Eble 10 - Eka Eswhī

Klísto a le lɔ̄k athū nnɛ̄t zí ntsɔ́ʼ afɛʼ, á kuʼ épúp

¹ Lepé Mɔɔ́sɛ é lɛ páʼā, ŋ́gɔ́ áa ayiŋne ajū mīi, a fú tɛ́ shʉʼe. É lɛ té kwaʼ ajū mīi, Ndém a le phʉ́ epuɔ menɔŋ ɔ́. Wɔ nɔŋ‑epɔʼ é gɛ nnɔ̄ŋɔ epɔʼ, ḿbeknɛ nnɔ̄ŋɔ, ŋguʼ tsem, té záʼte. Epɔʼ wuɔ mɛ́t, é pú ŋgɔ́ le ghʉ̄, epuɔ pīi, pɔ́ é si ŋkɔ̄ŋɔ á wɔ́p á lelɔk ewuɔ mɛnzhɛ, ńtshóte nnɛ̄t mbáte á Ndém, e láʼ ŋgʉ̄ɔ tɛ ŋkó ɔ́.

² Á le wíʼe ŋgɔ́ yīi, lewuʼte á Ndém, ánɛ ejʉɔ ntií mɛ́t, á le tshí á taʼ legʉɔ, ésōk mefa ánɛ epuɔ pīi, pɔ́ ziŋɛ ánɛ mɛnzhɛ wuɔ mɛ́t, mbɔ pɔ́ la zéŋ njúʼ, ŋ́gɔ́ á ntē mefa á. Mbɔ mɛ́ gɛ te nzɛ́t nnɔ̄ŋɔ epɔʼ ɔ́.

³ Anu zīi á éwú, á gɔ́ áa légɛ, epɔʼ wuɔ mɛ́t, é ghʉ̄ʉ, epuɔ menɔŋ, é gɔ́ ŋguʼ tsem, ŋ́kímte mefa mɔ́p.

⁴ Metshi mefɔŋ pɔ́ emi memvhō, é pú ŋgɔ́ le kūʼ á lesok mefa á léée.

⁵ Melaʼ épúp tɛ́, Klísto a le gē ekó á ŋgɔŋ ega, ńdé á mbū Ndém ŋ́gɛ: «O lɛ te kɔ̄ŋ ŋ́gɛ, mɛ́ ezwhí mena, ńdɔk nnɔ̄ŋ epɔʼ á mbū wu ú. O te kɔ̄ŋ ŋ́gɛ, mɛ́ eyá etsō, ńdɔk nnɔ̄ŋ epɔʼ á mbū wu ú. O le ké mbīŋ ŋghʉ̄, meŋ ewɛ mbe nnɛ̄t.

⁶ Letɔ mena tɛ kīne, ńdɔk nnɔ̄ŋ epɔʼ á mbū wu, melaʼ mefa, a lɛ te á wú pɔŋ. Lezwhīte mena, ńdɔk nnɔ̄ŋ epɔʼ á mbū wu, melaʼ mefa, a te á wú pɔŋ.

⁷ Púp, meŋ ndé ŋ́gɛ: “Ndém ga, meŋ wuɔ, meŋ shʉʼɛ páʼa, ŋ́gɔ̄ á ŋghʉʉ̄ ajū mīi, wu mé kɔŋ, ńdeŋ ndeŋ páʼ, mɛ́ le tí á ntē aŋwaʼne wu épúp.”»

⁸ Klísto yí méŋwɛ̄t a le zī mvhɔ, ńdé ŋ́gɛ, Ndém a lɛ te kɔ̄ŋ ŋ́gɛ, mɛ́ ezwhíte mena, ńdɔk nnɔ̄ŋ epɔʼ á mbū yí í. A te kɔ̄ŋ ŋ́gɛ, mɛ́ eyá etsō, ńdɔk nnɔ̄ŋ epɔʼ á mbū yí í. A te kɔ̄ŋ ŋ́gɛ, mɛ́ etɔ̄ mena tɛ e ekīne, ńdɔk nnɔ̄ŋ epɔʼ á mbū yí í. A te kɔ̄ŋ ŋ́gɛ, mɛ́ ezwhíte mena, ńdɔk nnɔ̄ŋ epɔʼ á mbū yí melaʼ mefa á. A lɛ te kɔ̄ɔŋ, é lɛ te á yí pɔŋ. Tɛ́ mɛ́ ké nnɔ̄ŋ nnɔ̄ŋɔ áa páʼ, lepé Mɔɔ́sɛ, é si nzɛ́ttɛ épúp.

