Eble 9 - Eka Eswhī

Lenɔŋ epɔʼ ánɛ afʉʼ nzwiŋ eka

¹ Á lɛ ánɛ mvhɔ eka, epuɔ menɔŋ é wɛ ezɔp ntií á lelɔk ŋgūʼte á Ndém. Azɔ́p ajʉʼ zīi pɔ́ le cuŋtēē, ŋ́gūʼtɛ á Ndém éwú, á gɔ́ á esī atsetsáʼ ega.

² Pɔ́ le kwɛ́t ntap, ńdɔ̄k epū nzhó tsɛ́pīa esáne mewup mbīa, ńtɔ́ŋ mvhɔ lewup lɛ, te alɔ́ʼ ajʉʼ, ajū mīi mɛ́ tshítɛ meláam éwú, á gɔ́ éwú, tɛ́blɛ á tshí azí éwú, mblɛ zīi mɛ́ é ndɔk nnɔ̄ŋ epɔʼ, é zápte éwú.

³ Mmɔʼ lewup é gɔ́ á nzem páte mémpīa apū nzhó, ŋ́gɔ́ á kwaʼ ajʉʼ zīi, Ndém a á éwú.

⁴ Ajū mīi, mɛ́ tɔɔ á aŋsaŋ éwú, á tshí éwú, mbɔ mɛ́ le lɔ̄k á gɔ́ɔl tɛ́ ncūŋte. Akʉp eka á tshí éwú, mbɔ mɛ́ le lɔ̄k á gɔ́ɔl tɛ́ ndīa. Ŋgwʉ́ŋ é tshí á ntē akʉp mɛ́t, mbɔ mɛ́ le lɔ̄k á gɔ́ɔl tɛ́ ncūŋte. Máane á gɔ́ á ntē éwú, athʉ́ Aalɔŋ zīi, á le sā lā, á gɔ́ éwú, etaáflɛ tsīi mɛ́ le lɔ̄k metɔ́ tɛ́ ncūŋte, é gɔ́ éwú. Anu zīi Ndém pɔ́ a epuɔ menɔŋ é le lɔ̄k ŋkʉɔ́ʼ eka, á tíne ánɛ metaáflɛ mɛ́t.

⁵ Emɔ̄ʼ metsō é tshíte á ndo akʉp eka mɛ́t, ŋ́gɔ́ páʼ mekeke emɔ̄ʼ ntií mecɔʼ Ndém lā, ńnɔŋ ŋwāŋnɛ lɛ sɛ́t, ńdɔkɔ ntswīi á légɛ, Ndém a á ajʉʼ mɛ́t. Mbap mɔ́p é nɔŋ ŋkʉ̄ŋɛ á ajʉʼ zīi, mɛ́ pfɛttɛ metshi mena éwú, ńdɔkɔ esōko mefa epuɔ. Meŋ ké ŋgɔ́ le kɛ́ʼte ecʉɔ etsō mɛ́t, anāŋ anāŋ tsetsɔŋɔ, éshúŋ á wɛ́ ɛ́.

⁶ Mɛ́ puú mbɛ́tte ntsem páʼa mɛ́t, wɔ nɔŋ‑epɔʼ é gɔ́ɔ eleʼé tsem, ŋkúɔ́ á ntē mvhɔ lewup, ŋ́ghʉ̄ɛ afaʼ zɔ́p.

⁷ Ŋ́ké mbīŋ ŋgɔ́ ánɛ lewup mbáte epīa, nnɔŋ‑epɔʼ eyi ndʉɛ mé kó éwú, á taʼ legʉɔ ánɛ ŋguʼ alāʼ, yíléyī. Ékó éwú épúp, a á le néŋ té lɔk metshi mena, ńnɔ̄ŋ epɔʼ á mbū Ndém, melaʼ mefa mí méŋwɛ̄t, mbɔɔ melaʼ mefa mīi, epuɔ alāʼ é faa té zhɛ́ ɛ́.

⁸ Azwakne Ndém á lɛɛ́ ndɔkɔ épúp, ńtswīi á légɛ, mvhɔ lewup e láʼa nzɛ́t té mi, mɛnzhɛ á lelɔk ŋkó á kwaʼ ajʉʼ zīi, Ndém a á éwú, a á le tsɔ́ʼɔ.

⁹ Menu muɔ mɛ́t é lɛ páʼā, ŋ́gɔ́ ayiŋne menu mīi, é ayáʼa ntɔ́kɔ. É lɛɛ́ ndɔkɔ ŋ́gɛ, ajū mīi mɛ́ yáa á mbū Ndém, mbɔɔ mena pīi, mɛ́ zwhíɛ ndɔkɔ ŋgūʼtɛ á yí, é le gɔ é le kūʼ á leghʉ tɛ, ntē ŋiŋ yīi, a ghʉɛ ejʉɔ ntií etsō mɛ́t, é ŋímne nnáŋ á.

