Eble 2 - Eka Eswhī

Ashuŋne letswɛ̄t, á mɛgém anu

¹ Páʼ á ké ŋgɔ́ páʼa lā, ḿpɛ pɔŋteé á lekūʼte ŋke yīi, ḿpɛ ke júʼē, tɛ é te. Tɛ á té épúp ɔ́, mbɔ ḿpɛ e fa nzhɛ.

² Ŋke yīi mecɔʼ Ndém é le lɔ̄k eshʉʼ amɔ̄ʼ afʉʼ, é lɛ te á méŋ agáʼ anu ú. Ŋiŋ ntsem yīi a le tē athū, á te zīŋ páʼ ŋke mɛ́t é si nzɛ́ttɛ épúp ɔ́, Ndém a le tswá á yí ŋgʉɔ athʉ́ lepé, páʼ á pɔŋteé á legɔ̄ épúp.

³ Ḿpɛ piŋɛ te lɔ̄k ŋke yīi, é ghʉɛ mɛ́ tswɛ́tɛ ntɔ́ŋ á azō ɔ́, mbɔ ḿpɛ gɔ eghʉ̄ʉ páʼ lā, ḿvūʼɔ ŋgʉɔ athʉ́ lepé é? Atsyapuɔ méŋwɛ̄t, a le zī á letswi ŋke mɛ́t. Epuɔ pīi é le júʼē, é véŋ. Pɔ́ mé le shúŋ á yímpɛ ŋ́gɛ, é anuúnē.

⁴ Pɔ́ le gē etswi ŋke mɛ́t, Ndém á nɔŋ ndɔ̄kɔ meyiŋne menu, mbɔɔ meŋkʉʼne menu ntií ntiī, pɔ́ metsiá menu, ńtɔ́tɛ. Ńzéŋ nzápa ánɛ Azwakne zí, ŋ́gyá mete á mbū awíɛ awíɛ, á lelɔk ŋghʉ̄ mefaʼ, páʼ yí Ndém a á kɔŋ.

Yɛɛ́so mé le tswī á yímpɛ á mɛnzhɛ ŋgɔŋ eswhī

⁵ Ndém a lɛ te tsekné ŋgɔŋ zīi, e e fú tɛ́ eshʉʼe, ŋ́gɔŋ zīi pek shúŋɔ anu éwú la, á mbū mecɔʼ pí ŋ́gɛ, pɔ́ esáʼ á.

⁶ Ŋiŋ a le lé á amɔ̄ʼ ajʉʼ, á ntē aŋwaʼne Ndém, ánɛ anu jʉɔ mɛ́t ŋ́gɛ: «Ŋiŋnɔŋ a á páʼa, ŋ́gɔ́ awɔ́, tɛ wu Ndém, o kwāŋtɛ á yí efʉʼ metsem m̄? Mɔ́ yīi ŋiŋnɔŋ a á zhí, a á páʼa ŋgɔ́ awɔ́, tɛ o tshíɛ menēk mú ánɛ á yí í?

⁷ O le shʉ̄ʼ ánɛ páʼ mecɔʼ Ndém é épúp, ńnáʼ esóʼne á yí mé esī, ánɛ méŋ afʉʼ, ńchʉ́ á yí, ŋ́ghʉ̄ ŋ́gɛ, mɛ́ eyá mekuʼ mí.

⁸ O le pú ŋghʉ̄ ŋ́gɛ, ajūɔ tsem a enɔ̄ŋ á mekhu yí. » Ndém á lɛɛ́ ŋghʉɛ ŋ́gɛ, ajūɔ tsem á enɔ̄ŋ á mekhu ŋiŋnɔŋ páʼā, ńdɔkɔ ndʉ́ɛ́ ŋ́gɛ, amɔ̄ʼ azō á té éwú zīi, ŋiŋnɔŋ a te sáʼ ā. Á piīŋ ŋgɔ́ tsetsɔŋɔ, ḿpɛ zɛ́t té jʉ́ɔ á légɛ, Ndém a lē mbú nnɔ̄ŋ ajūɔ tsem á mekhu yí.

⁹ Ḿpɛ ké ŋgɔ́ si njʉ́ɔ á légɛ, ŋiŋ yīi Ndém a le soʼné á yí á méŋ afʉʼ lɛ, ánɛ páʼ mecɔʼ Ndém é lɛ épúp, a lɛ á Yɛɛ́so. Ndém a le lɔ̄k atsāmezeŋɛ té ndhʉ zīi, a wɛɛ̄ ánɛ epuɔ menɔŋ, ŋ́ghʉ̄ Yɛɛ́so á kwhʉ́ á athū epuɔ menɔŋ. Á ké ŋgɔ́ tsetsɔŋɔ, mbɔ Ndém a ke chʉ́ á yí, ŋ́ghʉ̄ ŋ́gɛ, mɛ́ ewūʼte á yí, ŋ́gyá mekuʼ mí. Ńchʉ́ á yí épúp, melaʼ mīi a le jʉ́ɔ ŋgʉɔ̄ʼ, ŋ́kwhʉ́ á athū epuɔ menɔŋ metsem.

