Eble 6 - Eka Eswhī

¹ Púp, ḿpɛ enáʼ mbāʼne mvhɔ menu mīi, mɛ́ le ziʼné á yímpɛ ánɛ Klísto mé nzem, ńdɔk emi mɛ́ ziʼneé epuɔ pīi pɔ́ é tswhí, ŋ́gʉ̄ɔ mé mvhɔ. Ndɛ́ʼ ḿpɛ epīiŋ nzem, ánɛ atseŋ anu jʉɔ mɛ́t leswhī leswhī. Ńdɔkɔ ŋ́gɛ, ndɛ́ʼ ḿpɛ ezéŋ nzíʼne leswhī leswhī á légɛ, ŋiŋ a egɔ̄ nnɛ̄t zi, ŋ́gwáʼ mefaʼ tsem mīi, é gɔ evɛ́ne á ŋiŋ á lelāʼ njʉ́ɔ á Ndém. Á légɛ, ŋiŋ a efɛ́ nnɛ̄t ŋgyá á mbū Ndém.

² Ndɛ́ʼ ḿpɛ ezéŋ nzíʼne leswhī leswhī, menu ánɛ mentií lenoʼ epuɔ á ntshi. Ndɛ́ʼ ḿpɛ ezéŋ nzíʼne leswhī leswhī, á lezāpa mbū á athū ŋiŋ, ánu ánɛ lezīm ánɛ lewhʉ̄, ánu ánɛ Ndém á lezāʼ ntsaŋ zɔp a epuɔ menɔŋ á lemiʼɛ.

³ Ḿpɛ epāʼne emuɔ menu mɛ́t mé nzem, ŋ́gʉ̄ɔ mé mvhɔ, páʼ Ndém a á véŋ.

⁴ Ndɛ́ʼ ḿpɛ ezíʼne menu muɔ mɛ́t leswhī leswhī, melaʼ mīi, ŋiŋ a fhɔ́ɔ ánɛ mɛnzhɛ Ndém ntó, eshhʉ̄ é le éwú á lezēŋ ndɔ̄k ńtswíte á yí, tɛ á sɛt nnɛ̄t ncʉ́ʼ á ŋiŋ eswhī ɛ́. Ntií ŋiŋ jʉɔ mɛ́t, a lē ndáʼ njʉ́ɔ ŋkaʼ Ndém, ŋ́gwɛ̄ etsō mbɔŋ tsīi, Ndém a yáa. Azwakne Ndém á zéŋ ŋkó á ntē yí.

⁵ A ecuŋte nzhɛ́ á légɛ, ashuŋne Ndém á si ŋgɔ́ mbɔŋ. A lē ndáʼ nzwíʼ mete mīi, é fhɔ́ɔ ánɛ ŋgɔŋ zīi, e e fú tɛ́ eshʉʼe.

⁶ A le pú nzwíʼ ecū muɔ mɛ́t, ḿbiŋ nzéŋ ḿbīŋ nzem ánɛ nzwiŋ atswhī yi. Meshhʉ̄ e té zɛ́t á mbū ŋiŋ wuɔ mɛ́t, á lelɔk nzéŋ ŋgɔ̄ nnɛ̄t zi, ńcʉ́ʼ á ŋiŋ eswhī ɛ́, melaʼ mīi a á si ndɔ̄kɔ atswhī zí, ńzéŋɛ ŋkwɛ̄tɛ á Méŋ Ndém ánɛ mbaŋne paŋné. Ńdɔ̄kɔ atswhī mɛ́t, ŋ́gyáa meshhʉ̄ á mbū emɔ̄ʼ epuɔ, á lelɔk nzɔ̄te á Méŋ Ndém.

⁷ Mbeŋ e luú efʉʼ metsem, ŋ́kó ánɛ ajʉʼ atsáʼ páʼā, ajʉʼ atsáʼ mɛ́t, á zém etsō, ńdɔk ntswíte epuɔ pīi pɔ́ jʉ́ʼɛ. Ndém á néŋ mbwɛ́né ánɛ ajʉʼ atsáʼ mɛ́t.

⁸ Á piŋɛ ŋgyá menzɔ̄ŋ pɔ́ tepɔŋ mvēŋ, mbɔ mɛ́ e pú etó éwú. Mbɔ á cʉʉ́ʼ ŋgʉɔ mbīa, Ndém a enéŋ ndɔ éwú, épiŋ ege emakne, élɔk mmók eghʉ, a elákne.

⁹ Ŋ́ké ŋgɔ́ mé pɛ mepɔŋ mesoó pá, mbɔ pek ké ndʉ́ɛ́ páʼa, ńnɔŋ nchʉ́ɛ nnɛ̄t nzhɛ́ɛ á légɛ, pɛ é ánɛ mɛnzhɛ mbɔŋ, á mɛnzhɛ letswɛ̄t.

