Efɛze 1 - Eka Eswhī

Atsaʼte

¹ Meŋ Pɔ́ɔl, nziŋ‑ntō Yɛɛ́so Klísto, páʼ Ndém a le kɔ̄ŋ épúp, mé tíi akɛtte jʉɔ á mbū epuɔ Ndém, á tésɔŋ Efɛze, épuɔ pīi pɔ́ kuʼteé áa Yɛɛ́so tɛ́ ndɔk nnáŋ.

² Ŋ́gɛ Mɔʼɔ́ yímpɛ Ndém, pɔ́ Atsyapuɔ Yɛɛ́so Klísto, e eghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

Anu mbɔŋ té ndhʉ zīi Ndém a le zapá ánɛ Klísto, ŋ́ghʉ̄

³ Awuʼte a egɔ́ á mbū Ndém, á Mɔʼɔ́ Atsyapuɔ yímpɛ Yɛɛ́so Klísto. A le fhó á lephū, ńzápa ánɛ páʼ ḿpɛ lɛtneē ánɛ Klísto, ŋ́gyá á yímpɛ etsō mbɔŋ ntsem tsīi, e tswíte á yímpɛ á lenāŋ páʼ a á si ŋkɔŋɔ.

⁴ A le zapá ánɛ yí, ŋ́kāŋ á yímpɛ, tɛ nzī nzɛ́t áa té nɔŋ ŋgɔŋ, ŋ́gɛ ḿpɛ egɔ́ epuɔ pí, ŋ́gɔ́ á menēk yí, ŋ́gɔ́ epuɔ pīi, mɛ́ té si ndāʼa á wɔ́p ɔ́, ŋ́ghʉ̄ɛ épúp, ńdɔkɔ ŋkɔ̄ŋɔ á yímpɛ.

⁵ A le té njhʉ̄ ŋkɔ̄ŋ ŋ́gɛ, ḿpɛ ezápa ánɛ Yɛɛ́so Klísto, ńcʉ́ʼ epɔ̄ pí. Á páʼa tɛ́, a le fhó ánɛ apɔŋɔ́ ntē zí, ŋ́kɔ̄ŋ épúp.

⁶ Púp, ḿpɛ ewūʼte á yí, melaʼ mía apɔŋɔ́ ntē te ndhʉ zīi, a le zapá ánɛ Méŋ yi, ŋ́ghʉ̄ ánɛ pímpɛ, a kɔɔ̄ŋ á Méŋ yi mɛ́t tɛʼ.

⁷ Méŋ yi mɛ́t a le lɔ̄k metshi mí, ńzó athū zímpɛ, ŋ́ghʉ̄, Ndém á fhó ánɛ mía apɔŋɔ́ ntē te ndhʉ zí, ńdēkne mefa mímpɛ.

⁸ Ndém a le ghʉ̄ anu mbɔŋ té ndhʉ ánɛ pímpɛ, ŋ́gyá á yímpɛ azhɛ̄‑anu ntsem, ŋ́gyá á yímpɛ leghi.

⁹ A le ghʉ̄ʉ̄, ḿpɛ é zhɛ́ ajū mīi, a le nɔ̄ŋ ŋkwaŋtɛ á ntē ntsem, áju mīi yí méŋwɛ̄t a le té njhʉ̄, éfhó ánɛ apɔŋɔ́ ntē zí, ŋ́kwāŋte á leghʉ.

¹⁰ Afʉʼ á fú nnáŋ tɛ ŋkūʼ, Ndém á ghʉ, anu mɛ́t zīi a le nɔ̄ŋ ŋkwaŋtɛ, á po, ŋ́gɔ́ á lepū ncúʼte ŋgɔŋ ntsem, ájū mīi á lephū mbɔɔ azi á esī atsetsáʼ, ńcúʼte ajūɔ tsem jʉɔ mɛ́t, ńnɔ̄ŋ á mekhu taʼ Efɔ, á Klísto.

¹¹ Ndém a le fhó ánɛ páʼ pek kuʼteé á Klísto, ŋ́gyá azék akim, á gɔ́ páʼ, a le té njhʉ̄ ŋkāŋ á wék. A le ghʉ̄ épúp, á gɔ́ páʼ, a le kwaŋtēē, ńzéŋ ŋkɔ̄ŋ á leghʉ épúp.

¹² Ŋ́ghʉ̄ épúp ŋ́gɛ, epuɔ e ejʉ́ɔ á mía mía ajū mīi, a le ghʉ̄ á mbū pek pīi, pek le té njhʉ̄ mmāʼ ŋgua zek, ŋgyá á mbū Klísto, ńjʉ́ɔ epúp, ŋ́gūʼte á Ndém.

