Eble 4 - Eka Eswhī

¹ Ndém a le laʼnē á mbū pímpɛ ŋ́gɛ, ḿpɛ e láʼ enáŋ á ajʉʼ zīi, a naáŋ éwú, ézwite. Ḿpɛ elāk athū zímpɛ á légɛ, ndɛ́ʼ ŋiŋ á nnɔ pɛ, á láʼ nnéŋ té kó azí, ánɛ ajʉʼ azwite jʉɔ mɛ́t.

² Ḿpɛ le júʼ azímpɛ ashuŋne Ndém, ńdeŋ ndeŋ páʼ, epuɔ pīi é lɛ á késáatswɛt, é le júʼ azɔ́p. Ashuŋne mɛ́t zīi pɔ́ le júʼē, á lɛ te á wɔ́p tswíte, melaʼ mīi, pɔ́ lɛ te cʉ́ʼ ashuŋne mɛ́t, á kóte á ntē pɔ́p, tɛ ŋghʉ̄ pɔ́ fɛ́ nnɛ̄t ŋgyá á mbū Ndém ɛ́.

³ Ḿpɛ pīi ḿpɛ fɛɛ́ nnɛ̄t ŋgyá á mbū Ndém, ḿpɛ e láʼ enáŋ á ajʉʼ zīi, a naáŋ éwú, ézwite. A le lé ánɛ anu lezwite jʉɔ mɛ́t ŋ́gɛ: «Meŋ á záŋ á lɔ́ŋ, ńdé tɛ ŋkā ŋ́gɛ: Pɔ́ té ndáʼa ŋkúɔ́ á ntē ajʉʼ zīi, meŋ á éwú, tɛ nzwītɛ ɛ́. » Ndém a le gē elé épúp páʼā, mbɔ a le pú ŋghʉ̄ akʉ̄ɛ akʉ̄ɛ tɛ á mi, tɛ efhó á anɔŋɔ́‑ŋgɔŋ.

⁴ Mɛ́ zeéŋ ndé amɔ̄ʼ ajʉʼ, á ntē aŋwaʼne Ndém, ánɛ anu mbáte eleʼé esambīa ŋ́gɛ: «Ndém a le ghʉ̄ mefaʼ mí tɛ é mi, á zwite ánɛ mbáte eleʼé esambīa. »

⁵ Mɛ́ zeéŋ ndé amɔ̄ʼ ajʉʼ, á ntē aŋwaʼne Ndém ŋ́gɛ: «Pɔ́ té ndáʼa ŋkúɔ́ á ntē ajʉʼ zīi, meŋ á éwú, tɛ nzwītɛ ɛ́. »

⁶ Epuɔ pīi é lɛ megaŋ mvhɔ, á lejūʼ ŋke mbɔŋ, pɔ́ lɛ te kó á ntē ajʉʼ zīi, Ndém a á éwú tɛ nzwīte ɛ́, melaʼ mīi, pɔ́ lɛ te ŋke mbɔŋ mɛ́t kúʼte. Meshhʉ̄ é ké nzɛ́t á mbū emɔ̄ʼ epuɔ, á lekō éwú.

⁷ É melaʼ épúp tɛ́, Ndém a le zéŋ nnéŋ amɔ̄ʼ aleʼé leswhī leswhī, ńtɔ́ŋ lɛ, “ayáʼa”. Éshʉʼ nnáŋ tɛ ndɔ̄k nchu Efɔ Ndavít, ŋ́kím aleʼé mɛ́t ánɛ ajʉʼ aŋwaʼne zīi, mɛ́ ndáʼ ŋkím lā, ŋ́gɛ: «Pɛ gɔ́ ŋké njúʼ anu zīi, Ndém a lʉ́ɛ́, ayáʼa, ndɛ́ʼ pɛ ezēŋne metuúŋ mɛ́. »

⁸ Á le wíʼe ŋ́gɔ́ éyi, Jozwie a le lɔ̄k epuɔ Islaɛl, ŋ́kó á ntē kwaʼ alāʼ azwite, mbɔ Ndém a lɛ te zéŋ ŋkím amɔ̄ʼ aleʼé azwite ɛ́.