⁹ Ńzéŋ ndé ŋ́gɛ: «Meŋ eké ŋgɔ́ ewuɔ, meŋ shʉʼɛ á ŋghʉʉ̄ ajū mīi, wu mé kɔŋ. » A lɛɛ́ ndʉ́ɛ́ épúp páʼā, ńdɔkɔ mbíkɛ á nzwiŋ eka, ḿbhīɛ eka eswhī.

¹⁰ Yɛɛ́so Klísto a le ghʉ̄ ajū mīi, Ndém a le nɔ̄ŋ ŋkɔ̄ŋɔ. Ŋ́gyá á athū nnɛ̄t zí, á taʼ legʉɔ, á pú ŋkūʼ épúp, ńdɔk ŋghʉ̄, ḿpɛ é cʉ́ʼ epuɔ Ndém.

¹¹ Á lɛ á ntē nzwiŋ eka, wɔ nɔŋ‑epɔʼ é tshíte á ajʉʼ eleʼé tsem, ŋ́ghʉ̄ɛ afaʼ zɔ́p, ŋ́gyáa etsō ŋgʉɔ tɛ nzáne, ńdɔkɔ nnɔ̄ŋɔ epɔʼ, ḿbeknɛ nnɔ̄ŋɔ. Á piŋ ŋgɔ́ yīi, epɔʼ mɛ́t, é gɔ le pú ŋkūʼ á lesok mefa á léée.

¹² Klísto a le ké nnɔŋ epɔʼ, é gɔ́ ndaʼ, ńdɔk esōk mefa. A ké ŋgɔ́ tsetsɔŋɔ, ńnáŋ á apū ete Ndém, á lemiʼɛ.

¹³ Ńzwíʼtɛ ŋ́gɛ, megaŋ mbo pí, e eshʉʼ nnɔ̄ŋte á esī, a etshíte mekhu ánɛ pɔ́p.

¹⁴ A le lɔ̄k ndaʼ epɔʼ yīi, a le nɔ̄ŋŋ̄, ŋ́ghʉ̄, epuɔ pīi a le sōk mefa mɔ́p, é cʉ́ʼ epuɔ Ndém, á lemiʼɛ.

¹⁵ Azwakne Ndém á si eshúŋɔ á yímpɛ azí ŋ́gɛ, menu mɛ́t é ajʉʼ éwú, ŋ́gɔ́ épúp. A le lé ŋ́gɛ:

¹⁶ «Atsyapuɔ a á lé ŋ́gɛ: eka yīi, pek a pɔ́p e láʼ ekʉɔ́ʼe, páʼ meleʼé mɛ́t é tɔ́k, e ewuɔ páʼa. Meŋ a shʉʼ etí mbé má á ntē pɔ́p, mbɔɔ ánɛ ekwaŋte tsɔ́p. »

¹⁷ Ńzéŋ ntswiʼne ndé ŋ́gɛ: «Meŋ te shʉʼ ezéŋ ekímte mefa mɔ́p ɔ́, meŋ ńde zéŋ ŋkímte menu tepɔŋ mɔ́p ɔ́. »

¹⁸ Mɛ́ gɔ́ tɛ ndēkne mefa ŋiŋ páʼā, ŋgaŋ a te pɔŋté á lezēŋ nnɔ̄ŋ epɔʼ ndɛʼɛ, melaʼ mefa mí í.

Ḿpɛ ekúʼte á mɛnzhɛ yīi, Ndém a le kīā, tɛ a etē

¹⁹ Púp me epɔ̄ memía, ḿpɛ etsīa ánɛ metshi Yɛɛ́so, páʼ a le lɔ̄k nnɔŋ epɔʼ lā, ńchʉ́ nnɛ̄t nzhɛ́ á légɛ, ḿpɛ e láʼ ekó á ajʉʼ zīi, Ndém a naáŋ éwú.