¹⁰ Ndém méŋwɛ̄t mé le ghʉ̄ etsō tsem, yí mé si ŋgɔ́ á ŋwɛ́t etsō mɛ́t. Púp, á lɛ mbɔŋ ŋ́gɛ, a eghʉ̄, Yɛɛ́so a ejʉ́ɔ ŋgʉɔ̄ʼ, tɛ́ nnáŋ ánɛ mía ajʉʼ, ŋ́ghʉ̄, atʉtʉ epuɔ á ecʉ́ʼ epɔ̄ Ndém, ŋ́kó á ntē shʉ́shɔ́k yí. Yɛɛ́so mé si ŋgɔ́ á ŋiŋ yīi, a tswii nzhɛ zīi, ḿpɛ e zápa éwú, Ndém a eghʉ̄ ḿpɛ etswɛ́t.

¹¹ Yɛɛ́so, a á si ŋgɔ́ á esok‑mefa epuɔ menɔŋ. Pɔ́ a epuɔ menɔŋ pīi, a soko mefa mɔ́p, é pú efhó áa mbū taʼ ŋiŋ. Melaʼ épúp tɛ́, esē é té kú á yí, á letɔ̄ŋ epuɔ menɔŋ lɛ, epɔ̄ memía pí í.

¹² Yí méŋwɛ̄t a le lé á mbū Ndém ŋ́gɛ: «Meŋ a shʉʼɛ esáʼa eshúŋɔ epɔ̄ memía pá, á ŋiŋ yīi o ó ewiɛ́. Meŋ a shʉʼɛ etshíɛ á nnɔ epuɔ pú, éwuʼtɛ á wú. »

¹³ A le zéŋ ndé ŋ́gɛ: «Meŋ a shʉʼɛ enáŋa emaʼa ŋgua za, éyáa á mbū Ndém. » Ńzéŋ ndé ŋ́gɛ: «Meŋ wuɔ, pek a ewɔŋkhʉ̄ pīi, Ndém a le tsekné mé meŋ. »

¹⁴ Púp, ewɔŋkhʉ̄ pīi meŋ ndʉ́ɛ́ lā, é si ŋgɔ́ epuɔ menɔŋ tɛ ŋgwɛ̄ mekwɛ́ pɔ́ mbap nnɛ̄t. Yɛɛ́so méŋwɛ̄t azí, á le cʉ́ʼ á ŋiŋnɔŋ tɛ ŋgwɛ̄ mekwɛ́ pɔ́ mbap nnɛ̄t, tɛ́ ndɔk nzápa ánɛ yí lekwhʉ̄, ŋ́kīne mete Sɛ́ta, á ŋiŋ yīi á le wɛ̄ mete lewhʉ̄.

¹⁵ A le ghʉ̄ épúp, tɛ́ ndɔk ŋkɛ́ʼɛ ŋkhʉ apuʼ, á ntɔ̄ŋ epuɔ pīi, pɔ́ le té á mbɔ́k lewhʉ̄, ńcʉ́ʼɛ nnáŋa á ŋgɔŋ áa páʼ, epuʼ lewhʉ̄ lā.

¹⁶ Á anuúnē á légɛ, Yɛɛ́so a lɛɛ́ te eshʉ̄ʼɛ á ntswíte mecɔʼ Ndém ɛ́, a lɛɛ́ eshʉʼɛ, áa ntswíte ndhu Ablaham.

¹⁷ Melaʼ épúp tɛ́, a le pú eswhí epɔ̄ memía pí ánɛ ajūɔ tsem, tɛ ncʉ́ʼ á nnɔŋ‑epɔʼ eyi ndʉɛ, ŋ́gɔ́ á ŋgaŋ atsāmezeŋɛ, ńzīŋ ánɛ mekhu Ndém té miʼte, ńdɔkɔ efāʼa á lesok mefa epuɔ menɔŋ metsem.

¹⁸ Á épúp melaʼ mīi, páʼ mɛ́ le taté á yí, yí méŋwɛ̄t á jʉ́ɔ ŋgʉɔ̄ʼ lā, a kuūʼ á yí á letswīte epuɔ pīi, mɛ́ é si ntátɛ á wɔ́p.