Efɛze 3 - Eka Eswhī

Pɔ́ɔl a á ŋgaŋ afaʼ, á nnɔ wɔ te gɔ́ epuɔ Yúda

¹ Melaʼ épúp tɛ́ meŋ Pɔ́ɔl, meŋ á ŋgyā atʉɛ́ melaʼ afaʼ Yɛɛ́so Klísto páʼa, melaʼ wɛ́ pīi, pɛ te epuɔ Yúda á. Meŋ á si eswíŋtɛ á Ndém, á athū pɛ.

² Pɛ le júʼ páʼ, Ndém a le lɔ̄k apɔŋɔ́ ntē te ndhʉ zí, ńtsékne á gá á leghʉ afaʼ, á athū pɛ.

³ Pɛ le zéŋ njúʼ páʼ, Ndém a le kɛʼté ntsem zi, ŋ́ghʉ̄ meŋ ezhɛ́. Meŋ á ndáʼ nnáʼ ŋkia éshúŋ á wɛ́.

⁴ Pɛ e kó á ntɔ́ŋɔ akɛtte zá jʉɔ, ékuʼ á lejʉ̄ɔ páʼ, meŋ zhɛɛ́ ntsem zīi, e cʉteē á Klísto.

⁵ Ntsem mɛ́t, Ndém a lɛɛ́ te ŋghʉ̄ɛ ŋ́gɛ, epuɔ efʉʼ mvhɔ, e ezhɛ́ ɛ́. Táʼ, á piīŋ ŋgɔ́ tsetsɔŋɔ, mbɔ a á zápa ánɛ Azwakne zí, ŋ́ghʉ̄, meziŋ‑ntō mbɔɔ metswi‑ŋke pīi, a le tsɔ́ʼ á wɔ́p, ńtsékne á afaʼ á mbū pɔ́p, é zhɛ́.

⁶ Ntsem mɛ́t, e ejʉɔ: epuɔ pīi é té epuɔ Yúda á, é zapaá ánɛ ŋke mbɔŋ, ńdɛ̄tne ánɛ Yɛɛ́so Klísto, ŋ́gwɛ̄ azɔ́p akim, páʼ epuɔ Yúda lā, ánɛ ajū mīi, Ndém a le phʉ́ʉ̄. Á páʼā, pɔ́ lɔkɔ mbúu ncʉ́ʼɛ á taʼ mbe nnɛ̄t, pɔ́ a epuɔ Yúda, éfú ewɛ azɔ́p ajū mīi, Ndém a le laʼnēē.

⁷ Ndém a le fhó ánɛ apɔŋɔ́ ntē te ndhʉ zīi, a wɛɛ̄ ánɛ meŋ, ŋ́ghʉ̄ meŋ cʉ́ʼ á ŋgaŋ afaʼ yi, á letswi ŋke mbɔŋ. A le lɔ̄k mete mí, tɛ́ ŋghʉ̄ épúp.

⁸ Meŋ yīi, meŋ gɔ́ áa kwaʼ nzoknzem, á nnɔ epuɔ Ndém metsem, Ndém a le ké nzápa ánɛ apɔŋɔ́ ntē te ndhʉ zīi, a wɛɛ̄ ánɛ meŋ, ŋ́ghʉ̄, meŋ egʉ̄ɔ eshúŋ epuɔ pīi, é té epuɔ Yúda á, léwūʼ tsīi, é ánɛ Klísto. Lewūʼ mɛ́t é te mi lewūʼ.

⁹ A le zéŋ ŋgyá á gá meshhʉ̄ á lelɔk ŋghʉ̄, epuɔ é zhɛ́ páʼ, a á si ŋghʉ̄ɛ, anu zīi a le sáŋ á ntē ntsem, á puɔ. Anu mɛ́t, yí Ndém Nnɔŋ‑Ŋgɔŋ, a le lʉ̄ɔ̄, tɛ efhó á nzií‑ŋgɔŋ.

¹⁰ A le ghʉ̄ʉ̄, epuɔ é zhɛ́ épúp, tɛ á tsetsɔŋɔ, ajūɔ tsem zīi, á sáʼa lefɔ mbɔɔ mete á methʉ́, a ezápa ánɛ alúŋ epuɔ Yɛɛ́so, ńjʉ́ɔ azhɛ̄‑anu Ndém. Ndém a tswiī azhɛ̄‑anu mɛ́t, ánɛ mentií tɛ nzáne.

