2 Piɛ 2 - Eka Eswhī

Wɔ zíʼne epuɔ epoó‑anu

¹ Wɔ táŋ‑mela ŋ́gɛ, pɔ́ é metswi‑ŋke Ndém, é lɛ amɔ̄ʼ afʉʼ, ŋ́gɔ́ á alāʼ epuɔ Islaɛl. Ndeŋ ndeŋ épúp, wɔ táŋ‑mela ŋ́gɛ, pɔ́ é wɔ shúŋ‑anu Ndém, e shʉʼ ekó á tsetsɛlɛ pɛ. Pɔ́ e shʉʼ ekó á nnɔ pɛ, ézíʼne anu te methū, ézíʼne tɛ mbɔɔ á légɛ, mɛ́ pɔŋteé á lekʉŋne á Atsyapuɔ, tɛ́ mbɔ a le zó tɛ mbɔɔ athū zɔ́p. Pɔ́ e ghʉ épúp, élɔk etɔ́ŋ ndɔ te mi, énéŋ á athū pɔ́p, tɛ ndɔ mɛ́t, e te e náŋ á leshʉʼ ɛ́.

² Epuɔ tɛ nzáne, e shʉʼ etsé ánɛ tepɔŋ nzhɛ wɔp wuɔ mɛ́t, étsia á nzem pɔ́p, éshúŋne té pɔŋ ánɛ mɛnzhɛ Ndém, tɛ́ á ké ŋgɔ́ á mɛnzhɛ anuúnē.

³ Epuɔ puɔ mɛ́t, e shʉʼ eté á ŋkɔɔ̄ŋ ŋkāp, élɔk epoó‑anu, epɔpte á wɛ́, ékú etsō tsɛ́. Táʼ, Ndém a lē ndáʼ nzáʼ ntsaŋ zɔ́p tɛ efhó tɛ afʉʼ, tɛ á lɛɛ̄ ncʉ́ʼ áa méŋ afʉʼ, pɔ́ ekó á ntē ŋgʉɔ̄ʼ te mi.

⁴ Mecɔʼ Ndém é le fā anu, Ndém a te wɔ́p tsá, ńtshóne á wɔ́p mmāʼ á apwɛt, á ntē nzém. Ńtsēŋɛ á wɔ́p éwú, ńdɔkɔ nzwíʼtɛ aleʼé zīi, a gʉɔ mé nzaáʼ ntsaŋ.

⁵ Epuɔ efʉʼ mvhɔ é le fā azɔ́p á mbū Ndém, Ndém a te wɔ́p tsá, ŋ́ghʉ̄, pík‑ŋgɔŋ mbeŋ á lú, ntshi é kɔ́ʼ ndɔ̄k megaŋ mefa puɔ mɛ́t, tɛ ndaʼ epuɔ lefaá mé vuʼɔ, á Noe, páʼ a le nɔ̄ŋ eshúŋɔ ŋ́gɛ, mɛ́ pɔŋteé á lelɔk á ndeŋ ndeŋ tɛ́ nnáŋ, páʼ Ndém a á si ŋkɔ̄ŋɔ, ŋ́ghʉ̄ emɔ̄ʼ epuɔ esambīa.

⁶ Ndém a le zéŋ eshʉ́ʼne epuɔ tésɔŋ Sodɔm pɔ́ Gomɔɔ, tɛ pɔ́ sɛt nnɛ̄t ncʉ́ʼ avhō, ńdɔkɔ ntswīi á légɛ, ŋiŋ a gɔ te nchu yí júʼ, mbɔ yí e ghʉ épúp ánɛ yí.

⁷ A le ké mbiŋ efhó éwú, ésāʼ á Lɔ́ɔt, á ŋiŋ yīi a le nɔ̄ŋ nziŋɛ ndeŋ ndeŋ, páʼ yí a á si ŋkɔ̄ŋɔ. Menu mīi epuɔ tésɔŋ puɔ mɛ́t, éwɔ fʉʼte‑mele anu, é lɛ si efʉ̄ʼtɛ, é le nɔ̄ŋ nzáŋa á Lɔ́ɔt tɛʼ.

