2 Timotɛ 3 - Eka Eswhī

Yɛɛ́so a a láʼ egē epiŋ nzem, lelʉɛ epuɔ é le zɛ́t ŋgūʼtɛ á Ndém ɛ́

¹ Timotɛ, zhɛ́ á mbɔŋɔ́ á légɛ, a fú ekuʼ ánɛ mezoknzem eleʼé alāʼ, ejʉʼ e etē tɛʼ.

² Meŋ ndʉ́ɛ́ épúp melaʼ mīi, epuɔ menɔŋ e shʉʼ ecʉ́ʼ wɔ tɛtɔŋ‑azɔ́p. Écʉ́ʼɛ ekɔŋɔ áa ŋkāp. Écʉ́ʼɛ eŋia ŋia. Écʉ́ʼɛ ekɔ́ʼne kɔʼné. Écʉ́ʼɛ ezɔte á Ndém zɔte. Écʉ́ʼɛ etʉɛ athū á mbū memɔʼɔ́ pɔ́p. Écʉ́ʼ wɔ te zhɛ́ á ku‑ntáŋ wɔp. Écʉ́ʼ wɔ te yá‑mekuʼ Ndém.

³ Ntē wɔ́p e esɛnne ntē páʼ tɔ́ lā. Pɔ́ ecʉ́ʼ wɔ te tsá‑ŋiŋ. Ńcʉ́ʼ wɔ shúŋ‑epoó anu ánɛ emɔ̄ʼ epuɔ. Ńcʉ́ʼ wɔ ghʉ‑páʼ mbe nnɛ̄t zɔp, é si ntshónɛ á wɔ́p. Ńcʉ́ʼ mefwɛ̄t. Ńcʉ́ʼ megaŋ mbo anu mbɔŋ.

⁴ Ńcʉ́ʼ wɔ jhʉ́‑mezoʼ. Ńcʉ́ʼ wɔ ghʉ‑anu té kwaŋte. Ńcʉ́ʼ epuɔ pīi, leŋia a lē mbú njhʉ́ á wɔ́p. Ńcʉ́ʼ yīi pɔ́ e kɔŋ á Ndém, pɔ́ kɔŋ áa ajū mīi, mbe nnɛ̄t zɔp, e é si nzɛ́ttɛ.

⁵ Mɛ́ cʉteē á wɔ́p á nzem apɛ́, ńjʉ́ɔ pɔ́ gɔ́ páʼ epuɔ pīi, pɔ́ ziīŋ páʼ Ndém a á si ŋkɔ̄ŋɔ lā. Tɛ́ pɔ́ ké ŋgɔ́ epuɔ pīi, pɔ́ é si ndʉ̄ʼɛ mete Ndém. Lʉɔ́ʼte ntií epuɔ jʉɔ mɛ́t azɔ́p.

⁶ Ńdɔkɔ ŋ́gɛ, emɔ̄ʼ epuɔ á nnɔ pɔ́p, é ndáʼ ŋgɔ́ á si ndɔ̄kɔ leghi, ŋ́kúɔ́ á meŋgyā epuɔ, ŋ́kʉ̄ɛ leghi wɔnzwí pīi, mɛ́ shuúŋ akɔ̄ lɛ́, pɔ́ véŋ veéŋ, ŋ́gɛ pɔ́ evéŋ anu zīi, pɔ́ zíʼnɛ. Wɔnzwí epuɔ mɛ́t, é megaŋ mefa tɛʼ. Mbe nnɛ̄t zɔp é tshóne á wɔ́p, á leghʉ ntií ntiī menu.

⁷ Wɔnzwí puɔ mɛ́t, é efʉʼ metsem, ŋ́kɔ̄ŋ ŋ́gɛ mɛ́ ezíʼne á wɔ́p menu meswhī, pɔ́ piīŋ laá ŋkūʼ á wɔ́p á lezhɛ̄ ajū mīi, anuúnē á aziɛ́ ɛ́.

⁸ Ndeŋ ndeŋ páʼ Janɛs pɔ́ Jamblɛs é le lʉ̄ʼ anu zīi, Mɔɔ́sɛ a zíʼnɛ lā, epuɔ puɔ mɛ́t, é si ndʉ̄ʼɛ anuúnē. Pɔ́ wɛɛ̄ mekwaŋte tepɔŋ. Pɔ́ lɛ te kwāʼ efɛ́ nnɛ̄t, ŋ́gyá á mbū Yɛɛ́so ó.

