Eble 11 - Eka Eswhī

Páʼ wɔ maŋgānjʉʼ é le fɛ́ nnɛ̄t épúp, ŋ́gyá á mbū Ndém

¹ Lefɛ̄ nnɛ̄t ŋgyá á mbū Ndém, a á si ŋgɔ́ á levēŋ á légɛ, o ó ndáʼ ŋgwɛ̄ ajū mīi, o ó si ntsáa. Á levēŋ á légɛ, ajū mīi o te si ndɔ̄kɔ menēk njʉ́ɔ ɔ́, á éwú anuúnē.

² Ndém a le gē evéŋ á légɛ, epuɔ efʉʼ mvhɔ, é si ŋgɔ́ epuɔ pí, éfhó ánɛ páʼ, pɔ́ é fɛ́ nnɛ̄t ŋgyá á mbū yí.

³ Ḿpɛ fhoó ánɛ páʼ, ḿpɛ fɛɛ́ nnɛ̄t ŋgyá á mbū Ndém, tɛ́ njúʼ á légɛ, Ndém a le lɔ̄k ashuŋne, tɛ́ ŋghʉ̄ ŋgɔŋ. Púp, ajū mīi ḿpɛ é si ndɔ̄kɔ menēk njʉ́ɔ, á fhoó ánɛ azi, ḿpɛ te lɔ̄k menēk njʉ́ɔ ɔ́.

⁴ Á le fhó ánɛ páʼ, Abɛl a le fɛ́ nnɛ̄t épúp, ŋ́gyá á mbū Ndém, á nɔŋ epɔʼ yí á mbū Ndém, é pɔŋ ntɔ́k eyi Kaɛŋ. Éfhó ánɛ lefɛ̄ nnɛ̄t mɛ́t, Ndém á tɔ́ŋ á yí lɛ ŋiŋ ndeŋ ndeŋ, ńtswí epɔʼ yí. Páʼ Abɛl a le fɛ́ nnɛ̄t ŋgyá á mbū Ndém lā, a zɛɛ́t ayáʼa eshúŋne shuŋné, tsya áa légɛ, a lē ŋkwhʉ́.

⁵ Á le fhó ánɛ páʼ, Enɔk a le fɛ́ nnɛ̄t épúp, ŋ́gyá á mbū Ndém, Ndém á saʼ á yí, ńdɔk ŋkɔ́ʼ mé lephū, tɛ mɛ́ té zéŋ á yí njʉ́ɔ ɔ́, tɛ a te kwhʉ́ kwhʉ́ ɛ́. Aŋwaʼne Ndém á leé ŋ́gɛ, Ndém a le gē esaʼ á yí elɔk ekɔ́ʼ épúp, mbɔ a á jʉ́ɔ, ŋghʉʉ́‑anu tsí, é pɔŋ á yí.

⁶ Ŋghʉʉ́‑anu ŋiŋ, é gɔ le pɔ̄ŋ á Ndém, té gɔ́ yīi, ŋgaŋ a fɛɛ́ nnɛ̄t ŋgyá á mbū Ndém ɛ́. Ŋiŋ yīi a á si ntshótɛ nnɛ̄t mé lezēŋ Ndém, a pɔŋteé á levēŋ á légɛ, Ndém mɛ́t, a á éwú, ḿvéŋ á légɛ, a yaá ntaŋá á mbū epuɔ pīi, pɔ́ é si efāʼa á yí.

⁷ Á le fhó ánɛ páʼ, Noe a le fɛ́ nnɛ̄t épúp, ŋ́gyá á mbū Ndém, Ndém á shúŋne á mbū yí, ńdɔk ntswɛ̄te á yí, ánɛ menu mīi, é le nɔ̄ŋ ŋgɔ̄ á eshʉʼɛ̄, tɛ mɛ́ piŋ nzī nzɛ́t áa te jʉ́ɔ. Á júʼ anu zīi, Ndém a á lé, ḿvéŋ té miʼte, ŋ́ŋyɛ̄tte á mía mía mɛtúa ntshi, ńdɔk ŋghʉ̄, pɔ́ a epuɔ atseŋ ŋgyā pí metsem, é kó éwú, ńtswɛ́t. Á lɔk épúp, ńtswī á légɛ, avoʼ epuɔ á si ŋgɔ́ epuɔ tepɔŋ. A le fɛ́ nnɛ̄t épúp, Ndém á tɔ́ŋ á yí lɛ ŋiŋ ndeŋ ndeŋ.

