2 Piɛ 3 - Eka Eswhī

Atsyapuɔ a a láʼ eshʉʼe

¹ Mepɔŋ mesoó pá, ajʉɔ á páʼa, ŋ́gɔ́ akɛtte mbáte pīa zīi, meŋ túɔ́ á mbū pɛ. Ánɛ mekɛtte muɔ mɛ́t mɛ́mbīa, meŋ nɔ̄ɔŋ nzīɛ leghi tsɛ́, ŋ́gɛ pɛ ewɛ̄ akwaŋte mbɔŋ ánɛ ajū mīi, mɛ́ ke ziʼné á wɛ́.

² Pɛ ekímte meshuŋne mīi metswi‑ŋke, éfhɔ́ɔ á mbū Ndém, é le zī mvhɔ, éshúŋ á wɛ́. Ŋ́kímte lepé Atsyapuɔ Ŋghʉɛ‑mɛ́‑tswɛ́t, páʼ meziŋ‑ntō é le ziʼné á wɛ́ épúp.

³ Pɛ eté njhʉ̄ nzhɛ́ á légɛ, a shʉʼ egɔ́ ánɛ mezoknzem eleʼé, emɔ̄ʼ epuɔ e eshʉ̄ʼ, ŋ́ghʉ̄ azɔ́p áa menu mīi, mbe zɔp e é si ntshónɛ á wɔ́p ŋ́gɛ pɔ́ eghʉ̄. Epuɔ puɔ mɛ́t e shʉʼ ezwi á wɛ́,

⁴ élé á mbū pɛ gɛ: «Nɔ́ŋ ŋ́gɛ Yɛɛ́so a le lé ŋ́gɛ, yí e shʉʼ ezéŋ eshʉʼe. Yí piīŋ ŋgɔ́ áa egɔ́? Tɛ efhó páʼ wɔ maŋgānjʉʼ pímpɛ é le kwhʉtéē, akʉ̄ɛ akʉ̄ɛ á gɛ nzɛ́tɛ áa páʼ, Ndém a le gē enɔŋ ŋgɔŋ, á gɔ́ épúp. »

⁵ Pɔ́ e shʉʼ ege elé épúp, énɔŋ eghʉɛ páʼ pɔ́ é lekne á légɛ, tɛ efhó tɛ afʉʼ, Ndém á lɔk ashuŋne, ŋ́ghʉ̄ lephū pɔ́ esī atsáʼ. Éfāk atsáʼ ánɛ ntshi, ŋ́ghʉ̄, ajūɔ tsem á lɔk ntshi tɛ́ ŋgɔ́ éwú.

⁶ Ndém a le zéŋ ndɔk ntshi tɛ́ ŋghʉ̄, nzwiŋ ŋgɔŋ á lákne. Ntshi mɛ́t é le fhó ánɛ pík‑ŋgɔŋ mbeŋ.

⁷ Ŋ́gɔ́ mé lephū mbɔɔ mé esī atsetsáʼ zīi, e é tsetseŋɔ lāa, mbɔ ashuŋne Ndém mɛ́t a leé ŋ́gɛ, e e láʼ enáŋ tɛ eláʼ etshí aleʼé zīi, mmók é pík á wɔ́p. Ndém a a láʼ ekápte á wɔ́p, tɛ eláʼ etshí á aleʼé zīi, a záʼa ntsaŋ, ḿbíkɛ wɔ te jú‑nchu yí.

⁸ Mesoó pá, amɔ̄ʼ azō á éwú zīi, pɛ te pɔŋté á lelekne ɛ́. Á mbū Atsyapuɔ páʼā, taʼ aleʼé alāʼ, á gɔ́ páʼ ŋguʼ ntsāʼ lā. Ŋguʼ ntsāʼ, é gɔ́ páʼ taʼ aleʼé lā.

⁹ Atsyapuɔ a gɛ te nnáŋa á leghʉ, ajū mīi a le laʼnēē, á po ɔ́. Emɔ̄ʼ epuɔ é piŋ ŋkwāŋ ŋ́gɛ, a naáŋ á leghʉ. A gē eziŋ ménda páʼā, é gɔ́ áa melaʼ mɛ́, melaʼ mīi a te kɔ̄ŋ ŋ́gɛ, tsɔ taʼ ŋiŋ a efā nzhɛ ɛ́. A cʉ́ʼɛ épúp mbɔ, a kɔɔ̄ŋ ŋ́gɛ, ŋiŋ ntsem a ewɛ̄ njhʉ̄, á lelɔk ŋgɔ̄ nnɛ̄t zi, ŋ́gwáʼ atswhī tepɔŋ zí.

¹⁰ Aleʼé zīi Atsyapuɔ a shʉʼɛ, a eshʉ̄ʼ páʼ ntsɔ́ŋ lā. Aleʼé mɛ́t, mɛ́ lɛ njʉ́ɔ, lephū e epú nzwɛ̄t lɛ wúuu, ḿmī. Mmók e epú ntɔ̄ ajūɔ tsem zīi, á éwú, tɛ a ecʉ́ʼ avhō. Esī atsetsáʼ ntsem pɔ́ ajūɔ tsem zīi á éwú, e epú ndákne.

