Efɛze 5 - Eka Eswhī

Epuɔ Yɛɛ́so é pɔŋteé á leziŋ á ntē ŋkaʼ

¹ Páʼ pɛ é si ŋgɔ́ ewɔŋkhʉ̄ Ndém, á kɔŋ á wɛ́ lā, pɛ efāʼ á leswhī á yí.

² Pɛ elɔ̄k ŋkɔŋne tɛ́ nnáŋ, ńdeŋ ndeŋ páʼ Klísto a le náŋ épúp. A le kɔ̄ŋ á yímpɛ, tɛ ŋgyá athū nnɛ̄t zí méŋwɛ̄t, melaʼ mímpɛ, ńdɔ̄k nnɔ̄ŋ epɔʼ yīi, é pɔɔ̄ŋ á Ndém.

³ Pɛ é si ŋgɔ́ epuɔ Ndém, púp á ka pɔ̄ŋ ŋ́gɛ, agā, mbɔɔ eziɛ́ ntií anu epe lɛ́, mbɔɔ atsɔʼɔ́‑ntɔ̄ŋ, a ezi mbú ŋgɔ́ á nnɔ pɛ ɛ́.

⁴ Ndɛ́ʼ pɛ eshúŋ meshuŋne esē, ndɛ́ʼ pɛ eshúŋ meshuŋne mīi, methū é té éwú ú, ndɛ́ʼ pɛ eshúŋ meleém eshuŋne. Á épúp páʼā, á té pɔŋ. Pɛ nɔŋ eshúŋnɛ, pɛ eshúŋne ndɔ̄k esyákne á Ndém.

⁵ Pɛ ezhɛ́ á mbɔŋɔ́ á légɛ, megaŋ agā, mbɔɔ megaŋ epe, é té e láʼ ewɛ azɔ́p ajʉʼ á ntē Lefɔ Ndém pɔ́ Klísto ó. Megaŋ atsɔʼɔ́‑ntɔ̄ŋ é té e láʼ ewɛ azɔ́p ajʉʼ éwú ú, melaʼ mīi, ŋgaŋ atsɔʼɔ́‑ntɔ̄ŋ, a á si ŋgɔ́ páʼ ŋiŋ yīi, a wuʼtɛ mesī lā.

⁶ Ndɛ́ʼ pɛ ecʉ́ʼ, ŋiŋ á lɔk ashuŋne te methū mbɔ̄p á wɛ́. Menu tepɔŋ muɔ mɛ́t ntsem mé ghʉʉ̄, Ndém á záŋ á lɔ́ŋ á mbū epuɔ pīi, é teē athū á mbū yí.

⁷ Púp, ndɛ́ʼ pɛ a ntií epuɔ jʉɔ mɛ́t, é púte ŋghʉ̄ azō.

⁸ Á lɛ amɔ̄ʼ afʉʼ, pɛ náŋ áa ntē nzém, á ké mbiŋ ŋgɔ́ tsetsɔŋɔ, mbɔ pɛ kʉʉ̄ŋ ncʉ́ʼ ŋkaʼ, éfhó ánɛ páʼ pɛ lɛtneē ánɛ Atsyapuɔ. Púp, pɛ enáŋ páʼ epuɔ pīi, pɔ́ naáŋ á ntē ŋkaʼ lā.

⁹ Ŋiŋ yīi a naáŋ á ntē ŋkaʼ, a eghʉ̄ menu membɔŋ, ńzīŋ ndeŋ ndeŋ, ńnáŋ mé anuúnē.

¹⁰ Pɛ etsāʼ á ntē pɛ, tɛ nzhɛ́ ajū mīi, á pɔɔ̄ŋ á Atsyapuɔ Yɛɛ́so.

¹¹ Ndɛ́ʼ pɛ a epuɔ pīi, é naáŋ á ntē nzém, é púte azō ŋghʉ̄. A cʉ́ʼɛ épúp, pɛ esīate wɔ́p. Pɔ́ gɔ le ghʉ̄ azō, tɛ methū é tó ɔ́.

