Eble 12 - Eka Eswhī

Ḿpɛ ekúʼte á Ndém, á Mɔʼɔ́ yímpɛ, tɛ́ ndɔk nnáŋ

¹ Ŋ́gɔ́ mé pímpɛ, mbɔ ḿpɛ é si nzhɛ́ɛ atʉtʉ epuɔ jʉɔ mɛ́t zīi, á le fɛ́ nnɛ̄t ŋgyá á mbū Ndém. Púp, ḿpɛ epú ŋgwáʼ ajūɔ tsem zīi, á gɔ evɛ́ne á yímpɛ, á leziŋ ánɛ mɛnzhɛ lefɛ̄ nnɛ̄t ŋgyá á mbū Ndém, ńdʉɔ́ʼte mefa páʼ, é efʉʼ metsem, ŋ́kɔ̄ŋ á lejhʉ̄ á yímpɛ lā. Ŋ́kāk ete, ńdɔ̄k á lekʉte yīi, Ndém a le tsekné á mbū pímpɛ, ŋ́gʉɔ tɛ nzōko.

² Ŋ́gē ekʉte épúp, ńtshí menēk ánɛ Yɛɛ́so. Yí mé le ghʉ̄ʉ̄, ḿpɛ fɛ́ nnɛ̄t ŋgyá á mbū Ndém. Yí mé zéŋ nnɔ̄ŋ ŋghʉ̄ɛ, ḿpɛ e eláʼ ŋgʉɔ tɛ ŋkó á lezēŋ Ndém. Á yí yīi, a le kʉŋnē lepɔŋ tsīi, a lɛ á ntē éwú, ḿvéŋ á lekwhʉ̄ ánɛ mbaŋne paŋné, té kwaŋte esē yīi, é kuú epuɔ pīi, mɛ́ é kwɛte á wɔ́p ánɛ mbaŋne paŋné. A le kwhʉ́ épúp, a ké ŋgɔ́ tsetsɔŋɔ, ńnáŋ á ŋkɔʼɔ́ apū ete Ndém.

³ Pɛ enáŋ efʉʼ metsem, ŋ́kwāŋte á ŋiŋ yīi, epuɔ tepɔŋ é le māʼ ejʉɔ ntií ŋgʉɔ̄ʼ á athū yí, á kwɛ́t áa ntē. Púp, mbū mɛ́ é le láʼ ŋgɔ́ aleʼé, ḿbwɛ́t ɛ́, pɛ é le láʼ ŋgɔ́ aleʼé ŋká á.

⁴ Pɛ é si ndʉɔ́ʼɔ mefa, táʼ, pɛ ké nzɛ́t te lʉɔ́ʼ tɛ ŋgyá athū nnɛ̄t zɛ́.

⁵ Ndɛ́ʼ pɛ elēkne ashuŋne jʉɔ zīi, Ndém a á si ndɔ̄kɔ ŋgyáa á wɛ́ ŋgate, páʼ mɛ́ shúŋnɛ á mbū ewɔŋkhʉ̄ lā: «Méŋ ga, Atsyapuɔ a nɔŋ ŋkāka á wú, ndɛ́ʼ o elɔk ntɔ́ŋ mega. Ndɛ́ʼ o ezáŋte melɔ́ŋ á afʉʼ zīi, a á si ncɔ́kɔ á wú.

⁶ Atsyapuɔ a kaāk á ŋiŋ páʼā, ńdɔkɔ ŋkɔ̄ŋɔ á yí. Ńtswá á ŋiŋ ntsem yīi, yí Ndém á zhɛɛ́ á légɛ a á méŋ yi, ŋgʉɔ athʉ́. »

⁷ Ndém a veéŋ o jʉ́ɔ ŋgʉɔ̄ʼ páʼā, á lɔkɔ efāʼa ŋ́gɛ, o etswhí. Ndém a lɔɔ̄k á légɛ, pɛ é ewɔŋkhʉ̄ pí, tɛ́ ŋghʉ̄ épúp á mbū pɛ. Mmɔʼ méŋkhʉ̄ yīi, mɔʼɔ́ yi a te á yí cɔ́k, a te éwú ú.

⁸ Ndém a gɔ́ te cɔ́k á wɛ́, páʼ a cɔɔ́k ewɔŋkhʉ̄ pí metsem epúp ɔ́, pɛ ezhɛ́ á légɛ, pɛ gɔ́ áa epɔ̄ agā, pɛ te kwaʼ ewɔŋkhʉ̄ pí í.