¹¹ A le ghʉ̄ épúp, ńdɔk ŋghʉ̄, anu zīi a le sáāŋ, tɛ nzī nzɛ́t áa te nɔŋ ŋgɔŋ, á zápa ánɛ Atsyapuɔ yímpɛ Yɛɛ́so Klísto, ḿbō.

¹² Ḿpɛ lɛtneē ánɛ Klísto, ńnɔŋ efíɛ́ nnɛ̄t ŋgyáa á mbū yí. Púp, ḿpɛ gɔ etshóte nnɛ̄t mbáte á Ndém, ésa saá, ńnɔŋ mmāʼa ŋgua zímpɛ ŋgyáa á mbū yí.

¹³ Á épúp tɛ́, meŋ á si ntswɛ̄tɛ á wɛ́ ŋ́gɛ, ndɛ́ʼ pɛ ecʉ́ʼ, ŋgʉɔ̄ʼ zīi meŋ á si njʉ́ɔ melaʼ mɛ́, é ghʉ, pɛ eká ánɛ lefɛ̄ nnɛ̄t. Ŋgʉɔ̄ʼ mɛ́t e é si ŋgɔ́ á lelɔk ŋghʉ̄, pɛ ekāʼte.

Ntií zīi Yɛɛ́so a lɔɔ̄k ŋkɔŋ á yímpɛ

¹⁴ Melaʼ épúp tɛ́, meŋ tswiʼteé á esī, á mvhɔ Ndém Mɔʼɔ́,

¹⁵ á ŋiŋ yīi, metseŋ ŋgyā ntsem á athʉ́ lephū, mbɔɔ á esī atsetsáʼ, é fhoó á mbū yí.

¹⁶ Ŋ́gɛ a elɛ efhó ánɛ te ndhʉ lewūʼ tsí, ńzápa ánɛ Azwakne zí, ŋ́gyá á wɛ́ mete, tɛ́ agega zɛ́ a elɔk nnáŋ efʉʼ metsem, ńtēte.

¹⁷ Ŋ́gɛ Ndém a ezápa ánɛ wɛ́ lefɛ̄ nnɛ̄t ŋgyá mé Klísto, ŋ́ghʉ̄, Klísto mɛ́t a enáŋ á ntē pɛ. Ŋ́gɛ ŋkɔŋne e egɔ́ á tsetsɛlɛ pɛ, ńtēte, páʼ athʉ́ zīi meŋgaŋ mí, é lɛtneē á esī lā, mbɔɔ páʼ ŋgyā zīi, e tshií ánɛ kwaʼ atsék lā.

¹⁸ A egɔ́ épúp, pɛ a epuɔ Ndém metsem, e elɔk ŋkūʼ á wɛ́ á lezhɛ̄ páʼ, ŋkɔŋ zīi Klísto a wɛɛ̄ ánɛ epuɔ menɔŋ, e faáŋ épúp, ésāk épúp, ésɛ̄h épúp, ŋ́kɔ́ʼ mé athʉ́ épúp.

¹⁹ Ńzhɛ́ ŋkɔŋ Klísto mɛ́t, tɛ mbɔɔ páʼ, e puú efáŋ ńtɔ́k ajūɔ tsem zīi, ŋiŋ a gɔ ezhɛ́. Ńzhɛ́ épúp, tɛ́ ndɔk ŋgwɛ̄ ajūɔ tsem zīi, Ndém a wɛɛ̄, púp, Ndém a gɔ́ mé pɛ tɛ ntsékne.

²⁰ Ndém a pɔɔ́ŋ mete, á lelɔk ŋghʉ̄ azō á mbū pímpɛ. A kuūʼ á leyā á yímpɛ azō, tɛ á pú nzá ntɔ́k azi, ḿpɛ é nzi ndɔ́ á yí. Ŋ́kūʼ á leyā, tɛ á zá ntɔ́k azi, ḿpɛ gɔ ekwāaŋ ŋ́gɛ, a gɔ eyá. A kuūʼ á leyā tɛ pú nzá, ńtɔ́k nzíʼ ndhʉ.

²¹ Ŋ́gɛ epuɔ Yɛɛ́so metsem, e ezápa ánɛ Yɛɛ́so Klísto, ŋ́gūʼte á Ndém mɛ́t, efʉʼ metsem, á meŋguʼ meŋguʼ. Á épúp.