Efɛze 4 - Eka Eswhī

Epuɔ Yɛɛ́so é pɔŋteé á lenāŋ ŋgɔ́ á táʼ

¹ Meŋ yīi meŋ á ŋgyā atʉɛ́, melaʼ mīi meŋ á ŋgaŋ afaʼ Atsyapuɔ, meŋ a fhó ánɛ menu mīi, meŋ á shúŋ á wɛ́, étswɛte á wɛ́. Ŋ́gɛ pɛ ezīŋ ánɛ mekhu anu zīi, Ndém a le tɔ́ŋ á wɛ́ ŋ́gɛ, pɛ ezīŋ éwú ndeŋ ndeŋ.

² Pɛ epú esóʼne nnɛ̄t zɛ ŋgyá á esī, ánɛ ajūɔ tsem, ńdɔ̄k apwɛne tɛ́ nnáŋ. Pɛ ekwɛ́t ntē wɛ́, éfhó ánɛ ŋkɔŋne zīi, e é ntē pɛ, ntɔ́te mennɛ̄t mɛ́ nzeŋne zeŋné.

³ Pɛ efhó ánɛ apwɛne zīi, pɛ lɔɔ̄k nnáŋ, ŋ́kāk ete, ńdɔ̄k Azwakne Ndém, ńtswiʼne nnáŋ mé taʼ nchu, á nnɔ pɛ.

⁴ Alúŋ epuɔ Yɛɛ́so á gɔ́ áa taʼ, Azwakne Ndém á zéŋ ŋgɔ́ áa taʼ. Ndeŋ ndeŋ épúp, ajū mīi Ndém a lɛɛ́ ntɔ́ŋɔ á wɛ́, ŋ́gɔ̄ eyá mé pɛ, á gɔ́ áa taʼ.

⁵ Atsyapuɔ a gɔ́ áa taʼ. Lefɛ̄ nnɛ̄t ŋgyá á mbū yí, á zéŋ ŋgɔ́ á taʼ ntií. Mɛ́ le nōʼ á yímpɛ á ntshi, áa ánɛ lezēŋ taʼ ŋiŋ.

⁶ Taʼ Ndém mé gɔ́ éwú, ŋ́gɔ́ á Mɔʼɔ́ epuɔ metsem. Yí mé puú esáʼ epuɔ metsem. Yí mé lɔɔ̄k á ŋiŋ ntsem, ŋ́ghʉ̄ mefaʼ. A puú ŋgɔ́ á ntē ŋiŋ ntsem.

⁷ Ndém a le ke ŋgyá etsō mbɔŋ té ndhʉ á mbū pímpɛ, Klísto á piŋ ŋgāp ŋgyá á azi awíɛ awíɛ.

⁸ É melaʼ épúp tɛ́, mɛ́ le tí á ntē aŋwaʼne Ndém ŋ́gɛ: «A le pē mé athʉ́ lephū, ŋ́gē epe, ńdɔ̄k epuɔ pīi, a le gɔ̄ á wɔ́p, pɔ́ cʉ́ʼ epuʼ ncu. A le zéŋ ŋgyá eyi nthū awíɛ awíɛ. »

⁹ Púp, mɛ́ leé ŋ́gɛ: «Ŋ́kɔ́ʼ mé athʉ́ lephū», ńdɔkɔ ŋ́gɛ akɔ̄? Ńdɔkɔ ŋ́gɛ, Klísto a le té njhʉ̄ esóʼo, tɛ ŋkó á tɛ esī atsetsáʼ.

¹⁰ Ŋiŋ yīi a le pīŋ esóʼo tɛ ŋkó á esī atsetsáʼ, ŋgaŋ mé le zéŋ ŋkɔ́ʼ mé tɛ athʉ́ lephū, tɛ́ egɔ́ mé ajūɔ tsem.

¹¹ Ajū mīi a le yá á mbū epuɔ menɔŋ, á si ŋgɔ́ páʼ, a le lɔ̄k emɔ̄ʼ, ŋ́ghʉ̄ meziŋ‑ntō, ńdɔ̄k emɔ̄ʼ, ŋ́ghʉ̄ metswi‑ŋke, ńdɔ̄k emɔ̄ʼ, ŋ́ghʉ̄ metswi‑ŋke mbɔŋ ánɛ Yɛɛ́so, ńdɔ̄k emɔ̄ʼ, ŋ́ghʉ̄ mepfɛnne‑memvhō Ndém, pɔ́ zeéŋ ŋgɔ́ wɔ zíʼne‑epuɔ anu Ndém.

