Eble 1 - Eka Eswhī

Ndém a le zapá ánɛ Méŋ yi, eshúŋne á mbū epuɔ menɔŋ

¹ Ndém a lɛ efʉʼ mvhɔ, ŋ́gē eshúŋne á mbū wɔ maŋgānjʉʼ pímpɛ, ńzápa ánɛ metswi‑ŋke pí. Éshúŋne á mbū pɔ́p ŋgʉɔ tɛ nzá, mbɔɔ ánɛ mentií tɛ nzá.

² A piīŋ ŋgɔ́ tsetsɔŋɔ, ánɛ meleʼé muɔ mīi, ḿpɛ é éwú la, ńzápa ánɛ Méŋ yi, mbɔ a lē nchʉ́ á yí ŋ́gɛ, a esáʼ ajūɔ tsem, tɛ́ eshúŋnɛ á mbū pímpɛ. A le zī nzápa ánɛ yí tɛ́ ŋghʉ̄ ŋgɔŋ.

³ Mɔ́ mɛ́t mé si ntswīi páʼ shʉ́shɔ́k Ndém a á épúp. A gɔ́ éyi Ndém a á lɛ akɔ̄ lɛ́, mbɔ a zeéŋ ŋgɔ́ azí épúp. A lɔɔ̄k ashuŋne zí tɛ́ ŋgwɛ̄ ŋgɔŋ ntsem, ashuŋne mɛ́t á wɛɛ̄ mete. A le gɔ́ tɛ mbú efók mefa epuɔ metsem, tɛ pɔ́ cʉ́ʼ té alɔ́ʼ. Á gʉɔ nnáŋ ánɛ mía ajʉʼ, á tɛ athʉ́ lephū, á ŋkɔʼɔ́ apū ete Ndém Esaʼ‑Ŋgɔŋ ntsem.

Méŋ Ndém a tɔɔ́k mecɔʼ Ndém

⁴ Á lɛ épúp, Ndém á ghʉ, Méŋ yi á tsya mecɔʼ Ndém metsem, ḿbú ŋgyá á yí á mía lezēŋ yīi, a puú efáŋ ntsyā etsɔ́p metsem.

⁵ Ndém a laá nzi ŋgɔ́ aleʼé, ńdé á mbū mmɔʼ cɔʼ yi ŋ́gɛ: «O ó méŋ ga, tɛ efhó ayáʼa, meŋ gɔ́ á Mɔʼɔ́ wu ú. » A te lé á mbū mmɔʼ ŋ́gɛ: «Meŋ a shʉʼ egɔ́ á Mɔʼɔ́ wu, o epiŋ ŋgɔ́ á méŋ ga á. »

⁶ A cʉ́ʼɛ épúp, mbɔ Ndém a le nɔ̄ŋ ŋgɔ̄ á ntó Méŋ yi á ŋgɔŋ ega, á ŋiŋ yīi, a puú ntshí mvhɔ ánɛ etsō tsem, ńdé ŋ́gɛ: «Á pɔŋ ŋ́gɛ, mecɔʼ Ndém metsem, e etswíʼte á esī á mvhɔ yí, ŋ́gūʼte á yí. »

⁷ Ŋ́gɔ́ mé mecɔʼ Ndém, mbɔ Ndém méŋwɛ̄t a le lé ŋ́gɛ, pɔ́ é si ŋgɔ́ megaŋ afaʼ pí, ŋgɔ́ páʼ fefwɛt lā, ńzéŋ ŋgɔ́ páʼ alē mmók lā.

⁸ Ḿbiŋ ŋgɔ́ mé Méŋ yi, mbɔ a le lé ŋ́gɛ: «Wu Ndém, akɔʼ lefɔ jú a fú enáŋa egɔ́ áa éwú. » Ńzéŋ ndé ŋ́gɛ: «O o fú elɔkɔ á ndeŋ ndeŋ, tɛ́ esáʼa epuɔ menɔŋ.

⁹ O kɔɔ̄ŋ ajū mīi, á ndeŋ ndeŋ, ḿbiŋ mbā azi á té ndeŋ ndeŋ ɛ́. Melaʼ épúp tɛ́, wu Ndém, Mɔʼɔ́ wu Ndém a le kāŋ á wú, á nnɔ megaŋ akhu pú, ńchʉ́ á wú. Ŋ́gē echʉ́ á wú, ńdɔ̄k mevɛ̄t nzɔ́ʼ á wú, ŋ́gɛ o enáŋ mé lekāk.

¹⁰ A le zéŋ ndé ŋ́gɛ: «Atsyapuɔ, wu mé le gē ezi, ŋ́ghʉ̄ esī atsetsáʼ. Lephū é si ŋgɔ́ mefaʼ mbū mú.

¹¹ Ecū muɔ mɛ́t ntsem, e láʼ epú emi, o eké le mīi. Lephū pɔ́ esī atsetsáʼ, e fú epú ecʉ́ʼ páʼ mezwiŋ menzhó lā.

¹² O o láʼ ezémte ecū muɔ mɛ́t, páʼ mɛ́ zémtɛ mezwiŋ menzhó lā. Ecū muɔ mɛ́t, e láʼ esɛt ntií, páʼ menzhó é sɛtɛ ntií lā. O eké nzɛ́t áa páʼ, o ó épúp lā, o te ndáʼa mmī í.

¹³ Ndém a laá nzi ndé á mbū mmɔʼ cɔʼ yi ŋ́gɛ: «Shʉʼɛ nnáŋ ánɛ ŋkɔʼɔ́ apū ete gá, meŋ eghʉ̄, o etshíte mekhu mú ánɛ megaŋ mbo pú ú. »

¹⁴ Mecɔʼ Ndém é gɔ́ áa mezwakne, ńnɔŋ ŋghʉ̄ɛ afaʼ á mbū Ndém. Ndém a toó á wɔ́p ŋ́gɛ, pɔ́ egʉɔ ntswíte epuɔ pīi, a a láʼ eghʉ pɔ́ etswɛ́t.