Efɛze 2 - Eka Eswhī

Ndém a zapaá ánɛ Klísto, tɛ́ ŋghʉ̄ mɛ́ gɔ́ éwú

¹ Á lɛ amɔ̄ʼ afʉʼ, pɛ gɔ́ wɔ ekwhʉɛ‑ndáʼne á ndo ŋgia melaʼ menu tepɔŋ pɔ́ mefa mɛ́.

² Pɛ lɛ afʉʼ mɛ́t, ŋ́kúʼte menu tepɔŋ pɔ́ mefa mɛ́t tɛ é te, ńnɔŋ nzīŋɛ páʼ mete ŋgɔŋ muɔ é tshoneé á ŋiŋ, á ziŋ épúp, ńnɔŋ njúʼɔ nchu efɔ metsō tepɔŋ, páʼ a á si nnéŋɛ mbo á tsetsɛlɛ Ndém á athʉ́ lephū, pɔ́ a epuɔ menɔŋ á ndo esī atsetsáʼ. Yí mé tsetsɔŋɔ, ńtshónɛ wɔ tʉɛ‑athū á mbū Ndém, á leghʉ mefa.

³ Ḿpɛ metsem é le zéŋ ŋgɔ́ azímpɛ páʼ pɔ́p lā, ńnɔŋ nnáŋa páʼ mbe nnɛ̄t zímpɛ, é si ntshónɛ á yímpɛ ŋ́gɛ, ḿpɛ enáŋ épúp. Ḿpɛ le nɔ̄ŋ ŋghʉɛ páʼ mbe nnɛ̄t zímpɛ e é si ŋkɔ̄ŋɔ, ńnɔŋ nzīŋɛ páʼ á kɔ́ʼ á athū pímpɛ épúp. Ndém a lɛ eláʼ ezáŋ á lɔ́ŋ á mbū pímpɛ, páʼ a záŋa á mbū awɔ́ ŋiŋ lɛ́ yīi, a teē athū á mbū yí.

⁴ Táʼ, atsāmezeŋɛ Ndém á te ndhʉ. Ŋkɔŋ zīi a wɛɛ̄ ánɛ pímpɛ, é faáŋ tɛʼ.

⁵ É melaʼ épúp tɛ́, a le zapá ánɛ Klísto, ŋ́ghʉ̄ ḿpɛ é gɔ́ éwú, tɛ mbɔɔ páʼ, á le gɔ́ mbɔ mefa mímpɛ, é lē ŋghʉ̄, ḿpɛ gɔ́ wɔ kwhʉɛ‑ndáʼne á ndo ŋgia. Ndém a le fhó ánɛ apɔŋɔ́ ntē te ndhʉ zí, tɛ́ ŋghʉ̄ pɛ tswɛ́t.

⁶ Ndém a le fhó ánɛ páʼ, ḿpɛ lɛtneē ánɛ Klísto, ŋ́ghʉ̄ ḿpɛ a Klísto é zím ánɛ lewhʉ̄. Ŋ́ghʉ̄ ḿpɛ a pɔ́p é kó á ntē lefɔ tsí, á athʉ́ lephū.

⁷ Ndém a le zapá ánɛ Yɛɛ́so Klísto, ńtswī apɔŋɔ́ ntē zí ánɛ pímpɛ, ńdɔkɔ ntwīi á mbū epuɔ, á meŋguʼ meŋguʼ ŋ́gɛ, yí é ŋiŋ té mmɔʼ, éyi a ghʉʉ̄ anu mbɔŋ té ndhʉ.

⁸ Pɛ ezhɛ́ á légɛ, Ndém a le zapá ánɛ apɔŋɔ́ ntē te ndhʉ zí, tɛ́ ŋghʉ̄ pɛ tswɛ́t, éfhó ánɛ wɛ́ lefɛ̄ nnɛ̄t ŋgyá á mbū yí. Ewuɔ legɔ̄ mɛ́t, á ké te fhó á mbū pɛ ɛ́, a fhó áa ánɛ páʼ, Ndém mé kɔŋ ŋghʉ̄ épúp ndémndēm.

⁹ A te fhó ánɛ mefaʼ mɛ́ ɛ́, ńdɔkɔ ŋ́gɛ, ndɛ́ʼ ŋiŋ á lɔk épúp ŋŋīa.

¹⁰ Ndém mé le pɔ́ á yímpɛ, a le zapá ánɛ Yɛɛ́so, té mbɔ́ á yímpɛ. Ŋ́ghʉ̄ɛ épúp, ńdɔkɔ ŋ́gɛ, ŋghʉʉ́‑menu mímpɛ é egɔ́ mbɔŋ, ńzīŋ ánɛ nzhɛ zīi, Ndém a le té njhʉ̄ ŋkīa á mbū pímpɛ, ḿpɛ pīiŋ mbɔ́ŋte á leziŋ éwú.

Mɛ́ piīk tɛ ndɛ̄tne ánɛ Klísto páʼā, ḿbú ncʉ́ʼ á taʼ

¹¹ Epuɔ Yúda é wɛɛ̄ ayiŋne zīi, á tswii légɛ, mɛ́ lē ntém á wɔ́p á mbe nnɛ̄t pɔ́p. Pɔ́ kɔɔ̄ŋ ŋ́gɛ, mɛ́ etɔ́ŋ á wɔ́p lɛ «epuɔ pīi, mɛ́ lē ntém á wɔ́p. » Pɛ pīi mɛ́ lɛ te gē ezhí á wɛ́, pɛ gɔ́ epuɔ Yúda á, pɛ te wɛ̄ ayiŋne mɛ́t, á mbe nnɛ̄t pɛ ɛ́. Pɔ́ tɔɔ́ŋ á wɛ́ lɛ «epuɔ pīi, mɛ́ la á wɔ́p tém ɛ́. » Pɛ ekímte ajū mīi, pɛ lɛ aziɛ́ á amɔ̄ʼ afʉʼ.

