Kɔlɔs 4 - Eka Eswhī

¹ Ŋ́gɔ́ á mbū pɛ memɔʼɔ́ apuʼ, mbɔ pɛ elɔ̄k á ndeŋ ndeŋ pɔ́ anuúnē tɛ́ ndɔk ŋgwɛ̄ epuʼ tsɛ́, ńnɔ̄ŋ nzhɛ́ɛ á légɛ, pɛ wɛɛ̄ azɛ́ á taʼ Mɔʼɔ́ á athʉ́ lephū.

Nzoknzem ntekné

² Pɛ etswiʼne eswíŋte á Ndém, ńdɔk ŋgʉ̄ɔ mé mvhɔ. Ŋ́gē eswíŋte á yí, ńnɔŋ mbúʼu mbū, ésyákne á yí.

³ Pɛ ezéŋ eswíŋte á Ndém á athū pek, ŋ́gɛ a elɛ ntsɔ́ʼ nzhɛ á mbū pek, á lelɔk ntswī ŋke yí, á lelɔk ŋkɛ́ʼte ntsem zīi, a le zapá ánɛ Klísto, ŋ́kɛ́ʼɛ. Ézi ŋgɔ́ melaʼ ntsem mɛ́t, tɛ́ meŋ á ŋgyā atʉɛ́.

⁴ Pɛ eswíŋte ŋ́gɛ, Ndém a elɛ ŋghʉ̄, meŋ ekūʼ á gá á letɔŋte ntsem mɛ́t eshúŋ epuɔ, páʼ meŋ mbɔŋteé á gá á leghʉ épúp.

⁵ Pɛ elɔ̄k azhɛ̄‑anu tɛ́ nnáŋ, á nnɔ wɔ te véŋ‑Yɛɛ́so. Méŋ esa a elɛ ŋgē etsɔ́ʼɔ, pɛ elɔk ntswíte á wɔ́p.

⁶ Ashuŋne zɛ́ a egɔ́ efʉʼ metsem, ŋ́gɔ́ áa esok soke, ńdēte. Pɛ ezhɛ́ á letsɔ̄ʼ anu á mbū ŋiŋ, páʼ á gɔ́ épúp, á pɔŋ.

Atsaʼte á lelɔk nzōko

⁷ Tishik, á méŋ mɔ́ yímpɛ, meŋ kɔ̄ɔŋ á yí tɛʼ, á gɔ́ á ŋiŋ yīi, mɛ́ gɔ etém nzem ŋgyá á mbū yí, ŋ́gɔ azí ŋgaŋ afaʼ Atsyapuɔ páʼ meŋ, a a shʉʼ eshʉʼe, éshúŋ á wɛ́ menu meswhī ntsem ánɛ meŋ.

⁸ Meŋ túɔ́ á yí á mbū pɛ mé ntií, ŋ́gɛ a eshʉʼ eshúŋ á wɛ́ menu meswhī ánɛ pek, ŋ́kó nzéŋ ésēmte á wɛ́.

⁹ Pɔ́ Onezim mé nnɔ. Onezim a á si ŋgɔ́ á ŋiŋ alāʼ wɛ, ŋ́gɔ́ á ŋiŋ yīi, mɛ́ gɔ etém nzem ŋgyá mé yí, ŋ́gɔ́ á méŋ mɔ́ yímpɛ, meŋ kɔ̄ɔŋ á yí tɛ́ʼ. Pɔ́ e shʉʼ shʉʼe, épú eshúŋ á wɛ́ ajūɔ tsem zīi, á ega ntɔ́kɔ.

¹⁰ Alistáak a á si ntsāʼtɛ á wɛ́. Pek yí mé ŋgyā atʉɛ́. Málkúsi méŋ mɔ́ Baanabas a á si nzéŋɛ ntsāʼtɛ á wɛ́ azí. Mɛ́ lé zi ntí á mbū pɛ, ńdɔk ŋkím á yí. A gɛ ŋké eshʉ̄ʼ, pɛ ekókne á yí á mbɔŋɔ́.