¹³ Pɛ ezɛ́, é ke zapá ánɛ Klísto, ńjúʼ ŋke yīi é si ŋgɔ́ anuúnē, ŋ́ke mbɔŋ yīi é ghʉɛ mɛ́ tswɛ́tɛ. Pɛ le júʼ ŋke mbɔŋ mɛ́t, éfɛ́ nnɛ̄t ŋgyá á mbū Klísto, Ndém á néŋ ayiŋne zí ánɛ pɛ, á gɔ́ Azwakne zí zīi a le phʉ́ʉ̄.

¹⁴ Azwakne Ndém, á si ŋgɔ́ á ajū mīi á si ntswīi á légɛ, Ndém a a láʼ eyá ecū mīi a le phʉ́ʉ̄, á mbū pímpɛ. Ḿpɛ e láʼ ewɛ etsō mɛ́t ntsem, áleʼé zīi, ḿpɛ é pú efhó ánɛ ŋgʉɔ̄ʼ ntó. Ḿpɛ ewūʼte á Ndém, páʼ a faáŋ lā.

Pɔ́ɔl a á ega eswíŋtɛ á Ndém á athū epuɔ Yɛɛ́so, á Efɛze

¹⁵ Melaʼ épúp tɛ́, tɛ efhó páʼ meŋ nde júʼ azá á légɛ, pɛ é si efíɛ́ nnɛ̄t ŋgyáa á mbū Atsyapuɔ Yɛɛ́so, ńzéŋ njúʼ á légɛ, pɛ é si ŋkɔ̄ŋɔ epuɔ Ndém metsem,

¹⁶ meŋ te si nnéŋɛ té kím lezēŋ tsɛ́, á afʉʼ zīi, meŋ á si eswíŋtɛ á Ndém ɛ́. Meŋ á si esyákne á yí, ánɛ athū zɛ́ efʉʼ metsem.

¹⁷ Ŋ́gɛ Ndém yīi, Atsyapuɔ yímpɛ Yɛɛ́so Klísto a wuʼtɛ, á Mɔʼɔ́, ŋ́gɔ́ á ŋwɛ́t shʉ́shɔ́k, a eyá á wɛ́ á kwaʼ azhɛ̄‑anu zīi, a ŋáʼa menēk mɛ́, pɛ ecuŋte nzhɛ́ á ŋiŋ yīi, Ndém a á ewiɛ́.

¹⁸ Ŋ́gɛ a elɛ ndɔ̄k ŋkaʼ yí ŋkɛ̄ʼɛ ntē wɛ́, pɛ ecuŋte nzhɛ́ ajū mīi, a lɛɛ́ ntɔ́ŋɔ á wɛ́ páʼā, ŋ́gɔ̄ eyá mé pɛ, ńcuŋte nzhɛ́ páʼ, mía mía lewūʼ yīi, a yáa á mbū epuɔ pīi é lɛtneē ánɛ yí, a á épúp.

¹⁹ Ńcuŋte nzhɛ́ á mía mía mete yīi, a lɔkɔ ntswítɛ á yímpɛ wɔ fɛ́‑nnɛ̄t ŋgyá mé yí. A le lɔ̄k á mía mía mete mí mɛ́t, páʼ é pɔɔ́ŋ mbʉʼ lā,

²⁰ tɛ́ ŋghʉ̄, Klísto á zím ánɛ lewhʉ̄, á kɔ́ʼne á yí nnáŋ á ŋkɔʼɔ́ apū ete yí, á athʉ́ lephū.

²¹ Á naáŋ éwú, ḿbú ntsyā ajūɔ tsem zīi á wɛɛ̄ mete, ńtsyā ajūɔ tsem zīi, á sáʼa mbʉʼ, ḿbú ntsyā ajūɔ tsem zīi, á sáʼa lefɔ, ḿbú ntsyā ajūɔ tsem zīi, á sáʼa ŋgɔŋ, ńzéŋ mbú ńtsyā ajūɔ tsem zīi, mɛ́ gɔ ekím lezēŋ tsí á ndo esī atsetsáʼ ega, tɛ mbɔɔ á ntē ŋgɔŋ zīi, e e fú tɛ́ eshʉʼe.

²² Ndém a le pú ŋghʉ̄ ŋ́gɛ, ajūɔ tsem a enɔ̄ŋ á mekhu Klísto, ŋ́ghʉ̄ á gɔ́ á ntshi‑mvhɔ ánɛ ajūɔ tsem, ŋ́gɔ́ á ntshi‑mvhɔ ánɛ alúŋ epuɔ Yɛɛ́so.

²³ Alúŋ epuɔ Yɛɛ́so á páʼā, ŋ́gɔ́ mbe nnɛ̄t Klísto. Klísto á gɔ́ mé alúŋ mɛ́t efʉʼ metsem, Ndém á gɔ́ mé yí.