¹² A le ghʉ̄ épúp, ńdɔkɔ efāʼa ŋ́gɛ, epuɔ Ndém, e ekūʼ á wɔ́p á leghʉ afaʼ, á lelɔk ŋghʉ̄, mbe nnɛ̄t Klísto, álúŋ epuɔ pí, á tswhí ŋgʉ̄ɔ mé mvhɔ.

¹³ Púp tɛ́, ḿpɛ metsem e ekūʼ á lenāŋ mé taʼ nchu, ánɛ lefɛ̄ nnɛ̄t, mbɔɔ ánɛ lezhɛ̄ á ŋiŋ yīi, Méŋ Ndém a á ewiɛ́, ńcʉ́ʼ epuɔ pīi pɔ́ é tswhí, ńtswiʼne ntswhí, ntēte ánɛ lefɛ̄ nnɛ̄t mɛ́t, tɛ ŋgɔ́ páʼ Klísto a á azí épúp.

¹⁴ Ajɔ̄ afʉʼ, ḿpɛ é le zɛ́t ewɔŋkhʉ̄ ɛ́. Epuɔ pīi é táŋa mela, pɔ́ le zéŋ ndɔ̄k anu zīi, pɔ́ zíʼnɛ epuɔ, ŋ́ghʉ̄ ḿpɛ fāa nzhɛ ɛ́. Pɔ́ le zéŋ ndɔ̄k á yímpɛ ŋgáne, páʼ ntshi é lɔkɔ azaŋné akɛnūʼ, ŋ́gánɛ lá á.

¹⁵ A cʉ́ʼɛ épúp, ḿpɛ é náŋ mé ŋkɔŋne, ńnáŋ mé anuúnē, ńdɔk ntswhí ánɛ ajūɔ tsem, tɛ mbú ncʉ́ʼ páʼ Klísto a á épúp, á yí yīi, a á si ŋgɔ́ athū, ánɛ alúŋ epuɔ pí.

¹⁶ Yí mé ghʉʉ̄, mbe zi, épuɔ Klísto metsem, é gɔ́ á taʼ nchu, awíɛ á náŋ á lenaŋá yí, ńtsóʼne ánɛ méŋ mɔ́ yi, páʼ mejuŋɔ́ nnɛ̄t é ghʉʉ̄, ajʉʼ nnɛ̄t á tsóʼne ánɛ amɔ̄ʼ. Aziɛ́ ajʉʼ nnɛ̄t lɛ́, á ghʉʉ̄ azí afaʼ á mbɔŋɔ́ páʼā, tɛ́ ndɔk ŋghʉ̄, mbe nnɛ̄t é tswhí. Ndeŋ ndeŋ épúp, epuɔ Yɛɛ́so é lɔɔ̄k ŋkɔŋne nnáŋ páʼā, nnɔ wɔ́p é tswhí.

Epuɔ Yɛɛ́so é pɔŋteé á lewɛ lenāŋ leswhī

¹⁷ Anu zīi meŋ gɔ á eshúŋɔ la, meŋ ndɔkɔ lezēŋ Atsyapuɔ tɛ́ eshúŋɔ, á gɔ́ ajʉʼ éwú ŋgɔ́ épúp: ndɛ́ʼ pɛ ezéŋ nnáŋ páʼ, wɔ te zhɛ́‑kwaʼ Ndém. Akwaŋte zɔ́p, á té gʉɔ tɛ ntsóʼne ánɛ amɔ̄ʼ azō ɔ́.

¹⁸ Nzém e lē mbú njhʉ́ leghi tsɔ́p. Pɔ́ é ánɛ lenāŋ leswhī tsīi, Ndém a yáa, ŋgɔ́ áa mege, melaʼ mīi, pɔ́ teē athū á mbū yí, tɛ mbú te zhɛ́ á ŋiŋ yīi, a á ewiɛ́ ɛ́.

¹⁹ Esē é gɛ te nzɛ́t ŋkúu á wɔ́p, ánɛ amɔ̄ʼ azō ɔ́. Pɔ́ puú ntshí ntē wɔ́p áa leghʉ menu epe. Á kɔɔ́ʼ á athū pɔ́p, á leghʉ aziɛ́ anu esē lɛ́, pɔ́ ghʉ, té pú ŋkúʼte nnɛ̄t zɔp.

²⁰ Ŋ́gɔ́ mé pɛ, mbɔ á té épúp tɛ́, mɛ́ le ziʼné á wɛ́ anu Klísto ó.

