2 Timotɛ 2 - Eka Eswhī

Timotɛ, véŋ á wú á lejʉ̄ɔ ŋgʉɔ̄ʼ páʼ Yɛɛ́so lā

¹ Ŋ́ké ŋgɔ́ mé wu yīi, o ó méŋ ga, lɛ ncʉ́ʼ Yɛɛ́so Klísto a eyá á wú mete, éfhó ánɛ páʼ a wɛɛ̄ apɔŋɔ́ ntē te ndhʉ.

² Anu zīi o ke júʼ á gá á lezīʼne á mvhɔ epuɔ tɛ nzáne, zéŋɛ́ nzíʼne ajú epuɔ pīi, mɛ́ gɔ etém nzem ŋgyá á mbū pɔ́p, á anu mɛ́t, tɛ pɔ́ ekūʼ á lezīʼne azɔ́p emɔ̄ʼ epuɔ.

³ Jʉ́ɔ́ ajú ŋgʉɔ̄ʼ ánɛ mefaʼ Yɛɛ́so Klísto, páʼ mbɔŋ mmaʼ‑ncu lā.

⁴ Ŋiŋ yīi a á véŋ á yí á lekō afaʼ ncu lā, a gɔ le néŋ ntē yí, ánɛ emɔ̄ʼ menu ndɛʼɛ ɛ́, ḿbɔ́k á yí á legɔ̄ le ghʉ̄, tɛ ŋgɔŋ é pɔŋ á ŋiŋ yīi, a le lɔ̄k á yí á afaʼ á.

⁵ Ndeŋ ndeŋ épúp, mɛ́ nɔŋ ŋghʉ̄ɛ akʉʼte á lekʉte, ŋiŋ a te kʉ̄te páʼ mbé akʉʼte mɛ́t, é leé épúp ɔ́, mbɔ mɛ́ gɔ́ le á yí ntaŋá yá.

⁶ Njʉʼ‑ŋgɔ̄ŋ yīi a á jʉ́ɔ ŋgʉɔ̄ʼ, á leghʉ afaʼ á ŋkāʼ yí, a pɔŋteé á lezēŋ ŋgɔ́ mvhɔ ŋiŋ yīi, a pfɛ́tɛ ecū mīi, é fhó á ŋkāʼ mɛ́t.

⁷ Fhʉte menu mīi, meŋ á shúŋ á wú lā á mbɔŋɔ́. Atsyapuɔ a etswíte á wú, á lejūʼ menu muɔ mɛ́t ntsem.

Timotɛ, kímte á Yɛɛ́so páʼ a le zím ánɛ lewhʉ̄

⁸ Kímte á Yɛɛ́so Klísto, páʼ Ndém a le ghʉ̄ʉ̄, á zím ánɛ lewhʉ̄. Yɛɛ́so wuɔ mɛ́t, a á ndhu Efɔ Ndavít, ńdeŋ ndeŋ páʼ ŋke mbɔŋ yīi meŋ tswii, é si ndʉ́ɛ́ épúp.

⁹ É melaʼ ŋke mbɔŋ mɛ́t, tɛ́ meŋ jʉ́ɔ ŋgʉɔ̄ʼ páʼa, tɛ ŋkúɔ́ atʉɛ́ páʼ efwɛ̄t lā. Táʼ, ashuŋne Ndém á ké ŋgɔ́ á le atʉɛ́ kó.

¹⁰ Melaʼ épúp tɛ́, meŋ kaka ete mvéŋɛ ŋgʉɔ̄ʼ mɛ́t ntsem, melaʼ epuɔ pīi, Ndém a le tsɔ́ʼē, ŋ́gɛ pɔ́ é epuɔ pí, tɛ́ Yɛɛ́so Klísto a eghʉ̄, pɔ́ etswɛ́t azɔ́p, ńtā á ntē shʉ́shɔ́k á lemiʼɛ, á lezēŋ Ndém.

¹¹ Anu jʉɔ zīi, meŋ gɔ̄ á eshúŋɔ la, á ajʉʼ éwú, ŋ́gɔ́ épúp: «A gɔ́ ŋké ŋ́gɔ́ éyi, ḿpɛ a Klísto é le puté ŋkwhʉ́, mbɔ ḿpɛ a pɔ́p, e láʼ egɔ́ éwú.