⁸ Ŋiŋ ndeŋ ndeŋ wuɔ mɛ́t, a le náŋ á tsetsɛlɛ pɔ́p, ńnɔŋ njʉ́ɔ á wɔ́p á lefʉʼte menu, ńnɔŋ njúʼɔ á wɔ́p á leshūŋ metepɔŋ menu. A egɔ́ eleʼé etsem, páʼ a lɛ ŋiŋ ndeŋ ndeŋ á mvhɔ Ndém lā, ńjʉ́ɔ á ntií ntiī mele anu mɛ́t mīi, pɔ́ fʉʼtɛ, ntē yí e egēne á yí tɛʼ.

⁹ Mɛ́ fhoó ánɛ anu jʉɔ mɛ́t, ńjʉ́ɔ páʼ Atsyapuɔ a kuūʼ á lefhō á ntē atapne, éfók á ŋiŋ yīi, a naáŋ ndeŋ ndeŋ, páʼ yí Ndém a á si ŋkɔ̄ŋɔ. Ńjʉ́ɔ páʼ a kuūʼ á yí á lekūʼte megaŋ mefa, ńdɔk nzwíʼte aleʼé zīi, a gʉɔ mé nzaáʼ ntsaŋ, étswá á wɔ́p ŋgʉɔ athʉ́ lepé.

¹⁰ A láʼ aleʼé mɛ́t, a enéŋ á mía mía ŋgʉɔ̄ʼ á athū epuɔ pīi, nnɛ̄t zɔp e tshónɛ á wɔ́p á lefʉʼ mele anu, ḿbiŋɛ ŋgwáka mete Ndém. Wɔ zíʼne‑menu te athū puɔ mɛ́t, é juúʼ ŋkuʼ tɛʼ, ŋ́gɔ́ megaŋ leŋia, pɔ́ té pɔ́k á wɔ́p á lezɔte megaŋ shʉ́shɔ́k ɔ́.

¹¹ Mecɔʼ Ndém é piīŋ ndɔk mete pɔ́ mbʉʼ, ńtɔ́k wɔ zíʼne‑epuɔ menu te athū, ŋ́ké te zɔ̄te megaŋ shʉ́shɔ́k puɔ mɛ́t, éswīŋ á wɔ́p á mvhɔ Atsyapuɔ ɔ́.

¹² Epuɔ puɔ mɛ́t, é ké mbiŋ ŋgɔ́ páʼ mena mbaʼ lā. Mena mbaʼ é tswhíi, mɛ́ shʉʼ ŋgɔ̄ á wɔ́p nzwhíte. Epuɔ puɔ mɛ́t é si nzɔ̄tɛ ajū mīi, pɔ́ zi te si nzhɛ́ɛ ɛ́. Mɛ́ e láʼ ezwhíte á wɔ́p azɔ́p, páʼ mena mɛ́t lā.

¹³ Pɔ́ e shʉʼ ewɛ apiŋ menu tepɔŋ mɔ́p. Ŋgɔŋ e é si mbɔ̄ŋɔ á wɔ́p, ánɛ menu mīi, pɔ́ fʉʼtɛ ezokó. Áfʉʼ zīi pɛ a pɔ́p é si mbútɛ etsō mpfɛ́tɛ, pɔ́ nɔŋ ndɔ̄kɔ mela mɔ́p, ḿmāʼa esē á athū pɛ, ńnéŋɛ epe ánɛ pɛ.

¹⁴ O cʉʉ̄ menēk mɔ́p, ńjʉ́ɔ akwaŋte zɔ́p á tshí áa ánɛ agā. Pɔ́ té néŋ á leghʉ mefa á. Ńdɛ ŋgē elʉʼ letā, epuɔ pīi akwaŋte zɔ́p á pwɛ́te, é whʉte éwú. Ntē wɔ́p e puú ntshí áa ánɛ lepɔp epuɔ, ńdɔk ŋgwɛ̄ ŋkāp. Ndém a a láʼ enéŋ ndɔ, á athū pɔ́p.

¹⁵ Pɔ́ le fhó ánɛ mɛnzhɛ Ndém ntó, ḿbí, ńcʉ́ʼɛ nzīŋɛ áa ánɛ mɛnzhɛ Balam, á méŋ Bozɔɔ. Balam wuɔ mɛ́t, a le véŋ á yí á leghʉ anu tepɔŋ, mɛ́ yá á yí ŋkāp.