⁹ Ḿpɛ wɛɛ̄ memɔʼɔ́ pímpɛ á esī atsetsáʼ, pɔ́ nɔɔ̄ŋ ncɔ́kɔ á yímpɛ, ḿpɛ ké nnɔ̄ŋ ŋgyá áa mekuʼ mɔ́p. Tɛ ŋgʉɔ shɔ́ʼɔ́ á mbū pímpɛ, á leyā mekuʼ á mbū Mɔʼɔ́ yímpɛ yīi, a á athʉ́ lephū ú? O nɔɔ̄ŋ nnɛ̄t á esī á mvhɔ á yí, á ghʉ, pɛ yí mé cʉ́ʼɛ nnáŋa.

¹⁰ Memɔʼɔ́ pímpɛ, é lɛɛ́ efhɔ́ɔ ánɛ ezɔp ntií lelɔk njʉ́ɔ anu, ńcɔ́kɔ á yímpɛ áa ánɛ méŋ afʉʼ ndaʼ. Ndém a á si mbīŋɛ ŋgē ecɔ́kɔ á yímpɛ páʼā, ńdɔkɔ efāʼa áa lepɔŋ tsímpɛ, ńdɔkɔ efāʼa ŋ́gɛ, ḿpɛ egɔ́ té alɔ́ʼ páʼ yí.

¹¹ Mɛ́ cɔɔ́k á ŋiŋ páʼā, ŋgɔŋ e te á yí afʉʼ mɛ́t afʉʼ mɛ́t pɔŋ, é pék á yí péke. Á piŋ efú ŋgwɛ̄ á apwɛne, ńzīŋ ndeŋ ndeŋ, éfhó ánɛ páʼ mɛ́ le cɔ́k á yí, ńdɔk mbʉ́ʼte á yí épúp.

¹² Púp, pɛ epʉ́ʼte mbū mɛ́ mīi, é si mbwɛ́tɛ, ńtɔ́te mekhu mɛ́ mīi, é si nzɔ́ŋnɛ.

¹³ Ésāŋte nzhɛ tɛ́ nzīŋ éwú. Púp, ŋiŋ yīi, a á si ŋŋíʼɛ, a á le kwāte, tɛ ncʉ́ʼ épúp, á pú ntē.

Ŋiŋ Yɛɛ́so a pɔŋteé á lenāŋ páʼ Ndém a á si ŋkɔ̄ŋɔ

¹⁴ Pɛ enáŋ mé apwɛne, á tsetsɛlɛ epuɔ metsem. Ńnáŋ efʉʼ metsem, ńdɛ̄tne áa ánɛ Atsyapuɔ Ndém, melaʼ mīi, ŋiŋ a gɔ te lɛ̄tne ánɛ Ndém ɛ́, mbɔ a te e láʼ ejʉ́ɔ á yí í.

¹⁵ Pɛ epá, tɛ ŋiŋ a á le kʉ̄ŋne ajūɔ mbɔŋ zīi, Ndém a yáa á mbū epuɔ ɔ́. Ḿbá, tɛ ŋiŋ a á le gɔ́ páʼ mekāŋ lā á, ḿbɔ́k á lelɔk á yí á lewhi, ḿmāʼ á atāk á tsetsɛlɛ alúŋ epuɔ Yɛɛ́so.

¹⁶ Pɛ epá, tɛ ŋiŋ nnɔ wɛ a á le agā ghʉ, tɛ ŋiŋ nnɔ wɛ a á le tsēŋte ajū mīi, á azi Ndém, páʼ Izawu a le ghʉ̄ épúp lā. A lɛ á ntsya mvhɔ, ḿbiŋ ŋgyá á ajʉʼ zí, á mbū ntsiʼnzem yi, ńdɔk ŋkúmne etsō lejhʉ̄.

¹⁷ A le pīŋ eshʉʼ tɛ nnɔ̄ŋ ŋkɔ̄ŋɔ ŋ́gɛ, mɔʼɔ́ yi a enéŋ mbwɛ́né ánɛ yí, mɔʼɔ́ yi á piŋ te véŋ, á swíŋte á mɔʼɔ́ yi, ńdā lɛ akɔ̄ lɛ́, á té azō kúmne.

¹⁸ Pɛ le gē etshóte nnɛ̄t mé lezēŋ Ndém páʼā, pɛ te nnátɛ amɔ̄ʼ ajū mīi, mɛ́ é si njʉ́ɔ ɔ́, páʼ á lɛ épúp á ndo lekwɛ̄t Sinayi í. Ázō páʼ mmók yīi, é si ŋgīʼnɛ, páʼ amɔ nzém lā á, páʼ nzém ɛ́, páʼ mía afēm lā á.

