Fílíip 3 - Eka Eswhī

Kwaʼ ntií legɔ̄ ndeŋ ndeŋ á mvhɔ Ndém

¹ Epɔ̄ memía pá, meŋ a ge ezoko ajʉɔ anu mɛ́t, élé á mbū pɛ gɛ: pɛ egáŋte, melaʼ mīi pɛ lɛtneē ánɛ Atsyapuɔ. Á té si nzɛ́tɛ á gá, á lezēŋ ntí á mbū pɛ, ńdɔk mbīŋ ánɛ menu mīi, meŋ ndé zi eshúŋ á wɛ́ ɛ́. Meŋ eghʉ̄ɛ épúp, ńdɔkɔ ŋ́gɛ, ndɛ́ʼ amɔ̄ʼ anu tepɔŋ á ghʉ á wɛ́.

² Pɛ epá megaŋ epe, éwɔ fʉʼ‑menu tepɔŋ. Azɔ́p afaʼ á gɔ́ áa leŋīŋ ŋ́gɛ, mɛ́ eláʼ ntém á ŋiŋ, tɛ́ á gɔ́ áa anu ndémndēm.

³ Ḿpɛ mé kwaʼ epuɔ pīi, mɛ́ lé tém á wɔ́p. Ḿpɛ mé si ŋgē ewuʼtɛ á Ndém, Azwakne zí mé tshónɛ á yímpɛ. Ḿpɛ é si ndɔ̄kɔ á Yɛɛ́so Klísto tɛ́ ŋkāʼtɛ. Ḿpɛ gɔ le lɔ̄k ajū mīi, epuɔ menɔŋ mé le zapáā, tɛ́ ŋkāʼtɛ ɛ́.

⁴ Tɛ́ meŋ gɔ́ páʼa, ŋgɔ́ á ŋiŋ yīi meŋ nde gɔ́, meŋ enéŋ ntē gá ánɛ ntií menu mɛ́t. Tɛ ŋgɔ́ yīi, ŋiŋ a shúŋɔ á gá ŋ́gɛ, yí zhɛɛ́ azō éwú, meŋ shúŋ á yí ŋ́gɛ, meŋ zhɛɛ́ ntsyā á yí.

⁵ Mɛ́ le zhí á gá, á ghʉ eleʼé lefaá, mɛ́ tém á gá. Meŋ á ŋiŋ ánɛ nzwɛt epuɔ Islaɛl, ńtúɔ́ ánɛ atseŋ ŋgyā Bɛnjamɛŋ. Ŋ́gɔ́ á ŋiŋ alāʼ epuɔ Eble, memɔʼɔ́ pá é pú ŋgɔ́ epuɔ Eble. Ŋ́gɔ́ ánɛ lekūʼte lepé epuɔ Yúda, mbɔ meŋ ndɛ ŋiŋ nnɔ Falísia.

⁶ Ntē gá é le pú ŋkhʉ́ne á lekūʼte lepé epuɔ Yúda kuʼtée, tɛ meŋ ndʉɔ́ʼɔ epuɔ pīi, pɔ́ é ánɛ alúŋ epuɔ Yɛɛ́so. Ŋ́gɔ́ mé leziŋ ndeŋ ndeŋ, páʼ lepé é si nzɛ́ttɛ, mbɔ mɛ́ lɛ té alɔ́ʼ zá jʉ́ɔ.

⁷ Meŋ ke nɔ̄ŋ njʉ́ɔ ŋ́gɛ, ecū muɔ mɛ́t ntsem, é gɔ etswíte á gá. Tsetsɔŋɔ meŋ á fhó ánɛ ajū mīi, Klísto a ke ghʉ̄ ánɛ meŋ, ḿbiŋ njʉ́ɔ é pú ŋgɔ́ áa mepí.

⁸ Á té ndaʼ épúp ɔ́, akɔ̄ akɔ̄ lɛ́ á mbū meŋ, á té zɛ́t á azō ɔ́, melaʼ mīi, meŋ mbikɛ tɛ ŋkúʼte á Yɛɛ́so Klísto, á Atsyapuɔ ga, á gɔ́ á mbū meŋ, ŋ́gɔ́ mɛgém anu. É melaʼ mí tɛ́, meŋ á pú efhó ánɛ ajūɔ ntsem ntó, ńcʉ́ʼɛ njʉ́ɔ, ajūɔ tsem zīi meŋ ndɛɛ́ ŋghʉɛ, a gɔ́ á mbū meŋ, ŋ́gɔ́ áa páʼ nzɛ̄t lā. Tɛ́ elɔk páʼ meŋ á tó éwú lā, éghʉ, Klísto á egɔ́ á mbū meŋ, ńcʉ́ʼ egá ndaʼ azō.

⁹ Élɛtne ánɛ yí épúp, meŋ ńde zéŋ esé ŋ́gɛ, lekūʼte lepé epuɔ Yúda mé ghʉʉ̄, tɛ́ meŋ gɔ́ á ŋiŋ ndeŋ ndeŋ, á mvhɔ Ndém ɛ́. Táʼ, ajū mīi á gɔ eghʉ̄ʉ, tɛ́ meŋ gɔ́ á ŋiŋ ndeŋ ndeŋ á mvhɔ Ndém, á gɔ́ áa gá á lefɛ̄ nnɛ̄t ŋgyá á mbū Klísto. Ndém mé le ghʉ̄ʉ̄, meŋ egɔ́ á ŋiŋ ndeŋ ndeŋ á mvhɔ yí, melaʼ mīi meŋ ndē efɛ́ nnɛ̄t ŋgyá á mbū Klísto.