²¹ Páʼ pɛ le júʼ anu tsem zīi, á cʉteē á Yɛɛ́so lā, páʼ mɛ́ le lɔ̄k anuúnē zīi á fhɔ́ɔ á mbū Yɛɛ́so, ńzíʼne á wɛ́ á ŋiŋ yīi, a á ewiɛ́ lā,

²² pɛ pɔŋteé á lepū ŋgwáʼ á nzwiŋ atswhī yīi, pɛ lɛɛ́ ŋgwiɛ, éfhó ánɛ nzwiŋ lenāŋ ntó. Ecū mīi pɛ seé ánɛ nzwiŋ lenāŋ wuɔ mɛ́t, é pɔpte á wɛ́ pɔpte, ŋ́gɔ̄ eghʉ, pɛ eláʼ ndákne.

²³ Á pɔŋ ŋ́gɛ, pɛ ecʉ́ʼ, Ndém a esɛ̄t ntē wɛ́, ŋ́ghʉ̄ pɛ ecʉ́ʼ epuɔ meswhī.

²⁴ Pɛ ewɛ̄ lenāŋ leswhī, ŋiŋ yīi a wɛɛ̄ lenāŋ cʉɔ mɛ́t, a swhií á Ndém. Anuúnē á ghʉʉ̄, á lɔk á ndeŋ ndeŋ tɛ́ nnáŋ, Ndém á piŋ nnɔ̄ŋ te ndāʼa á yí í.

²⁵ Páʼ pɛ wɛɛ̄ lenāŋ leswhī lā, pɛ efhó ánɛ mela ntó, awíɛ awíɛ a eshúŋ anuúnē á mbū méŋ mɔ́ yi, melaʼ mīi, ḿpɛ metsem é si mbú ŋgɔ́ ekim taʼ mbe nnɛ̄t.

²⁶ Á gɔ́ afʉʼ zīi pɛ é si nzáŋa á lɔ́ŋ, ndɛ́ʼ pɛ cʉ́ʼ lɔ́ŋ mɛ́t, á ké ntshóne á wɛ́ nnéŋ á ntē mefa. Á mbɔŋ ŋ́gɛ, nzem e gē eséŋ, mbɔ lɔ́ŋ mɛ́t a á ndáʼ mbwɛ́t.

²⁷ Ndɛ́ʼ pɛ eyá eshhʉ̄ á mbū Sɛ́ta, á lejhʉ̄ á wɛ́.

²⁸ Ŋiŋ yīi a ke nɔ̄ŋ njʉʉ, ndɛ́ʼ á zéŋ njʉ̄. A evéŋ á lejʉ̄ɔ ŋgʉɔ̄ʼ, ńdɔ̄k mbū mí ŋghʉ̄ afaʼ té mekɛ̄t, tɛ́ ndɔk ŋkūʼ á lewɛ ajū mīi, a gɔ egāp ŋ́gyá azi ŋiŋ yīi, azō á si ŋkíŋɛ á mbū yí.

²⁹ Ndɛ́ʼ anu tepɔŋ á tó á nchu pɛ, azi ŋgɔ́ éyi ashuŋne a tó á nchu pɛ, á gɔ́ azi mbɔŋ, pɛ eshúŋ ndɔ̄k ḿbʉ́ʼte epʉ́ʼte, ńdɔk ntswíte epuɔ pīi, pɔ́ é si njúʼɔ á wɛ́ á leshūŋne.

³⁰ Ndɛ́ʼ pɛ eghʉ̄ʉ, Azwakne Ndém zīi, a le néŋ á ntē pɛ, á záŋ á lɔ́ŋ. Azwakne mɛ́t á si ŋgɔ́ ayiŋne zīi, á tswii á wɛ́ á légɛ, Ndém a a fú ekú á wɛ́ ánɛ ŋgʉɔ̄ʼ.

³¹ Pɛ epú efhó á ntē pɛ, éfók ajūɔ tsem zīi, á si ŋghʉ̄ɛ, ntē wɛ́ é gwhiɛ. Éfók ajūɔ tsem zīi, á ghʉɛ pɛ cɔ́kɔ. Éfók ajūɔ tsem zīi, á ghʉɛ pɛ záŋa á lɔ́ŋ. Éfók ajūɔ tsem zīi, á ghʉɛ pɛ lhʉ̄ɛ mekwɛt. Éfók ajūɔ tsem zīi, á ghʉɛ pɛ thúɔ nchu. Pɛ epú efhó á nnɔ, éfók á ntií ntiī akwaŋte tepɔŋ.

³² Pɛ ewɛ̄ ntē mbɔŋ á nnɔ pɛ, ńzeŋne zeŋné, ŋ́gwɛ̄ á atsāmézeŋɛ. Pɛ elēkne mefa emɔ̄ʼ epuɔ, ńdeŋ ndeŋ páʼ, Ndém a le zapá ánɛ Klísto, ńdēkne mefa mɛ́ lā.