²⁰ Yɛɛ́so a le sīa á mía apū nzhó á mvhɔ pímpɛ, ńdɔkɔ nzápa ánɛ yí méŋwɛ̄t, páʼ a á nte lā, ńtsɔ́ʼɔ nzhɛ eswhī zīi, ḿpɛ gɔ ezīiŋ éwú, ńtā á lezēŋ Ndém. Mía apū nzhó mɛ́t zīi a le sīā, e lɛ páʼā, ŋ́gɔ́ mbe nnɛ̄t zi, páʼ mɛ́ le kwɛtēē.

²¹ Á páʼā, ḿpɛ lɔ̄ɔk épúp, ŋ́gwɛ̄ á nnɔŋ‑epɔʼ eyi ndʉɛ yīi, a cʉtɛ alúŋ epuɔ Ndém.

²² Púp, ḿpɛ elɔ̄k á taʼ ntē, ńtshóte nnɛ̄t mé lezēŋ Ndém, ńnɔŋ mbúu efíɛ́ nnɛ̄t ŋgyáa á mbū yí, té miʼte, melaʼ mīi, Yɛɛ́so a le lɔ̄k metshi mí, ésōk ntē yímpɛ, ńdɔ̄k ntshi te alɔ́ʼ, ésōk mbe nnɛ̄t zímpɛ.

²³ Ndém a le laʼnē á lefū ŋgyá á yímpɛ azō. A piīŋ te lé á anu, mɛ́ faʼ kékáŋ á. Púp, ḿpɛ etswiʼne eshúŋ esa saá, ajū mīi, a le phʉ́ á yímpɛ.

²⁴ Ḿpɛ etɔ́te mennɛ̄t mímpɛ nzeŋne zeŋné, ńdɔk ntshóne á awíɛ awíɛ, á lewɛ ŋkɔŋne, mbɔɔ á leghʉ mefaʼ membɔŋ.

²⁵ Ndɛ́ʼ ḿpɛ ezéŋ ŋgwáʼ alúŋ epuɔ Yɛɛ́so zímpɛ, páʼ emɔ̄ʼ epuɔ é cʉʼɛ́ ŋghʉ̄ɛ épúp. A cʉ́ʼɛ épúp, ḿpɛ esēmte mennɛ̄t mímpɛ, ńzeŋne zeŋné, melaʼ mīi, pɛ é si nzhɛ́ɛ á légɛ, aleʼé zīi Atsyapuɔ a gʉɔ mé eshʉʼɛ, á tshóne tɛ mbáte.

²⁶ Ŋiŋ a nɔŋ nzhɛ́ɛ á mɛnzhɛ anuúnē, ḿbiŋ te éwú ziŋ, mbɔ mmɔʼ epɔʼ yīi, mɛ́ gɔ enɔ̄ɔŋ tɛ ndɔ̄k esōk mefa mɛ́t, é té éwú ú.

²⁷ Mbɔ ŋgaŋ a a cʉ́ʼɛ ezwíʼtɛ áa mía ŋgʉɔ̄ʼ yīi, Ndém a a záʼ ntsaŋ zi, élé. A egɔ́ á yí á legʉɔ mé mía mmók yīi, megaŋ atʉɛ́‑athū á mbū Ndém, e láʼ egʉɔ mé éwú.

²⁸ Pɛ é si nzhɛ́ɛ á légɛ, ŋiŋ a lɛɛ́ efaa lepé Mɔɔ́sɛ, tɛ epuɔ mémpīa ká métɛ́t é gɔ́ wɔ njhʉɛ‑njʉɔ́, mɛ́ zwhíɛ á yí, té tsá á yí.

²⁹ Tɛ ŋgʉɔ shɔ́ʼɔ́ á mbū ŋiŋ yīi, a á wák á Méŋ Ndém, a te lɔ̄k metshi eka mīi, mɛ́ le lɔ̄k esok á yí, ńtɔ́ŋ á azō ɔ́, ńzɔ̄te Azwakne Ndém zīi, á ghʉɛ anu mbɔŋ té ndhʉ á mbū epuɔ menɔŋ ŋ̄? Pɛ ka jʉ́ɔ á légɛ, ezi ŋgʉɔ̄ʼ e pɔŋteé á lezā ntɔ́k ezi ŋgaŋ á lɛ̄?