¹⁰ Ndaʼ ajū mīi meŋ á si ntsáa, á gɔ́ áa gá á lechʉ̄ nnɛ̄t nzhɛ́ á Klísto, ŋ́kūʼ á gá á lewɛ mete mīi, Ndém á le ghʉ̄ á zím ánɛ lewhʉ̄ páʼā, ŋ́gwɛ̄. Ŋ́kūʼ á gá á lejʉ̄ɔ ŋgʉɔ̄ʼ páʼ yí lā, tɛ ndáʼ ŋkwhʉ́, ńdeŋ ndeŋ páʼ yí lā.

¹¹ Éghʉ épúp, Ndém a eláʼ ŋghʉ̄, meŋ ezím azá ánɛ lewhʉ̄ páʼ yí, tɛ á zi ŋgɔ́ áa lɛ akɔ̄ lɛ́.

Lekak ete, á legʉɔ tɛ ŋkó

¹² Meŋ te ndʉ́ɛ́ ŋ́gɛ, meŋ á ndáʼ ŋgwɛ̄ ajū mīi, meŋ faʼa á, kɛ́ ŋ́gɛ, meŋ á ndáʼ ŋgʉɔ tɛ ŋkó ɔ́. A cʉ́ʼɛ épúp mbɔ, meŋ zɛɛ́t nnáa ŋgʉ̄ɔ mé mvhɔ, éfāʼ á gá á legɔ̄ ajū mīi, meŋ á si ntsáa. Yɛɛ́so Klísto a lɛɛ́ ŋghʉɛ, meŋ ecʉ́ʼɛ á ŋiŋ yi páʼā, melaʼ épúp.

¹³ Ŋgáŋ me epɔ̄ memía, meŋ ka kwāŋ ŋ́gɛ, meŋ á ndáʼ ŋgwɛ̄ ajū mīi meŋ tsáa á. Ndaʼ ajū mīi meŋ á si eshʉ́ɛ́, á gá á lelekne ajūɔ tsem zīi, meŋ ke ghʉ̄ʉ̄, ŋ́kāk ete nnáte azi á mvhɔ.

¹⁴ Á páʼa tɛ́ meŋ á si ŋkāka ete, éfāʼa á gá á leshʉʼ ŋgwɛ̄ ntaŋá yīi, Ndém a a shʉʼ elɔk etáŋ epuɔ pīi, a á zápa ánɛ Yɛɛ́so Klísto, ńtɔ́ŋ á wɔ́p, ŋ́gɛ pɔ́ eshʉʼ nnáŋ á lezēŋ yí, á lephū.

¹⁵ Ḿpɛ metsem pīi, ḿpɛ é tswhí ánɛ mɛnzhɛ Yɛɛ́so, ḿpɛ epú ŋgwɛ̄ ejʉɔ ntií akwaŋte mɛ́t. A piŋɛ ŋgɔ́ éyi, pɛ wɛɛ̄ amɔ̄ʼ akwaŋte ndɛʼɛ, Ndém á tsɔ́ʼ leghi tsɛ́.

¹⁶ Mía anu a gɔ́ áa lɛ, ḿpɛ metsem e eké nzɛ́t nzīŋɛ ánɛ mɛnzhɛ yīi, ḿpɛ ke zī nnɔŋ nzīŋɛ éwú, tɛ ŋkó tsetsɔŋɔ.

¹⁷ Epɔ̄ memía, pɛ metsem e epú efʉ̄ʼne á gá. Pɛ etshí menēk mɛ́ ánɛ epuɔ pīi, pɔ́ é si ŋkúʼtɛ atswhī zīi, pek ke ziʼné á wɛ́.

¹⁸ Epuɔ te nzáne é si ndɔ̄kɔ atswhī zɔ́p, ńtswīi ŋ́gɛ, pɔ́ kʉʉ̄ŋ ncʉ́ʼ megaŋ mbo Klísto, páʼ a le kwhʉ́ ánɛ mbaŋne paŋné. Meŋ ndé zi eshúŋ á wɛ́ tɛ ŋgʉɔ é zá. Tsetsɔŋɔ, meŋ á si nzéŋɛ ndɔ̄kɔ ntshi nnēk, éshúŋɔ á wɛ́.

¹⁹ Epuɔ puɔ mɛ́t, pɔ́ é si nzīŋɛ ánɛ mɛnzhɛ yīi, a a láʼ eghʉ pɔ́ elákne, melaʼ mīi, pɔ́ lē ndɔk levem tsɔ́p, ŋ́ghʉ̄ ewɔp Ndém. Pɔ́ ghʉʉ̄ menu mīi esē é ke gɔ́ é kú á wɔ́p éwú, ḿbiŋ ŋgɔ́ si ŋkáka. Ntē wɔ́p é tshí áa ánɛ tsitsi ndo esī atsetsáʼ.

²⁰ Ḿbiŋ ŋgɔ́ mé pímpɛ, mbɔ ḿpɛ é epuɔ alāʼ Ndém. Ḿpɛ é si nzwíʼtɛ aleʼé zīi, Atsyapuɔ Yɛɛ́so Klísto, a a láʼ efhó éwú eshʉʼ eghʉ, ḿpɛ etswɛ́t.

²¹ A a láʼ esɛt mbe nnɛ̄t zímpɛ zīi, e gɔ́ áa apwɛɛ́t‑azō, e ecʉ́ʼ páʼ mbe nnɛ̄t zi lā, ŋ́gwɛ̄ á shʉ́shɔ́k. A a láʼ elɔk mete mīi a lɔkɔ ŋghʉ̄ɛ, ajūɔ tsem á júʼɔ nchu yí, tɛ́ eghʉ épúp.