Fílíip 2 - Eka Eswhī

Pɛ náŋa, pɛ egɔ́ á taʼ nchu, ésóʼne nnɛ̄t ŋgyá á esī

¹ Páʼ legɔ̄ yīi, Klísto mé si ntsāŋa á wɛ́, a á si ŋghʉ̄ɛ pɛ etētɛ lā. Páʼ ŋkɔŋne zīi a wɛɛ̄ ánɛ pɛ, e é si nnɔŋ ŋghʉ̄ɛ, pɛ ekāka ete lā. Páʼ pɛ kuʼteé Azwakne Ndém tɛ́ ndɔk nnáŋ lā. Páʼ pɛ wɛɛ̄ apɔŋɔ́ ntē pɔ́ atsāmezeŋɛ á tsetsɛlɛ pɛ lā.

² Pɛ egɔ́ á taʼ nchu, ŋ́kɔ̄ŋne mennɛ̄t mɛ́t, ŋ́gwɛ̄ á taʼ ntē, pɔ́ taʼ akwaŋte, púp, lekāk e egɔ́ á ntē meŋ tɛ nzíʼ.

³ Ndɛ́ʼ pɛ gē eghʉ azō, ńdɔkɔ efāʼa anu ánɛ ŋiŋ, kɛɛ́ ndɔkɔ ntswīi nnɛ̄t lɛ́. A cʉ́ʼɛ épúp, pɛ enɔ̄ɔŋ nnɛ̄t á esī á tsetsɛlɛ pɛ, awíɛ awíɛ á piŋ njʉ́ɔ mmɔʼ ŋiŋ áa páʼ, ŋgaŋ mé tsyaā á yí lā.

⁴ Ndɛ́ʼ ŋiŋ á lɛ ŋghʉ̄ áa ajū mīi, yíléyī ndaʼ mé gʉɔ me njhʉʉ́ apɛ éwú. Pɛ eghʉ̄ azi, a tswíte emɔ̄ʼ epuɔ azɔ́p.

⁵ [Pɛ enáŋ ánɛ ntií zīi, epuɔ pīi pɔ́ ziīŋ á nzem Yɛɛ́so Klísto, é pɔŋteé á lenāŋ épúp].

⁶ Tɛ mbɔɔ páʼ pɔ́ Ndém é lɛ taʼ azō lā, A lɛ te lɔ̄k épúp, ésáʼ nnɛ̄t ŋ́gɛ, pɔ́ yí é ndeŋ ndeŋ ɛ́.

⁷ A cʉ́ʼɛ épúp, mbɔ a le pú ntshi ajūɔ tsem nnéŋ, ḿvéŋ á lecʉ̄ʼ ŋgaŋ afaʼ. Púp, ńcʉ́ʼ á ŋiŋnɔŋ tɛ mɛ́ zhí á yí zhíi. Á zéŋ nnáŋ ŋ́gɔ́ á ŋiŋnɔŋ tɛ mɛ́ jʉ́ɔ á yí.

⁸ Yí méŋwɛ̄t á véŋ á lesōʼne nnɛ̄t zi ŋgyá á esī, ńjúʼ nchu Ndém tɛ ndáʼ ŋkwhʉ́. Ŋ́gē ekwhʉ́, mɛ́ kwɛte á yí ánɛ mbaŋne paŋné.

⁹ Melaʼ épúp tɛ́, Ndém a le pú nchʉ́ á yí, ŋ́gyá á yí á atsyantsɔp lezēŋ.

¹⁰ Ŋ́ghʉ̄ɛ épúp ŋ́gɛ, ajūɔ tsem tɛ nnɔ̄ŋ nzwāknɛ zīi, á athʉ́ lephū, mbɔɔ á esī atsetsáʼ, mbɔɔ á nzem esī, á júʼɔ á lekīm lezēŋ Yɛɛ́so, á pú ntswíʼte á mvhɔ yí, ŋ́gyá mekuʼ mí.

¹¹ Ŋ́gɛ, ŋiŋ ntsem a esáʼ ŋ́gɛ, Yɛɛ́so Klísto mé Atsyantsɔp. Awiɛ́ awiɛ́ a eghʉ̄ épúp, ńdɔk ŋgūʼte á Ndém Mɔʼɔ́.

