Efɛze 6 - Eka Eswhī

Ntií zīi ewɔŋkhʉ̄ e pɔŋteé á lelɔk nnáŋ pɔ́ a memɔʼɔ́ pɔ́p

¹ Ŋ́gɔ́ mé pɛ ewɔŋkhʉ̄, awɔ́ lɛ́, a ejúʼ nchu mɔʼɔ́ yi pɔ́ mɛ́ wɔ́p, páʼ Atsyapuɔ a á si ŋkɔ̄ŋɔ épúp. Á si ŋgɔ́ ndeŋ ndeŋ, ajū mīi pɛ pɔŋteé á leghʉ.

² Mvhɔ lepé tsīi, Ndém a le gē eyá, ŋ́ghʉ̄ á alaʼne éwú, é leé ŋ́gɛ, ŋiŋ a eghʉ̄ mekuʼ mɔʼɔ́ yi pɔ́ mɛ́ wɔp.

³ Alaʼne mɛ́t á gɔ́ lɛ, ŋiŋ a ghʉɛ épúp, mbɔ a a wɛ lepɔŋ, égɔʼ enáŋ á ndo esī atsetsáʼ.

⁴ Ŋ́gɔ́ mé pɛ memɔʼɔ́ epɔ̄, ndɛ́ʼ pɛ eswite ewɔŋkhʉ̄ pɛ́. Pɛ gē ekɔ́ʼte á wɔ́p, ńdɔ̄k meshuŋne mīi, é fhɔ́ɔ á mbū Atsyapuɔ, ńték á wɔ́p, ńzéŋ ndɔ̄k ńtswɛ̄te á wɔ́p.

Meŋkwa pɔ́ memɔʼɔ́ pɔ́p

⁵ Ŋ́gɔ́ me pɛ meŋkwa, pɛ ejúʼ nchu epuɔ pīi, pɔ́ pɔɔ́ŋ á wɛ́, ŋ́ghʉ̄ mekuʼ mɔ́p, ésóʼne nnɛ̄t mé esī á mvhɔ pɔ́p, ŋ́gwɛ̄ ntē mbɔŋ á mbū pɔ́p. Pɛ epú ŋghʉ̄ épúp, ndeŋ ndeŋ páʼ pɛ ghʉʉ̄ á mbū Klísto épúp.

⁶ Ndɛ́ʼ pɛ lɛ ŋghʉ̄ áa afʉʼ zīi, mɛ́ é si mbípnɛ á wɛ́. Ndɛ́ʼ pɛ eghʉ̄ʉ tɛ á gɔ́ páʼ, pɛ lɛ ndɔ̄kɔ efāʼa áa légɛ, mɛ́ ekɔ̄ŋ á wɛ́ lā. Pɛ eghʉ̄ áa páʼ, meŋkwa Klísto pīi, pɔ́ é si ŋkhʉ́nɛ á leghʉ ajū mīi, Ndém a á si ŋkɔ̄ŋɔ lā.

⁷ Pɛ elɔ̄k ntē mbɔŋ, ŋ́ghʉ̄ afaʼ á mbū pɔ́p, páʼ pɛ ghʉɛ á mbū Atsyapuɔ lā, tɛ á le gɔ́ áa páʼ, pɛ ghʉɛ á mbū epuɔ menɔŋ lā á.

⁸ Pɛ é si nzhɛ́ɛ á légɛ: Atsyapuɔ a shʉʼ eyá ntaŋá á mbū awíɛ awíɛ yīi, a ghʉʉ̄ afaʼ mbɔŋ, tɛ ŋgaŋ a láʼa le gɔ́ ŋkwa, ká á ŋiŋ yīi, a naáŋ á ŋga athū yí.

⁹ Ŋ́gɔ́ mé pɛ wɔ pɔ́ŋ‑meŋkwa, mémɔʼɔ́ pɔ́p, pɛ eghʉ̄ azɛ́ ndeŋ ndeŋ épúp, á mbū meŋkwa mɛ́. Ndɛ́ʼ pɛ ekāak á wɔ́p kake. Pɛ ezhɛ́ ŋ́gɛ, pɛ a pɔ́p é wɛɛ̄ áa taʼ Mɔʼɔ́, á gɔ́ á athʉ́ lephū. Epuɔ menɔŋ metsem é mbū yí, ŋ́gɔ́ áa taʼ.

Tsitsi ncu yīi a fhɔ́ɔ á mbū Ndém

¹⁰ Meŋ a ge ezoko, élé gɛ, páʼ pɛ lɛtneē ánɛ Atsyapuɔ lā, pɛ ezápa ánɛ mía mía mete mīi, a yáa á mbū pɛ, ńtswiʼne ntēte.

¹¹ Pɛ ezwík á tsitsi ncu ntsem yīi, a fhɔ́ɔ á mbū Ndém, tɛ́ ndɔk ŋkūʼ á wɛ́ á lete, éfʉʼ metsem yīi, Sɛ́ta a á si efāʼa ŋ́gɛ, pɛ efā nzhɛ.

¹² Ḿpɛ te páʼā, ńnɔŋ ndʉɔ́ʼɔ epuɔ menɔŋ ɔ́, ḿpɛ é si ndʉɔ́ʼɔ áa ajūɔ tsem zīi, á sáʼa lefɔ, ájuɔ tsem zīi á sáʼa mete, éwɔ sáʼ‑ŋgɔŋ jʉɔ, páʼ e ké ŋgɔ́ áa ntē nzém lā, ńdʉɔ́ʼɔ ajūɔ tepɔŋ ntsem zīi, á wɛɛ̄ mete á methʉ́.

