2 Piɛ 1 - Eka Eswhī

Atsaʼte

¹ Meŋ Simɔŋ Piɛ, ŋ́gɔ́ á ŋgaŋ afaʼ Yɛɛ́so Klísto, ńzéŋ ŋgɔ́ á nziŋ‑ntō yi, mé tíi akɛtte jʉɔ páʼa. Ńtíi á mbū epuɔ pīi, é lē efɛ́ nnɛ̄t ŋgyá á mbū Yɛɛ́so, páʼ pek lā. Lefɛ̄ nnɛ̄t ŋgyá mé Yɛɛ́so, á azō ntē nzwiŋ tɛʼ, á mbū pɛ, mbɔɔ á mbū pek. Yɛɛ́so Klísto mé le ghʉ̄ épúp ánɛ pímpɛ, melaʼ mīi, a lɔɔ̄k á ndeŋ ndeŋ, tɛ́ ŋghʉ̄ azō ánɛ awíɛ awíɛ. A á Ndém yímpɛ, ńzéŋ ŋgɔ́ á Ŋghʉɛ‑mɛ́‑tswɛ́t.

² Ŋ́gɛ Ndém a elɛ ŋghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne té ndhʉ, éfhó ánɛ páʼ pɛ kuʼteé á Ndém, ńzéŋ ŋkúʼte á Yɛɛ́so, á Atsyapuɔ yímpɛ.

Ŋiŋ Yɛɛ́so a pɔŋteé á leghʉ ajū mīi Yɛɛ́so a le tɔ́ŋ á yí melaʼ épúp

³ Atsyapuɔ a le lɔ̄k mete mí, ḿbú ŋgyá á yímpɛ ajūɔ tsem zīi, á si nzɛ́ttɛ ŋ́gɛ ḿpɛ ewɛ̄, tɛ́ ndɔk nnáŋ á ŋgɔŋ, ŋ́ké nnáŋ áa páʼ, a á si ŋkɔ̄ŋɔ ŋ́gɛ, mɛ́ enáŋ épúp. A lɛɛ́ ntɔ́ŋɔ á yímpɛ ŋ́gɛ, ḿpɛ ezhɛ́ á Ndém, ḿpɛ a pɔ́p e epú ŋgɔ́ á ntē shʉ́shɔ́k yí, éfhó ánɛ apɔŋɔ́ ntē Ndém mɛ́t.

⁴ Á le tsīa épúp, tɛ́ Ndém á pú ŋgyá á yímpɛ etsō tee nzwiŋ tsīi, a le phʉ́ á yímpɛ, ŋ́gɛ e etswíte á yímpɛ. Ŋgyáa épúp ŋ́gɛ, pɛ ezápa ánɛ etsō mɛ́t, ŋ́kūʼ á lefōk nnɛ̄t zɛ, ánɛ ntií ntiī menu mīi, mbe nnɛ̄t zɛ́t e tshónɛ á wɛ́, pɛ ghʉ̄ɛ á ntē ŋgɔŋ ega. Éfók épúp, ńcʉ́ʼɛ ŋgwīɛ̄ áa ntē Ndém, tɛ́ ndɔkɔ nnáŋa.

⁵ Melaʼ épúp tɛ́, pɛ ekāk ete ntsem, ńtswīʼne á atswhī mbɔŋ, ánɛ ewɛ lefɛ̄ nnɛ̄t ŋgyá á mbū Yɛɛ́so. Eshʉ̄ʼ ánɛ atswhī mbɔŋ, ńtswīʼne á lezhɛ̄ ajū mīi Ndém a á si ŋkɔ̄ŋɔ.

⁶ Éshʉ̄ʼ ánɛ lezhɛ̄ ajū mīi Ndém a á si ŋkɔ̄ŋɔ, ńtswīʼne á lekūʼte mbe nnɛ̄t zɛ. Eshʉ̄ʼ ánɛ lekūʼte mbe nnɛ̄t, ńtswīʼne á lesek ntē. Éshʉ̄ʼ ánɛ lesek ntē, ńtswīʼne á lenāŋ páʼ Ndém a á si ŋkɔ̄ŋɔ.

⁷ Éshʉ̄ʼ ánɛ lenāŋ páʼ Ndém a á si ŋkɔ̄ŋɔ, ńtswīʼne á lejʉ̄ɔ á ŋiŋ ntsem páʼ méŋ mɔ́ wu lā. Ŋgē ejʉ́ɔ á ŋiŋ ntsem páʼ méŋ mɔ́ wu, ŋ́gwɛ̄ ŋkɔŋne.

⁸ Pɛ púu nnɔ̄ŋ ŋghʉ̄ɛ menu mīi, meŋ á té la, ńdɔkɔ ŋgʉ̄ɔ mé mvhɔ, mbɔ e ghʉ, nnɛ̄t zɛ e ezāŋne á leghʉ mefaʼ Ndém, ézéŋ eghʉ pɛ etswiʼne nzhɛ́ á ŋiŋ yīi, Atsyapuɔ yímpɛ Yɛɛ́so Klísto a ewiɛ́.

⁹ Ŋiŋ a nɔŋ te nzīŋɛ ánɛ menu mīi, meŋ á té lā, á zhɛ́ á légɛ, yí te si njʉ́ɔ ejʉʼ á mbɔŋɔ́ ɔ́. Ŋ́gɛ yí é páʼ apií‑menēk lā, ńnɔŋ ndēknɛ á légɛ, Ndém a le sōk mefa mīi, a lɛɛ́ ŋghʉɛ.