Epuɔ Yɛɛ́so é si ŋgɔ́ páʼ ŋkaʼ lā

¹² Mepɔŋ mesoó pá, pɛ gɛ nzī nzīŋɛ ánɛ mekhu anu zīi, meŋ nde ziʼné á wɛ́, pɛ etswiʼne nzīŋ éwú, tɛ pɛ é le lɛ̄ nzīŋ éwú áa afʉʼ zīi, meŋ á tsetsɛlɛ pɛ ɛ́, pɛ etswhi nzīŋ éwú tsetsɔŋɔ, páʼ meŋ te á esī í. Pɛ ekāk ete, ńdɔ̄k mekuʼ pɔ́ lenɔŋ nnɛ̄t á esī á mvhɔ Ndém, ńtswī á légɛ, a lē ŋghʉ pɛ tswɛ́t,

¹³ melaʼ mīi, Ndém mé si ntshónɛ á wɛ́, pɛ tsáa, ḿbiŋɛ ŋkūʼɔ á leghʉ ajū mīi, a kɔɔ̄ŋ ŋ́gɛ mɛ́ eghʉ̄.

¹⁴ Pɛ eghʉ̄ tɛ mbɔɔ akɔ̄ lɛ́, té zwɛ́tte, té ŋak.

¹⁵ Ńdɔk mbú ŋgɔ́ epuɔ pīi, mɛ́ té si ndāʼa á wɔ́p ɔ́. Épuɔ pīi alɔ́ʼ zɔ́p á té éwú ú. Ŋ́gɔ́ epɔ̄ Ndém, épuɔ pīi pɔ́ é te alɔ́ʼ á nnɔ epuɔ ŋguʼ puɔ, mégaŋ esɔ̄, ŋgɔ́ epuɔ tepɔŋ. Pɛ egɔ́ á nnɔ pɔ́p, ŋ́kɛ̄ʼɛ, páʼ mecɔʼ saŋ é kɛʼɛ ejʉʼ lā.

¹⁶ Ńnɔŋ eshúŋɔ á wɔ́p ashuŋne zīi, pɔ́ e láʼ elɔk egɔ́ éwú. Pɛ ghʉɛ épúp, mbɔ a láʼ ekuʼ aleʼé zīi, Yɛɛ́so Klísto a piŋɛ nzem, lekāk e egɔ́ á ntē meŋ, melaʼ mīi, á si ŋgɔ́ ayiŋne zīi, á tswii á légɛ, emá mefaʼ pɔ́ ega lezap nnɛ̄t á nnɔ pɛ, a kɛ te ndémndēm ɛ́.

¹⁷ Wɛ́ á lefɛ̄ nnɛ̄t ŋgyá á mbū Ndém, a á si ŋgɔ́ páʼ, epɔʼ yīi, pɛ nɔŋɔ á mbū yí lā. Mɛ́ zi eshʉ̄ʼ nzwhí á gá zwhíi, mbɔ metshi má e gɔ́ páʼ meluʼ mīi, meŋ tswiʼnɛ ánɛ epɔʼ mɛ́t lā. A shʉʼɛ ŋgɔ́ épúp, mbɔ ŋgɔŋ e pɔŋ á gá, ḿpɛ epúte ŋkák.

¹⁸ Mbɔɔ pɛ azɛ́, pɛ ekák, ḿpɛ metsem e epúte ŋkák.

Pɔ́ɔl a á ega ntúɔ́ á Timotɛ pɔ́ Epaflodit

¹⁹ Meŋ á si ŋkwāŋtɛ, ńnɔŋ nzhɛ́ɛ á légɛ, Atsyapuɔ Yɛɛ́so a shʉʼ evéŋ, meŋ egákne ntó á Timotɛ á mbū pɛ. A egʉɔ mbīŋ nzem, éshúŋ á gá menu meswhī ánɛ pɛ, e eghʉ̄, meŋ ewɛ̄ mbʉʼ eswhī.

²⁰ Mmɔʼ ŋiŋ a puú te ega yīi, pek yí é wɛɛ̄ á taʼ akwaŋte ɛ́, ńdaʼ Timotɛ. A á si ntsáa á lechʉ̄ nnɛ̄t ntswíte á wɛ́.

