Kɔlɔs 3 - Eka Eswhī

¹ Páʼ pɛ a Klísto é lē nzím ánɛ lewhʉ̄ lā, pɛ ecʉ́ʼɛ eshʉ́ɛ́ áa ajū mīi, á athʉ́ lephū. Klísto wuɔ mɛ́t a á éwú, ńnáŋ á ŋkɔʼɔ́ apū ete Ndém.

² Pɛ etshí athū zɛ́ ánɛ ajū mīi, á athʉ́ lephū. Ndɛ́ʼ pɛ ezéŋ ntshí athū zɛ́, ánɛ ajū mīi, á esī atsetsáʼ.

³ Pɛ a Klísto é le pú ŋkwhʉ́, púp, legɔ̄ wɛ a zapaá ánɛ yí, ńdʉ̄ɔne á mbū Ndém.

⁴ Klísto mé ewɛ legɔ̄. Aleʼé zīi a ŋwaka, pɛ epú nzéŋ ŋ́ŋwāk azɛ́, púp, pɛ a pɔ́p e epú ŋgɔ́ á ntē shʉ́shɔ́k.

Nzwiŋ lenāŋ pɔ́ lenāŋ leswhī

⁵ Pɛ eké mbú ḿbík ajū mīi, á zɛɛ́t ndɛt á wɛ́ á esī atsetsáʼ. Mɛ́ lʉ́ɛ́ agā, ńdʉ́ɛ́ á wɛ́ lewɛ á mɛgap, ńdʉ́ɛ́ á leshʉɔ wɔnzwí, ńdʉ́ɛ́ á lewɛ akwaŋte, á leghʉ anu tepɔŋ. Ndɛ́ʼ pɛ egɔ́ megaŋ atsɔʼɔ́‑ntɔ̄ŋ, melaʼ mīi, ŋiŋ a á ŋgaŋ atsɔʼɔ́ ntɔ̄ŋ páʼā, ńdáʼ ŋgē ezoko, ŋ́gūʼte ajū mīi a tshií ntē yí éwú, ńdɔk ŋghʉ̄ á Ndém.

⁶ Melaʼ ejʉɔ ntií etsō mɛ́t, tɛ́ Ndém a a láʼ ezáŋ á lɔ́ŋ á mbū epuɔ [pīi, pɔ́ teē athū á mbū yí].

⁷ Á lɛ amɔ̄ʼ afʉʼ, pɛ nɔ̄ɔŋ nzīŋɛ á ntē mefa muɔ mɛ́t. Á lɛ amɔ̄ʼ afʉʼ, lenāŋ wɛ á gɔ́ épúp.

⁸ Tsetsɔŋɔ, pɛ epú mbíʼte á tepɔŋ atswhī mɛ́t ŋgwáʼ. Ndɛ́ʼ ŋiŋ á zéŋ nzáŋ á lɔ́ŋ, ndɛ́ʼ ŋiŋ á zéŋ ntém mbek, ndɛ́ʼ ŋiŋ á zéŋ nzá esɔ̄, ndɛ́ʼ ashuŋne á lelɔk nzɔ̄te á ŋiŋ, mbɔɔ meleém eshuŋne, é zéŋ ntó á nchu pɛ.

⁹ Ndɛ́ʼ pɛ eghí mela á tsetsɛlɛ pɛ, melaʼ mīi, pɛ lē ŋgwáʼ á nzwiŋ atswhī mɛ́t, pɔ́ a menu tepɔŋ mīi, pɛ lɛ éwú efʉ̄ʼtɛ.

¹⁰ Pɛ kʉʉ̄ŋ ncʉ́ʼ epuɔ meswhī, épuɔ meswhī pīi, Ndém, á Mbɔ yímpɛ, a á efʉʼ metsem, ŋ́ghʉ̄ pɔ́ swhí á yí, éfāʼa ŋ́gɛ, pɛ etswiʼne nzhɛ́ á yí.