¹⁰ Ndém a á páʼā, ḿbú ŋgɔ́ áa ŋiŋ ndeŋ ndeŋ. A gɔ le lēkne afaʼ mbɔŋ zɛ́ ɛ́. Pɛ le gē etswi á légɛ, pɛ kɔɔ̄ŋ á yí, ŋ́ghʉ̄ afaʼ, ńdɔ̄k ntswíte epuɔ pí. Pɛ é tsetsɔŋɔ, ńzéŋ nzɛ́t ŋ́ghʉ̄ ghʉ.

¹¹ Pek é si ntsáa á légɛ, awíɛ awíɛ á nnɔ pɛ, a ekúʼte á mbɔŋ atswhī wuɔ mɛ́t, tɛ ndáʼ nzōko, ńnéŋ á ntē yí á légɛ, yí é ndáʼ ŋgwɛ̄ ajū mīi, yí é si nzwíʼtɛ.

¹² Púp, ndɛ́ʼ pɛ eká, á cʉ́ʼɛ épúp, pɛ efʉ̄ʼne epuɔ pīi, pɔ́ le fɛ́ nnɛ̄t ŋgyá á mbū Ndém, ŋ́kāk ete, Ndém á yá á wɔ́p ajū mīi, a le laʼnē á mbū pɔ́p.

Ndém a laʼneē azō, ńdáʼ ŋghʉ̄

¹³ Ndém a le gē eghʉ alaʼne á mbū Ablaham páʼā, ńdɔ̄k athū zí méŋwɛ̄t Ndém ŋkā, melaʼ mīi, mmɔʼ ŋiŋ tɛ ntɔ́k á yí, éyi a le gɔ́ á lɔk á yí ŋkā, a te éwú ú.

¹⁴ A le kā ndé ŋ́gɛ: «Meŋ a shʉʼ efuʼte mbwɛ́né ánɛ wu, tɛ e ezá ntɔ́k. Meŋ a shʉʼ eghʉ, nzwɛt ju e efuŋ nzáne. »

¹⁵ Ablaham á júʼ épúp, ŋ́kwɛ́t ntē nnáŋ. Ndém á láʼ ŋgyá ajū mīi, a le laʼnēē, á mbū yí.

¹⁶ Epuɔ menɔŋ é gē eka anu, ńdɔ̄k lezēŋ ŋiŋ yīi, a faáŋ ntsya á wɔ́p, tɛ́ ŋkā. Á lɔkɔ ntswīi á légɛ, anu zɔ́p á si ŋgɔ́ á anuúnē, tɛ ŋgɔ́ yīi, ŋiŋ a gɔ le zéŋ ŋŋāk á.

¹⁷ É melaʼ épúp, tɛ́ Ndém a le ká ánɛ alaʼne zīi, a le ghʉ̄ á mbū epuɔ menɔŋ. A le gē eghʉ épúp, ńdɔkɔ efāʼa á letswi á mbū epuɔ pīi, a le laʼnē á leyā azō á mbū pɔ́p, á légɛ, yí gɔ le lāʼne azō, mɛ́ piŋ efāʼ kékáŋ á.

¹⁸ Púp, menu mɛ́mbīa muɔ mɛ́t, Ndém a gɔ le kúmne. Ndém a púu ŋgɔ́ le á wú láte. Aziɛ́ mé ghʉ̄ʉ, ḿpɛ pīi ḿpɛ lē ŋkʉ ndʉ̄ɔne á mbap yí, é chʉ́ nnɛ̄t ŋkāk ete melaʼ épúp, ńnéŋ á ntē pímpɛ á légɛ, ḿpɛ e láʼ ewɛ ajū mīi, Ndém a le laʼnē á leyā á mbū pímpɛ.

¹⁹ Ḿpɛ ekúʼte á ntē pímpɛ tɛ a etē, ńzhɛ́ á légɛ, Ndém a a láʼ eyá ajū mīi, a le laʼnē á leyā á mbū pímpɛ. Aziɛ́ mé ghʉ̄ʉ, ḿpɛ etshí á mvhɔ yí té miʼte. É melaʼ épúp, tɛ́ ḿpɛ le tɔ́k ánɛ mía apū nzhó zīi, mɛ́ le lɔ̄k esáne á Mía Ŋgyā Ndém, ŋ́kó á ajʉʼ zīi, Ndém a naáŋ éwú.

²⁰ Ajʉʼ mɛ́t, tɛ́ Yɛɛ́so a le té njhʉ̄ ŋkó éwú, melaʼ mímpɛ. Á gɔ́ páʼ, a le cʉ́ʼ á nnɔŋ‑epɔʼ eyi ndʉɛ á lemiʼɛ, ńdeŋ ndeŋ páʼ Mɛlkisedɛk.