²¹ Mvuʼ epuɔ metsem é si ŋghʉ̄ɛ mefaʼ mīi, e tswíte á wɔ́p pɔ́plépɔ̄p. Ḿbiŋɛ te nzɛ́t ŋghʉ̄ɛ ajū mīi, Yɛɛ́so Klísto a á si ŋkɔ̄ŋɔ ɔ́.

²² Ŋ́gɔ́ mé Timotɛ, mbɔ pɛ é si nzhɛ́ɛ páʼ, a ke tswī á légɛ, yí wɛɛ̄ atswhī mbɔŋ. Pek yí é ke puté ŋghʉ afaʼ, á letswi ŋke mbɔŋ. Á nɔŋ ntswítɛ á gá ánɛ afaʼ jʉɔ mɛ́t, páʼ méŋkhʉ̄ a tswítɛ mɔʼɔ́ yi lā.

²³ Meŋ á si ŋkwāŋtɛ ŋ́gɛ, mɛ́ shʉʼɛ nzáʼ ntsaŋ za páʼ mɛ́ é záʼ, meŋ ndɛ̄ɛ ntó á yí á mbū pɛ.

²⁴ Meŋ á si nzéŋɛ nchʉ́ɛ nnɛ̄t nzhɛ́ɛ á légɛ, Atsyapuɔ a shʉʼ evéŋ, meŋ méŋwɛ̄t é le nnáŋ á leshʉʼ tɛ njʉ́ɔ á wɛ́ ɛ́.

²⁵ Meŋ á jʉ́ɔ ŋ́gɛ, á mbɔŋ á gá á lezēŋ ntó á Epaflodit, á mbū pɛ. Á méŋ mɔ́ ga, ŋ́gɔ́ á nziŋ‑ntō wɛ yīi, pɛ ke tó á yí, ŋ́gɛ a eshʉʼ ŋgyá ajū mīi, á mbū meŋ ŋkíŋɛ, ńdɔk ntswíte á gá lā. Pek yí é ke puté ŋghʉ afaʼ, ńdʉɔ́ʼ ncu ánɛ ŋke mbɔŋ.

²⁶ A ke nɔ̄ŋ mbúu eshʉ́ɛ́ tɛʼ, á lezēŋ njʉ́ɔ á wɛ́ metsem. Á piŋ nnɔ̄ŋ ŋgēnɛ á yí, páʼ pɛ ke júʼ á légɛ, a á si ŋgɔ̄ɔ.

²⁷ Á anuúnē, a ke gɔ̄ tɛ nnɔ̄ŋ á nchu lewhʉ̄, táʼ, Ndém á ké ntsá á yí, tɛ a te lɛ ntsáa á yí ndaʼá, ńzéŋ ntsá á gá azá, ŋ́gɛ ndɛ́ʼ mmɔʼ lemek á zéŋ eshʉ̄ʼ ńzápne ánɛ eyi meŋ á éwú la.

²⁸ Melaʼ épúp tɛ́, ntē ga é si ŋkhʉ́nɛ á letō á yí á mbū pɛ, ńzhɛ́ páʼ, pɛ e kó ezéŋ ege ejʉ́ɔ á yí, ntē wɛ́ e egáŋte, meŋ méŋwɛ̄t azá, meŋ ńde zéŋ mmēk ɛ́.

²⁹ Púp, a a shʉʼ eshʉʼe, pɛ elɔ̄k á kwaʼ mía lekāk tɛ́ ntswí á yí, melaʼ mīi a á méŋ mɔ́ wɛ á nzem Atsyapuɔ. Pɛ eghʉ̄ mekuʼ ntií epuɔ pīi, pɔ́ é páʼ yí lā.

³⁰ A ke nɔ̄ŋ ŋgɔ̄ á ŋkwhʉ́ɛ ánɛ mefaʼ Klísto. A ke kó á leshʉʼ á ŋgyā ajū mīi, pɛ méŋwɛ̄t é le gɔ le kūʼ á leshʉʼ ŋgyá á mbū meŋ, ńdɔk ntswíte á gá á, ńnɔŋ ŋgɔ̄ á ŋgyá athū zí.