¹⁶ A le ké ŋghʉ épúp páʼā, Ndém á cɔ́k á yí melaʼ ŋghʉʉ́‑anu tsí. Ŋ́ghʉ̄ nzwí njakási, á lɔk ŋghi ŋiŋnɔŋ eshúŋne, tɛ́ mbɔ njakási e gɛ nzī te eshúŋnɛ ɛ́. Éshúŋne épúp, tɛ́ ndɔk nzáʼ á yí á lezēŋ eshúŋ menu te athū, ŋ́gɛ yí é ntswi‑ŋke Ndém.

¹⁷ Epuɔ puɔ mɛ́t é páʼ letiíʼ ntshi tsīi, é lē nzó, ŋ́gɔ́ páʼ alɔ zīi, afēm á túʼɔ ndɔ̄kɔ nzīŋɛ lā. Ndém a lē ndáʼ ncūŋte á ajʉʼ zɔ́p, á ntē sɛ́h nzém.

¹⁸ Pɔ́ é si ndɔ̄kɔ menu mīi pɔ́ shúŋɔ, ŋ́ŋáʼnɛ, tɛ́ menu mɛ́t é zi ŋgɔ́ áa ndémndēm. Pɔ́ é si mbɔ̄ptɛ epuɔ pīi, pɔ́ ke zɛ́t efhɔ́ɔ ánɛ mɛnzhɛ epuɔ pīi, é té á Ndém zhɛ́ ntúɔ́. Ńzíʼnɛ á wɔ́p menu esē, ŋ́gɛ ŋiŋ a gɔ eghʉ̄ʉ akɔ̄ akɔ̄ lɛ́ zīi, mbe nnɛ̄t e é si ntshónɛ á yí ŋ́gɛ a eghʉ̄.

¹⁹ Ńzéŋɛ nnɔŋɔ eshúŋɔ á wɔ́p ŋ́gɛ, pɔ́ gɔ eghʉ̄ʉ, tɛ pɔ́ cʉ́ʼɛ ŋghʉ̄ɛ áa ajū mīi, pɔ́ méŋwɛ̄t é kɔŋ. Ḿbiŋɛ ndʉ́ɛ́ épúp páʼā, ŋ́gɔ́ meŋkwa atswhī zīi, á píkɛ epuɔ. Ŋiŋ a puú ŋgɔ́ áa ŋkwa ajū mīi, á lē njhʉ́ á yí.

²⁰ A gɔ́ éyi, ŋiŋ a lē efɛ́ nnɛ̄t ŋgyá á mbū Atsyapuɔ Yɛɛ́so Klísto, Ŋghʉɛ‑mɛ́‑tswɛ́t yímpɛ, ńtó ánɛ ecū mīi, é gɔ eghʉ̄ʉ, ŋiŋ á kʉɛ epe á ŋgɔŋ ega, ḿbīŋ nnáŋ tɛ ncʉ́ʼ, etsō mɛ́t é zéŋ ŋkó á ntē yí, ḿbú njhʉ́ á yí, mbɔ azi anu ŋgaŋ, á a láʼ egē emakne, épú epék etɔ́k páʼ, á le zī ŋgē ezi, ŋ́gɔ́ épúp.

²¹ Á lɛ mbɔŋ á mbū ŋiŋ wuɔ mɛ́t, á le zi ŋgɔ́ le á mɛnzhɛ anuúnē zhɛ́, ńtɔ́k á lezhɛ̄, tɛ́ mbiŋ nzéŋ éfhó éwú ntó, ŋ́gwáʼ ashuŋne Ndém zīi mɛ́ ke ziʼné á yí.

²² Anu zīi á ghʉʉ̄ á wɔ́p, á páʼā ndɔkɔ mbūɔ̄ páʼ, ashuŋne lepúʼ á leé ŋ́gɛ: «Mbhʉ̄ e le tékē, ńzéŋ mbēŋte. » Mbɔɔ azi á leé ŋ́gɛ: «Mɛ́ le sōk á kúna tɛ á lá, á lɛ ŋgʉ̄ɔ ŋkɛ̄nne nnɛ̄t mɛ́t ánɛ atetɔp. »