¹¹ Púp, mɛ́ le zéŋ ŋghʉ̄ á tɛʼte ŋ́gɛ, ŋiŋ Glɛk a awuɔ, ŋiŋ Yúda á gɔ́ ewuɔ ɔ́. Ŋ́gɛ, ŋiŋ yīi mɛ́ lē ntém á yí a awuɔ, ŋiŋ yīi mɛ́ la á yí tém ɛ́, á gɔ́ ewuɔ ɔ́. Ŋ́gɛ, ŋiŋ alāʼ ndɛʼɛ a awuɔ, epuɔ pīi pɔ́ naáŋ páʼ mena mbaʼ lā, é gɔ́ epuɔ ɔ́. Ŋ́gɛ, apuʼ a ajʉɔ, ŋiŋ yīi a naáŋ á ŋga athū yí, á gɔ́ ewuɔ ɔ́. Klísto mé puú ŋgɔ́ ndaʼ mɛgém anu, ńnáŋ á ntē epuɔ metsem pīi, pɔ́ fɛɛ́ nnɛ̄t ŋgyá mé yí.

¹² Páʼ pɛ é si ŋgɔ́ epuɔ pīi, Ndém a lē ŋkaŋ á wɔ́p, pɛ cʉ́ʼ epuɔ pīi, a kɔɔ̄ŋ á wɛ́ lā, pɛ ecʉ́ʼɛ ŋgwīɛ̄ áa atswhī jʉɔ páʼa: pɛ ewɛ̄ ntē atsāmezeŋɛ, ŋ́gwɛ̄ ntē mbɔŋ, ésóʼne nnɛ̄t zɛ mé esī, ŋ́gwɛ̄ apwɛné ntē, ńzhɛ́ á wɛ́ á lekwɛ̄t ntē.

¹³ Pɛ etɔ́te mennɛ̄t mɛ́ nzeŋne zeŋné, ánɛ menu mīi, ŋiŋ a á fhó á tsetsɛlɛ pɛ, ŋ́ghʉ̄ ánɛ mmɔʼ. Ŋiŋ pɔ́ ŋiŋ é wiɛ ntsaŋ á nnɔ pɛ, á lekne azí ŋgyá á mbū yí, ńdeŋ ndeŋ páʼ, Atsyapuɔ Yɛɛ́so a le leknē mefa mɛ́ ŋgyá á mbū pɛ.

¹⁴ Ajū mīi á puú ntshí mvhɔ, ánɛ menu muɔ mɛ́t ntsem, á si ŋgɔ́ á lewɛ ŋkɔŋne á tsetsɛlɛ pɛ. Ŋkɔŋne mé si ŋgɔ́ ndaʼ ajū mīi, á gɔ echʉ́ nnɛ̄t ntswāŋ á wɛ́.

¹⁵ Ŋ́gɛ apwɛne zīi, á fhɔ́ɔ á mbū Klísto, a egɔ́ á ntē pɛ. Ndém a lɛɛ́ ntɔ́ŋɔ á wɛ́ ndɔkɔ ŋghʉ̄ɛ epuɔ pí páʼā, ŋ́gɛ pɛ enáŋ á ntē apwɛne jʉɔ mɛ́t, ŋ́gɔ́ á taʼ nchu. Pɛ esyákne á yí efʉʼ metsem.

¹⁶ Ŋ́gɛ ashuŋne Klísto, páʼ á wɛɛ̄ lewūʼ ntsem lā, a egɔ́ á ntē pɛ efʉʼ metsem. Pɛ elɔ̄k azhɛ̄‑anu, ńzíʼne anu Ndém á nnɔ pɛ, ńzeŋne zeŋné, ńtékne mennɛ̄t mɛ́. Pɛ ezɔ̄p mé ntē wɛ́ ntsem, ńdɔk ŋgūʼte á Ndém. Ńzɔ̄p mezɔp ntshi mīi, é ntē aŋwaʼne Ndém, ńzɔ̄p mezɔp ntshi epuɔ Yɛɛ́so. Ńzɔ̄p mezɔp ntshi mīi, Azwakne Ndém á néŋ á ntē pɛ.

