2 Timotɛ 4 - Eka Eswhī

Pɔ́ɔl a á tsékne afaʼ letswi ŋke mbɔŋ á mbū Timotɛ

¹ A fú aleʼé, Yɛɛ́so Klísto, a ezéŋ eshʉ̄ʼ, ésáʼ ŋgɔŋ ntsem, ńzáʼ ntsaŋ zɔp a epuɔ mete, mbɔɔ ezɔp a mepfhō. Meŋ á tshí á mvhɔ yí, mbɔɔ á mvhɔ Ndém, ńdɔk á legɔ̄ yīi, a a fú eshʉʼ épúp, ńdé mé wu ŋ́gɛ:

² sáʼ ŋke mbɔŋ, ésáʼ ŋŋiŋ ŋiíŋ, ésáʼ á afʉʼ zīi, epuɔ menɔŋ é si ŋkɔ̄ŋɔ á lejūʼ, mbɔɔ afʉʼ zīi, pɔ́ té si ŋkɔ̄ŋɔ. Ésáʼ ndɔk eshúŋ epuɔ ajū mīi, pɔ́ é si efāa, ésáʼ ndɔk nthú alɔ́ʼ epuɔ, ésáʼ ndɔk ŋgyá epuɔ ŋgate. Ŋ́ké ŋgē eghʉ épúp, ńnɔŋ ŋkwɛ́tɛ ntē, ńdɔkɔ nzíʼnɛ á wɔ́p.

³ Meŋ ndʉ́ɛ́ épúp melaʼ mīi, amɔ̄ʼ afʉʼ a shʉʼ eshʉʼe, emɔ̄ʼ epuɔ é le zéŋ ŋkɔ̄ŋ á lejūʼ anuúnē ánɛ Yɛɛ́so ó, ńcʉ́ʼɛ ŋkɔ̄ŋɔ á leziŋ páʼ, akwaŋte zɔ́p á si ndʉ́ɛ́ épúp. Páʼ metuúŋ mɔ́p é si ŋké nzōko, ŋ́kɔ̄ŋɔ á lejūʼ menu lā, pɔ́ efāʼ epuɔ tɛ nzáa pīi, e e zíʼne á wɔ́p azō, pɔ́ ezíʼne á wɔ́p menu mīi, é pɔŋ á wɔ́p.

⁴ Púp, pɔ́ efé metuúŋ mɔ́p ánɛ anuúnē, ńcʉ́ʼɛ ŋkɔ̄ŋɔ á lejūʼ menu ŋgiŋte yiŋté.

⁵ Ŋ́ké ŋgɔ́ mé wu, mbɔ o ezéŋ nzɛ́t ŋghʉ̄ɛ ajú akɔ̄ akɔ̄ lɛ́, áa ŋkuʼne kuʼne, ésēk seke ánɛ ŋgʉɔ̄ʼ, ńtswī ŋke mbɔŋ ánɛ Yɛɛ́so, ŋ́ghʉ̄ áa afaʼ Ndém tɛ ntsékne.

Pɔ́ɔl a á ega ndʉ́ɛ́ ŋ́gɛ, afʉʼ zīi yí gɔ efhó á ŋgɔŋ egʉɔ, á kuʼ

⁶ Ḿbiŋ ŋgɔ́ mé meŋ, mbɔ afʉʼ zīi, mɛ́ gɔ elɔk á gá enɔŋ epɔʼ, á mbū Ndém á kuʼ, áfʉʼ zīi meŋ gɔ efhó á ŋgɔŋ ega egʉɔ.

⁷ Meŋ ke lʉɔ́ʼ á mbɔŋ ncu. Meŋ á mak á gá á lekʉte, meŋ ke kuʼté áa ndaʼ gá á lefɛ̄ nnɛ̄t ŋgyá á mbū Yɛɛ́so.

⁸ Tɛ efhó tsetsɔŋɔ, meŋ ncʉ́ʼɛ nzwíʼtɛ áa ntaŋá yīi, ŋiŋ yīi a naáŋ páʼ Ndém a á si ŋkɔ̄ŋɔ, a pɔŋteé á lewɛ, ńtaŋá yīi Atsyapuɔ, á ndɔ̄k ndeŋ ndeŋ nzáʼ ntsaŋ, a a láʼ eyá mé meŋ, á aleʼé zīi, a záʼa ntsaŋ. A á le lɛ̄ ŋgyá mé meŋ ndaʼ á, a eyá tɛ mbɔɔ á mbū epuɔ metsem pīi, é gɛ nzī ntsáa á lejʉ̄ɔ á yí.