¹¹ Yɛɛ́so a á si nzéŋɛ ntsāʼtɛ á wɛ́. Meŋ ndʉ́ɛ́ á ŋiŋ yīi, mɛ́ tɔ́ŋɔ á yí lɛ, Zwistwis lā. Á shʉʉ̄ʼ ánɛ epuɔ Yúda pīi, é lē esɛt ncʉ́ʼ epuɔ Yɛɛ́so, pek a epuɔ métɛ́t ndaʼ pīi, meŋ á kím nzēŋ mɔ́p la, mé nɔŋ ntswīi ŋke mbɔŋ ánɛ Lefɔ Ndém. Pɔ́ é si esēmtɛ á gá tɛʼ.

¹² Epaflas, ńzéŋ ŋgɔ́ azí á ŋiŋ alāʼ wɛ, a á si ntsāʼtɛ á wɛ́. A zeéŋ ŋgɔ́ á ŋgaŋ afaʼ Yɛɛ́so Klísto. A neéŋ athū zí tɛʼ, á leswīŋte á Ndém á athū pɛ ŋ́gɛ, Ndém a elɛ ŋghʉ̄, pɛ etswiʼne ntēte ánɛ lefɛ̄ nnɛ̄t, ŋ́gyá á mbū Yɛɛ́so. Ńtswiʼne ntswhí, ánɛ anu Ndém. Ńnéŋ á ntē pɛ, á legɔ̄ efʉʼ metsem, ŋ́ghʉ̄ ajūɔ ntsem zīi, Ndém mé si ŋkɔ̄ŋɔ.

¹³ Meŋ méŋwɛ̄t é si ndɔ̄kɔ menēk, ńjʉ́ɔ mefaʼ mīi, a kaka ete, ŋ́ghʉ̄ɛ á athū pɛ, mbɔɔ á athū epuɔ Yɛɛ́so á tésɔŋ Laodisɛ, mbɔɔ á tésɔŋ Yiɛlapolis.

¹⁴ Mbɔŋ esoó yímpɛ Lúkási, á mbɛt‑megɔ, a á si ntsāʼtɛ á wɛ́. Demas á zéŋ nnɔ̄ŋ ntsāʼtɛ á wɛ́ azí.

¹⁵ Pɛ epú ntsāʼte epɔ̄ memía pīi, pɔ́ é tésɔŋ Laodisɛ, ńtsāʼte á Nímfa, ńtsāʼte epuɔ Yɛɛ́so metsem pīi, pɔ́ gɛ ncúʼtɛ á ŋgyā yí.

¹⁶ Pɛ shʉʼɛ ntɔ́ŋ akɛtte jʉɔ tɛ á mī, pɛ efāaʼ eshhʉ̄, tɛ mɛ́ zéŋ ntɔ́ŋ ánɛ alúŋ epuɔ Yɛɛ́so, á tésɔŋ Laodisɛ. Pɛ méŋwɛ̄t azɛ́, é etɔ́ŋ azi á fhɔ́ɔ á Laodisɛ.

¹⁷ Pɛ etswī á mbū Aashʉp ŋ́gɛ, ndɛ́ʼ á lɔk afaʼ zīi Atsyapuɔ a le tsekné á mbū yí lā, ŋ́ghʉ̄ mega. Ŋ́gɛ a eghʉ̄ afaʼ mɛ́t, mé taʼ ntē.

¹⁸ Ajʉɔ atsaʼte á páʼa, meŋ Pɔ́ɔl méŋwɛ̄t mé lɔk apū zá ntí. Pɛ ekwāŋte á gá páʼ, meŋ á ŋgyā atʉɛ́ la, éswíŋte á Ndém á athū meŋ. Ndém a elɛ ŋghʉ̄ anu mbɔŋ té ndhʉ ánɛ pɛ.