⁸ Á le fhó ánɛ páʼ, Ablaham a le fɛ́ nnɛ̄t épúp, ŋ́gyá á mbū Ndém, tɛ́ Ndém á tɔ́ŋ á yí, á lɛ mvéŋ, ŋ́gʉ̄ɔ mé alāʼ zīi, Ndém a le phʉ́ á leyā á mbū yí ŋ́gɛ, a ecʉ́ʼ azí. Ŋ́gē egʉɔ, a te nzhɛ́ ajʉʼ zīi, a gʉɔ mé éwú ú.

⁹ A le fhó ánɛ páʼ, yí fɛɛ́ nnɛ̄t épúp, ŋ́gyá á mbū Ndém, tɛ́ ŋgʉɔ nnáŋ ánɛ alāʼ zīi, Ndém a le phʉ́ á yí, ŋ́gɔ́ á ŋge, ńnáŋ éwú épúp, á ntē ntap, pɔ́ Izak mbɔɔ Yakɔ́p, mbɔ Ndém a le ghʉ̄ alaʼne mɛ́t, á mbū pɔ́p azɔ́p.

¹⁰ Ablaham a le gē enáŋ éwú épúp, ńnɔŋ nzwíʼtɛ á tésɔŋ yīi, a wɛɛ̄ á kwaʼ atsék, á tésɔŋ yīi, Ndém yí méŋwɛ̄t mé lɛ á ŋgaŋ levho, yí mé zéŋ ŋkwɛ́t.

¹¹ Á le fhó ánɛ páʼ, Saála a le fɛ́ nnɛ̄t azí epúp, ŋ́gyá á mbū Ndém, tɛ mbɔɔ páʼ, a le gɔ́ mbɔ a á zwiŋ tɛʼ lā, Ndém á ghʉ, á kuʼ páʼ, a gɔ ezéŋ nzhí. Púp melaʼ mīi, a le néŋ á ntē yí á légɛ, Ndém a gɔ le kúmne anu zīi, a le laʼnē ɛ̄.

¹² É melaʼ épúp tɛ́, Ablaham, páʼ, a le gɔ́ mbɔ a á zwiŋ tɛ ncʉ́ʼɛ ŋgɔ̄ á ŋkwhʉ̄ɛ, a le zéŋ nzhí ewɔŋkhʉ̄, tɛ pɔ́ zá tɛ ŋgɔ́ páʼ mecɔʼ saŋ, á athʉ́ lephū lā. Tɛ ŋgɔ́ páʼ memvem asaŋasáŋá á legʉ̄ŋ ntshi, tɛ ŋgɔ́ yīi, ŋiŋ a gɔ le kūʼ á lesāŋ á.

¹³ Ablaham pɔ́ a epuɔ pí mɛ́t, é le pú ŋkwhʉ́te metsem, té wɛ ajū mīi, Ndém a le laʼnē á mbū pɔ́p. Táʼ, ŋ́ké nzápa ánɛ wɔ́p á lefɛ̄ nnɛ̄t ŋgyá á mbū Ndém, ńzhɛ́ á légɛ, pɔ́ é ndáʼ ŋgwɛ̄ etsō mɛ́t ntsem, á pɔŋ á wɔ́p, pɔ́ zhɛ́ á légɛ, pɔ́ é esī atsetsáʼ páʼā, ŋ́gɔ́ áa metsia nzhɛ, ŋ́gɔ́ áa mege.

¹⁴ Epuɔ pīi, pɔ́ shuŋneé páʼa mɛ́t, á páʼā ndɔkɔ ntswīi ndeŋ ndeŋ ŋ́gɛ, pɔ́ é si efāʼa á amɔ̄ʼ alāʼ ndɛʼɛ zīi, a gɔ́ á kwaʼ azɔ́p.

