Eble 13 - Eka Eswhī

Ntií lenāŋ zīi, e pɔɔ̄ŋ á Ndém

¹ Pɛ enáŋ efʉʼ metsem, ŋ́kɔ̄ŋne mennɛ̄t mɛ́, páʼ epɔ̄ memía lā.

² Ndɛ́ʼ pɛ elēkne á lekōkne ŋiŋ ntsem. Emɔ̄ʼ epuɔ é le té á ŋghʉʉ̄ épúp, ŋ́kókne mecɔʼ Ndém té zhɛ́.

³ Ndɛ́ʼ pɛ elēkne epuɔ pīi, pɔ́ é ŋgyā atʉɛ́. Pɛ ekímte á wɔ́p, tɛ a gɔ́ páʼ, pɛ a pɔ́p mé puú ŋgɔ́ éwú lā. Ndɛ́ʼ pɛ elēkne epuɔ pīi, mɛ́ néŋɛ ŋgʉɔ̄ʼ á athū pɔ́p, melaʼ mīi, pɛ é si ŋgɔ́ epuɔ pīi, mɛ́ gɔ enéŋ ŋgʉɔ̄ʼ á athū pɛ azɛ́.

⁴ Awiɛ́ a ewūʼte alaá‑ŋgyā zí, ŋiŋ mbaŋa a á le sɛ̄t nzem nzwí yí í, menzwí a á le sɛ̄t nzem ndō yí í. Ndém a a láʼ etswá ŋgʉɔ athʉ́ lepé, á athū megaŋ agā, mbɔɔ á athū epuɔ pīi, pɔ́ wɛɛ̄ á mɛgap.

⁵ Ndɛ́ʼ pɛ enéŋ ntē wɛ́ ánɛ ŋkāp, tɛ́ ndɔk nnáŋ. Ajū mīi pɛ wɛɛ̄, a ekūʼ á mbū pɛ. Ndém méŋwɛ̄t a leé ŋ́gɛ: «Meŋ te e láʼ etshi á wú néŋ ɛ́, meŋ te e láʼ ewáʼ á wú ú. »

⁶ Á épúp tɛ́, ḿpɛ gɔ evéŋ té miʼte á légɛ: «Atsyapuɔ Ndém mé tswiteé á gá. Meŋ gɔ le zéŋ amɔ̄ʼ azō mbɔ́kɔ ɔ́. Ŋiŋnɔŋ a gɔ epīiŋ nzéŋ ŋ́ghʉ̄ akɔ̄ ánɛ meŋ ŋ̄?»

⁷ Pɛ ekímte wɔ tshí‑mvhɔ pīi, pɔ́ le zī mvhɔ, ńzíʼne á wɛ́ anu Ndém. Pɛ ejʉ́ɔ ntií zīi, pɔ́ le lɔ̄k nnáŋ, ńzéŋ njʉ́ɔ ezi pɔ́ le lɔ̄k ŋkhwʉ́te, éfʉ̄ʼne ezɔp ntií lefɛ̄ nnɛ̄t ŋgyá á mbū Ndém.

⁸ Yɛɛ́so Klísto a te kúmne, a gɔ́ éyi a kɛ ezɔ́, ŋ́gɔ́ lɛ akɔ̄ lɛ́, mbɔ a á ayáʼa, ŋ́gɔ́ áa épúp, épiŋ enáŋa egɔ́ɔ áa épúp.

⁹ Ndɛ́ʼ pɛ ecʉ́ʼ mɛ́ lɔk á ntií ntiī menu eswhī mīi, mɛ́ zíʼnɛ á wɛ́ ánɛ Ndém, ŋ́ghʉ̄, pɛ efāa nzhɛ. Mɛ́ é si nzíʼnɛ á wɛ́ ŋ́gɛ, etsō lejhʉ̄ é gɔ eghʉ̄ʉ, ŋiŋ á tete ánɛ mɛnzhɛ Ndém. Epuɔ pīi pɔ́ kuʼteé anu jʉɔ mɛ́t, pɔ́ la amɔ̄ʼ apɛ éwú jhʉ́ ɛ́. Ndém a lɔɔ̄k apɔŋɔ́ ntē te ndhʉ zí tɛ́ ŋghʉ̄, ŋiŋ á tete ánɛ mɛnzhɛ yi.

¹⁰ Ḿpɛ wɛɛ̄ ajʉʼ nnɔɔ́ŋ‑epɔʼ. Wɔ nɔŋ‑epɔʼ á ntē nzwiŋ eka, é té pɔŋté á lepɛ̄ ecū mīi, mɛ́ é lɔk nnɔ̄ŋ epɔʼ éwú, ḿpfɛ́t ɛ́.

¹¹ Tɛŋgyā wɔ nɔŋ‑epɔʼ a lɔɔ̄k metshi mena, ŋ́kó á kwaʼ ajʉʼ zīi, Ndém a naáŋ éwú páʼā, ŋ́gɔ̄ áa elɔk esōk mefa epuɔ menɔŋ, mɛ́ epiŋ ndɔ̄k epfhō mena mɛ́t, efhó á káaŋ ntó, tɛ́ ntɔ̄.

¹² Ndeŋ ndeŋ épúp, Yɛɛ́so a le gē elɔk metshi mí méŋwɛ̄t, ésok mefa epuɔ menɔŋ, ńjʉ́ɔ ŋgʉɔ̄ʼ tɛ ŋkwhʉ́, áa nzem apɛ́ tésɔŋ.

