Kɔlɔs 1 - Eka Eswhī

Atsaʼte

¹ Meŋ Pɔ́ɔl, ŋ́gɔ́ á Nziŋ‑ntō Yɛɛ́so Klísto, páʼ Ndém a le kɔ̄ŋ épúp, mé tíi akɛtte jʉɔ páʼa, pek Timotɛ méŋ mɔ́ yímpɛ.

² Ńtíi á mbū epuɔ Ndém pīi, pɔ́ é tésɔŋ Kɔlɔs, épɔ̄ memía metsem pīi, pɔ́ lɛtneē ánɛ Klísto. Ŋ́gɛ Ndém, á Mɔʼɔ́ yímpɛ, a eghʉ̄ anu mbɔŋ té ndhʉ á mbū pɛ, ŋ́ghʉ̄ pɛ enáŋ mé apwɛne.

Pɔ́ɔl a á ega esyáknɛ Ndém á athū epuɔ Kɔlɔs, melaʼ ŋke mbɔŋ

³ Efʉʼ metsem yīi, pek é si eswíŋtɛ á Ndém, á Mɔʼɔ́ Atsyapuɔ yímpɛ Yɛɛ́so Klísto, á athū pɛ, pek esyákne á yí.

⁴ Éfhɔ́ɔ ánɛ páʼ, pek ke júʼ mɛ́ nɔŋ ŋghítɛ páʼ, pɛ fɛɛ́ nnɛ̄t épúp ŋgyá á mbū Yɛɛ́so Klísto, mbɔɔ páʼ, pɛ kɔɔ̄ŋ epuɔ Ndém metsem épúp,

⁵ melaʼ mīi, pɛ é si ncuŋtɛ nzhɛ́ɛ á légɛ, pɛ e láʼ ewɛ ajū mīi, pɛ é si ntsáa, ńnɔŋ nzhɛ́ɛ á légɛ, Ndém a a láʼ eyá á mbū pɛ, á athʉ́ lephū. Á le fhó ánɛ páʼ pɛ le júʼ ŋke mbɔŋ mvhɔ legʉɔ, páʼ é si ŋgɔ́ á anuúnē lā, tɛ́ pɛ ezhɛ́ azō mɛ́t.

⁶ Ŋke mbɔŋ é le shʉ̄ʼ tɛ ŋkó á mbū pɛ, tɛ́ ŋghʉ̄, pɛ ezhɛ́. Ŋke mbɔŋ mɛ́t, é si esāŋa ŋgɔŋ ntsem, ńnɔŋ nzémɛ ntá. É si nzéŋɛ ŋghʉ̄ɛ épúp á tsetsɛlɛ pɛ, tɛ efhó mvhɔ legʉɔ zīi, pɛ le júʼ á leshūŋ menu mbɔŋ té ndhʉ mīi, Ndém a ghʉɛ, ńzéŋ njʉ́ɔ, ḿvéŋ á légɛ é si ŋgɔ́ anuúnē,

⁷ éfhó ánɛ menu mīi, Epaflas a le ziʼné á wɛ́. Epaflas a á si ŋgɔ́ á méŋ mɔ́ wek, ńzéŋ ŋgɔ́ á esoó afaʼ wek. A á si ŋkúmnɛ athū zék á lezēŋ pɛ, ŋ́gɔ́ á ŋgaŋ afaʼ Klísto yīi, mɛ́ gɔ etém nzem ŋgyá mé yí.

⁸ A ke shúŋ á wék páʼ, Azwakne Ndém á si ŋghʉ̄ɛ, pɛ kɔ̄ŋɔ epɔ̄ memía épúp.

⁹ É melaʼ épúp tɛ́, tɛ efhó páʼ pek le júʼ épúp, pek é ánɛ ewék eshhʉ̄, éswíŋtɛ á Ndém á athū pɛ té ká. Éswíŋtɛ á yí ŋ́gɛ, a elɛ ŋgyá á wɛ́ azhɛ̄‑anu zīi, á fhɔ́ɔ á mbū Azwakne zí, pɛ elɔk ncūŋte njúʼ azō mɛ́t zīi, pɛ ghʉɛ. Ńzéŋ ndɔk ńzhɛ́ á ajū mīi, a á si ŋkɔ̄ŋɔ.

¹⁰ Púp, ńdɔk nnáŋ páʼ Atsyapuɔ a á si nzɛ́ttɛ. Ŋ́gɔ́ efʉʼ metsem, ŋ́ghʉ̄ ajū mīi, á pɔŋ á yí, e elɔk ŋgɔ́ ntá mbɔŋ zīi, pɛ zémɛ. Ńtswiʼne nzhɛ́ á Ndém, ńdɔk ŋgʉ̄ɔ mé mvhɔ.