¹² Ajū mīi, epuɔ puɔ mɛ́t, é lʉɔnɛ ŋghʉ̄ɛ, á tɛ esē é kú epuɔ á leshūŋ.

¹³ Mɛ́ piŋ ŋgɔ́ tɛ esīa, ŋkaʼ é ghʉ, mɛ́ pú njʉ́ɔ.

¹⁴ Ajūɔ tsem zīi, mɛ́ piŋ esīa, ŋkaʼ é ghʉʉ̄, mɛ́ pú njʉ́ɔ. Á épúp tɛ́, mɛ́ zɔɔ̄p ŋ́gɛ: «Wu yīi o ó si ndíi, ziɛ̄, fhó á nnɔ mepfhō, ḿbʉ́ʼɛ nnɛ̄t, Klísto a elɔ̄k ŋkaʼ yí, ŋ́kɛ̄ʼɛ á wú. »

¹⁵ Púp, pɛ elāk athū zɛ́ ánɛ ntií atswhī zīi, pɛ lɔɔ̄k nnáŋ. Ndɛ́ʼ pɛ enáŋ páʼ metsetseŋ lā, pɛ enáŋ áa páʼ megaŋ azhɛ̄‑anu lā.

¹⁶ Pɛ ejhʉ́ apɛ, ánɛ njhʉ̄ zīi pɛ lɔɔ̄k nnáŋ tsetsɔŋɔ, melaʼ mīi, meleʼé alāʼ mīi, ḿpɛ lɔɔ̄k nnáŋ á ayáʼa, é té si mbɔ̄ŋɔ ɔ́.

¹⁷ Ndɛ́ʼ pɛ enáŋ páʼ metsetseŋ lā, pɛ egɔ́ efʉʼ metsem, éfāʼ á lezhɛ̄ ajū mīi, Atsyapuɔ a á si ŋkɔ̄ŋɔ ŋ́gɛ pɛ eghʉ̄.

¹⁸ Ndɛ́ʼ pɛ ecʉ́ʼ meluʼ é jhʉ́ á wɛ́, melaʼ mīi meluʼ é tshóne á ŋiŋ, á fate menu. Pɛ ecʉ́ʼ, Azwakne Ndém a epú njhʉ́ á wɛ́.

¹⁹ Pɛ egɔ́ á nnɔ pɛ, ńzɔ̄p mezɔp ntshi mīi, é ntē aŋwaʼne Ndém, ńdɔk ŋgūʼte á Ndém, ńzɔ̄p mezɔp ntshi epuɔ Yɛɛ́so, ńzɔ̄p mezɔp ntshi mīi, Azwakne Ndém á néŋ á ntē pɛ. Pɛ ezɔ̄p mé ntē wɛ́ ntsem, ńdɔk ŋgūʼte á Atsyapuɔ.

²⁰ Pɛ egɔ́ efʉʼ metsem, ńzápa ánɛ lezēŋ Atsyapuɔ yímpɛ Yɛɛ́so Klísto, ésyákne á Ndém Mɔʼɔ́, ánɛ ajūɔ tsem.

Ntií zīi epuɔ Yɛɛ́so é pɔŋteé á lenāŋ épúp, ánɛ alaá‑ŋgyā

²¹ Páʼ pɛ́ é si njúʼɔ nchu Klísto lā, pɛ esóʼne nnɛ̄t ŋgyá á esī, á nnɔ pɛ nzeŋne zeŋné.

²² Ewiɛ́ menzwí lɛ́, a esóʼne nnɛ̄t ŋgyá á esī, á mvhɔ ndō yi, ńdeŋ ndeŋ páʼ a soʼneé nnɛ̄t ŋgyá á mbū Atsyapuɔ Yɛɛ́so épúp,

²³ melaʼ mīi, á mbū menzwí páʼā, ndō yi mé gɔ́ eyi efɔ, ńdeŋ ndeŋ páʼ, ánɛ alúŋ epuɔ Klísto páʼā, Klísto mé gɔ́ á efɔ. Yí yīi a le ghʉ̄ʉ̄, alúŋ mɛ́t, páʼ á si ŋgɔ́ mbe nnɛ̄t zi lā, á tswɛ́t.