¹⁰ Á lɛ páʼā, ŋ́gɔ́ áa anu ajūɔ lejhʉ̄, mbɔɔ meluʼ, ŋ́gɔ́ anu ánɛ ntií ntiī lesok epe. Ŋ́gɔ́ á mɛt yīi, epuɔ menɔŋ mé le kuʼtéē, á piŋ ŋgɔ́ yīi, pɔ́ lɛ ezáʼe, ánɛ afʉʼ zīi, Ndém a á kúmne ntií lelɔk ŋgūʼte á yí.

Epɔʼ yīi, Klísto a le nɔ̄ŋŋ̄

¹¹ Klísto a le ké mbiŋ eshʉ̄ʼ, ŋ́gɔ́ á nnɔŋ‑epɔʼ eyi ndʉɛ, ńdɔ̄kɔ lepɔŋ tsīi, e náŋa náŋa eshʉ̄ʼɛ. A le kó á ntē ntap zīi, e é te alɔ́ʼ, é fáŋ ntɔ́k zīi, e lɛ efʉʼ mvhɔ, tɛ́ ŋghʉ̄ afaʼ zí. Ntap jʉɔ mɛ́t, ŋiŋnɔŋ mé lɛ te kwɛ́t. Púp, é lɔkɔ te ŋgɔ́ɔ azō tɛ ndɛ̄t ŋgɔŋ jʉɔ ɔ́.

¹² A le gē ekó á kwaʼ ajʉʼ zīi, Ndém a á éwú, a te pfɛ̄tte metshi mbwɔ̄p ɔ́, a te pfɛ̄tte emi mɔ́ efɔŋ ɔ́, ḿpfɛ̄tte áa kwaʼ metshi mí. A le kó éwú á taʼ legʉɔ, á pú ŋkūʼ épúp, ndɔ̄k esōk mefa ntsem, ánɛ epuɔ menɔŋ á lemiʼɛ.

¹³ Mɛ́ le nɔ̄ŋ ŋŋiktɛ metshi mbwɔ̄p, mbɔɔ metshi melō mefɔŋ, ńnɔŋ ncʉ̄ʼɛ avhō mɔ́ efɔŋ yīi, mɛ́ é tɔ, ánɛ epuɔ pīi, epe é ánɛ pɔ́p, ńdɔkɔ esōko epe áa mbe nnɛ̄t pɔ́p ndaʼ. Púp, pɔ́ ezéŋ ŋkūʼ á wɔ́p á lewuʼte á Ndém.

¹⁴ Tɛ ŋgʉɔ shɔ́ʼɔ́ ánɛ metshi Klísto o? Te mi Azwakne á le tshoné á yí, á yá athū nnɛ̄t zí á mbū Ndém, ŋ́gɔ́ á Te fa, á ŋiŋ yīi, a kwhʉ́ɛ epa esɔ̄. Metshi mí e láʼ esok á yímpɛ ánɛ mefaʼ tepɔŋ, ḿpɛ epiŋ ncʉ́ʼɛ ŋghʉ̄ɛ afaʼ áa mbū Ndém, páʼ a naáŋ nte.

Metshi mé si ŋgɔ́ ayiŋne eka Ndém pɔ́ a epuɔ menɔŋ

¹⁵ Á épúp tɛ́ Klísto, a á si ŋgɔ́ á nziŋ‑ekém, á lelɔk ŋkó ánɛ eka eswhī, melaʼ mīi, a le kwhʉ́ʉ̄, ńdɔk ncūʼ epuɔ menɔŋ, ánɛ mefa mīi pɔ́ le ghʉ̄ʉ̄, ánɛ afʉʼ nzwiŋ eka. Tɛ́ epuɔ pīi, Ndém a á tɔ́ŋ á wɔ́p, e ewɛ̄ a te mi ajū mīi, a le phʉ́ á mbū epuɔ pí.

¹⁶ Mɛ́ gɔ le tɔ́ŋ akɛtte lewhʉ̄ ŋiŋ, té gɔ́ yīi, ŋgaŋ a á kwhʉ́, tɛ mɛ́ jʉ́ɔ ɔ̄.

¹⁷ Ŋiŋ a zɛ́tɛ nte, mɛ́ tɔ́ŋ akɛtte lewhʉ̄ zí, mbɔ mɛ́ pú ŋgɔ́ le lɔ̄k ntɔ́ŋ amɔ̄ʼ anu ú. Ŋiŋ a kwhʉʉ́ páʼā, tɛ́ akɛtte lewhʉ̄ zí á te nzwiŋ.

¹⁸ Á épúp tɛ́, mvhɔ eka e le gē ezi, mɛ́ pfɛtte metshi mena.

