Eble 5 - Eka Eswhī

¹ Mɛ́ é páʼā, éfhó á nnɔ epuɔ menɔŋ, tɛ́ ntsɔ́ʼ á nnɔŋ‑epɔʼ eyi ndʉɛ, ŋ́gɛ a egɔ́ á ntɔk‑nzem epuɔ menɔŋ, ánɛ lenāŋ epuɔ menɔŋ pɔ́ á Ndém. Afaʼ zí á si ŋgɔ́ á leyā etsō, mbɔɔ á lenɔŋ epɔʼ melaʼ mefa epuɔ menɔŋ.

² A kuūʼ á yí á lejūʼ ajū mīi, á ghʉʉ̄, epuɔ é whʉ mefa, kɛ́ azi á ghʉʉ̄, ŋiŋ á gē efa nzhɛ, ńnɔŋ te nzhɛ́ ɛ́. Á gɔ́ páʼ yí méŋwɛ̄t azí, a á ŋiŋ mbwɛ́t ánɛ meshhʉ̄ ntsem.

³ É melaʼ lepwɛ̄t mɛ́t, tɛ́ a pɔŋteé á lenɔŋ epɔʼ melaʼ mefa mí méŋwɛ̄t, mbɔɔ melaʼ mefa epuɔ alāʼ.

⁴ Ŋiŋ mé té kɔŋ nnáŋ ánɛ mía ajʉʼ nnɔŋ‑epɔʼ eyi ndʉɛ ɛ́, Ndém mé tɔɔ́ŋ á ŋiŋ, ŋ́gɛ a egɔ́ ewiɛ́, ńdeŋ ndeŋ páʼ a le tɔ́ŋ á Aalɔŋ lā.

⁵ Á le zéŋ ŋgɔ́ ndeŋ ndeŋ épúp, á mbū Klísto. A le gē ecʉ́ʼ á nnɔŋ‑epɔʼ páʼā, yí méŋwɛ̄t mé té kāŋ ecʉɔ lewūʼ mɛ́t ɛ́. Ŋiŋ yīi a le lé mé yí ŋ́gɛ: «O ó méŋ ga, tɛ efhó ayáʼa, meŋ gɔ́ á Mɔʼɔ́ wu,» mé le yá me yí.

⁶ Á zeéŋ efhó ánɛ páʼ, ŋgaŋ a le lé ŋ́gɛ: «O ó si ŋgɔ́ á nnɔŋ‑epɔʼ á lemiʼɛ, ńdeŋ ndeŋ páʼ Mɛlkisedɛk a lɛ épúp. »

⁷ Klísto a lɛ á esī atsetsáʼ, ńdɔ̄k ŋghi teté pɔ́ ntshi nnēk, ńdā á mbū Ndém. Éswíŋte á Ndém, á ŋiŋ yīi a le kūʼ á lefhō á mbū lewhʉ̄, ŋ́kú á yí. Á ké ŋgɔ́ páʼ, a le pú mvéŋ ajūɔ tsem lā, Ndém á júʼ aswiŋte zí.

⁸ Tsya áa légɛ, a lɛ á Méŋ Ndém, a le ziʼné á lezāpa ánɛ ŋgʉɔ̄ʼ, ńjúʼ nchu Ndém.

⁹ Ndém á náŋ á yí ánɛ mía ajʉʼ, á cʉ́ʼ á mbū epuɔ pīi é juúʼ nchu yí, ŋ́gɔ́ á Ŋghʉɛ‑mɛ́‑tswɛ́t á lemiʼɛ.

¹⁰ Ndém a le chʉ́ á yí ndɔk ŋghʉ̄ á nnɔŋ‑epɔʼ eyi ndʉɛ, ńdeŋ ndeŋ páʼ, Mɛlkisedɛk a lɛ épúp.

Awíɛ a epá á yí á lefhō ánɛ mɛnzhɛ Ndém ntó

¹¹ Pek wɛɛ̄ menu tɛ nzáne mīi, pek gɔ á eshúŋɔ ánɛ anu jʉɔ mɛ́t. Wék á lepiŋ ŋkɛ́ʼte éshúŋ á wɛ́, á te, melaʼ mīi, pɛ cʉ́ʼɛ ŋká kaá ánɛ lejūʼ anu.

¹² Á le gɔ́, á ge egɔ́ páʼa, mbɔ pɛ lē ndáʼ ncʉ́ʼ meziʼnɛ. Á piīŋ ŋgɔ́ tsetsɔŋɔ, mɛ́ zɛ́t mbɔ́ŋte á lezēŋ nzíʼne á wɛ́ epɔ̄ metsō, ánɛ anu Ndém. Á pú ŋgɔ́ gɔ́ɔ, tɛ mɛ́ e cʉ́ʼɛ eyáa á wɛ́ áa lepē, mbɔ á ŋgɔ́ yīi a ke gɔ́, mɛ́ cʉ́ʼɛ ŋgyáa á wɛ́ áa etsō lejhʉ̄ tsīi, é si ntētɛ.

¹³ Ŋiŋ yīi a á efʉʼ metsem, ńtsá áa lepē lā, a á páʼā, ńdɔkɔ nzɛ́t áa mɔ́ eswī. Yí méŋwɛ̄t a gɔ le kūʼ á lezhɛ̄ ajū mīi, á ndeŋ ndeŋ ɛ́.

¹⁴ Melʉɛ é pfɛɛ́t etsō lejhʉ̄ tsīi, é si ntētɛ. Pɔ́ fhoó ánɛ menu mīi, pɔ́ lé jʉ́ɔ, ŋ́kūʼ á lesāŋ tɛ nzhɛ́ ajū mīi á mbɔŋ, ńzhɛ́ azi á té pɔŋ.