¹⁵ Ŋ́gɔ́ éyi, pɔ́ le gɔ́ péʼe, ńnáʼ ŋkwāŋte alāʼ zīi, pɔ́ le fhó éwú, mbɔ pɔ́ le gɔ́, pɔ́ faʼ nzhɛ, á lelɔk mbīŋ nzem mé éwú.

¹⁶ Pɔ́ lɛ páʼā, ńcʉ́ʼɛ eshʉ́ɛ́ áa alāʼ mbɔŋ zīi, pɔ́ gʉɔ mé éwú, ńdɔkɔ ndʉ́ɛ́ athʉ́ lephū. Á lɛ épúp páʼā, Ndém a te lʉ̄ʼ á légɛ, pɔ́ etɔ́ŋ lezēŋ tsí, ńdé ŋ́gɛ, yí é Ndém wɔp ɔ́, melaʼ mīi, a le gɔ́ mbɔ, a lē ndáʼ ncūŋte ejʉʼ tsɔ́p á lephū.

¹⁷ Á le fhó ánɛ páʼ, Ablaham a le fɛ́ nnɛ̄t épúp, ŋ́gyá á mbū Ndém, Ndém á zwíʼ á yí, ńdé á mbū yí ŋ́gɛ, a elɔ̄k á méŋ yi Izak, ńnɔ̄ŋ epɔʼ á mbū yí. Á véŋ, ńnɔŋ ŋgɔ̄ elɔk á tséŋ méŋ yí Izak enɔŋ epɔʼ, tɛ́ mbɔ Ndém a le ké ŋghʉ̄ alaʼne á mbū yí,

¹⁸ ńdé ŋ́gɛ, Izak mé láʼ eghʉ, nzwɛt zi e esá.

¹⁹ Ablaham á le nɔ̄ŋ nzhɛ́ɛ á légɛ, Ndém a kuūʼ á yí á leghʉ, mepfhō é zím ánɛ lewhʉ̄. Melaʼ épúp tɛ́, Ndém a le tsɔ́ʼ á méŋ yi, ŋ́gyá mé yí, tɛ á gɔ́ áa páʼ, a á zím ánɛ lewhʉ̄ lā, á lɔkɔ eshúŋɔ anu.

²⁰ Á le fhó ánɛ páʼ, Izak a le fɛ́ azí nnɛ̄t épúp, ŋ́gyá á mbū Ndém, Izak mɛ́t á lɔ́ mbwɛ́né á athū Yakɔ́p pɔ́ Izawu, ánɛ menu mīi, e fú tɛ́ eshʉʼ á mbū pɔ́p.

²¹ Á le fhó ánɛ páʼ, Yakɔ́p a le fɛ́ nnɛ̄t épúp, ŋ́gyá á mbū Ndém, Yakɔ́p wuɔ mɛ́t, á cʉ́ʼ ŋkwhʉ́ kwhʉʉ́, ńdɔ́ mbwɛ́né á athū awíɛ awíɛ, ánɛ epɔ̄ Yosɛ́p. Ńtɛ́te á athʉ́ zí, ńdɔk ŋŋɔ́ʼne á esī ŋgūʼte á Ndém.

²² Á le fhó ánɛ páʼ, Yosɛ́p a le fɛ́ nnɛ̄t épúp, ŋ́gyá á mbū Ndém, á cʉ́ʼ ŋkwhʉ́ kwhʉʉ́, éshúŋ anu ánɛ páʼ, epɔ̄ Islaɛl, e láʼ ecʉ́ʼ efhó á Ejīpto etó, ńzéŋ eshúŋ páʼ, mɛ́ e fú ecʉ́ʼ eghʉ épúp, mé mekwɛ́ mí.

²³ Á le fhó ánɛ páʼ, mɔʼɔ́ Mɔɔ́sɛ pɔ́ mɛ́ wɔp, é le fɛ́ nnɛ̄t épúp, ŋ́gyá á mbū Ndém, pɔ́ zhí á yí páʼā, ńjʉ́ɔ, alá eshhʉ̄ zí á gɔ́ mbɔŋ, pɔ́ te zéŋ lepé efɔ mbɔ́k ɔ́, ńdʉ̄ɔ á yí mesaŋ métɛ́t.