¹¹ Pek é si eswíŋtɛ á yí ŋ́gɛ, a elɛ ndɔ̄k á mía mía mete mí, ŋ́ghʉ̄ pɛ etēte ánɛ meshhʉ̄ ntsem, tɛ́ ndɔk ŋkūʼ á wɛ́ á lekwɛ̄t ntē, ŋ́kāk ete ánɛ ajūɔ tsem. Pɛ elɔ̄k lekāk,

¹² ésyákne á Ndém Mɔʼɔ́. A le kūʼ á yí á leghʉ pɛ kó á ntē ŋkaʼ, á yá á wɛ́ etsō mbɔŋ tsīi, mɛ́ pɔŋteé á leyā á mbū epuɔ pīi, pɔ́ é epuɔ Ndém.

¹³ A le fhó á ntē nzém, ésāʼ á yímpɛ, ńtsākne á yímpɛ nnéŋ á ntē lefɔ Méŋ yi, páʼ a kɔɔ̄ŋ á yí tɛʼ lā.

¹⁴ A le zapá ánɛ Méŋ yi mɛ́t, tɛ́ ncūʼ á yímpɛ, ńzápa ánɛ yí, tɛ́ ndēkne mefa mímpɛ.

Klísto a puú ntshí mvhɔ ánɛ ajūɔ tsem

¹⁵ Klísto a á si ŋgɔ́ á ayiŋne Ndém páʼ, mɛ́ té á yí jʉ́ɔ lā. Yí mé mvhɔ ánɛ ajūɔ tsem zīi, Ndém le ghʉ̄ʉ̄.

¹⁶ Ndém a le zapá ánɛ yí, tɛ́ ŋghʉ̄ ajūɔ tsem. Ájuɔ tsem zīi á athʉ́ lephū, mbɔɔ á esī atsetsáʼ, ájuɔ tsem zīi mɛ́ lɔɔ̄k menēk njʉ́ɔ, mbɔɔ azi mɛ́ té jʉ́ɔ. Ájuɔ tsem zīi, á sáʼa ŋgɔŋ, ájuɔ tsem zīi, á sáʼa lefɔ, ájuɔ tsem zīi, á wɛɛ̄ mete, ájuɔ tsem zīi, á pɔɔ́ŋ mbʉʼ. Ndém le zapá ánɛ yí, tɛ́ ŋghʉ̄ ajūɔ tsem. Ajūɔ tsem mɛ́t, á piŋ ŋgɔ́ azí, á yí Klísto.

¹⁷ Ndém a le gē eghʉ ajūɔ tsem, á zi ŋgɔ́ áa éwú. Ajūɔ tsem á piŋ nzápa ánɛ yí, tɛ́ ŋgɔ́ éwú.

¹⁸ Yí mé si ŋgɔ́ á athū mbe nnɛ̄t, mbe nnɛ̄t mɛ́t, é gɔ́ alúŋ epuɔ Yɛɛ́so. Yí mé si ŋgɔ́ nzií lenāŋ leswhī, ḿvhɔ ŋiŋ yīi, a le zím ánɛ lewhʉ̄. Púp, ńdɔk ŋgɔ́ mvhɔ, ánɛ ajūɔ tsem.

¹⁹ Á anuúnē, Ndém a le kɔ̄ŋ á légɛ, a gɔ́ éyi, yí é páʼ lā lɛ́, Méŋ yi á zéŋ ŋgɔ́ azí épúp.

²⁰ Ndém a le kɔ̄ɔ̄ŋ, ńzápa ánɛ Méŋ yi, ŋ́ghʉ̄ pɔ́ a ajūɔ tsem, é zéŋ ncʉ́ʼ á taʼ nchu. Ndém a le fhó ánɛ páʼ, Méŋ yi a le pfɛttē metshi mí ánɛ mbaŋne paŋné, ŋ́kɔ̄ŋ ŋ́gɛ, pɔ́ a epuɔ menɔŋ metsem, e ezéŋ ncʉ́ʼ á taʼ nchu. Púp, pɔ́ a ajūɔ tsem zīi, á esī atsetsáʼ, mbɔɔ á athʉ́ lephū, é lɔkɔ mbúu ŋgɔ́ɔ á taʼ nchu.

²¹ Á lɛ amɔ̄ʼ afʉʼ, pɛ a Ndém é gɔ́ té nnɔ ɔ́. Pɛ lɛ megaŋ mbo Ndém, melaʼ menu tepɔŋ mīi, pɛ lɛɛ́ ŋkwaŋtɛ á athū pɛ, éfʉ̄ʼtɛ.

