Galat 1 - Eka Eswhī

Atsaʼte

¹ Meŋ Pɔ́ɔl, nziŋ‑ntō Yɛɛ́so Klísto mé tíi akɛtte jʉɔ páʼa, mbɔ epuɔ menɔŋ mé lɛ te lɔ̄k á gá ŋghʉ̄ á nziŋ‑ntō ɔ́, meŋ te zába á nzem ŋiŋ, tɛ́ ncʉ́ʼ á nziŋ‑ntō ɔ́. Klísto, mbɔɔ Ndém Mɔʼɔ́, mé le ghʉ̄ʉ̄, meŋ ecʉ́ʼ á nziŋ‑ntō wɔp. Yɛɛ́so Klísto mɛ́t, Ndém a le ghʉ̄ á zím ánɛ lewhʉ̄.

² Meŋ, mbɔɔ emɔ̄ʼ epɔ̄ memía pīi, pek a pɔ́p é nnɔ, é tsaʼte elúŋ epuɔ Yɛɛ́so tsīi, é apak ŋgɔŋ Ŋgalati.

³ Ŋ́gɛ, Mɔʼɔ́ yímpɛ Ndém, pɔ́ Atsyapuɔ Yɛɛ́so Klísto, e elɛ ŋghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

⁴ Klísto mɛ́t, a le yá athū nnɛ̄t zí, ńdɔk ŋghʉ̄ ḿpɛ etswɛ́t ánɛ mefa mímpɛ. Éfhó á mbū tepɔŋ mete ŋgɔŋ muɔ, ŋ́kú á yímpɛ. Á gɔ́ afaʼ zīi Mɔʼɔ́ yímpɛ Ndém, a le nɔ̄ŋ ŋkɔŋɔ ŋ́gɛ a eghʉ̄.

⁵ Epuɔ metsem e epú ŋgūʼte á Ndém á meŋguʼ meŋguʼ. Á épúp.

Ŋke mbɔŋ é gɔ́ áa wɔmɔʼɔ́

⁶ Á si mbúu ntsyā á gá tɛʼ, ánɛ ntií zīi, pɛ é lɔk ŋgákne efhó á nzem Ndém ntó épúp. Tɛ́ mbɔ yí mé le zapá ánɛ Klísto, ńdɔ̄k apɔŋɔ́ ntē te ndhʉ Klísto mɛ́t, ńtsɔ́ʼ á wɛ́ ŋ́gɛ, pɛ egɔ́ epuɔ pí. Pɛ kʉʉ̄ŋ mbiŋ ŋgwáʼ á yí, ńcʉ́ʼɛ ŋkúʼtɛ áa mmɔʼ ŋke ndɛʼɛ, ńnɔŋ ŋkwāŋa ŋ́gɛ, ewiɛ́ mé ŋke mbɔŋ.

⁷ Meŋ eké eshúŋ á wɛ́, mmɔʼ ŋke mbɔŋ ndɛʼɛ é zi te éwú ú. A cʉ́ʼɛ épúp, mbɔ emɔ̄ʼ epuɔ mé si efāʼa á lemaʼ atāk á nnɔ pɛ, ńnɔŋ ŋkɔ̄ŋɔ á wɔ́p á lekūmne ŋke mbɔŋ yīi é cʉteē á Klísto.

⁸ A zi mbú ŋgɔ́ áa awɔ́ lɛ́, tɛ mbɔɔ pek, tɛ mbɔɔ taʼ cɔʼ Ndém yīi, a fhɔ́ɔ á lephū, éshʉ̄ʼ ntswī mmɔʼ ŋke mbɔŋ ndɛʼɛ á mbū pɛ, té gɔ́ áa eyi pek é le tswīī, Ndém á lɛ nnéŋ ndɔ á athū yí.

⁹ Pek é lē ndáʼ eshúŋ á wɛ́, tsetsɔŋɔ, meŋ ezéŋ nchʉ́ nnɛ̄t eshúŋ á wɛ́: ŋiŋ a shʉʼɛ ntswī mmɔʼ ŋke mbɔŋ ndɛʼɛ, tɛ é té gɔ́ áa eyi pek le tswī á mbū pɛ, pɛ evéŋ ɛ́, Ndém á lɛ nnéŋ ndɔ á athū yí.

¹⁰ Pɛ é kwaŋ ŋ́gɛ á tsetsɔŋɔ, meŋ nɔ̄ɔŋ efāʼa ŋ́gɛ, epuɔ menɔŋ e ekɔ̄ŋte á gá lɛ́? Ŋgáŋ, meŋ á si efāʼa ŋ́gɛ, Ndém a ekɔ̄ŋte á gá. Meŋ te si efāʼa á gá á leghʉ ajū mīi, epuɔ menɔŋ é lɔk ewuʼte á gá á. Á ŋgwíʼe ŋgɔ́ éyi, meŋ á si ntsáa á gá á leghʉ, epuɔ menɔŋ é wuʼte á gá, mbɔ meŋ gɔ le ghʉ̄ épúp, ḿbiŋ ŋgɔ́ á ŋgaŋ afaʼ Klísto ó.