²⁴ Á le fhó ánɛ páʼ, Mɔɔ́sɛ a le fɛ́ nnɛ̄t épúp, ŋ́gyá á mbū Ndém, á tswhí tɛ ŋgɔ́ á ndʉɛ, ńdʉ̄ʼ á mɛ́ letɔ̄ŋ á yí Mɔɔ́sɛ lɛ, méŋ méŋ efɔ Falaɔŋ eyi menzwí.

²⁵ A le kɔ̄ŋ á lejʉ̄ɔ ŋgʉɔ̄ʼ, páʼ epɔ̄ memía pí, épuɔ Islaɛl alāʼ Ndém, ńtɔ́k á yí á lege egɔ́ á ntē lekāk, ńnɔŋ ŋghʉ̄ɛ mefa. Ntí lekāk cʉɔ mɛ́t, e te náŋ.

²⁶ A le jʉ́ɔ á légɛ, lejʉ̄ɔ ŋgʉɔ̄ʼ, páʼ Nzaʼ‑Ŋkhʉ á ntɔ̄ŋ apuʼ, a á si ŋgɔ́ á mía lewūʼ, ńtɔ́k lewūʼ tsīi é Ejīpto. A le nɔ̄ŋ ntshíɛ ntē yí áa ánɛ ntaŋá yīi, a a fú tɛ́ ewɛ.

²⁷ Á le fhó ánɛ páʼ, Mɔɔ́sɛ wuɔ mɛ́t, a le fɛ́ nnɛ̄t épúp, ŋ́gyá á mbū Ndém, á fhó á Ejīpto ŋgʉ̄ɔ, té cɔʼ á légɛ, efɔ a a záŋ á lɔ́ŋ. Ŋ́ŋíŋ á yí á legʉɔ, páʼ a á si njʉ́ɔ á Ndém lā, tɛ́ á piŋ ŋgɔ́ yīi, mɛ́ gɔ le lɔ̄k menēk njʉ́ɔ á yí í.

²⁸ Á le fhó ánɛ yí á lefɛ̄ nnɛ̄t ŋgyá á mbū Ndém, á tshí lekāk Páska, ńtswī ŋ́gɛ, mɛ́ eŋīk metshi mena á menchu ŋgyā, tɛ́ cɔʼ yīi, Ndém a á tó á yí ŋ́gɛ, a egʉɔ nzwhíte epuɔ, a á le zwhíte epɔ̄ lethū epuɔ Islaɛl ɛ́.

²⁹ Á le fhó ánɛ páʼ, epuɔ Islaɛl é le fɛ́ nnɛ̄t épúp, ŋ́gyá á mbū Ndém, pɔ́ tó á mía paŋ ntshi, á aláŋ esī, páʼ pɔ́ ziŋɛ ánɛ azooné‑atsáʼ lā. Epuɔ Ejīpto é piŋ efʉ̄ʼne azɔ́p á leghʉ épúp, ḿbú ndákne á ntē ntshi.

³⁰ Á le fhó ánɛ páʼ, epuɔ Islaɛl é le fɛ́ nnɛ̄t épúp, ŋ́gyá á mbū Ndém, pɔ́ kɛ́nne á tésɔŋ Jeliko eleʼé esambīa, mekɛ tésɔŋ wuɔ mɛ́t, é táka mbwɛ̄t á esī.

³¹ Á le fhó ánɛ páʼ, Lahab ŋgaŋ agā menzwí, a le fɛ́ nnɛ̄t épúp, ŋ́gyá á mbū Ndém, á lɔk apwɛne, ŋ́kókne wɔ mɛnāŋ epuɔ Islaɛl. Melaʼ épúp tɛ́, epuɔ Islaɛl é le gē ezwhíte megaŋ mbo Ndém, pɔ́ te á yí zwhí.

³² Meŋ ezéŋ ŋkím á awɔ́, ńtsyā awɔ́? Meŋ gɛ meŋ a kím á Jedeɔŋ, mbɔɔ Balak, ŋ́ghʉ̄ á Samsɔŋ, mbɔɔ Jeftɛ, ŋ́ghʉ̄ á Ndavít, mbɔɔ Samiɛ, mbɔɔ metswi‑ŋke Ndém, mbɔ njhʉ̄ e e kíŋ á mbū meŋ, á lelɔk ŋkím á wɔ́p, anāŋ anāŋ.