¹³ Melaʼ épúp tɛ́, pɛ ezwík á tsitsi ncu yīi, a fhɔ́ɔ á mbū Ndém, ńzhɛ́ páʼ, á gɔ́ɔ aleʼé zīi, á ka láŋa, pɛ etēe athū á mbū ŋgaŋ mbo, ńdʉɔ́ʼ tɛ njhʉ́, ńzɛ́t ntē tee.

¹⁴ Púp, pɛ etshíte á ajʉʼ, ḿbíp, anuúnē a egɔ́ á mbū pɛ, ŋ́gɔ́ páʼ ekɔp yīi, pɛ cuúŋ á mbembéŋ pɛ lā. Leghʉ anu ndeŋ ndeŋ, a egɔ́ á mbū pɛ, ŋ́gɔ́ páʼ nzhó ncu zīi, mɛ́ lɔɔ̄k atʉɛ́ ncūŋte lā.

¹⁵ Lekhʉ̄ne á letswi ŋke mbɔŋ, páʼ é yáa apwɛne lā, a egɔ́ á mbū pɛ, ŋ́gɔ́ páʼ meláŋ mīi, pɛ zwiík á mekhu pɛ lā.

¹⁶ Lefɛ̄ nnɛ̄t ŋgyá á mbū Ndém, á egɔ́ á mbū pɛ, ŋ́gɔ́ páʼ kʉ́ʼɛ́ ncu lā. Kʉ́ʼɛ́ ncu mɛ́t a etswíte á wɛ́ á lepīk mmók yīi, Efɔ menu tepɔŋ a á yɛt ánɛ mekɔŋ, tɛ́ ndɔk ndʉɔ́ʼ á wɛ́.

¹⁷ Pɛ evéŋ ŋ́gɛ, Ndém a eghʉ̄, pɛ etswɛ́t. Letswɛ̄t mɛ́t a egɔ́ á mbū pɛ, ŋ́gɔ́ páʼ ezɛ́ nta ncu zīi, mɛ́ lɔɔ̄k atʉɛ́, ńcūŋte lā. Pɛ ekúʼte ŋŋí ncu zīi, Azwakne Ndém, á yáa á mbū pɛ, á gɔ́ ashuŋne Ndém.

¹⁸ Pɛ eswíŋte á Ndém, ánɛ ajūɔ tsem. Azwakne Ndém a etswíte á wɛ́, á lelɔ̄ á Ndém azō efʉʼ metsem. Ndɛ́ʼ ŋiŋ á lí, pɛ eswíŋte á Ndém té ká, á athū epuɔ Ndém metsem.

¹⁹ Pɛ eswíŋte á Ndém, mbɔɔ ánɛ azá athū. Éswíŋte ŋ́gɛ, Ndém a enéŋ ashuŋne zí á nchu meŋ, meŋ ndɔk ntɛ̄ʼte éshúŋ ntsem zīi, e lʉɔneē ánɛ ŋke mbɔŋ.

²⁰ Meŋ á si ŋgɔ́ á ŋiŋ yīi, a tɔ́ktɛ ntswīi ŋke mbɔŋ mɛ́t. É melaʼ púp tɛ́, meŋ á ŋgyā atʉɛ́. Púp, pɛ eswíŋte ŋ́gɛ, Ndém a eghʉ̄, meŋ etswī ŋke mbɔŋ mɛ́t, ntɛʼte tɛʼte, páʼ meŋ mbɔŋteé á gá á leghʉ épúp.

Atsaʼte á lelɔk nzōko

²¹ Meŋ á si ŋkɔ̄ŋɔ ŋ́gɛ, pɛ ezɛ́, e ezhɛ́ ajʉʼ zīi, meŋ á tsetsɔŋɔ ntshí éwú, ńzhɛ́ ajū mīi, meŋ á si ŋghʉ̄ɛ. Melaʼ épúp tɛ́, Tishik méŋ mɔ́ yímpɛ, meŋ kɔ̄ɔŋ á yí tɛʼ, á nɔŋ ŋghʉ̄ɛ afaʼ Atsyapuɔ mé taʼ ntē, a a shʉʼ eshʉʼe, éshúŋ á wɛ́ menu meswhī ntsem ánɛ meŋ.

²² Meŋ túɔ́ á yí á mbū pɛ mé ntií, ŋ́gɛ a eshʉʼ eshúŋ á wɛ́ páʼ pek é épúp, ŋ́kó esēmte á wɛ́.

²³ Ŋ́gɛ Ndém Mɔʼɔ́ mbɔɔ Atsyapuɔ Yɛɛ́so Klísto, e eghʉ̄, epɔ̄ memía metsem, e enáŋ mé apwɛne, ńnáŋ mé ŋkɔŋne á tsetsɛlɛ pɔ́p, éfɛ́ nnɛ̄t ŋgyá á mbū Ndém.

²⁴ Ŋ́gɛ Ndém a elɛ ŋghʉ̄ anu mbɔŋ té ndhʉ, ánɛ epuɔ metsem pīi, pɔ́ kɔɔ̄ŋ Atsyapuɔ yímpɛ Yɛɛ́so Klísto, mé ŋkɔŋne zīi, e te ndáʼa mmī í.