¹⁰ Melaʼ épúp, meŋ shúŋɔ á wɛ́ me epɔ̄ memía, páʼ Ndém a le kāŋ á wɛ́, ńtɔ́ŋ á wɛ́ ánɛ mefaʼ mí lā, pɛ ekāk ete ánɛ mɛnzhɛ mɛ́t. Pɛ ghʉɛ épúp, mbɔ pɛ gɔ le láʼ efhó ánɛ mɛnzhɛ Ndém ntó ɔ́.

¹¹ A egɔ́ épúp, Ndém a eláʼ esá nzhɛ saá, pɛ elɔk ŋkó á ntē Lefɔ tsí. Léfɔ te mi Atsyapuɔ yímpɛ Yɛɛ́so Klísto Ŋghʉɛ‑mɛ́‑tswɛ́t.

Epuɔ menɔŋ é pɔŋteé á lekūʼte anu Ndém

¹² Á páʼa ŋgɔ́ ajū mīi á ghʉɛ, meŋ ndáʼa nzóko ŋkímtɛ á wɛ́ menu muɔ mɛ́t. Tɛ mbɔɔ páʼ pɛ é si nzi nzhɛ́ɛ, ńnɔŋ ŋkúʼtɛ anuúnē, páʼ mɛ́ le ziʼné á wɛ́.

¹³ Meŋ á ké njʉ́ɔ ŋ́gɛ, á ndeŋ ndeŋ á mbū meŋ, á gá lezɛ̄t á ndo esī atsetsáʼ ega páʼa, ŋ́kímte á wɛ́ emuɔ menu mɛ́t, ńdɔk nzīɛ á wɛ́.

¹⁴ Meŋ á si nzhɛ́ɛ á légɛ, afʉʼ zīi meŋ gɔ efhó á ŋgɔŋ ega egʉɔ, a cʉ́ʼɛ ŋkuʼ kuʼe. Atsyapuɔ yímpɛ Yɛɛ́so Klísto mé ke ghʉ̄ʉ̄, meŋ ezhɛ́ épúp.

¹⁵ Táʼ, meŋ á ké ŋkɔŋ á gá á lelɔk meshhʉ̄ ntsem, ŋ́ghʉ̄ tɛ ŋgɔ́ yīi, meŋ a kwhʉ́, pɛ enáŋa ŋkímtɛ menu muɔ mɛ́t mīi, meŋ á zíʼne á wɛ́ la, efʉʼ metsem.

Epuɔ pīi é le jʉ́ɔ á shʉ́shɔ́k Klísto

¹⁶ Pek ke shúŋ á wɛ́ páʼ, Atsyapuɔ yímpɛ Yɛɛ́so Klísto, a le ghʉ̄ mɛ́ chʉ́ nnɛ̄t njʉ́ɔ mete shʉ́shɔ́k yi. Pek kɛ te gē eshúŋ á wɛ́ épúp, éfhó ánɛ menu mīi, mɛ́ chʉʉ́ nnɛ̄t ŋgiŋte yíŋtɛ ɛ́. Pek ke gē eshúŋ á wɛ́, á gɔ́ áa páʼ, pek le lɔ̄k menēk mék, ńjʉ́ɔ á yí, á ntē shʉ́shɔ́k mɛ́t.

¹⁷ Afʉʼ zīi Ndém Mɔʼɔ́ a le kɔʼné nzwiŋ yí, ŋ́gyá á yí á shʉ́shɔ́k, mɛ́ júʼ ŋghi Ndém, á ŋwɛ́t shʉ́shɔ́k, á lé mé yí ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ. Meŋ á tsɔ́ʼ á yí, a ghʉʉ̄, ntē gá é gáŋte. »

¹⁸ Pek a wɔ Yɛɛ́so é lɛ á ndo lekwɛ̄t Ndém, pek méŋwɛ̄t é júʼ ŋghi mɛ́t, páʼ e fhɔ́ɔ á lephū esóʼo.

¹⁹ Á té ndaʼ épúp ɔ́, anu zīi metswi‑ŋke Ndém é le léē, á si ŋgɔ́ anu ntēte. Pɛ pɔŋteé á wɛ́ á lekūʼte anu mɛ́t, ńtshí menēk mɛ́ éwú, páʼ pɛ cʉʉ ŋkaʼ yīi, é si ŋkɛ̄ʼɛ á ntē nzem lā. Pɛ ekúʼte, tɛ cɔʼ saŋ yīi, a phʉ́ɛ melanjhʉ̄, a eláʼ esáʼ á ntē pɛ, púp, pɛ epú ncʉ́ʼɛ nnáŋa áa ntē ŋkaʼ.

²⁰ Ajū mīi pɛ pɔŋteé á wɛ́ á letē njhʉ̄ nzhɛ́, á si ŋgɔ́ á légɛ: «Ŋiŋ a gɔ le lɔ̄k leghi tsí méŋwɛ̄t, ŋ́kɛ́ʼte anu zīi metswi‑ŋke Ndém é le lé á ntē aŋwaʼne Ndém ɛ́. »

²¹ Á zi ŋgē egɔ́ mbɔ, anu zīi metswi‑ŋke Ndém é le léē, á lɛɛ́ te efhɔ́ɔ ánɛ lekɔŋ ŋiŋnɔŋ ɔ́. Metswi‑ŋke Ndém é le gē eshúŋne, á gɔ́ áa páʼ, Azwakne Ndém mé tshóne á wɔ́p ŋ́gɛ, pɔ́ etswī ŋke Ndém.