³³ Á le fhó ánɛ páʼ, pɔ́ le fɛ́ nnɛ̄t épúp, ŋ́gyá á mbū Ndém, emɔ̄ʼ é lʉɔ́ʼ melāʼ, ńjhʉ́, ńdɔ̄k á ndeŋ ndeŋ ntɛ́ne menu. Ŋ́gwɛ̄ ajū mīi, Ndém a le laʼnē á leyā mé pɔ́p. Emɔ̄ʼ é tsɛ́t nchu menjʉnjhʉ meŋgēm.

³⁴ Emɔ̄ʼ é pík á mía mmók. Emɔ̄ʼ é vuʼu ŋŋí ncu. Emɔ̄ʼ é nɔ̄ŋ mbwɛ́tɛ, páʼ epuɔ pīi, pɔ́ é si ŋgɔ̄ɔ lā, Ndém á ké ŋgyá á wɔ́p mete. Emɔ̄ʼ é lɛ wɔ maʼ‑ncu té pɔ́k azō. Ńjūŋ wɔ maʼ‑ncu epuɔ elāʼ ndɛʼɛ, tɛ pɔ́ kʉ.

³⁵ Á le fhó ánɛ páʼ, emɔ̄ʼ wɔnzwí é le fɛ́ nnɛ̄t épúp, ŋ́gyá á mbū Ndém, epuɔ pɔ́p pīi, pɔ́ lē ŋkwhʉ́te, é zím ánɛ lewhʉ̄, tɛ pɔ́ zéŋ njʉ́ɔ á wɔ́p. Ńzím épúp, emɔ̄ʼ é zéŋ mvéŋ á légɛ, mɛ́ egēne á wɔ́p tɛ nzwhí. Ḿvéŋ á letswiʼne njʉ́ɔ ŋgʉɔ̄ʼ, ńdɔkɔ efāʼa á lefū ntā á lezēŋ Ndém.

³⁶ Emɔ̄ʼ é zéŋ mvéŋ á légɛ, mɛ́ ezɔ̄ á wɔ́p, ńtswá á wɔ́p, ńdɔ̄k mbɔɔ metsyɛ́ɛn, ŋ́kwɛ́t á wɔ́p, ḿmāʼ á ŋgyā atʉɛ́.

³⁷ Mɛ́ lɔk metɔ́ ntémte emɔ̄ʼ, ńzwhí. Ńdɔ̄k asɔɔ́, ńzáʼte emɔ̄ʼ, etsém pīa. Ńdɔ̄k ŋŋí ncu, ńzwhíte emɔ̄ʼ. Emɔ̄ʼ é gɔ́ á esī atsetsáʼ, ŋ́gáne gané, ŋ́gē egáne épúp, ńzwík ŋgup njʉnjhʉ, ká ŋgup mvhō, ńnɔŋ mbúŋɔ ajūɔ tsem, mɛ́ genɛ á wɔ́p, ńnɔŋ ndʉɔ́ʼɔ á wɔ́p.

³⁸ Epuɔ puɔ mɛ́t, é lɛɛ́ ŋkɛ́tɛ á mejʉʼ mejʉʼ, á késáatswɛt, á mekwɛ̄t, á mewɔpɔ́ tɔ́, á membhʉ̄ esī atsetsáʼ. Ŋgɔŋ esī atsetsáʼ, é lɛ te á mbɔŋ ajʉʼ yīi, pɔ́ gɔ enáŋ éwú ú.

³⁹ Epuɔ puɔ mɛ́t, é le fɛ́ nnɛ̄t ŋgyá á mbū Ndém, Ndém á jʉ́ɔ épúp, ḿvéŋ ŋ́gɛ, pɔ́ é epuɔ pí. Táʼ, pɔ́ le ké te wɛ̄ ajū mīi, Ndém a le laʼnē á leyā á mbū epuɔ pí í.

⁴⁰ Púp melaʼ mīi, ajū mīi Ndém a le féŋ á mbū pímpɛ, á mbɔŋ ntɔ́k azi, pɔ́ le nɔ̄ŋ ŋkwaŋtɛ. A le gɔ́ a á le yá mé pɔ́p, té pímpɛ ŋgɔ́ éwú ú.