Kɔlɔs 2 - Eka Eswhī

¹ Meŋ á páʼā, ńdɔkɔ ŋkɔ̄ŋɔ ŋ́gɛ, pɛ ezhɛ́ lewɛ ncu tsīi, meŋ ntshií éwú melaʼ mɛ́, mbɔɔ melaʼ epuɔ Yɛɛ́so á tésɔŋ Laodisɛ, mbɔɔ melaʼ emɔ̄ʼ epuɔ tɛ nzáne pīi, pɔ́ zi la lezēk ánɛ meŋ tshí ɛ́.

² Meŋ tíi akɛtte jʉɔ páʼa, ńdɔkɔ esēmtɛ á wɛ́ metsem. Ńzéŋɛ ndɔkɔ efāʼa ŋ́gɛ, pɛ etswiʼne ŋkɔ̄ŋne mennɛ̄t mɛ́ nzeŋne zeŋné. Ŋ́gɛ Ndém a efhó ánɛ wɛ́ lejūʼ anu zí tɛ ntsékne, ŋ́kēm ephʉ wɛ́. Púp, pɛ elɔk ŋkūʼ á lejūʼ ntsem zi. Ntsem mɛ́t, é si ŋgɔ́ á Klísto méŋwɛ̄t.

³ Ajūɔ tsem zīi á teē nzwiŋ, páʼ azhɛ̄‑anu ntsem, páʼ lezhɛ̄ ashuŋne Ndém, á puú ŋgɔ́ áa mbū Klísto wuɔ mɛ́t.

⁴ Meŋ ndʉ́ɛ́ páʼā, ńdɔkɔ mbɔ́kɔ á ŋiŋ á lelɔk mepɔŋ meshuŋne, ḿbɔ̄pte á wɛ́.

⁵ Á anuúnē á légɛ, meŋ te lɔ̄k mbe nnɛ̄t, ŋ́gɔ́ á lezēŋ pɛ ɛ́. Táʼ, akwaŋte zá á ké ntshí áa ánɛ pɛ. Ŋgɔŋ e é si mbɔ̄ŋɔ á gá tɛ́ʼ, á lezhɛ̄ á légɛ, pɛ é páʼ kyá ŋkʉŋkhʉ, ŋ́kúʼte á wɛ́ á lechʉ̄ nnɛ̄t efɛ́ nnɛ̄t ŋgyá mé Klísto.

Klísto mé si ŋgɔ́ ndaʼ ŋiŋ yīi, a ghʉɛ mɛ́ gɔ́ɔ éwú

⁶ Púp, páʼ pɛ lē mvéŋ á légɛ, Yɛɛ́so Klísto a á efɔ wɛ lā, pɛ elɛ̄tne ánɛ yí.

⁷ Ńdɔkɔ ŋ́gɛ, pɛ etsēŋɛ meŋgaŋ mɛ́ ánɛ yí, ḿbú ndɛ̄t ewɛ lenāŋ ánɛ yí. Ŋ́kúʼte á wɛ́ á lefɛ̄ nnɛ̄t ŋgyá á mbū yí, ńdeŋ ndeŋ páʼ mɛ́ le ziʼné á wɛ́ épúp. Ńchʉ́ nnɛ̄t esyákne á Ndém mé taʼ ntē.

⁸ Pɛ epá, tɛ ŋiŋ a á le lɔ̄k azhɛ̄‑anu megaŋ azhɛ̄‑anu ŋgɔŋ puɔ, ḿbɔ̄pte á wɛ ɛ́. Azhɛ̄‑anu zɔ́p mɛ́t, á gɔ́ áa mela, ŋ́gɔ́ áa anu ŋiké. Azhɛ̄‑anu zɔ́p mɛ́t, á fhó áa ánɛ mɛt yīi, epuɔ menɔŋ mé le zapáā, éfhɔ́ɔ á mbū tepɔŋ mete yīi, a sáʼa ŋgɔŋ jʉɔ. Á té efhɔ́ɔ á mbū Klísto ó.

⁹ Meŋ ndʉ́ɛ́ páʼa melaʼ mīi, a gɔ́ éyi, Ndém a á lɛ akɔ̄ lɛ́, mbɔ Klísto a zeéŋ ŋgɔ́ azí épúp, tɛ mbɔɔ páʼ, a le wɛ̄ mbe nnɛ̄t ŋiŋnɔŋ lā.

