2 Timotɛ 1 - Eka Eswhī

Atsaʼte

¹ Akɛtte jʉɔ á fhɔ́ɔ á mbū meŋ Pɔ́ɔl, nziŋ‑ntō Yɛɛ́so Klísto, mbɔ Ndém mé le kɔ̄ŋ ŋ́gɛ, meŋ egɔ́ ewiɛ́. Azá afaʼ a gɔ́ á leshūŋ anu á mbū epuɔ menɔŋ, ánɛ lefū ntā á lezēŋ Ndém, páʼ Ndém mɛ́t a le laʼnē épúp, á mbū epuɔ pīi, pɔ́ lɛtneē ánɛ Yɛɛ́so Klísto.

² Meŋ tíi páʼa á mbū wu Timotɛ méŋ ga, meŋ ŋkɔ̄ɔŋ á wú tɛʼ. Meŋ á si ndɔ́ɔ á mbū Ndém, á Mɔʼɔ́ yímpɛ, mbɔɔ á mbū Atsyapuɔ yímpɛ Yɛɛ́so Klísto, ŋ́gɛ pɔ́ lɛ ŋghʉ̄ anu mbɔŋ té ndhʉ, ŋ́gwɛ̄ á atsāmezeŋɛ ánɛ wu, ŋ́ghʉ̄, o enáŋ mé apwɛne.

Pɔ́ɔl a á ega esyáknɛ á Ndém á athū Timotɛ

³ Meŋ á si mbúu esyáknɛ á Ndém tɛʼ, ánɛ athū jú. Á Ndém yīi meŋ ŋguʼtɛ mé taʼ ntē, páʼ wɔ maŋgānjʉʼ pék, é le wuʼtē azɔ́p. Efʉʼ metsem yīi, meŋ á si eswíŋtɛ á Ndém, étsōʼ pɔ́ ezokó, meŋ ekím lezēŋ cú.

⁴ Meŋ á si kímtɛ páʼ pɔkɔ le gē efakne, meŋ egʉ̄ɔ, o elāa épúp. Meŋ á si ntsáa á gá á lezēŋ njʉ́ɔ á wú tɛʼ, ntē gá é pú ŋgáŋte.

⁵ Meŋ á si ŋkímtɛ páʼ, o fɛɛ́ nnɛ̄t ju, ŋ́gyá á mbū Yɛɛ́so mé taʼ ntē. Mbɔ Loyísi, á mía mɛ́ wu, mbɔɔ mɛ́ wu Enis é le fɛ́ azɔ́p. Meŋ á si nchʉ́ɛ nnɛ̄t nzhɛ́ɛ á légɛ, o fɛɛ́ ajú nnɛ̄t ŋgyá á mbū Yɛɛ́so, páʼ pɔ́p.

Pɔ́ɔl a á ega ntswíʼtɛ á Timotɛ ŋ́gɛ a ekúʼte ŋke mbɔŋ

⁶ É melaʼ épúp tɛ́ meŋ kímtɛ á wú ŋ́gɛ, te cʉ́ʼ, menu mbɔŋ mīi, Ndém a le néŋ á ntē wu, ŋ́gɛ o eghʉ̄, á afʉʼ zīi meŋ nde zapá mbū á athū wu lā, é lí.

⁷ Meŋ ndʉ́ɛ́ páʼa melaʼ mīi, Azwakne zīi Ndém á le néŋ á ntē pímpɛ, á té azi, á ghʉʉ̄, ḿpɛ egɔ́ epi, ecɔʼ é ntē pɔ́p ɔ́. A cʉ́ʼɛ épúp, mbɔ á si ŋgɔ́ Azwakne zīi á ghʉʉ̄, ḿpɛ ewɛ̄ mete, ŋ́ghʉ̄ ḿpɛ ewɛ̄ ŋkɔŋne, ŋ́ghʉ̄ ḿpɛ ekūʼ a lekūʼte nnɛ̄t zímpɛ.

⁸ Púp, ndɛ́ʼ esē é kú á wú á leshūŋ ajū mīi, o ó si nzhɛ́ɛ ánɛ Atsyapuɔ yímpɛ. Ndɛ́ʼ esē é kú á wú á lelē ŋ́gɛ, o ó si nzhɛ́ɛ á gá, páʼ meŋ á ŋgyā atʉɛ́ melaʼ yí lā. A cʉ́ʼɛ épúp, pɔkɔ ejʉ́ɔ ŋgʉɔ̄ʼ á leghʉ, ŋke mbɔŋ é saŋ ejʉʼ. Pɔkɔ ké nnɔ̄ŋ esáŋa ánɛ mete Ndém.