³⁰ Ḿpɛ é si ncuŋtɛ nzhɛ́ɛ páʼ, Atsyapuɔ Ndém a le lé ŋ́gɛ: «Meŋ mé pɔɔ́ŋ á lepʉʼ anu, meŋ mé pɔɔ́ŋ á lezāpa azi awɔ́ ŋiŋ lɛ́, á alá apū yí. » A le zéŋ ndé ŋ́gɛ: «Meŋ mé pɔɔ́ŋ á lezāʼ ntsaŋ epuɔ alāʼ pá. »

³¹ Á anu ntē tɛʼ, á lewhʉ á mbū Ndém yīi, a naáŋ ntē.

³² Pɛ ekímte menu mīi, é le ghʉ̄ á wɛ́, efʉʼ mvhɔ. Ŋkaʼ Ndém é le lɛ̄ ŋgē ekɛʼɛ ánɛ pɛ, pɛ pú njʉ́ɔ á ntenté ŋgʉɔ̄ʼ, á ntē ncu yīi, pɛ le nɔ̄ŋ mmaʼa, ŋ́ké esēk seke.

³³ Á lɛ ánɛ mmɔʼ eshhʉ̄, mɛ́ nɔŋ nzɔ̄tɛ á wɛ́, ḿmāʼa esē á athū pɛ, á mvhɔ alāʼ, ńdʉɔ́ʼɔ á wɛ́. Ŋ́gɔ́ mmɔʼ eshhʉ̄, pɛ nɔ̄ɔŋ ŋkʉ̄ɛ ŋgʉɔ̄ʼ epuɔ pīi, pɔ́ jʉ́ɔ ejʉɔ ntií ŋgʉɔ̄ʼ mɛ́t, ḿbīʼɛ.

³⁴ Pɛ le kʉ̄ɛ ŋgʉɔ̄ʼ megaŋ atʉɛ́, ḿbīʼ. Mɛ́ gɔ á wɛ́ ŋkú etsō tsɛ́, pɛ evéŋ mé lekāk, nnɔ̄ŋ nzhɛ́ɛ á légɛ, pɛ wɛɛ̄ ajū mīi, á teē nzwiŋ, áju mīi á naáŋ á lemiʼɛ.

³⁵ Púp, pɛ etswiʼne nnéŋ ntē wɛ́ ánɛ Ndém, ńdáʼ ŋgwɛ̄ á mía mía ntaŋá.

³⁶ Á si nzɛ́ttɛ á wɛ́ á lekak ete, tɛ́ ndɔk ŋghʉ̄ ajū mīi, Ndém a á si ŋkɔ̄ŋɔ, a etsīa épúp, pɛ ewɛ̄ ajū mīi, Ndém a le laʼnē á mbū pɛ.

³⁷ Ndém a leé á ntē aŋwaʼne yí ŋ́gɛ: «Á lɛɛ̄ ncʉ́ʼ áa méŋ agáʼ afʉʼ lɛ, á méŋ atsém njhʉ̄ lɛ, ŋiŋ yīi, a pɔŋteé á leshʉʼ, a eshʉ̄ʼ. A te e zéŋ enáŋ á leshʉʼ ɛ́.

³⁸ Ŋiŋ yīi, a á ŋiŋ ndeŋ ndeŋ, a lɔɔ̄k á lefɛ̄ nnɛ̄t ŋgyá mé meŋ, ŋ́kwaʼ ŋgɔ́ éwú. A piŋɛ efhó ánɛ mɛnzhɛ ga ntó, mbɔ ntē gá é gɔ le zéŋ ŋgáŋte melaʼ mí í. »

³⁹ Ŋ́ké ŋgɔ́ mé pímpɛ, mbɔ ḿpɛ te si ŋgɔ́ epuɔ pīi, pɔ́ fhɔ́ɔ ánɛ mɛnzhɛ Ndém ntúɔ́, éfāʼa á lepī í. Ḿpɛ é si ŋgɔ́ áa epuɔ pīi, pɔ́ fɛɛ́ nnɛ̄t ŋgyá á mbū Ndém, ńzéŋ nnɔ̄ŋ nzīŋɛ ánɛ mɛnzhɛ letswɛ̄t.