¹² Á lɛ efʉʼ mɛ́t, pɛ nɔ̄ɔŋ te nzwíʼtɛ á Nzaʼ‑Ŋkhʉ ɛ́, ŋ́gɔ́ á nnɔ epuɔ Islaɛl, ŋ́gɔ́ mege. Mɛ́ nɔŋ te esáŋa á wɛ́ ánɛ alaʼne zīi, Ndém a le ghʉ̄ á mbū epuɔ Islaɛl, tɛ pɔ́ a pɔ́p é kʉɔ́ʼ eka á. Pɛ lɛ á ŋgɔŋ, ńnɔŋ te nzwíʼtɛ amɔ̄ʼ azō ɔ́, pɛ a Ndém é zi te nnɔ ɔ́.

¹³ Á piīŋ ŋgɔ́ tsetsɔŋɔ, pɛ pīi pɛ le tshí tɛ éwú, ánɛ Ndém, mbɔ Ndém a le fhó ánɛ páʼ, pɛ lɛtneē ánɛ Yɛɛ́so Klísto, ńdɔ̄k metshi Klísto mɛ́t, ŋ́ghʉ̄ pɛ náŋ mbáte á yí.

¹⁴ Yí Klísto, mé si nnéŋɛ apwɛne, á tsetsɛlɛ pímpɛ. Éfhó ánɛ páʼ, a le ghʉ̄ʉ̄, epuɔ Yúda, pɔ́ a epuɔ pīi é té epuɔ Yúda á, é temte, ńcʉ́ʼ á taʼ. Mbɔɔ páʼ a le yá athū nnɛ̄t zí, ńdɔk nták akɛ zīi, á lɛɛ́ efaknɛ á wɔ́p, ŋ́ghʉ̄ɛ pɔ́ gɔ́ɔ megaŋ mbo.

¹⁵ A le gē eták akɛ mɛ́t, ḿbík lepé Mɔɔ́sɛ tsīi, é tswii ŋ́gɛ, mɛ́ eghʉ̄ á ajʉɔ, ká azi. A lɛɛ́ ŋghʉɛ épúp, ńdɔkɔ mbhīɛ apwɛne, éfāʼa ŋ́gɛ, epuɔ Yúda pɔ́ a epuɔ pīi, é té epuɔ Yúda á, e ezápa ánɛ yí, ńcʉ́ʼ á taʼ, ŋ́gɔ́ epuɔ meswhī.

¹⁶ Ńzéŋɛ ndɔkɔ efāʼa á lefhō ánɛ páʼ, a le kwhʉ́ ánɛ mbaŋne paŋné, ńcúʼte á wɔ́p, pɔ́ cʉ́ʼ á taʼ nnɔ. Ńcʉ́ʼ á taʼ nnɔ épúp, pɔ́ metsem pɔ́ a Ndém é gɔ́ á taʼ nchu. A le lɔ̄k á yí á lekwhʉ̄ ánɛ mbaŋne paŋné, ḿbú mbík mbo.

¹⁷ A le shʉ̄ʼ á ntswiī ŋke mbɔŋ yīi, é yáa apwɛne, á mbū pɛ pīi, pɛ lɛ á tɛ éwú ánɛ Ndém, mbɔɔ á mbū epuɔ pīi, pɔ́ naáŋ mbáte á Ndém.

¹⁸ É melaʼ Klísto, tɛ́ ḿpɛ metsem, épuɔ Yúda mbɔɔ epuɔ pīi, é té epuɔ Yúda á, é zapaá ánɛ ndaʼ Azwakne Ndém, ŋ́kūʼ á letshī á lezēŋ Ndém Mɔʼɔ́.

¹⁹ Púp, pɛ te zɛ́t á tsetsɛlɛ epuɔ Yúda, ŋ́gɔ́ metsia‑nzhɛ ɛ́, pɛ te gɔ́ mege ɛ́. Pɛ é tsetsɔŋɔ ŋgwɛ̄ azɛ́ ajʉʼ, á nnɔ epɔ̄ Ndém, ŋ́gɔ́ epuɔ atseŋ ŋgyā Ndém.

²⁰ Pɛ lē ncʉ́ʼ ŋgyā Ndém. Meziŋ‑ntō Yɛɛ́so, mbɔɔ metswi‑ŋke pí, é gɔ́ páʼ mentɔ̄ ŋgyā mɛ́t lā, Yɛɛ́so Klísto yí méŋwɛ̄t á gɔ́ tɔ́ yīi, a piīʼ ŋgyā mɛ́t.

²¹ Yí mé si ŋghʉ̄ɛ, ŋgyā mɛ́t é tetɛ, ńtswhíɛ ŋgʉ̄ɔ mé mvhɔ, ŋ́gɔ́ ajʉʼ te alɔ́ʼ zīi, Atsyapuɔ a naáŋ éwú.

²² Ndém a le fhó ánɛ páʼ, pɛ azɛ́, é lɛtneē ánɛ Klísto lā, tɛ́ ŋghʉ̄ pɛ egɔ́ mmɔʼ ŋkaŋa ánɛ ŋgyā mɛ́t, pɛ a emɔ̄ʼ epuɔ é pú ncʉ́ʼ ŋgyā zīi, a lɔɔ̄k Azwakne zí nnáŋ éwú.