Eble 7 - Eka Eswhī

Mɛlkisedɛk a lɛ á efɔ, ńzéŋ ŋgɔ́ á nnɔŋ‑epɔʼ

¹ Mɛlkisedɛk wuɔ mɛ́t, a lɛ á efɔ tésɔŋ Salɛm, ńzéŋ ŋgɔ́ á nnɔŋ‑epɔʼ Ndém‑tɛ‑athʉ́ lephū. Ablaham á nɔŋ ŋkɔ́ʼɔ ncu, mbɔ a á ndʉɔ́ʼ mefɔ tɛ njhʉ́, á gʉɔ mbōte á yí, ńdɔ́ mbwɛ́né á athū yí.

² Ablaham á gap afuʼ ncu ntsem nzhɛ legēm, ŋ́gyá á taʼ nzhɛ á mbū yí. Lezēŋ Mɛlkisedɛk wuɔ mɛ́t, é zi nté njhʉ̄ ndɔkɔ ndʉ́ɛ́ ŋ́gɛ: «Efɔ anu ndeŋ ndeŋ» Á zéŋ ŋgɔ́ á efɔ tésɔŋ Salɛm, ńdɔkɔ ndʉ́ɛ́ á efɔ apwɛne.

³ Mɛ́ lɛ te á mɔʼɔ́ yi zhɛ́, mɛ́ té á mɛ́ wɔp zhɛ́, ńzi te elhu yí zhɛ́. Ńzi te zhɛ́ aleʼé zīi, mɛ́ le zhí á yí í, mɛ́ té zhɛ́ azi a le kwhʉ́ ɛ̄. A á páʼ Méŋ Ndém lā, ńdɔkɔ ŋgɔ́ á nnɔŋ‑epɔʼ, á lemiʼɛ.

⁴ Ablaham a á si ŋgɔ́ á maŋgānjʉʼ epuɔ Islaɛl, pɛ eké njʉ́ɔ páʼ, a le gāp afuʼ ncu zí nzhɛ legēm, ŋ́gyá á akim mbɔŋ, á mbū Mɛlkisedɛk. Á páʼā, Mɛlkisedɛk á lɔk ŋgɔ́ á mía ŋiŋ.

⁵ Lepé é veéŋ ŋ́gɛ, epuɔ Islaɛl e egāp etsō tsɔ́p nzhɛ legēm, ŋ́gyá á taʼ nzhɛ á mbū ndhu Levi, páʼ pɔ́ é si ŋgɔ́ wɔ nɔŋ‑epɔʼ lā. Ndhu Levi e é páʼā, ńdɔkɔ ntswíi azō á mbū epɔ̄ memía pɔ́p, páʼ pɔ́ é azɔ́p ndhu Ablaham.

⁶ Mɛlkisedɛk a le pīŋ te ŋiŋ ánɛ ndhu Levi í, Ablaham á ké ŋgyá á taʼ nzhɛ, ánɛ afuʼ ncu zīi, a á gap nzhɛ legēm, á mbū yí. Á té épúp ndaʼá, Mɛlkisedɛk á le zéŋ ndɔ́ mbwɛ́né á athū ŋiŋ yīi, Ndém a le ghʉ̄ alaʼne á mbū yí.

⁷ Á té anu efaʼ faʼ á, ŋiŋ yīi a lɔɔ́ mbwɛ́né á athū ŋiŋ, a faáŋ ntɔ́k á ŋiŋ yīi, a tswíi mbwɛ́né.

⁸ Ndhu Levi, épuɔ pīi, mɛ́ gapa etsō nzhɛ legēm ŋgyáa á taʼ nzhɛ á mbū pɔ́p, pɔ́ é si ŋgɔ́ epuɔ pīi, pɔ́ e láʼ ekwhʉ́te kwhʉ́te. Á piŋ eshʉ̄ʼ ánɛ Mɛlkisedɛk, mbɔ mɛ́ le yá nzhɛ azō áa mbū yí. Á piŋ ŋgɔ́ á ŋiŋ yīi, mɛ́ zhɛɛ́ ŋ́gɛ, a zɛɛ́t áa nte.

⁹ Ḿpɛ gɔ elé ŋ́gɛ, Levi, páʼ mɛ́ gapa etsō nzhɛ legēm, ŋ́gyáa á taʼ nzhɛ á mbū yí lā, a le zéŋ ŋgyá azí nzhɛ etsō, á mbū Mɛlkisedɛk, éfhó ánɛ páʼ, maŋgānjʉʼ wɔp Ablaham, a le yá nzhɛ etsō á mbū Mɛlkisedɛk.