¹² Ŋ́gɔ́ éyi ḿpɛ é si ŋkwɛ́tɛ ntē, á ntē ŋgʉɔ̄ʼ páʼ yí, mbɔ ḿpɛ a pɔ́p e láʼ epúte esáʼ ŋgɔŋ. Ḿbiŋ ŋgɔ́ éyi, ḿpɛ é si mbūŋnɛ á yí, mbɔ a a láʼ ezéŋ epuŋne á yímpɛ azí.

¹³ Ŋ́gɔ éyi, ḿpɛ é si sɛ̄tɛ nzem zi, mbɔ a ké ŋgɔ́ á te sɛt‑nzem, melaʼ mīi, a gɔ le lé anu, ḿbīŋ le ghʉ ɛ́. »

Timotɛ a pɔŋteé á legɔ̄ ŋgaŋ afaʼ yīi Ndém a á si ŋkɔ̄ŋɔ

¹⁴ Kímte menu muɔ mɛ́t, á mbū epuɔ metsem, ńtshí á mvhɔ Ndém, éshúŋ á wɔ́p esīa sia ŋ́gɛ, ndɛ́ʼ pɔ́ zɔŋ ashuŋne. Pɔ́ ghʉɛ épúp, mbɔ á gɔ le á wɔ́p tswíte. A cʉ́ʼɛ épúp, mbɔ pɔ́ e ghʉ, epuɔ pīi é júʼɔ meshuŋne mɛ́t, e éfhó á nzem Ndém ntó.

¹⁵ Kak ete á legē etshí á mvhɔ Ndém efʉʼ metsem, ŋ́gɔ́ á ŋiŋ yīi, Ndém a pɔŋteé á levēŋ á yí. Ŋ́gɔ́ á ŋgaŋ afaʼ yīi, esē é té si ŋkúu á yí, ánɛ afaʼ zí í. Ŋ́gɔ́ á ŋgaŋ afaʼ yīi, a á si nchʉ́ɛ nnɛ̄t nzíʼnɛ epuɔ á kwaʼ ashuŋne Ndém.

¹⁶ Pá á wú á lenēŋ nchu wú ánɛ meshuŋne mīi, é té á Ndém wuʼte. Epuɔ pīi, pɔ́ shuúŋ ntií meshuŋne muɔ mɛ́t, pɔ́ é efʉʼ metsem, ńtsēŋte lezēŋ Ndém tseŋte.

¹⁷ Meshuŋne mɔ́p é poōk ejʉʼ, páʼ eféŋ zīi e zyɛ́ttɛ lā. Imene pɔ́ Filetɔs é si ŋgɔ́ ntií epuɔ jʉɔ mɛ́t.

¹⁸ Pɔ́ kʉʉ̄ŋ efhó ánɛ mɛnzhɛ anuúnē ntó, ńnɔŋ ntáŋa mela ŋ́gɛ, Ndém a lē ndáʼ ŋghʉ̄, epuɔ menɔŋ é zím ánɛ lewhʉ̄. Ńdʉ́ɛ́ épúp, ńdɔkɔ ŋghʉ̄ɛ, epuɔ tɛ nzá pīi, pɔ́ lē ndáʼ efɛ́ nnɛ̄t ŋgyá á mbū Yɛɛ́so, é fhɔ́ɔ á nzem yí ntúɔ́.