¹¹ Páʼ ajʉɔ tsem a láʼ epú emi ánɛ ejʉɔ ntií lā, á lɔkɔ eshúŋɔ á wɛ́ ntií lenāŋ zīi, pɛ pɔŋteé á lewɛ. Á si nzɛ́ttɛ ŋ́gɛ, pɛ enáŋ páʼ Ndém a á si ŋkɔ̄ŋɔ, ńjúʼ nchu yí té tswhi afʉʼ.

¹² Pɛ pīi pɛ é si nzwíʼtɛ ŋ́gɛ, Ndém a láʼa ŋgákne éshʉ̄ʼ lɛ́. A láʼ aleʼé mɛ́t, mmók e epú ntɔ̄ lephū tɛ e epú eshhʉ́, ajūɔ tsem zīi á éwú, a epú ŋkīne tɛ ncʉ́ʼ á avhō.

¹³ Ndém a le laʼnē ŋ́gɛ, yí e fú eghʉ lephū leswhī, mbɔɔ esī atsetsáʼ eswhī. A egɔ́ ajʉʼ zīi, epuɔ menɔŋ é éwú, ŋ́gwɛ̄ á ndeŋ ndeŋ. Aziɛ́ tɛ́ ḿpɛ é si nzwíʼtɛ.

Awíɛ a egē enáŋ, ńnɔŋ mbípɛ

¹⁴ Mepɔŋ mesoó pá, melaʼ épúp tɛ́, pɛ egē ezwíʼte aleʼé mɛ́t, ŋ́kāk ete tɛ Klísto a gē eshʉʼe, pɛ enɔŋ nnáŋa mé apwɛne, ŋ́gɔ́ té alɔ́ʼ, Ndém a enɔ̄ŋ le ndāʼa á wɛ́ ɛ́.

¹⁵ Pɛ ecuŋte nzhɛ́ á mbɔŋɔ́ á légɛ, Atsyapuɔ a te ŋgáknɛ á leshʉʼ ɛ́ páʼā, ńdɔkɔ ŋgyáa eshhʉ̄ á mbū epuɔ, á lefū ntswɛ́t. Ánɛ ajʉɔ anu mɛ́t, mbɔ Ndém a le yá azhɛ̄‑anu á mbū méŋ mɔ́ yímpɛ Pɔ́ɔl, ŋ́gɔ́ á esoó yímpɛ, á lɔk ntí menu muɔ mɛ́t eshúŋ á wɛ́.

¹⁶ Á zeéŋ ŋgɔ́ anu zīi, a le lé á ntē meŋwaʼne mí ntsem, á ajʉʼ zīi a kiím menu muɔ mɛ́t éwú. Emɔ̄ʼ mejʉʼ é ánɛ meŋwaʼne mí, ńtē á lejūʼ, metsetseŋ, éwɔ te zhɛ́‑azō, é lɛ esɛ̄t njuʼɔ́, ŋ́kúmne anu zīi, á lɔkɔ ndʉ́ɛ́, páʼ pɔ́ gɛ nzī ŋghʉ̄ɛ épúp, ánɛ emɔ̄ʼ mejʉʼ, á ntē aŋwaʼne Ndém. Pɔ́ ghʉʉ̄ épúp páʼā, ńdɔkɔ ntɔ́ŋɔ ndɔ Ndém, ńnéŋɛ á athū pɔ́p.

¹⁷ Ŋ́ké ŋgɔ́ mé pɛ mepɔŋ mesoó pá, mbɔ mɛ́ kʉʉ̄ŋ ndáʼ ńtswɛ̄te á wɛ́ ánɛ menu mīi, e láʼ etɔ́ke. Pɛ egē enáŋ, ńnɔŋ mbípɛ. Ndɛ́ʼ pɛ ecʉ́ʼ, wɔ te júʼ‑nchu Ndém, é pɔpte á wɛ́, pɛ efāa nzhɛ. Pɔ́ méŋwɛ̄t é si efāa nzhɛ. Ndɛ́ʼ pɛ ecʉ́ʼ, pɔ́ ghʉ pɛ efhó ánɛ mbɔŋ ajʉʼ yīi, pɛ tshií éwú, ŋ́ŋɛ̄nne.

¹⁸ A cʉ́ʼɛ épúp, pɛ etswīʼne ndɛ̄tne ánɛ Atsyapuɔ yímpɛ Yɛɛ́so Klísto, á náŋa ŋghʉ̄ɛ menu mbɔŋ té ndhʉ ánɛ pɛ, yí mé Ŋghʉɛ‑mɛ́‑tswɛ́t. Awuʼte a egɔ́ á mbū yí, tɛ efhó tsetsɔŋɔ, ŋ́gʉɔ ŋkó ánɛ meŋguʼ meŋguʼ. Á páʼa.