Eble 3 - Eka Eswhī

Yɛɛ́so a tsyaā á Mɔɔ́sɛ

¹ Páʼ á ké mbiŋ ŋgɔ́ páʼa lā, epɔ̄ memía, pɛ́ é si ŋgɔ́ epuɔ Ndém, mbɔ Ndém a le tɔ́ŋ á yímpɛ ŋ́gɛ, ḿpɛ eghʉ̄ afaʼ zí. Púp, pɛ etshí menēk ánɛ Yɛɛ́so. Yí mé si ŋgɔ́ á nziŋ‑ntō Ndém, ŋ́gɔ́ á nnɔŋ‑epɔʼ eyi ndʉɛ, á ŋiŋ yīi ḿpɛ fɛɛ́ nnɛ̄t ŋgyá á mbū yí.

² Ndém a le tsɔ́ʼ á yí, ńtsékne afaʼ mɛ́t á mbū yí, á júʼ nchu yí ndeŋ ndeŋ, páʼ Mɔɔ́sɛ a le júʼ nchu Ndém épúp, páʼ a le nɔ̄ŋ ŋghʉ̄ɛ afaʼ á athū alāʼ zí.

³ Mɛ́ wuʼteē á mbɔɔ‑meŋgyā, ńtɔ́k ŋgyā zīi a á pɔ́. Púp, mɛ́ pɔŋteé á lewuʼte á Yɛɛ́so, ńtɔ́k á Mɔɔ́sɛ.

⁴ Ŋgyā e gɔ le tshí á ajʉʼ, té gɔ́ yīi, ŋiŋ mé le pɔ́ɔ̄. Ndém mé piīŋ ŋgɔ́ á ŋiŋ yīi, a le pú ŋghʉ̄ ajūɔ tsem.

⁵ Mɔɔ́sɛ a lɛ á ŋgaŋ afaʼ Ndém, ńjúʼ nchu Ndém páʼ, a le nɔ̄ŋ ŋghʉɛ afaʼ, á athū alāʼ zí, mbɔ Ndém a le tsekné á mbū yí á légɛ, a eshúŋ anu zīi, yí Ndém mé nnɔŋ ŋgɔ̄ á eshúŋɔ.

⁶ Klísto, páʼ a á si ŋgɔ́ á Méŋ Ndém lā, a juúʼ nchu Ndém, mbɔ Ndém a le tsekné alāʼ zí á mbū yí. Ḿpɛ gɔ́ ŋké ŋkúʼte menu muɔ mɛ́t á ntē pímpɛ, ńnɔ̄ŋ ncuŋtɛ nzwíʼtɛ mé lekāk, mbɔ ḿpɛ mé si ŋgɔ́ alāʼ zí mɛ́t.

Ndém a a láʼ eghʉ, epuɔ pīi é epí, e ezwīte

⁷ É melaʼ épúp tɛ́, Ndém a le lɔ̄k ŋghi Azwakne zí, ńdé ŋ́gɛ: «Pɛ gɔ́ ŋké njúʼ anu zīi, meŋ ndʉ́ɛ́ ayáʼa,

⁸ ndɛ́ʼ pɛ ezēŋne metuúŋ mɛ́, páʼ wɔ maŋgānjʉʼ pɛ́ é le ghʉ̄ épúp, áfʉʼ zīi, pɔ́ le tē athū á mbū meŋ. Pɔ́ le gʉ̄ɔ tɛ ŋkó á késáatswɛt, ńnáŋ tɛ amɔ̄ʼ afʉʼ á kuʼ, pɔ́ zwíʼ á gá. »

⁹ Ndém a le zéŋ ndé ŋ́gɛ: «Wɔ maŋgānjʉʼ pɛ́ mɛ́t, é le gʉ̄ɔ tɛ ŋkó éwú, ńzwíʼ á gá, ŋ́gɔ̄ á njʉ́ɔ páʼ meŋ a ghʉ épúp. Tɛ́ mbɔ pɔ́ é ké njʉ́ɔ mefaʼ mīi, meŋ a ghʉ á mbū pɔ́p,

¹⁰ tɛ á gɔ́ ŋguʼ megēm lekua. É melaʼ épúp tɛ́, meŋ nde záŋ á lɔ́ŋ ánɛ pɔ́p, ńdé ŋ́gɛ: “Pɔ́ é efʉʼ metsem, ntē wɔ́p é fhó ánɛ meŋ ntó tó. Pɔ́ té kɔ̄ŋ á wɔ́p, á leziŋ ánɛ mɛnzhɛ yīi, meŋ nde kīā ā.”