Kwaʼ atsék zīi Ndém mé le nɔ̄ŋŋ̄

¹⁹ Táʼ, epuɔ pīi pɔ́ le fɛ́ nnɛ̄t ŋgyá á mbū Yɛɛ́so, pɔ́ teē páʼ kwaʼ atsék zīi, Ndém mé le nɔ̄ŋŋ̄, azō á gɔ le wɔ́p nʉʼne. Mɛ́ tií ánɛ atsék mɛ́t ŋ́gɛ: «Atsyapuɔ a zhɛɛ́ epuɔ pí». Mɛ́ zeéŋ ntí éwú ŋ́gɛ: «Ŋiŋ a nɔŋ ndʉ́ɛ́ ŋ́gɛ yí lɛtneē ánɛ Atsyapuɔ, á kʉ á mɛnzhɛ tepɔŋ. »

²⁰ Á shʉʉ̄ʼ á ŋgyā ŋgaŋ azō, mɛ́ jʉ́ɔ ntií ntiī mepɛ́ɛn é gɔ́ éwú. Emɔ̄ʼ é éwú, mbɔ mɛ́ le lɔ̄k á gɔ́ɔl tɛ́ ncūŋte. Emɔ̄ʼ é gɔ́ éwú, mbɔ mɛ́ le lɔ̄k atʉɛ́ ŋkāp tɛ́ ncūŋte. Emɔ̄ʼ é gɔ́ éwú, mbɔ mɛ́ le lɔ̄k athʉ́ tɛ́ ŋkɔ́. Emɔ̄ʼ é zéŋ ŋgɔ́ éwú, mbɔ mɛ́ le lɔ̄k atsáʼ tɛ́ mbɔ́. Mɛ́ tshií emɔ̄ʼ á esī áa ánɛ aleʼé lekāk, ńtshí emɔ̄ʼ eleʼé metsem.

²¹ Púp, ŋiŋ yīi a á fhó ánɛ yí, ésōk menu tepɔŋ mīi, meŋ á té lā, a á páʼ pɛ́ɛn yīi mɛ́ é tshí á esī, ánɛ aleʼé lekāk lā. Ndém a á tswhi efāk á yí, a etswíte á yí Ndém ánɛ mefaʼ, ánɛ mefaʼ ntsem mīi é mbɔŋ.

Ŋgaŋ afaʼ Atsyapuɔ

²² Kʉ menu tepɔŋ mīi epɔ̄ ŋgwɛso, é khʉneé á leghʉ. Gɔ́ efʉʼ metsem, efāʼ á wú á legɔ̄ á ŋiŋ ndeŋ ndeŋ, á mvhɔ Ndém, éfɛ́ nnɛ̄t ŋgyá á mbū Yɛɛ́so, ŋ́gwɛ̄ ŋkɔŋne, ńnáŋ mé apwɛne, pɛ a epuɔ pīi, pɔ́ swiŋteé á Atsyapuɔ Ndém mé taʼ ntē.

²³ Pá aŋak zīi, methū é té éwú ú, áŋak zīi á gɔ́ le á ŋiŋ tswíte. O ó si nzhɛ́ɛ páʼ, ntií aŋak jʉɔ mɛ́t, e gē emakne, ḿmāʼ áa mekɔŋ asɔpne.

²⁴ Ŋgaŋ afaʼ Atsyapuɔ, á piŋ te pɔŋté á yí á lewɛ mekɔŋ asɔpne ɛ́. A pɔŋteé á yí á lezwite, á mbū epuɔ metsem, ŋ́kūʼ á yí á lezīʼne emɔ̄ʼ epuɔ, ŋ́kūʼ á yí á legɔ̄ á te ŋak.

²⁵ A pɔŋteé á yí á lelɔk á nda nda, tɛ́ mbʉ́ʼte epuɔ pīi, pɔ́ piŋnɛ ashuŋne zí. A gɔ́ amɔ̄ʼ, mbɔ Ndém a shʉʼɛ ŋgyá eshhʉ̄, pɔ́ gɔ nnɛ̄t zɔp, ŋ́gwáʼ atswhī tepɔŋ zɔ́p, ńzhɛ́ azɔ́p á anuúnē.

²⁶ Ndém a gɔ eshʉ̄ʼ ŋ́ghʉ̄, pɔ́ fhó ánɛ mekhʉ Sɛ́ta ntó, ńzīŋ ánɛ mɛnzhɛ mbɔŋ. Ŋ́gwáʼ á wɔ́p á lezēŋ nzīŋ páʼ, pɔ́ kɛ á ntē mekhʉ Sɛ́ta, ńzīŋɛ páʼ a á si ŋkɔ̄ŋɔ épúp.