¹⁰ Á gɔ́ páʼ a le zɛ́t áa levem maŋgānjʉʼ wɔp, tɛ́ Ablaham pɔ́ Mɛlkisedɛk é pote.

¹¹ Lenɔŋ epɔʼ mé lɛ si ŋgɔ́ letseŋ anu, ánɛ mbé mīi, mɛ́ le yá á mbū epuɔ Islaɛl. Páʼ wɔ nɔŋ‑epɔʼ ánɛ ndhu Levi, é lɛ te ghʉ̄ afaʼ ndeŋ ndeŋ, páʼ lepé mɛ́t é zɛtteé épúp ɔ́ lā, mɛ́ le pīŋ te zéŋ efāʼ mmɔʼ nnɔŋ‑epɔʼ ndɛʼɛ, ánɛ ndhu Aalɔŋ ɔ́, ńcʉ́ʼɛ efāʼa á yí áa ánɛ ndhu Mɛlkisedɛk.

¹² Ntií lelɔk ncʉ́ʼ á nnɔŋ‑epɔʼ, e kumneé páʼā, lepé é pɔ́ŋte á lezēŋ ŋkúmne azí.

¹³ Menu mīi meŋ á shúŋ la, é cʉteē á Atsyapuɔ yímpɛ. A lɛ te tó ánɛ atseŋ ŋgyā Levi í, a le tó áa ánɛ atseŋ ŋgyā zīi, ŋiŋ a laá nzi ntó éwú, ŋ́gɔ́ á nnɔŋ‑epɔʼ ɔ́.

¹⁴ Epuɔ metsem é si nzhɛ́ɛ á légɛ, a lɛ ŋiŋ ánɛ ndhu Yúda, á gɔ́ atseŋ ŋgyā, mbɔ Mɔɔ́sɛ a le nɔ̄ŋ eshúŋɔ anu ánɛ wɔ nɔŋ‑epɔʼ, a te kím eshúŋ ŋ́gɛ, nnɔŋ‑epɔʼ a lé zi ntó éwú ú.

Klísto a á nnɔŋ‑epɔʼ eyi ndʉɛ, ńdeŋ ndeŋ páʼ Mɛlkisedɛk

¹⁵ Wɔ nɔŋ‑epɔʼ ánɛ ndhu Levi, é lɛ te ghʉ̄ páʼ Ndém a á si ŋkɔ̄ŋɔ ɔ́. Ajū mīi á tswiʼnɛ ŋkɛ́ʼtɛ ajʉʼ anu mɛ́t, a ajʉɔ. Á si ŋgɔ́ páʼ, eyi mmɔʼ nnɔŋ‑epɔʼ yīi, meŋ á zi ŋkím lā, a le tó ŋgɔ́ páʼ Mɛlkisedɛk lā.

¹⁶ A lɛ te gē ecʉ́ʼ á nnɔŋ‑epɔʼ, éfhó ánɛ anu atseŋ ŋgyā á, mete á lenāŋ á lemiʼɛ mé le ghʉ̄ʉ̄, á cʉ́ʼ ewiɛ́.

¹⁷ Á zi ŋgē egɔ́, aŋwaʼne Ndém á nɔŋ ntswíi ntāŋ yí, ńdʉ́ɛ ŋ́gɛ: «O ó si ŋgɔ́ á nnɔŋ‑epɔʼ á lemiʼɛ, ńdeŋ ndeŋ páʼ Mɛlkisedɛk a lɛ épúp. »

¹⁸ Á páʼā, Ndém á lɔkɔ mbíkɛ á nzwiŋ lepé, melaʼ mīi, é le pwɛ́tē, ńzi te epuɔ tswíte.

¹⁹ Lepé Mɔɔ́sɛ é lɛ te tswíte epuɔ menɔŋ, á legɔ̄ té alɔ́ʼ á mvhɔ Ndém ɛ́. Tsetsɔŋɔ, Ndém a le ké ŋgyá á yímpɛ amɔ̄ʼ azō, á tɔ́k lepé mɛ́t. Azō mɛ́t, á si ŋgyáa á yímpɛ á mɛnzhɛ á letshī á mvhɔ yí. Ḿpɛ enéŋ á ntē pímpɛ á légɛ, ḿpɛ é ndáʼ ŋgwɛ̄ aziɛ́ azō.