¹⁰ Páʼ pɛ lɛtneē ánɛ Klísto lā, pɛ wɛɛ̄ ajūɔ tsem zīi, á mbɔŋ á mbū pɛ. Klísto a puú ŋgɔ́ á ŋwɛ́t ajūɔ tsem zīi, á wɛɛ̄ mete, ésáʼa ŋgɔŋ.

¹¹ Páʼ pɛ lɛtneē ánɛ Klísto lā, pɛ é ntém teém, ŋiŋnɔŋ mé ké te á wɛ́ tém, Klísto méŋwɛ̄t mé le tém á wɛ́. Ejʉɔ ntií letēm mɛ́t, e soōk mefa ánɛ pɛ.

¹² Mɛ́ le nōʼ á wɛ́ á ntshi páʼā, á lɔk ŋgɔ́ páʼ mɛ́ néŋɛ á wɛ́ a Yɛɛ́so á lesi lā. Pɛ a pɔ́p é lɔkɔ mbúu nzímɛ ánɛ lewhʉ̄, melaʼ mīi, pɛ le véŋ á légɛ, mete Ndém mé le ghʉ̄ʉ̄, á zím ánɛ lewhʉ̄.

¹³ Á lɛ amɔ̄ʼ afʉʼ, pɛ gɔ́ páʼ mepfhō lā, melaʼ mefa mɛ́, mbɔɔ melaʼ páʼ, mɛ́ lɛ te á wɛ́ tém. Á piīŋ ŋgɔ́ tsetsɔŋɔ, mbɔ Ndém a ke ghʉ̄ʉ̄, pɛ a Yɛɛ́so é zím ánɛ lewhʉ̄, á lɔkɔ ndēknɛ mefa mímpɛ.

¹⁴ Á páʼā ndɔkɔ ŋ́gɛ, aŋwaʼne zīi, mɛ́ le tí mefa mímpɛ éwú, ńdɔkɔ eswīŋɛ á yímpɛ, Ndém a lē mbík. A le lɔ̄k páʼ, mɛ́ le kwɛtē á Yɛɛ́so ánɛ mbaŋne paŋné, tɛ́ mbík aŋwaʼne mɛ́t,

¹⁵ Á epúp tɛ́, a le kú mete á mbū ajūɔ tsem zīi, á sáʼa ŋgɔŋ, mbɔɔ á mbū ajūɔ tsem zīi, á wɛɛ̄ mbʉʼ, ḿbú njhʉ́ á wɔ́p, ŋ́kōk nzwiŋ wɔ́p á mvhɔ alāʼ. A le lɔ̄k páʼ, Klísto a le kwhʉ́ ánɛ mbaŋne paŋné, tɛ́ ŋghʉ̄ épúp. Ŋ́gē eghʉ épúp, ŋ́ghʉ̄, Klísto á lɔk á wɔ́p ŋghʉ̄ epuʼ ncu, ńdɔ̄k á wɔ́p ŋkɛ́nne á mvhɔ alāʼ, ńdɔkɔ ntswīi á légɛ, yí é pú njhʉ́ á wɔ́p.

¹⁶ Púp, ndɛ́ʼ ŋiŋ á thú alɔ́ʼ zɛ́ tɛ mbā á wɛ́, melaʼ etsō lejhʉ̄ tsīi, pɛ pfɛ́tɛ, ká melaʼ ajū mīi, pɛ núu. Ndɛ́ʼ ŋiŋ á thú alɔ́ʼ zɛ́ tɛ mbā á wɛ́, melaʼ mīi, pɛ ka ghʉ̄ lekāk ánɛ aleʼé zīi, pɔ́ mé le néŋ ɛ́, ŋ́gɛ pɛ ka ghʉ̄ lekāk, ńdɔk ŋgūʼte á saŋ eswhī ɛ́, ŋ́gɛ pɛ é ghʉ ajū mīi, mɛ́ té pɔŋté á leghʉ á aleʼé aswite ɛ́.