⁹ Ndém mé le ghʉ̄ ḿpɛ é tswɛ́t, ńtɔ́ŋ á yímpɛ ndɔ̄k ŋghʉ̄ epuɔ pí. A lɛ te gē eghʉ épúp, éfhó ánɛ mefaʼ mbɔŋ mímpɛ ɛ́, a le fhó ánɛ páʼ, a le kwāŋ épúp, éfhó ánɛ apɔŋɔ́ ntē te ndhʉ zí, ánɛ epuɔ menɔŋ. A le té njhʉ̄ nzápa ánɛ Yɛɛ́so Klísto, ńtswī á yímpɛ apɔŋɔ́ ntē te ndhʉ jʉɔ mɛ́t, tɛ nzī nzɛ́t áa te nɔŋ ŋgɔŋ.

¹⁰ Tsetsɔŋɔ, Ndém a á ké mbiŋ ntswī á yímpɛ apɔŋɔ́ ntē te ndhʉ mɛ́t, éfhó ánɛ páʼ, Ŋghʉɛ‑mɛ́‑tswɛ́t yímpɛ, á Yɛɛ́so Klísto, a le shʉ̄ʼ á ŋgɔŋ tɛ mɛ́ jʉ́ɔ á yí. Ŋghʉɛ‑mɛ́‑tswɛ́t wuɔ mɛ́t, mé le tē ntsyā á lewhʉ̄, ńtswī á yímpɛ á légɛ, ŋiŋ a kúʼtɛ ŋke mbɔŋ, mbɔ a a fú eta á lezēŋ Ndém, a á le zéŋ ŋkwhʉ́ ɛ́.

¹¹ Ndém a le tsɔ́ʼ á gá ndɔk ŋghʉ̄ á nziŋ‑ntō yi, ŋ́gɛ meŋ etswī ŋke mbɔŋ wuɔ mɛ́t, ŋ́kɛ́ʼte eshúŋ epuɔ.

¹² É melaʼ épúp tɛ́, meŋ jʉ́ɔ ejʉɔ ntií ŋgʉɔ̄ʼ. Esē é ké te si ŋkúu á gá melaʼ épúp ɔ́, melaʼ mīi, meŋ á si nzhɛ́ɛ á ŋiŋ yīi, meŋ ndē efɛ́ nnɛ̄t za ŋgyá á mbū yí. Meŋ á si ncuŋtɛ nzhɛ́ɛ á légɛ, ŋgaŋ a wɛɛ̄ mete, á lelɔk ŋkápte ŋke mbɔŋ, páʼ a le tsekné á mbū meŋ. Ŋ́kápte tɛ ndáʼ ŋkó á aleʼé zīi, a piŋɛ nzem, ŋ́gɔ̄ á nzáʼ ntsaŋ.

¹³ Cʉ́ʼ, meshuŋne mīi é ke tó á nchu meŋ, ŋ́gɔ́ á anuúnē, e egɔ́ efʉʼ á mbū wu, á lelɔk nzíʼne emɔ̄ʼ epuɔ. Ŋ́gē ezíʼne epuɔ, ńnɔŋ efíɛ́ nnɛ̄t ŋgyáa á mbū Yɛɛ́so Klísto, ŋ́kɔ̄ŋ epuɔ melaʼ mīi, o lɛtneē ánɛ yí.

¹⁴ Ŋ́gɛ Azwakne Ndém páʼ á ntē pímpɛ lā, a elɛ ntswíte á wú á lepīp ŋke mbɔŋ, páʼ mɛ́ le tsekné á mbū wu lā, tɛ azō á le éwú kúmne.

¹⁵ O ó si nzhɛ́ɛ páʼ, epuɔ Yɛɛ́so metsem á apak ŋgɔŋ Azíi, é ke pú ŋgwáʼ á gá, tɛ mbɔɔ Fijɛl, mbɔɔ Ɛɛmɔjɛn.

¹⁶ Ŋ́gɛ Atsyapuɔ a elɛ ŋkápte epuɔ metsem pīi, é mba Onezifɔɔ. A kɛ efʉʼ metsem, ńnɔŋ ntúŋnɛ á gá. A te kú esē á mvhɔ epuɔ, ánɛ páʼ meŋ á ŋgyā atʉɛ́ ɛ́.

¹⁷ A cʉ́ʼɛ épúp, mbɔ a le lɛ ŋgē ekó á tésɔŋ Lóma ega, ŋ́kāk ete, éfāʼ á gá tɛ ndáʼ njʉ́ɔ.

¹⁸ Ŋ́gɛ Atsyapuɔ a elɛ ŋkápte á yí, áleʼé zīi a piŋɛ nzem, ŋ́gɔ̄ á nzáʼ ntsaŋ. Mmɔʼ ŋiŋ a te si nzhɛ́ɛ mefaʼ mīi, a ke ghʉ̄ á mbū meŋ, á tésɔŋ Efɛze, páʼ wu ú.