²² Pɛ eké njʉ́ɔ páʼ, á ké mbiŋ ŋgɔ́ tsetsɔŋɔ, mbɔ Ndém a ke ghʉ̄ʉ̄, pɛ a pɔ́p é pú ncʉ́ʼ á taʼ nchu. A ke fhó ánɛ páʼ, Méŋ yi a le sɛ̄t ncʉ́ʼ á ŋiŋnɔŋ, ŋ́khwʉ́, tɛ́ ŋghʉ̄ épúp. Ŋ́ghʉ̄ɛ épúp páʼā, ŋ́gɛ pɛ eláʼ ŋgē etshí á mvhɔ yí, ŋ́gɔ́ epuɔ pīi, é ziīŋ páʼ yí Ndém a á si ŋkɔ̄ŋɔ, ŋ́gɔ́ té alɔ́ʼ. Épuɔ pīi, mɛ́ té si ndāʼa á wɔ́p ɔ́.

²³ Á si ŋké nzɛ́ttɛ ŋ́gɛ, pɛ ekāk ete, ńtswiʼne efɛ́ nnɛ̄t ŋgyá á mbū Klísto, ńdɔk ŋgʉ̄ɔ mé mvhɔ. Ŋ́kúʼte á lefɛ̄ nnɛ̄t mɛ́t, tɛ a echʉ́ nnɛ̄t ntēte, páʼ ŋgyā zīi, mɛ́ lɔɔ̄k á tɔ́ nnɔ̄ŋ atseŋ lā. Pɛ é le cʉ́ʼ, azō á ghʉ, pɛ ewáʼ ajū mīi, pɛ gɛ ntsáa, tɛ efhó á aleʼé zīi, pɛ le júʼ ŋke mbɔŋ, ńnɔŋ nzhɛ́ɛ á légɛ, Ndém a a láʼ eyá mé pɛ ɛ́. Mɛ́ le tswī ŋke mbɔŋ mɛ́t, á mbū epuɔ menɔŋ metsem á ŋgɔŋ. Meŋ Pɔ́ɔl, meŋ ndē ncʉ́ʼ á ŋgaŋ afaʼ Ndém, á letswi ŋke mbɔŋ mɛ́t.

Afaʼ zīi Ndém a le tsekné á mbū Pɔ́ɔl

²⁴ Tsetsɔŋɔ, ŋgɔŋ é si mbɔ̄ŋɔ á gá ánɛ ŋgʉɔ̄ʼ zīi, meŋ jʉ́ɔ, ánɛ athū zɛ́. Meŋ ndɔkɔ mbe nnɛ̄t za méŋwɛ̄t, ńjʉ́ɔ ŋgʉɔ̄ʼ mɛ́t épúp, ánɛ lezēŋ Klísto, melaʼ mbe nnɛ̄t zi zīi, e é si ŋgɔ́ alúŋ epuɔ Yɛɛ́so.

²⁵ Meŋ ndē ncʉ́ʼ á ŋgaŋ afaʼ Ndém, éfāʼa á gá á letswi ŋke mɛ́t, á mbū alúŋ epuɔ Yɛɛ́so. Ndém mé le tsekné ajʉɔ afaʼ mɛ́t, á mbū meŋ, melaʼ mɛ́. Afaʼ mɛ́t, á gɔ́ á gá á lekɛ̄ʼte ashuŋne zí ntsem, éshúŋ á wɛ́.

²⁶ Éshúŋ á wɛ́ ntsem zīi, tɛ efhó á meŋguʼ meŋguʼ, á lʉɔ á mbū epuɔ menɔŋ. Tsetsɔŋɔ, a ke pīŋ ŋkɛ́ʼɛ, á mbū epuɔ pīi, é si ŋgɔ́ epuɔ pí.

²⁷ Ndém a ke kɔ̄ŋ á leghʉ, pɔ́ zhɛ́ ntsem mɛ́t. Ńzhɛ́ páʼ, nzwiŋ ntsem mɛ́t, é teē épúp. Ńzhɛ́ lewūʼ tsīi é ánɛ ntsem mɛ́t. Ńzhɛ́ épúp, á tsetsɛlɛ epuɔ pīi, é té epuɔ Yúda á. Ntsem mɛ́t é gɔ́ lɛ: Klísto a á tsetsɛlɛ pɛ, yí mé zéŋ nnɔ̄ŋ ŋghʉ̄ɛ, pɛ ekúʼtɛ á légɛ, pɛ e fú ekó á ntē lewūʼ Ndém.

²⁸ Klísto wuɔ mɛ́t, tɛ́ pek é si eshúŋɔ á wɛ́ á ŋiŋ yīi, a á ewiɛ́. Pek é si ntswɛ̄tɛ á ŋiŋ ntsem, ńnɔŋ ndɔ̄kɔ azhɛ̄‑anu ntsem, ńziʼnɛ á ŋiŋ ntsem, éfāʼa ŋ́gɛ, awiɛ́ awiɛ́ a ekúʼte á Klísto tɛ a etē.

²⁹ Á épúp tɛ́, meŋ á si ŋkāka ete, ńnɔŋ mbɛ́ttɛ ŋkwɛ, mé mete mīi, é fhɔ́ɔ á mbū Klísto. Emiɛ́ mé si ntshónɛ á gá, á leghʉ mefaʼ muɔ mɛ́t.