Nzoknzem ashuŋne Pɔ́ɔl á mbū Timotɛ

⁹ Lɛ ŋkāk ete, ŋgákne eshʉʼ ntswɛ́tte á gá,

¹⁰ melaʼ mīi, Demas a ke wáʼ á gá, ńnéŋ ntē yí ánɛ menu ŋgɔŋ muɔ. A ke gʉ̄ɔ mé tésɔŋ Tesalonik. Klesáŋsi á gʉɔ mé apak ŋgɔŋ Ŋgalati. Tíit á gʉɔ mé apak ŋgɔŋ Dalmati.

¹¹ Pek Lúkási ndaʼ mé zɛɛ́t ega. Pɛ Málkúsi e eshʉ̄ʼ, melaʼ mīi, anu zí á mbū meŋ tɛʼ, á yí á letswīte á gá ánɛ afaʼ.

¹² Meŋ ke tó á Tishik ŋgyá á tésɔŋ Efɛze.

¹³ Lɛ ŋgē eshʉʼe, ḿbɛ́ nzhó efwɔ̄k za zīi, meŋ nde tsyā á tésɔŋ Tloas, á mba Kaapɔs, ńzéŋ mbɛ́ meŋwaʼne. Ndɛ́ʼ o elēkne emi, é me ŋgup na lā.

¹⁴ Alɛkzaŋdle, á tɛ‑ala, a ke zá esɔ̄ ánɛ meŋ tɛʼ. Atsyapuɔ mé e láʼ etsɔ́ʼ afaʼ zīi, a ke ghʉ̄ʉ̄.

¹⁵ Tɛ mbɔɔ wu ajú, lʉɔ́ʼte á yí, a ke pú ndʉ̄ʼ menu mīi, pek zíʼnɛ tɛʼ.

¹⁶ Á lɛ ánɛ mvhɔ legʉɔ zīi, meŋ nde nɔ̄ŋ ndhʉɛ athū zá á mvhɔ asāʼ, ŋiŋ á pú te gá tɔ́te, epuɔ metsem é pú ŋgwáʼ á gá. Ndém á elɛ ndēkne, á mbū epuɔ puɔ mɛ́t.

¹⁷ Pɔ́ le wáʼ á gá páʼā, Atsyapuɔ á ké nnɔ̄ŋ ntɔ́tɛ á gá, éfho á nchu mena nzwi, ésāʼ á gá. Ŋ́gyá á gá mete á lelɔk ntswī ŋke yí, páʼ mɛ́ pɔŋteé á letswi épúp. Meŋ tswīi épúp, tɛ epuɔ metsem pīi, é té epuɔ Yúda á, é júʼ.

¹⁸ Atsyapuɔ a shʉʼ ezéŋ éfhó á mbū menu tepɔŋ ntií ntiī, ésaʼ á gá, éghʉ meŋ etswɛ́t, ŋ́kó á ntē lefɔ tsí, á athʉ́ lephū. Awuʼte á egɔ́ á mbū yí, á meŋguʼ meŋguʼ. Á épúp.

Atsaʼte á lelɔk nzōko

¹⁹ Tsaʼte á Plisil mbɔɔ Akilas, ńzéŋ mbú ńtsāʼte epuɔ mba Onezifɔɔ ŋgyá á gá.

²⁰ Elaste a ke zɛ́t á tésɔŋ Kɔlɛŋte. Meŋ ke tshī á Tlofime á tésɔŋ Milɛt nnéŋ, á nɔŋ ŋgɔ̄ɔ.

²¹ Lɛ ŋkāk ete eshʉ̄ʼ, tɛ afʉʼ mbeŋ a ezɛ́t té kuʼ. Ebul mbɔɔ Pudɛ́si, ŋ́ghʉ̄ á Lɛ́ɛŋ mbɔɔ Klódia, ŋ́ghʉ̄ epɔ̄ memía metsem, é si mbúu ntsāʼtɛ á wú.

²² Atsyapuɔ a egɔ́ mé wu. Ŋ́gɛ Ndém a elɛ ŋghʉ̄ anu mbɔŋ té ndhʉ, ánɛ pɛ metsem.