⁹ Epuɔ mɛ́t é ké ŋgɔ́ le lɔ̄k ajʉɔ afaʼ, ŋgʉ̄ɔ tɛ ŋgia é sak á, melaʼ mīi, a shʉʼ etó á ntentā á légɛ, pɔ́ té tsɔ azō zhɛ́, ńdeŋ ndeŋ páʼ á le tó épúp, á mbū Janɛs pɔ́ Jamblɛs.

Nzoknzem ntekné

¹⁰ Ŋ́ké ŋgɔ́ mé wu, mbɔ o ke zīŋ ánɛ mekhu má, ánɛ ajū mīi meŋ á si nzíʼnɛ epuɔ. Ńjʉ́ɔ páʼ meziŋɛ́ má é kɛ épúp, ńzhɛ́ ajū mīi, meŋ ke gē eghʉ afaʼ, ńnɔŋ ntsáa. Ńjʉ́ɔ páʼ meŋ ke fɛ́ nnɛ̄t épúp, ŋ́gyá á mbū Yɛɛ́so. Ńjʉ́ɔ páʼ meŋ ke kwɛ́t ntē épúp, ánɛ menu. Ńjʉ́ɔ páʼ meŋ ke kɔ̄ŋ epuɔ menɔŋ épúp. Ńjʉ́ɔ páʼ meŋ kɛ efʉʼ metsem, ńnɔŋ ŋkāka ete té ká.

¹¹ O ó si nzhɛ́ɛ páʼ mɛ́ ke lʉɔ́ʼ á gá épúp, ńnɔŋ nzhɛ́ɛ ŋgʉɔ̄ʼ zīi, meŋ ke jʉ́ɔ á tésɔŋ Aŋtiɔsh, mbɔɔ á tésɔŋ Ikoniɔm, mbɔɔ á tésɔŋ Lístle. Mɛ́ kɛ te gá ánɛ ezɛ́ ntií lʉɔ́ʼ ē? Táʼ, Atsyapuɔ á ké ŋgɔ́ efʉʼ metsem, ńnɔŋ ŋkáptɛ á gá kápte.

¹² Ńzi te épúp ɔ́, mbɔ epuɔ metsem pīi, pɔ́ é si efāʼa á leziŋ páʼ Ndém a á si ŋkɔ̄ŋɔ, éfhó ánɛ páʼ pɔ́ lɛtneē ánɛ Yɛɛ́so Klísto, mɛ́ é efʉʼ metsem, ńdʉɔ́ʼ á wɔ́p lʉɔ́ʼe.

¹³ Ŋ́gɔ́ mé epuɔ tepɔŋ, mbɔɔ wɔ táŋ‑mela, pɔ́ e lɔk á leghʉ menu tepɔŋ, égʉɔ mé mvhɔ, énɔŋ epɔptɛ epuɔ, mɛ́ ezéŋ nnɔŋ mbɔ̄ptɛ á wɔ́p azɔ́p.

¹⁴ Ḿbiŋ ŋgɔ́ mé wú, kak ete, ŋkúʼte ajū mīi, pek ke ziʼné á wú, o véŋ á légɛ, azō mɛ́t á ajʉʼ éwú, ŋ́gɔ́ épúp. O ó si nzhɛ́ɛ epuɔ pīi, pɔ́ ke ziʼné á wú menu mɛ́t.

¹⁵ O ó si nzhɛ́ɛ aŋwaʼne Ndém, tɛ efhó páʼ, o le zɛɛ́t á mɔ́. Aŋwaʼne mɛ́t á kuūʼ á leyā á wú azhɛ̄‑anu, tɛ́ Ndém á ghʉ o etswɛ́t, éfhó ánɛ páʼ, o ó fɛ́ nnɛ̄t ju ŋgyá á mbū Yɛɛ́so Klísto.

¹⁶ Anu ntsem zīi, á ntē aŋwaʼne Ndém, á toó áa nchu Ndém, ḿbiŋ mbɔ̄ŋ á lelɔk nzíʼne epuɔ á anuúnē, á lelɔk eshúŋ epuɔ ajū mīi, pɔ́ é si efāa, á lelɔk mbʉ́ʼte melɔ́ʼ, á lelɔk nték epuɔ, á lenāŋ ndeŋ ndeŋ páʼ, Ndém a á si ŋkɔ̄ŋɔ.

¹⁷ Ashuŋne Ndém á épúp, tɛ́ ŋiŋ yīi a ghʉɛ afaʼ Ndém, a elɔk ncūŋte nnɛ̄t zi tɛ ntsékne, ŋ́kūʼ á yí á lewɛ ajūɔ tsem zīi, a gɔ elɔ̄k ŋghʉ̄ mefaʼ membɔŋ ntsem.