Fílíip 4 - Eka Eswhī

¹ Púp me epɔ̄ memía pīi, é teē nzwiŋ, páʼ pɛ lɛtneē ánɛ Atsyapuɔ lā, ndɛ́ʼ pɛ eká á lejūʼ nchu yí. Meŋ á si ntsáa tɛʼ, á lezēŋ njʉ́ɔ á wɛ́. Ntē gá é si ndētɛ tɛ́ʼ, melaʼ mīi pɛ é si ŋgɔ́ ayiŋne mefaʼ mbɔŋ mīi, meŋ ke ghʉ̄ʉ̄, á wɛ́ megaŋ ŋkɔŋ pá.

Pɔ́ɔl a á ega ŋgyáa á nzoknzem ntekné á mbū epuɔ Fílíio

² Meŋ á si ntékɛ á Evodi pɔ́ Sɛŋtish, éswíŋtɛ á wɔ́p ŋ́gɛ, páʼ pɔ́ lɛtneē ánɛ Atsyapuɔ lā, pɔ́ ewáʼ mbo zīi é tsɛtsɛlɛ pɔ́p, ŋ́gɔ́ á taʼ nchu.

³ Ŋ́gɔ́ mé wu, mbɔŋ esoó afaʼ ga, tswíte wɔnzwí puɔ mɛ́t á lenāŋ mé taʼ nchu. Pek a pɔ́p é ke tshí á taʼ nzem, ḿmāʼ ncu á leghʉ, ŋke mbɔŋ é saŋ ejʉʼ, pek a pɔ́p mbɔɔ Klemaŋ, ŋ́ghʉ̄ emɔ̄ʼ mesoó afaʼ pá. Ndém a lē ndáʼ mbú ńtí nzēŋ mɔ́p, á ntē aŋwaʼne nzēŋ epuɔ pīi, pɔ́ wɛɛ̄ lenāŋ leswhī.

⁴ Páʼ pɛ lɛtneē ánɛ Atsyapuɔ lā, pɛ enáŋ efʉʼ tsem mé lekāk. Meŋ zéŋɛ ndʉ́ɛ́ mé pɛ, pɛ enáŋ mé lekāk.

⁵ Pɛ eghʉ̄ tɛ epuɔ metsem, e ejʉ́ɔ páʼ, pɛ pwɛneé. Pɛ ekímte páʼ á cʉʉ́ʼ ŋgʉɔ mbīa, Atsyapuɔ a eshʉ̄ʼ.

⁶ Ndɛ́ʼ pɛ epú ndā nnɛ̄t ánɛ amɔ̄ʼ azō, a cʉ́ʼɛ épúp, mbɔ pɛ tshíɛ ánɛ akɔ̄ anu lɛ́, pɛ elɔ̄ɔk aswiŋte, ńdɔ́ á Ndém ajū mīi á mbū pɛ ŋkíŋɛ, ŋ́gē elɔ́ épúp, ésyákne á yí, ḿbúʼ mbū ŋ́gɛ, a etswíte á wɛ́.

⁷ Pɛ ghʉɛ épúp, Ndém á yá á wɛ́ apwɛne zīi, á puú efáŋ ńtɔ́k ajū mīi, leghi ŋiŋ ntsem, é gɔ ekwāŋte. Apwɛne mɛ́t, a epú ŋkápte á wɛ́, ńtɔ́te leghi tsɛ́, melaʼ mīi pɛ lɛtneē ánɛ Yɛɛ́so Klísto.

⁸ Meŋ a ge emakne me epɔ̄ memía, élé mé pɛ gɛ, pɛ etshí á akwaŋte zɛ́ ánɛ ajūɔ tsem zīi, azwíŋ á éwú, ńdɔkɔ ndʉ́ɛ́ ajū mīi, á anuúnē, áju mīi á ndeŋ ndeŋ, áju mīi á te alɔ́ʼ, áju mīi á gɔ epɔ̄ɔŋ epuɔ, áju mīi mɛ́ gɔ ekɔ̄ŋte, áju mīi mɛ́ gɔ ewūʼte, áju mīi á yaá mekuʼ.

⁹ Ajūɔ tsem zīi, meŋ ke ziʼné á wɛ́, pɛ ejúʼ mvéŋ, mbɔɔ azi pɛ ke júʼ á gá á leshūŋ á wɛ́, mbɔɔ azi pɛ ke jʉ́ɔ meŋ nɔŋ ŋghʉ̄ɛ, pɛ ezéŋ ŋghʉ̄ azɛ́ épúp. Ndém Ŋgap‑Apwɛne, a egɔ́ mé pɛ.

Pɔ́ɔl a á ega esyáknɛ epuɔ Fílíio ánɛ ajū mīi pɔ́ ke tóō

¹⁰ Meŋ á si esyákne á Atsyapuɔ páʼ meŋ ndɛtneē ánɛ yí, ntē gá é nɔŋ mbúu nnáŋa mé lekāk, melaʼ mīi pɛ ke zéŋ nziɛ, ŋ́kwāŋte á gá leswhī leswhī. Pɛ kɛ si nzi nnɔ̄ŋ ŋkwaŋtɛ á gá kwaŋte, táʼ, eshhʉ̄ á lelɔk ntswíte á gá, é piŋ nnɔ̄ŋ te ntúɔ́.