¹¹ Meŋ nde záŋ á lɔ́ŋ épúp, ŋ́ka ndé ŋ́gɛ: Pɔ́ té ndáʼa ŋkúɔ́ á ntē ajʉʼ zīi, meŋ á éwú, tɛ nzwītɛ ɛ́. »

¹² Púp me epɔ̄ memía, pɛ elāk athū zɛ́, ndɛ́ʼ ŋiŋ nnɔ wɛ, á wɛ ntē tepɔŋ, ńtē yīi e ghʉ, ŋiŋ a á le fɛ́ nnɛ̄t ŋgyá á mbū Ndém yīi, a ghʉɛ mɛ́ gɔ́ɔ éwú ú, ńtē yīi e ghʉ, a efhó á nzem Ndém ntó.

¹³ A cʉ́ʼɛ épúp, pɛ esēmte mennɛ̄t mɛ́ nzeŋne zeŋné eleʼé etsem, ḿbɔ́k mefa á letshōne á ŋiŋ á nnɔ pɛ, á te athū á mbū Ndém. Pɛ eghʉ̄ épúp eleʼé metsem, melaʼ mīi, tɛ ntshí tsetseŋɔ, ḿpɛ gɔ́ áa ánɛ ayáʼa, páʼ mɛ́ leé á ntē aŋwaʼne Ndém épúp.

¹⁴ Ḿpɛ gɔ́ ŋké ŋkúʼte menu mīi, mɛ́ le gē ezi, ńzíʼne á yímpɛ, tɛ́ ḿpɛ fɛ́ nnɛ̄t ŋgyá á mbū Ndém, tɛ ndáʼ ŋkó á nzokó, mbɔ ḿpɛ é páʼā, ḿpɛ a Klísto é lɔkɔ ncʉ́ʼɛ á taʼ.

¹⁵ Á gɔ́ páʼ aŋwaʼne Ndém á leé ŋ́gɛ: «Pɛ gɔ́ ŋké njúʼ anu zīi, Ndém a lʉ́ɛ́ ayáʼa, ndɛ́ʼ pɛ ezēŋne metuúŋ mɛ́, páʼ wɔ maŋgānjʉʼ pɛ́, é le ghʉ̄ épúp, áfʉʼ zīi pɔ́ le tē athū, á mbū Ndém. »

¹⁶ Wɔ awɔ́ é si ŋgɔ́ epuɔ pīi, pɔ́ le júʼ ashuŋne Ndém, ḿbiŋ ntē athū á mbū yí í? É si ŋgɔ́ epuɔ metsem pīi, Mɔɔ́sɛ a le tsāŋ á wɔ́p, ńdɔk efhó á ŋgɔŋ Ejīpto ntó.

¹⁷ Ndém a le záŋ á lɔ́ŋ á mbū awɔ́, tɛ á gɔ́ ŋguʼ megēm lekua ā? A le záŋ á mbū epuɔ pīi, pɔ́ le whʉ̄ mefa, ŋ́kwhʉ́te á késáatswɛt.

¹⁸ Ndém a lɛ́ ndʉ́ɛ́ á mbū wɔ awɔ́, tɛ ŋkāa ŋ́gɛ, pɔ́ té ndáʼa ŋkúɔ́ á ajʉʼ zīi, yí é éwú tɛ nzwītɛ ɛ̄? A lɛɛ́ ndʉ́ɛ́ á mbū wɔ te‑athū á mbū yí.

¹⁹ Ḿpɛ é si mbīŋɛ njʉ́ɔ páʼ, pɔ́ lɛ te kó ajʉʼ mɛ́t tɛ nzwīte ɛ́, melaʼ mīi, pɔ́ le lʉ̄ʼ á wɔ́p á lefɛ̄ nnɛ̄t, ŋ́gyá á mbū Ndém.