¹⁹ Mɔɔ́sɛ a le tshí á mvhɔ alāʼ ntsem, ńzī mvhɔ, ńdɔ̄k ŋghi teté, ńtɔ́ŋ mbé ntsem mīi, Ndém a le tsekné mɛ́ tí á ntē aŋwaʼne. Tɛ́ ntswíʼ metshi epɔ̄ efɔŋ, ńtēmte ánɛ emi mbwɔ̄p, ńnéŋ ntshi éwú. Éfāʼ apū amɔ̄ʼ athʉ́ zīi, mɛ́ tɔ́ŋɔ lɛ izɔp, ŋ́kwɛ́t á paŋ menɔŋ njʉnjhʉ á athū éwú, ńdɔk ŋŋīkte aŋwaʼne mɛ́t, mbɔɔ alāʼ ntsem.

²⁰ Ŋ́gē eŋikte, ńnɔŋ ndʉ́ɛ́ ŋ́gɛ: «Emuɔ é si ŋgɔ́ metshi mīi, Ndém a lɔkɔ nzyɛ̄tɛ eka yīi, pɛ a pɔ́p é kʉɔ́ʼ. Pɛ pɔŋteé á lekūʼte eka mɛ́t. »

²¹ Mɔɔ́sɛ a le zéŋ ndɔk metshi, ŋ́ŋīk ntap, mbɔɔ ajūɔ tsem zīi, wɔ nɔŋ‑epɔʼ é lɔkɔ ŋghʉ̄ɛ afaʼ, á lewuʼte Ndém.

²² Lepé é le zɛtté ŋ́gɛ, mɛ́ elɔ̄k metshi tɛ́ esōk epe, ánɛ lelʉɛ metsō. Púp, mɛ́ zɛ́tɛ té pfɛtte metshi, mefa é le gɔ́ esok sok ó.

Klísto a le lɔ̄k athū nnɛ̄t zí, ńnɔ̄ŋ epɔʼ, á kuʼ épúp

²³ Mɛ́ é páʼā, ńdɔkɔ ndʉ́ɛ́ ŋ́gɛ, ajūɔ tsem zīi, mɛ́ lɛɛ́ ndɔkɔ ŋgūʼtɛ á Ndém, ánɛ nzwiŋ eka, á lɛ áa ayiŋne kwaʼ ajū mīi, á athʉ́ lephū. Mɛ́ le pɔŋté á lefōk epe, ánɛ etsō mɛ́t, páʼ lepé Mɔɔ́sɛ é le nɔ̄ŋ nzɛ́ttɛ. Ḿbiŋ ŋgɔ́ mé kwaʼ ntií lelɔk ŋgūʼte á Ndém, é nɔŋ nzɛ́ttɛ ŋ́gɛ, mɛ́ enɔ̄ŋ epɔʼ yīi, é tɔɔ́k metshi mena.

²⁴ Klísto a lɛ te kó á ntē ajʉʼ alɔ́ʼ zīi, epuɔ menɔŋ mé le pɔ́ɔ̄. Ewuɔ te alɔ́ʼ ajʉʼ mɛ́t, a lɛ áa lelɔk ŋghíte páʼ, ajʉʼ zīi Ndém a naáŋ éwú, á épúp. A le kó á ntē lephū, tɛ a tshií tsetsɔŋɔ, á mvhɔ Ndém, ńtɔ́kɔ nzem zímpɛ.

²⁵ Nnɔŋ‑epɔʼ eyi ndʉɛ, a eziɛ́ ŋguʼ lɛ́, ŋ́kó á ntē te alɔ́ʼ ajʉʼ, ńdɔ̄k metshi mīi é té emí í, ńnɔ̄ŋ epɔʼ. Klísto a le ké mbiŋ ndɔ̄k athū zí méŋwɛ̄t, ńnɔ̄ŋ epɔʼ, á taʼ legʉɔ, á kuʼ épúp.

²⁶ Á lɛ te gɔ́ péʼe, ŋ́gɔ́ épúp ɔ́, mbɔ a le gɔ́ á jʉ́ɔ ŋgʉɔ̄ʼ tɛ ŋgʉɔ é záne, tɛ efhó á anɔŋɔ́‑ŋgɔŋ. Táʼ, afʉʼ á le náŋ tɛ ŋkūʼ, á yá athū nnɛ̄t zí, á taʼ legʉɔ épúp, ńdɔk nnɔ̄ŋ epɔʼ á athū epuɔ metsem, melaʼ mefa mɔ́p.

²⁷ Páʼ epuɔ menɔŋ, é pɔŋteé á lekwhʉ̄ á taʼ legʉɔ, ŋgʉ̄ɔ mé ajʉʼ zīi, Ndém a záʼa ntsaŋ éwú lā.

²⁸ Púp, Klísto a le yá athū nnɛ̄t zí, á taʼ legʉɔ páʼā, ńdɔkɔ esōko mefa atʉtʉ epuɔ. A a fú ezéŋ eshʉʼ mmɔʼ legʉɔ, é le gɔ́ melaʼ mefa á, a gɔ́ á leghʉ, epuɔ pīi, pɔ́ nnɔŋ nzwíʼtɛ á yí, e etswɛ́t.