Eble 8 - Eka Eswhī

Yɛɛ́so a á si ŋgɔ́ á nnɔŋ‑epɔʼ yímpɛ eyi ndʉɛ

¹ Mɛgém anu yīi, pek é si ŋkɔ̄ŋɔ á leshūŋ ánɛ anu jʉɔ mɛ́t, a awuɔ páʼa: ntií mía mía nnɔŋ‑epɔʼ eyi ndʉɛ páʼa mɛ́t, tɛ́ ḿpɛ wɛ̄ɛ. Yí mé le gʉ̄ɔ nnáŋ á lephū, ánɛ ŋkɔʼɔ́ apū ete Ndém, á ajʉʼ zīi Ndém a naáŋ éwú, ésáʼa ajūɔ tsem.

² A naáŋ éwú épúp, ŋ́ghʉ̄ɛ mefaʼ ánɛ te alɔ́ʼ ajʉʼ, á ntē kwaʼ ntap zīi, Atsyapuɔ a le ghʉ̄ʉ̄, ŋiŋnɔŋ mé lɛ te zēek.

³ Nnɔŋ‑epɔʼ eyi ndʉɛ ntsem yīi, mɛ́ é chʉ́ á yí, mɛ́ chʉʉ́ á yí páʼā, ŋ́gɛ a eyá etsō á mbū Ndém, ńzéŋ nnɔ̄ŋ epɔʼ á mbū yí. Melaʼ épúp tɛ́, á mbɔŋ ŋ́gɛ, nnɔŋ‑epɔʼ eyi ndʉɛ yímpɛ, a ewɛ̄ azí ajū mīi, a gɔ eyá.

⁴ Klísto a le wíʼe, ŋgɔ́ á esī atsetsáʼ, mbɔ a zi te mbɔɔ nnɔŋ‑epɔʼ ɔ́, melaʼ mīi a le zī ŋgē eshʉʼe, mbɔ epuɔ é ndáʼ ŋgɔ́ si ŋgyáa etsō, á mbū Ndém, ńdeŋ ndeŋ páʼ lepé Mɔɔ́sɛ é le nɔ̄ŋ nzɛ́ttɛ épúp.

⁵ Afaʼ zīi wɔ nnɔŋ‑epɔʼ puɔ mɛ́t, é lɛɛ́ ŋghʉɛ, á lɛ ayiŋne kwaʼ afaʼ zīi, mɛ́ é athʉ́ lephū ŋghʉ̄ɛ. Mɔɔ́sɛ a le nɔ̄ŋ ŋgɔ̄ á nzeēk ntap Ndém, Ndém á tswɛte á yí ŋ́gɛ: «Jʉ́ɔ́, ge ezeke, ńcuŋte ŋghʉ̄, tɛ ajūɔ tsem a egɔ́ ndeŋ ndeŋ, páʼ ezi meŋ ke tswī á wú á ndo lekwɛ̄t. »

⁶ Púp, ḿpɛ elɔ̄ɔk njʉ́ɔ á légɛ, afaʼ Yɛɛ́so á pú efáŋ ntsyā azi wɔ nɔŋ‑epɔʼ mɛ́t. A tshií á tsetsɛlɛ Ndém pɔ́ a epuɔ menɔŋ, ŋ́gɔ́ á nziŋ‑ekém ánɛ eka yīi, Ndém a kʉɔ́ʼɔ. Eka wuɔ mɛ́t, é tɔɔ́k eyi efʉʼ mvhɔ, melaʼ mīi, ajū mīi Ndém a á ntē eka wuɔ mɛ́t, ḿbhʉ́ɛ epuɔ, á tɔɔ́k azi ḿpɛ le zī ŋgwɛ.

⁷ Á ŋgwíʼe ŋgɔ́ éyi, alɔ́ʼ á lɛ te ánɛ mvhɔ eka á, mbɔ Ndém a lɛ te lɔ̄k mmɔʼ eka ndɛʼɛ, ŋ́kúmne ɛ́.

⁸ Ḿpɛ é si ŋké njʉ́ɔ páʼ, alɔ́ʼ á lɛ éwú, melaʼ mīi Ndém méŋwɛ̄t, a le cɔ́k epuɔ alāʼ pí, ńdé ŋ́gɛ: «Awuɔ yīi meleʼé é si eshʉ̄ʼɛ la, Atsyapuɔ mé lʉ́ɛ́. Émi pek a alāʼ epuɔ Islaɛl, mbɔɔ alāʼ epuɔ Yúda, e kʉɔ́ʼ eka eswhī.

⁹ Eka wuɔ mɛ́t, é le gɔ́ páʼ eyi, pek a wɔ maŋgānjʉʼ pɔ́p é le kʉɔ́ʼē, á afʉʼ zīi meŋ nde tswíʼ á wɔ́p, ŋ́gwɛ̄ á mbū meŋ, ńdɔk efhó á ŋgɔŋ Ejīpto ntó ɔ́. Pɔ́ lɛ te eka gá wuɔ mɛ́t kúʼte, melaʼ épúp tɛ́, meŋ nde tém nzem zɔp azá. Atsyapuɔ mé lʉ́ɛ́.

¹⁰ Eka yīi pek a epuɔ Islaɛl é shʉʼɛ ekʉɔ́ʼɔ afʉʼ mɛ́t, e ewuɔ páʼa, Atsyapuɔ mé lʉ́ɛ́: meŋ a shʉʼ enéŋ mbé má, á ntē akwaŋte pɔ́p. Meŋ a shʉʼ etí á ntē pɔ́p. Meŋ a shʉʼ egɔ́ á Ndém wɔp, pɔ́ egɔ́ epuɔ alāʼ pá.

¹¹ Ŋiŋ wɔp a á le zéŋ nzíʼne mmɔʼ, á lezhɛ̄ á gá á. Ŋiŋ wɔp a á le zéŋ nzíʼne á méŋ mɔ́ yi, ńdé ŋ́gɛ: “Zhɛ́ á Atsyapuɔ ɔ́.” Epuɔ metsem e e láʼ enɔŋ ezhɛ́ɛ á gá, tɛ efhó ewɔŋkhʉ̄, ŋ́gʉɔ ŋkó melʉɛ.

¹² A egɔ́ épúp, meŋ ndēkne mefa mɔ́p. Meŋ ńde zéŋ menu tepɔŋ mɔ́p ŋkímtɛ ɛ́. »

¹³ Ndém a le shúŋ anu ánɛ eka eswhī páʼā, ńdɔkɔ ŋghʉ̄ɛ, mvhɔ eka, é cʉ́ʼɛ nzwiŋ. Ḿpɛ é si mbīŋɛ nzhɛ́ɛ á légɛ, ajū mīi á zwiīŋ, tɛ á té zéŋ ntswítɛ ɛ́, á cʉʉ́ʼ áa awaʼá‑azō.