¹¹ Meŋ te ndʉ́ɛ́ páʼa melaʼ mīi, amɔ̄ʼ azō á mbū meŋ ŋkíŋ ɛ́. Á gɔ́ áa lɛ, meŋ ndé nzíʼne á gá á lenāŋ mé lekāk, tɛ meŋ ndáʼa ŋgwɛ̄ azō lo, kɛɛ meŋ te wɛ̄ lɛ̄ɛ.

¹² Meŋ zhɛɛ́ á gá á lenāŋ á afʉʼ zīi, meŋ á ntē epūŋ, ńzhɛ́ á gá á lenāŋ á afʉʼ zīi, meŋ ŋgwɛɛ̄ azō tɛ á zá. Á efʉʼ etsem, mbɔɔ ejʉʼ etsem, azō á gɔ́ á esī, meŋ epfɛ́t tɛ nzwɛ́t. Ŋ́gɔ́ te éwú ú, meŋ enáŋ nzi. Meŋ ndē nzíʼne á gá á lenāŋ á afʉʼ zīi, meŋ ŋgwɛɛ̄ tɛ á zá. Ńzíʼne á gá á lenāŋ á afʉʼ zīi, meŋ á ntē epūŋ.

¹³ Klísto mé si ŋgyáa á gá mete, á lelɔk ŋkūʼ á lenāŋ ánɛ meshhʉ̄ metsem.

¹⁴ Tɛ mbɔɔ épúp lɛ́, pɛ ke ké ŋghʉ̄ azɛ́ áa mbɔŋɔ́, páʼ pɛ ke tswité á gá á ntē ŋgʉɔ̄ʼ zīi, meŋ a éwú la.

¹⁵ Mesoó pá epuɔ Fílíio, pɛ méŋwɛ̄t, é chʉʉ́ nnɛ̄t nzhɛ́ á mbɔŋɔ́ á légɛ, á lɛ afʉʼ zīi, meŋ nde zī á letswi ŋke mbɔŋ, á ntē apak ŋgɔŋ Maseduan, éshʉʼ efhó éwú ŋgʉ̄ɔ, pɛ pwɔ̄ ndaʼ mé tswíte á gá. Amɔ̄ʼ alúŋ epuɔ Yɛɛ́so ndɛʼɛ, á té yá á gá ŋkāp, ńdɔk ntswíte á gá á.

¹⁶ Tɛ nzī efhó páʼ meŋ ndɛ á tésɔŋ Tesalonik, pɛ tó ajū mīi, á lɛ á mbū meŋ ŋkíŋɛ, ŋ́gʉɔ tɛ nzáne, ńdɔk ntswíte á gá.

¹⁷ Meŋ ndʉ́ɛ́ páʼa, meŋ te ndɔ̄kɔ ŋ́gɛ, meŋ á si ntshíɛ ntē gá ánɛ ecū mīi, mɛ́ e yá mé meŋ ɛ́. Ajū mīi meŋ á si ntsáa, á gɔ́ áa lɛ, Ndém a elɛ nzápa ánɛ ecū mīi, pɛ gɔ eyá mé meŋ, ńnéŋ mbwɛ́né ánɛ pɛ.

¹⁸ Meŋ á chʉ́ nnɛ̄t mvéŋ ŋ́gɛ, meŋ ke jʉ́ɔ ajūɔ tsem zīi, pɛ ke tó á mbū meŋ. Á ke pú nzá, ńtɔ́k azi á ŋgɔ́ á mbū meŋ ŋkíŋɛ. Tsetsɔŋɔ, páʼ Epaflodit a ke lɔ̄k etsō tɛ nzá eshʉʼ ŋgyá mé meŋ lā, amɔ̄ʼ azō á té zɛ́t á mbū meŋ ŋkíŋɛ ɛ́. Etsō mɛ́t é si ŋgɔ́ páʼ epɔʼ yīi, é lemteē azík mbɔŋ, épɔʼ yīi, mɛ́ é yá á mbū Ndém, tɛ á véŋ, é nɔŋ mbɔ̄ŋɔ á yí lā.

¹⁹ Ndém yīi meŋ ŋguʼtɛ, a wɛɛ̄ lewūʼ te ndhʉ. A a láʼ etsia á nzem Yɛɛ́so Klísto, éyá á wɛ́ ajūɔ tsem zīi, á mbū pɛ ŋkíŋɛ, té cʉ nzem.

²⁰ Awuʼte a egɔ́ á mbū Ndém, á Mɔʼɔ́ yímpɛ, á meŋguʼ meŋguʼ. Á páʼa.

Atsaʼte á lelɔk nzōko

²¹ Meŋ a ge ezoko, élé á mbū pɛ gɛ, pɛ etsāʼte awɔ́ ŋiŋ lɛ́ yīi, a zapaá ánɛ Yɛɛ́so Klísto, ńcʉ́ʼ á ŋiŋ Ndém. Epɔ̄ memía pīi pek a pɔ́p é ega, é tsaʼte á wɛ́.

²² Epuɔ metsem pīi, pɔ́ zapaá ánɛ Yɛɛ́so, ńcʉ́ʼ epuɔ Ndém, é tsaʼte á wɛ́. Epi pɔ́ faʼa, á mba ŋwɛ́t ŋgɔŋ, é tswhi ntsāʼte á wɛ́.

²³ Ŋ́gɛ Atsyapuɔ Yɛɛ́so Klísto, a lɛ ŋghʉ̄ anu mbɔŋ té ndhʉ ánɛ pɛ.