²⁴ Páʼ alúŋ epuɔ Yɛɛ́so á nɔɔ̄ŋ nnɛ̄t á esī á mvhɔ yí lā, á pɔŋ ŋ́gɛ, ewiɛ́ menzwí lɛ́, a enɔ̄ŋ nnɛ̄t á esī, ánɛ ajūɔ tsem, á mvhɔ ndō yi.

²⁵ Ŋ́gɔ́ mé pɛ mbaŋa, awíɛ awíɛ a ekɔ̄ŋ á nzwí yi, ńdeŋ ndeŋ páʼ Klísto a kɔɔ̄ŋ alúŋ epuɔ pí épúp. A le kɔ̄ŋ alúŋ epuɔ pí kɔɔŋ, tɛ ŋgyá athū nnɛ̄t zí melaʼ mɔ́p.

²⁶ A le kɔ̄ŋ á yí á lelɔk épúp, ŋ́ghʉ̄, alúŋ epuɔ pí, á kuʼ á legɔ̄ ajūɔ Ndém, ŋ́gē eghʉ epúp, ńdɔ̄k ashuŋne zí pɔ́ ntshi esōk á wɔ́p.

²⁷ Klísto a le kɔ̄ŋ á légɛ, alúŋ epuɔ pí a egē etshí á mvhɔ yí, ńnɔŋ ŋwāŋnɛ, ŋ́gɔ́ té alɔ́ʼ, ŋ́gɔ́ té nchʉ́, ŋ́gɔ́ té atswɛ́t. A le kɔ̄ŋ ŋ́gɛ, alúŋ epuɔ pí a ekūʼ á legɔ̄ ajūɔ Ndém, tɛ Ndém a nɔ̄ŋ le ndāʼa á wɔ́p ɔ́.

²⁸ Á páʼa tɛ́, ndō a pɔŋteé á lekɔŋ á nzwí yí épúp, páʼ athū nnɛ̄t zí lā. Ŋiŋ a kɔɔ̄ŋ á nzwí yi páʼā, ńdɔkɔ ŋkɔ̄ŋɔ athū nnɛ̄t zí méŋwɛ̄t.

²⁹ Mɛ́ laá njʉ́ɔ, ŋiŋ á gene mbe nnɛ̄t zi, yí méŋwɛ̄t ɛ́, a cʉ́ʼɛ épúp mbɔ, a tuŋneé á yí, ńzék á yí á mbɔŋɔ́. Á si ŋgɔ́ ajū mīi, Klísto a ghʉʉ̄, ánɛ alúŋ epuɔ pí,

³⁰ ŋ́ghʉ̄ɛ épúp, melaʼ mīi, ḿpɛ é si ŋgɔ́ mekim mbe nnɛ̄t zi.

³¹ Á gɔ́ páʼ mɛ́ le tí á ntē aŋwaʼne Ndém ŋ́gɛ: «Melaʼ épúp tɛ́, ŋiŋ mbaŋa a a fú enáŋ tɛ efak nnɛ̄t, ánɛ mɔʼɔ́ yi pɔ́ mɛ́ wɔp, égʉɔ ekwɛ́tɛ nnɛ̄t ánɛ nzwí yi, pɔ́ mémpīa e ekwɛ́tɛ ncʉ́ʼ á taʼ. »

³² Anuúne zīi á lʉɔneē ánɛ anu jʉɔ mɛ́t, á faáŋ tɛʼ. Meŋ á jʉ́ɔ azá ŋ́gɛ, á cʉteē á Klísto pɔ́ alúŋ epuɔ pí.

³³ Á zeéŋ ncʉ̄te á wɛ́ azɛ́: awɔ́ ŋiŋ nnɔ wɛ lɛ́, a pɔŋteé á lekɔŋ á nzwí yi, páʼ athū nnɛ̄t zí lā, ewiɛ́ menzwí lɛ́, á pɔ́ŋte á lejūʼ nchu ndō yi.