²⁰ Amɔ̄ʼ anu á zeéŋ ŋgɔ́ lɛ, Ndém a le gē elɔk á Yɛɛ́so eghʉ á nnɔŋ‑epɔʼ eyi ndʉɛ, ŋ́kā. Ḿbiŋ ŋgɔ́ mé wɔ nɔŋ‑epɔʼ ánɛ ndhu Levi, mbɔ a lɛ te kāa.

²¹ A le ké ŋgē echʉ́ á yí, élɔk eghʉ á nnɔŋ‑epɔʼ, ŋ́ka ndé á mbū yí ŋ́gɛ: «Meŋ Atsyapuɔ, meŋ á lé tɛ ŋkā. Meŋ mbiŋɛ ŋgɔ́ le kúmne anu zīi, meŋ á lé ɛ́: “O ó si ŋgɔ́ á nnɔŋ‑epɔʼ á lemiʼɛ.”»

²² Ndém a le kā páʼā, ńdɔkɔ ntswīi á légɛ, Yɛɛ́so mé si ntswíi ntāŋ á légɛ, eka yīi, Ndém pɔ́ a epuɔ menɔŋ é le kʉɔ́ʼē, é si ŋgɔ́ mbɔŋ ntɔ́k eyi mvhɔ.

²³ Ḿbáte, mbɔ wɔ nɔŋ‑epɔʼ ánɛ ndhu Levi, é lɛ tɛ nzáne, melaʼ mīi, lewhʉ̄ a le nɔ̄ŋ mvɛ́nɛ á wɔ́p, á lenāŋ á lemiʼɛ.

²⁴ Ḿbiŋ ŋgɔ́ mé Yɛɛ́so, mbɔ, páʼ a puú nnáŋ á lemiʼɛ lā, ezi ntií legɔ̄ á nnɔŋ‑epɔʼ, é tswhiī tswhi.

²⁵ É melaʼ épúp tɛ́, a kuūʼ á yí á leghʉ, epuɔ pīi pɔ́ é si nzápa ánɛ yí, ńtshótɛ nnɛ̄t mé lezēŋ Ndém, é tswɛ́t tɛ ndaʼ, melaʼ mīi, a á efʉʼ metsem, ŋ́gɔ́ áa nte, ńzéŋ nnɔŋ eswíŋtɛ á Ndém á athū pɔ́p.

²⁶ Yí mé si ŋgɔ́ á nnɔŋ‑epɔʼ eyi ndʉɛ yīi, á le pɔ̄ŋ ŋ́gɛ, ḿpɛ ewɛ̄. Á ŋiŋ té alɔ́ʼ, té atswɛ́t, té mefa, mbɔ Ndém a lē efakne á wɔ́p a megaŋ mefa, ŋ́kɔ́ʼne á yí nnáŋ ánɛ mía ajʉʼ, á athʉ́ lephū.

²⁷ A te pɔŋté á yí á legɔ̄ eleʼé tsem, ŋ́gē enɔŋ epɔʼ, ńzī mvhɔ, ńnɔ̄ŋɔ melaʼ mefa mí, tɛ́ mbiŋ nnɔ̄ŋ melaʼ mefa epuɔ alāʼ, páʼ emɔ̄ʼ wɔ nɔŋ‑epɔʼ epi melʉɛ ɛ́. A le pú ndɔk athū nnɛ̄t zí, ńnɔ̄ŋ epɔʼ á taʼ legʉɔ, á kuʼ épúp.

²⁸ Á lɛ ánɛ lepé Mɔɔ́sɛ, mɛ́ tsɔ́ʼ epuɔ menɔŋ, tɛ́ ndɔk ŋghʉ̄ wɔ nɔŋ‑epɔʼ epi melʉɛ, tɛ́ pɔ́ ké ŋgɔ́ azɔ́p áa megaŋ mefa. Lepé é le pīŋ eshʉʼ ńnáŋ tɛ ntɔ́k, Ndém á shúŋne tɛ ŋkā, ńchʉ́ á Méŋ yi, ńdɔk ŋghʉ̄ á nnɔŋ‑epɔʼ eyi ndʉɛ, ŋ́gɛ a eghʉ̄ afaʼ mɛ́t á lemiʼɛ. Mbɔ Méŋ yi mɛ́t, a á ghʉ ajū mīi, á pɔŋ á yí.