswí apū zék, á azá mbɔɔ azi Baanabas, ńdɔk ntswī á légɛ, pek a pɔ́p é taʼ nchu. Púp, pek gē egʉɔ á ntswiī ŋke mbɔŋ á mbū epuɔ pīi, é té epuɔ Yúda á, pɔ́ gʉɔ ntswī á mbū epuɔ Yúda.

¹⁰ Pɔ́ le lɛ ntswɛte á wék ánɛ taʼ azō ndaʼ, ŋ́gɛ ndɛ́ʼ pek elekne té tswíte wɔ te kuʼ ánɛ azō ánɛ alúŋ epuɔ Yɛɛ́so á tésɔŋ pɔ́p, á Yelósalɛm. Á gɔ́ ajū mīi, meŋ ke ghʉ̄ mé taʼ ntē.

Pɔ́ɔl a á ega ncɔ́kɔ á Piɛ á tésɔŋ Aŋtiɔsh

¹¹ Piɛ á shʉʼ eshʉ̄ʼ á Aŋtiɔsh, meŋ kyákne á yí á mvhɔ epuɔ, mbɔ a á fa taʼ azō.

¹² Anu mɛ́t á gɔ́ lɛ̄ɛ, epuɔ pīi Jáak a le tó á wɔ́p, é le gē eshʉʼe, Piɛ pɔ́ a epuɔ pīi é té epuɔ Yúda á é nɔŋ mbútɛ mpfɛ́tɛ azō. Epuɔ mɛ́t é shʉʼ tɛ ŋkó éwú, á fak nnɛ̄t, a te zéŋ ŋkɔ̄ŋ á wɔ́p a pɔ́p á lepūte mpfɛ́t azō ɔ́, ḿbɔ́k epuɔ Yúda mɛ́t á lezhɛ̄.

¹³ Emɔ̄ʼ epuɔ Yúda é jʉ́ɔ, ńzī á leghʉ azɔ́p épúp. Tɛ mbú nzéŋ éshūŋ á Baanabas nnéŋ ánɛ meziŋɛ́ afho nzem pīa muɔ mɛ́t.

¹⁴ Meŋ jʉ́ɔ páʼ epuɔ puɔ, é té si nzīŋɛ ndeŋ ndeŋ páʼ anuúnē zīi, ánɛ ŋke mbɔŋ á si nzɛ́ttɛ épúp ɔ́, ńdé á mbū Piɛ á mvhɔ epuɔ metsem ŋ́gɛ: «Yaāa me Piɛ, wu yīi, o ó ŋiŋ Yúda, ḿbiŋ nnɔ̄ŋ nnáŋa páʼ ŋiŋ yīi, a te ŋiŋ Yúda á, o te náŋa páʼ ŋiŋ Yúda á, o gɔ epīiŋ ŋgā á, ŋ́ŋíŋ ŋ́gɛ, epuɔ pīi é té epuɔ Yúda á, e enáŋ páʼ epuɔ Yúda ā?»

Ndém a fhoó ánɛ lefɛ̄ nnɛ̄t, tɛ́ ntɔ́ŋ á ŋiŋ lɛ, ŋiŋ ndeŋ ndeŋ

¹⁵ Ḿpɛ é páʼā, mbɔ mɛ́ le zhí á yímpɛ, ḿpɛ gɔ́ epuɔ Yúda. Ḿpɛ é té epuɔ pīi, é té epuɔ Yúda á, épuɔ pīi ḿpɛ jʉɔ́ á wɔ́p páʼ megaŋ mefa lá á.

¹⁶ Ḿpɛ é si ŋké nzhɛ́ɛ á légɛ, Ndém a te fhó ánɛ ŋiŋ á lekūʼte mbé mí, tɛ́ ntɔ́ŋ á ŋgaŋ lɛ, ŋiŋ ndeŋ ndeŋ ɛ́. A fhoó áa ánɛ ŋiŋ á lefɛ̄ nnɛ̄t ŋgyá á mbū Yɛɛ́so Klísto. Ḿpɛ azímpɛ é le fɛ́ nnɛ̄t ŋgyá á mbū Yɛɛ́so Klísto, ńdɔkɔ efāʼa ŋ́gɛ, a etsīa ánɛ lefɛ̄ nnɛ̄t mɛ́t, ńtɔ́ŋ á yímpɛ lɛ, epuɔ ndeŋ ndeŋ. A á le zápa ánɛ pímpɛ á lekūʼte mbé mí í, melaʼ mīi, Ndém a gɔ le fhó ánɛ ŋiŋ á lekūʼte mbé mí, tɛ́ ntɔ́ŋ á ŋgaŋ lɛ, ŋiŋ ndeŋ ndeŋ ɛ́.

¹⁷ Ḿpɛ epiŋ ŋkó á lefaʼ á légɛ, Ndém a ezápa ánɛ Klísto, ńtɔ́ŋ á yímpɛ lɛ, epuɔ ndeŋ ndeŋ, epuɔ é piŋ ndɔ̄k á yímpɛ nzóko ntɔ́ŋɔ megaŋ mefa, mbɔ á lɔkɔ ndʉ́ɛ́ ŋ́gɛ, Klísto a á si ntshónɛ epuɔ nnéŋɛ á mbū mefa lɛ́? Ŋgáŋ, á té épúp ɔ́.

¹⁸ Ŋiŋ a náŋa, tɛ a te zéŋ ŋkúʼte lepé ɛ́, melaʼ mīi é té si ntswítɛ á yí á legɔ̄ ŋiŋ ndeŋ ndeŋ ɛ́, ḿbīŋ nnáŋ tɛ nzéŋ efāʼ á yí á lezēŋ mbīŋ nzem ánɛ mbé mɛ́t, mbɔ ŋgaŋ a á páʼā, ńnēŋtɛ lepé mɛ́t.

¹⁹ Ŋ́gɔ́ mé meŋ, mbɔ á gɔ́ azō tɛ ncʉ̄te lepé, mɛ́ zhɛ́ á légɛ meŋ ndē ndáʼ ŋkwhʉ́, lepé é lē ndáʼ ŋghʉ̄ meŋ kwhʉ́. Meŋ ghʉ̄ɛ épúp, ńdɔkɔ efāʼa á gá á lenāŋ á ŋgɔŋ, ŋ́ghʉ̄ mefaʼ Ndém. Mɛ́ le gē ekwɛte á Klísto ánɛ mbaŋne paŋné páʼā, ḿbú ŋkwɛ̄te á gá azá.

²⁰ Meŋ naáŋ á ŋgɔŋ páʼā, meŋ mé té zɛ́t nnáŋ éwú ú, Klísto mé zápa ánɛ meŋ, ńnáŋ éwú. Gá á lenāŋ á ŋgɔŋ, a á si ŋgɔ́ á gá á lefɛ̄ nnɛ̄t ŋgyá á mbū Méŋ Ndém. A le kɔ̄ŋ á gá, tɛ ŋgyá athū nnɛ̄t zí melaʼ má.

²¹ Meŋ te si ŋkɔ̄ŋɔ á gá á lewāʼ apɔŋɔ́ ntē te ndhʉ zīi Ndém a wɛɛ̄ ánɛ meŋ ɛ́, melaʼ mīi, á ŋgwíʼe ŋgɔ́ éyi Ndém a gē etɔ́ŋ á ŋiŋ lɛ, ŋiŋ ndeŋ ndeŋ, éfhó ánɛ yí á lekūʼte lepé, mbɔ á lɔkɔ ndʉ́ɛ́ ŋ́gɛ, Klísto a le kwhʉ́ páʼā, á gɔ́ áa anu te athū.