⁹ Púp, amɔ̄ʼ aleʼé azwite, páʼ mbáte eleʼé esambīa lā, á zeéŋ nzɛ́t á mbū epuɔ Ndém.

¹⁰ Ŋiŋ yīi a á kó á ntē azwite á lezēŋ Ndém, a á páʼā, ńdɔkɔ nzwītɛ ánɛ mefaʼ mí, ńdeŋ ndeŋ páʼ Ndém a le zokō mefaʼ mí, ńzwīte azí épúp.

¹¹ Ḿpɛ ekāk ete á lekō á ntē azwite á lezēŋ Ndém. Ḿpɛ eghʉ̄, tɛ tsɔ ŋiŋ nnɔ yímpɛ, a á le tē athū á mbū Ndém, éfā nzhɛ páʼ, wɔ maŋgānjʉʼ pímpɛ, é le ghʉ̄ épúp ɔ́.

¹² Ashuŋne Ndém á te kwhʉ́, á wɛɛ̄ mbʉʼ, ńdó tɛ ntɔ́k apuʼ yīi, mɛ́ ntsakne meshhʉ̄ mbīa. Á koó á ntē ŋiŋ, tɛ mpfēŋ agega zí, ŋ́gʉɔ tɛ njúʼ akwɛ́, ŋ́gʉɔ tɛ njúʼ epɔŋ. Á tshoneé á ŋiŋ á lelɔk akwaŋte zīi, á ntē yí, ésáŋ tɛ nzhɛ́ ajū mīi, á mbɔŋ á leghʉ.

¹³ Mmɔʼ ŋiŋ a te éwú yīi, á té jʉ́ɔ á yí mé menēk mí í. Ajūɔ tsem á mvhɔ yí, ḿbú ŋgɔ́ ŋkɛʼɛ kɛʼɛ. Menēk mí é tshií ánɛ pímpɛ efʉʼ metsem. Ḿpɛ e láʼ epɛ́te ŋghʉʉ́‑menu mímpɛ, áa mbū yí.

Klísto a á si ŋgɔ́ á nnɔŋ‑epɔʼ eyi ndʉɛ

¹⁴ Ḿpɛ wɛɛ̄ á kwaʼ mía mía nnɔŋ‑epɔʼ eyi ndʉɛ, á ŋiŋ yīi, a le gʉ̄ɔ nnáŋ á lezēŋ Ndém, á gɔ́ á Yɛɛ́so Méŋ Ndém. Púp, ḿpɛ ekúʼte á lefɛ̄ nnɛ̄t ŋgyá á mbū yí á mbɔŋɔ́, ńtswī á mbū emɔ̄ʼ epuɔ.

¹⁵ Kwaʼ nnɔŋ‑epɔʼ eyi ndʉɛ yīi, ḿpɛ wɛɛ̄, a kuūʼ á yí á letswīte á yímpɛ, ánɛ lepwɛ̄t yímpɛ. Metáté é le shʉ̄ʼ á mbū yí, ánɛ meshhʉ̄ ntsem, páʼ é shʉʼɛ á mbū pímpɛ lā, á ké te ánɛ mefa whʉ̄ʉ.

¹⁶ Púp, ḿpɛ egʉ̄ɔ mé lezēŋ Ndém té cʉʉ nzem, á yí yīi, a ghʉʉ̄ anu mbɔŋ té ndhʉ, á mbū ŋiŋ ntsem. A etsá mezeŋɛ mímpɛ. Ḿpɛ ekó nzéŋ ńtswí ajūɔ tsem zīi, a yáa, ńdɔkɔ ntswítɛ á yímpɛ ánɛ afʉʼ zīi, a á kɔŋ.