Pɔ́ɔl a á ega eshúŋɔ páʼ á le tsīa épúp, tɛ́ yí cʉ́ʼ á nziŋ‑ntō

¹¹ Epɔ̄ memía, meŋ chʉ́ɛ nnɛ̄t eshúŋɔ á wɛ́ ŋ́gɛ, ŋke mbɔŋ yīi, meŋ ndɛɛ́ ntswii á mbū pɛ, é té efhɔ́ɔ á mbū ŋiŋnɔŋ ɔ́.

¹² Ŋiŋnɔŋ mé lɛ te tswī ŋke mɛ́t, á mbū meŋ ɛ́. Ŋiŋnɔŋ mé té zíʼne á gá anu zīi, ŋke mɛ́t é lʉ́ɛ́ ɛ́. Yɛɛ́so Klísto mé le kɛʼɛ́ atseŋ ŋke mɛ́t, ŋ́ghʉ̄ meŋ ezhɛ́.

¹³ Pɛ le chʉ́ nnɛ̄t njúʼ ntií atswhī zīi, meŋ ndɛɛ́ ŋgwīɛ̄ á afʉʼ zīi, meŋ nde zɛ́t ŋkúʼte á mɛt epuɔ Yúda. Ńnɔŋ nzhɛ́ɛ páʼ azá azō á lɛ áa lefōk mbʉʼ, ńdʉɔ́ʼ megaŋ alúŋ epuɔ Ndém, ḿbú mbík á wɔ́p.

¹⁴ Meŋ ndɛ ánɛ mɛt epuɔ Yúda wuɔ mɛ́t, ńnɔŋ ŋkāka ete ŋgʉ̄ɔ mé mvhɔ, ńtɔ́kɔ emɔ̄ʼ epuɔ Yúda ánɛ akhu ŋkaŋa zék. Akhʉne zīi á lɛ á ntē meŋ, á nɔŋ ntshónɛ á gá á lekūʼte á mɛt memɔʼɔ́ pá.

¹⁵ Táʼ, meŋ nde ké nzɛ́t á levem mɛ́ ga, Ndém á fhó ánɛ apɔŋɔ́ ntē te ndhʉ zí, ŋ́kāŋ á gá. Ńtsɔ́ʼ á gá, ŋ́gɛ meŋ efú ncʉ́ʼɛ ŋgɔ́ɔ áa ánɛ alá apū zí. Afʉʼ zīi yí mé kɔŋ, á le kūʼe,

¹⁶ á sia eshúŋ á gá páʼ Méŋ yi, a á épúp. Ésīa épúp páʼā, ŋ́gɛ meŋ ndɛ ŋgʉ̄ɔ á nnɔ epuɔ pīi, é té epuɔ Yúda á, éshúŋ páʼ Méŋ yi mɛ́t, a á épúp. Meŋ nde pīŋ te gʉ̄ɔ ntswí mmɔʼ ntekné ndɛʼɛ, á mbū ŋiŋnɔŋ ɔ́.

¹⁷ Meŋ te pē ŋgʉ̄ɔ á Yelósalɛm, ńzɛ́tte ntekné ndɛʼɛ á mbū epuɔ pīi, é le té njhʉ̄ ŋgɔ́ meziŋ‑ntō Yɛɛ́so ó. A cʉ́ʼɛ épúp, mbɔ meŋ nde lɛ̄ ŋgʉɔ mé apak ŋgɔŋ Alabi, éshʉʼ eswáŋ nnɛ̄t mé tésɔŋ Damas.

¹⁸ Éfhó épúp, á tɔ́k ŋguʼ tɛ́t, meŋ mbēe ŋgʉ̄ɔ mé Yelósalɛm, á ŋgúa Piɛ, ŋ́kó éwú, pek yí é náŋ eleʼé ntsɔp táa mé legēm.

¹⁹ Meŋ te ŋgʉ̄ɔ ŋgúa mmɔʼ nziŋ‑ntō ndɛʼɛ ɛ́, ńdaʼ Jáak, méŋ mɔ́ Yɛɛ́so.

²⁰ Anu zīi meŋ shúŋɔ á wɛ́, á si ŋgɔ́ anuúnē, meŋ tshií á mvhɔ Ndém tɛ́ eshúŋnɛ, é té epoó‑anu ú.

²¹ Ḿbáte, ŋ́gʉ̄ɔ mé apak ŋgɔŋ Sili mbɔɔ á Silisi.

²² Á gɔ́ épúp páʼā, mbɔ melúŋ epuɔ Klísto mīi é ŋgɔŋ Yudéa, pɔ́ la lezēk ánɛ meŋ tshí ɛ́.

²³ Pɔ́ le lɛ̄ njúʼ áa mɛ́ lelē ánɛ meŋ ŋ́gɛ: «Ŋiŋ yīi a ke nɔ̄ŋ ndʉɔ́ʼɔ á yímpɛ á amɔ̄ʼ afʉʼ lā, a piīŋ ŋgɔ́ tsetsɔŋɔ, ńcʉ́ʼɛ ntswīi áa ŋke mbɔŋ, ánɛ lefɛ̄ nnɛ̄t ŋgyá mé Klísto, tɛ́ mbɔ a ke nɔ̄ŋ efóko akwɛ́, ḿbíkɛ ŋke mbɔŋ mɛ́t píke. »

²⁴ Pɔ́ lé épúp, ńcʉ́ʼɛ ŋgūʼtɛ áa Ndém ánɛ lezēŋ tsá.