¹⁷ Ajūɔ tsem zīi, pɛ gɔ eshúŋ, ká azi pɛ gɔ eghʉ̄ʉ, pɛ epú ŋghʉ̄ páʼ epuɔ pīi, pɔ́ lɛtneē ánɛ Atsyapuɔ Yɛɛ́so, é pɔŋteé á leghʉ épúp. Ńzápa ánɛ Atsyapuɔ mɛ́t, ésyákne á Mɔʼɔ́ yímpɛ Ndém.

Páʼ epuɔ Yɛɛ́so é pɔŋteé á lenāŋ épúp

¹⁸ Pɛ wɔnzwí, pɛ enɔ̄ŋ nnɛ̄t á esī á mvhɔ melō pɛ́, ńdeŋ ndeŋ páʼ á pɔŋteé é legɔ̄ épúp, á mbū wɔnzwí pīi, pɔ́ lɛtneē ánɛ Atsyapuɔ.

¹⁹ Ewiɛ́ ŋiŋ mbaŋa lɛ́, a ekɔ̄ŋ á nzwí yi. Ndɛ́ʼ pɛ elɔ̄ɔk á wɔ́p ntɔ́ŋ ekup etsō.

²⁰ Ŋ́gɔ́ mé pɛ ewɔŋkhʉ̄, pɛ ejúʼ nchu memɔʼɔ́ pɛ́, ńjúʼ nchu memía pɛ́, ánɛ ajūɔ tsem. Á si ŋgɔ́ atswhī zīi Atsyapuɔ a kɔ̄ɔŋ.

²¹ Ŋ́gɔ́ mé pɛ memɔʼɔ́ epɔ̄, ndɛ́ʼ pɛ eghʉ̄ʉ, ewɔŋkhʉ̄ pɛ́ é záŋ á lɔ́ŋ, ḿbɔ́k á wɔ́p á legɔ̄ le zéŋ ŋkāk ete, ŋ́gʉ̄ɔ mé mvhɔ ɔ́.

²² Ŋ́gɔ́ mé epuʼ, mbɔ pɛ ejúʼ nchu memɔʼɔ́ pɛ́ ánɛ ajūɔ tsem, á esī atsetsáʼ ega. Pɛ é le lɛ̄ njúʼ nchu wɔ́p áa afʉʼ zīi, pɔ́ é si mbípnɛ á wɛ́, tɛ á lɛ ŋgɔ́ áa páʼ, pɛ faʼa ŋ́gɛ, ŋgɔŋ e epɔ̄ŋ á wɔ́p ɔ́. Pɛ efhó ánɛ páʼ pɛ wuʼteē á Atsyapuɔ, ńjúʼ nchu wɔ́p mé taʼ ntē.

²³ Afaʼ zɛ́ á zi mbú ŋgɔ́ á leghʉ akɔ̄ lɛ́, pɛ elɔ̄ɔk á taʼ ntē tɛ́ ŋghʉ̄. Pɛ é le ŋghʉ̄ɛ ŋgyáa á mbū epuɔ menɔŋ ɔ́, pɛ eghʉ̄ɛ ŋgyáa á mbū Atsyapuɔ.

²⁴ Ńnɔŋ nzhɛ́ɛ á légɛ, Atsyapuɔ a a láʼ eyá ntaŋá yīi, a le laʼnē á mbū pɛ. Kwaʼ Mɔʼɔ́ wɛ a gɔ́ áa Klísto, pɛ pīiŋ nnɔ̄ŋ ŋghʉ̄ɛ afaʼ zí.

²⁵ Ŋiŋ a gɔ́ɔ á ŋgaŋ ŋgɛ́tte, mbɔ Ndém a a láʼ etswá á yí ŋgʉɔ athʉ́ lepé. A te wɛ̄ á atɛʼte ánɛ epuɔ ɔ́.