¹⁹ Ázō páʼ ŋghi ntaŋ á, pɛ te júʼ ŋghi Ndém ɛ́. Epuɔ Islaɛl pīi, pɔ́ le júʼ ŋghi mɛ́t, ejʉʼ é le tē á wɔ́p, tɛ pɔ́ lʉʼ ŋ́gɛ, ndɛ́ʼ Ndém á zéŋ eshúŋne á mbū pɔ́p,

²⁰ melaʼ mīi, pɔ́ le gɔ pɔ́ le kūʼ á lekūʼte lepé cʉɔ tsīi, Ndém a le yá á mbū pɔ́p ŋ́gɛ: «Ŋiŋ ntsem yīi, a á pfeŋ lekwɛ̄t cʉɔ, mɛ́ lɔk metɔ́ ntémte á yí nzwhí, tɛ a zi mbú ŋgɔ́ áa na. »

²¹ Ecū muɔ mɛ́t, e le tē ejʉʼ tee, tɛ Mɔɔ́sɛ á lé ŋ́gɛ: «Meŋ á si ncɔ̄ʼɔ, tɛ mvɛ̄tɛ. »

²² Ŋ́gɔ́ mé pɛ, mbɔ pɛ lɛɛ́ eshʉʼɛ mé ndo lekwɛ̄t á Siɔŋ, mé tésɔŋ Ndém páʼ, a naáŋ nte, mé Yelósalɛm, álāʼ Ndém. Pɛ lɛɛ́ eshʉʼɛ mé lezēŋ atʉtʉ mecɔʼ Ndém, páʼ pɔ́ é efʉʼ metsem, ŋ́gɔ́ áa ntē lekāk.

²³ Pɛ lɛɛ́ eshʉʼɛ mé acuʼte epɔ̄ lethū Ndém, páʼ nzēŋ mɔ́p é nti tií á athʉ́ lephū lā. Pɛ lɛɛ́ eshʉʼɛ mé lezēŋ Ndém, á nzaʼ‑ntsaŋ epuɔ menɔŋ metsem. Pɛ lɛɛ́ eshʉʼɛ mé lezēŋ wɔ júʼ‑nchu Ndém pīi, pɔ́ naáŋ á lezēŋ Ndém.

²⁴ Pɛ lɛɛ́ eshʉʼɛ mé lezēŋ Yɛɛ́so, á nziŋ‑ekém ánɛ eka eswhī. Pɛ lɛɛ́ eshʉʼɛ mé lezēŋ metshi mīi, Yɛɛ́so a le lɔ̄k ŋkʉɔ́ʼ eka. Metshi muɔ mɛ́t, é teē nzwiŋ ntɔ́k emi Abɛl.

²⁵ Pɛ epá á wɛ́ á legɔ̄ le júʼ á ŋiŋ yīi, a shúŋnɛ á mbū pɛ ɛ́. Epuɔ pīi pɔ́ lɛ te véŋ á lejūʼ nchu ŋiŋ yīi, a lɛɛ́ ntswɛtɛ á wɔ́p á ndo esī atsetsáʼ á, Ndém a le tswá á wɔ́p ŋgʉɔ athʉ́. Ḿpɛ lʉʼɛ á lejūʼ ŋghi Ndém zīi, é fhɔ́ɔ á lephū eshúŋnɛ á mbū pímpɛ, mbɔ a gɔ le néŋ té tswá á yímpɛ ɛ́.

²⁶ Á lɛ efʉʼ mvhɔ, ŋghi Ndém é ghʉ, esī atsetsáʼ é pú ncʉ̄ʼne, á tsetsɔŋɔ, Ndém á nɔŋ mbhʉ́ɛ á yímpɛ ŋ́gɛ: «Meŋ a shʉʼ eghʉ, esī atsetsáʼ ndaʼ mé le zéŋ ncʉ̄ʼne mmɔʼ legʉɔ ɔ́, lephū e epú ncʉ̄ʼne azí. »

²⁷ Mmɔʼ legʉɔ é páʼā, ńdɔkɔ eshúŋɔ á légɛ, ajūɔ tsem zīi, Ndém a le pɔ́ɔ̄, á piŋ nnɔ̄ŋ ntsēŋɛ ŋgɔŋ, a láʼ ekēmɛ, épú emii, tɛ́ ajū mīi á gɔ le kēmɛ, á enáŋ á lemiʼɛ.

²⁸ Púp, ḿpɛ esyákne á Ndém páʼ a á si ŋghʉ̄ɛ, ḿpɛ kúɔ́ ánɛ alāʼ zīi, á gɔ le kēmɛ. Ḿpɛ egē esyákne á yí, ńnɔ̄ŋ nnɛ̄t á esī, ŋ́ghʉ̄ ajū mīi, á pɔŋ á yí, ńnɔŋ njúʼɔ nchu yí.

²⁹ Ndém yīi ḿpɛ wuʼtɛ, a á si ŋgɔ́ páʼ mmók yīi, é peŋɛ ajūɔ tsem lā.