¹⁷ Menu muɔ mɛ́t é lɛ páʼā, ńdɔkɔ ŋghítɛ anu zīi, a fú tɛ́ shʉʼe. Kwaʼ anu, á ké mbīŋ ŋgɔ́ áa Klísto.

¹⁸ Ndɛ́ʼ pɛ ecʉ́ʼ, epuɔ menɔŋ é lé ŋ́gɛ, pɛ ka jhʉ́ ɛ́. Epuɔ puɔ mɛ́t é efʉʼ metsem, ŋ́ghʉ̄ páʼ pɔ́ kuʼteé á Ndém tɛʼ lā, ńtswíʼte á mvhɔ mecɔʼ Ndém, ŋ́gūʼte á wɔ́p. Ńnéŋ ntē wɔ́p ánɛ menu mīi, pɔ́ ndí á athū njʉ́ɔ. Pɔ́ juúʼ ŋkuʼ tɛʼ, ḿbiŋ nzī te azō ɔ́. Ńdɔ̄k menu mīi pɔ́ méŋwɛ̄t mé kwaŋtɛ, té kím á Ndém, ŋ́ŋīa.

¹⁹ Pɔ́ té lɛtnē ánɛ Klísto ó, tɛ́ yí mé gɔ́ athū, epuɔ Yɛɛ́so é gɔ́ mbe nnɛ̄t. Yí mé nɔŋ ŋghʉ̄ɛ, mbe nnɛ̄t mɛ́t, é wiɛ ajū mīi, á mbū yí ŋkíŋɛ. Yí mé gɔ́ páʼ lejuŋɔ́ tsīi, é ghʉɛ, ajʉʼ nnɛ̄t á tsóʼnɛ ánɛ amɔ̄ʼ lā, ŋ́gɔ́ páʼ meŋgaŋ mīi é lɛɛ̄t ajʉʼ nnɛ̄t ánɛ amɔ̄ʼ lā. Ndém mé ké nnɔ̄ŋ ŋghʉ̄ɛ, mbe nnɛ̄t mɛ́t é tswhíɛ.

Ḿpɛ a Yɛɛ́so mé le kwhʉ́ʉ̄, mbiŋ nzím ánɛ lewhʉ̄

²⁰ Páʼ pɛ a Klísto é le puté ŋkwhʉ́ lā, á lɛ páʼā, á lɔkɔ efhɔ́ɔ á mbū mete ŋgɔŋ muɔ, ŋ́kúu á wɛ́. Púp, ndɛ́ʼ pɛ ezéŋ nzīŋ ánɛ mɛ́t yīi, epuɔ menɔŋ mé le zapáā. Ndɛ́ʼ pɛ ezéŋ nnáŋ páʼ, mɛt epuɔ ŋgɔŋ puɔ a á si nzɛ́ttɛ. Mɛt mɛ́t, a á si ndʉ́ɛ́ ŋ́gɛ:

²¹ «Te pɛ́ ajʉɔ. » «Te zwíʼ azi. » «Te pfēeŋ ajʉɔ. »

²² Mɛt wuɔ mɛ́t, a tsoʼneé áa ánɛ ajū mīi, mɛ́ lɛɛ̄ ŋge elɔk eghʉ azō, á pék. Pɛ ejʉ́ɔ azɛ́ páʼ, a gɔ́ áa mɛt yīi, epuɔ menɔŋ mé le zapáā, ńzíʼnɛ epuɔ.

²³ Á anuúnē á légɛ, mɛ́ naáʼ ncʉte á mɛt mɛ́t, ńjʉ́ɔ á náʼ ŋgɔ́ páʼ, azhɛ̄‑anu á éwú lā, melaʼ mīi, a á si eshúŋɔ anu, ńtsóʼnɛ ánɛ mmɔʼ ntií lewuʼte Ndém zīi, pɔ́ méŋwɛ̄t mé le kwaŋtēē, mbɔɔ ánɛ lekūʼte Ndém, mbɔɔ ánɛ legene mbe nnɛ̄t zɔp. Mɛt wɔp mɛ́t, a ké mbú te azō ɔ́, a lɛɛ̄ ntswíte á ŋiŋ, áa leghʉ ajū mīi, mbe nnɛ̄t e é si nzɛ́ttɛ.