¹³ Púp, ḿpɛ efhó á káaŋ, ntó ŋgʉɔ ńjʉ́ɔ á yí, ḿvéŋ á lejʉ̄ɔ ŋgʉɔ̄ʼ, páʼ a le jʉ́ɔ ŋgʉɔ̄ʼ épúp,

¹⁴ melaʼ mīi, ḿpɛ te wɛ̄ á ajʉʼ á esī atsetsáʼ ega zīi, a náŋa enáŋa á. Ḿpɛ é si ntshíɛ ntē yímpɛ áa ánɛ ajʉʼ zīi, ḿpɛ e láʼ enáŋ éwú, á lemiʼɛ.

¹⁵ Ḿpɛ ezápa ánɛ Yɛɛ́so, azɔp zīi ḿpɛ lɔkɔ ŋgūʼtɛ á Ndém, a egɔ́ páʼ epɔʼ yīi, ḿpɛ nɔŋɔ á mbū yí lā. Púp, ashuŋne zīi á túɔ́ á nchu pímpɛ, a egɔ́ á lelɔk ŋgūʼte á Ndém, á mvhɔ epuɔ.

¹⁶ Ndɛ́ʼ pɛ elēkne á leghʉ anu mbɔŋ, á letswīte mennɛ̄t mɛ́ á nnɔ pɛ, ntií epɔʼ jʉɔ mɛ́t mé pɔɔ̄ŋ á Ndém.

¹⁷ Pɛ ejúʼ nchu wɔ tshí‑mvhɔ á nnɔ pɛ, ńjúʼ anu zīi pɔ́ shúŋɔ á wɛ́, melaʼ mīi pɔ́ é efʉʼ metsem, ńcʉ̄te á wɛ́ té ká. Á gɔ́ páʼ, pɔ́ e láʼ etshí á mvhɔ Ndém, épɛ́te páʼ, pɔ́ le cʉtē á wɛ́ épúp. Pɛ eghʉ̄ tɛ pɔ́ gē eghʉ afaʼ zɔ́p, ntē wɔ́p e enɔŋ ŋgáŋtɛ, pɔ́ le nɔ̄ŋ nzwɛ́ttɛ ɛ́. Pɔ́ ge eghʉ afaʼ zɔ́p, ńnɔŋ nzwɛ́ttɛ, mbɔ á té ŋgɔ̄ á ntswíte pɛ, ánɛ amɔ̄ʼ azō ɔ́.

¹⁸ Pɛ eswíŋte á Ndém ánɛ athū zék. Pek é si ncuŋtɛ nzhɛ́ á légɛ, ntē wék é té si ŋŋāka á wék, ánɛ amɔ̄ʼ azō ɔ́. Pek é efʉʼ metsem, éfāʼ áa leghʉ á mbɔŋɔ́, ánɛ anu tsem.

¹⁹ Meŋ á si nzɛ́ttɛ á wɛ́ ntsaŋne tsaŋne ŋ́gɛ, pɛ eswíŋte á Ndém, á véŋ, meŋ ekūuʼ á lezēŋ ŋgákne mbīŋ nzem ntswɛ́tte á wɛ́.

Aswiŋte

²⁰ Ndém, á ŋwɛ́t apwɛne, a le ghʉ̄ʉ̄, Atsyapuɔ yímpɛ Yɛɛ́so, á zím ánɛ lewhʉ̄. Ńzím épúp, ńcʉ́ʼ á mía mía mpfɛnne‑memvhō Ndém, ńtsīa ánɛ páʼ, á le lɔ̄k metshi mí, ŋ́kwɛ́t eka yīi, é naáŋ á lemiʼɛ.

²¹ Ŋ́gɛ Ndém mɛ́t, a elɛ ŋghʉ̄, pɛ ekūʼ á wɛ́ á leghʉ ajūɔ tsem zīi, á mbɔŋ, tɛ́ ndɔk nzīŋ páʼ, a á si ŋkɔ̄ŋɔ. Ŋ́gɛ a elɛ nzápa ánɛ Yɛɛ́so Klísto, ŋ́ghʉ̄ ánɛ pímpɛ, páʼ a á jʉ́ɔ ŋ́gɛ, yí ghʉɛ épúp, á pɔŋ. Awuʼte á egɔ́ á mbū Yɛɛ́so mɛ́t, á meŋguʼ meŋguʼ. Á páʼa.

Atsaʼte á lelɔk nzōko

²² Epɔ̄ memía, meŋ á si ndʉ́ɛ́ ŋ́gɛ, pɛ ekúʼte anu jʉɔ zīi, meŋ á shúŋ, ńdɔk ŋgyá á wɛ́ ŋgate lāa, té záŋte nnɛ̄t. Akɛtte zīi meŋ á tí á mbū pɛ, á zi ka tswhī esāk á.

²³ Pɛ ezhɛ́ á légɛ, mɛ́ ke tshī á méŋ mɔ́ yímpɛ Timotɛ nnéŋ. A gáknɛ eshʉ̄ʼ ńtswɛ́tte á gá, mbɔ meŋ a ge eshʉʼ ejʉ́ɔ á wɛ́, pek yí e egɔ́ nnɔ.

²⁴ Pɛ etsāʼte wɔ tshí‑mvhɔ metsem á nnɔ pɛ, ńtsāʼte epuɔ Ndém metsem. Epi pɔ́ é Itália ega, é tsaʼte á wɛ́.

²⁵ Ŋ́gɛ Ndém a elɛ ŋghʉ̄ anu mbɔŋ té ndhʉ, ánɛ pɛ metsem.