2 Jáaŋ 1 - Eka Eswhī

Atsaʼte

¹ Meŋ mɔ́ ndʉɛ mé tíi akɛtte jʉɔ páʼa, á mbū Mía ewɔŋkhʉ̄ yīi, Ndém a le kāŋŋ̄, mbɔɔ á mbū ewɔŋkhʉ̄ pí. Meŋ kɔɔ̄ŋ á wɛ́ á kwaʼ anuúnē. Meŋ méŋwɛ̄t ndaʼ mé té lɛ ŋkɔ̄ŋ á wɛ́ ɛ́. Epuɔ metsem pīi pɔ́ neéŋ ntē wɔ́p ánɛ anuúnē, é zeéŋ ŋkɔŋ á wɛ́ azɔ́p.

² Pek kɔɔ̄ŋ á wɛ́ épúp, melaʼ mīi, anuúnē á ntē pímpɛ, é náŋa enáŋa éwú.

³ Ŋ́gɛ Ndém, á Mɔʼɔ́ yímpɛ mbɔɔ Yɛɛ́so Klísto Méŋ yi, e elɛ ŋghʉ̄ anu mbɔŋ té ndhʉ ánɛ pímpɛ, ŋ́gwɛ̄ atsāmezeŋɛ ánɛ pímpɛ, ŋ́ghʉ̄ ḿpɛ enáŋ mé apwɛne, ńnɔŋ nnéŋɛ ntē yímpɛ ánɛ anuúnē, ŋ́gwɛ̄ ŋkɔŋne á tsetsɛlɛ pímpɛ.

Ḿpɛ ekɔ̄ŋne mennɛ̄t mímpɛ, ńdɔk anuúnē nnáŋ

⁴ Ŋgɔŋ ke pɔ̄ŋ á gá tɛʼ, á lejʉ̄ɔ emɔ̄ʼ ewɔŋkhʉ̄ pú, á leziŋ ánɛ mekhu Ndém, ńdeŋ ndeŋ páʼ, a le tswī á mbū pímpɛ épúp.

⁵ Púp, Mía ewɔŋkhʉ̄, ajū mīi meŋ á si nzɛ́ttɛ á mbū wu, á si ŋgɔ́ á légɛ, ḿpɛ ekɔ̄ŋne mennɛ̄t mímpɛ nzeŋne zeŋné. Meŋ te ntíi páʼa, é gɔ́ mmɔʼ lepé leswhī ɛ́, é gɔ́ áa lepé tsīi, ḿpɛ wɛɛ̄ tɛ efhó páʼ ḿpɛ le zī á lejūʼ ŋke mbɔŋ.

⁶ Ḿpɛ eké njʉ́ɔ ajū mīi, ŋkɔŋne e é si ŋgɔ́ aziɛ́: e é si ŋgɔ́ á yímpɛ á leziŋ páʼ, lepé Ndém é si nzɛ́ttɛ, lépé Ndém tsīi, pɛ gɛ njúʼɔ tɛ efhó á nzií ŋke mbɔŋ. Á mbɔŋ ŋ́gɛ, pɛ enáŋ mé ŋkɔŋne, páʼ lepé mɛ́t é si ndʉ́ɛ́ épúp.

⁷ Megaŋ mela tɛ nzáne, é kʉʉ̄ŋ mbú ésāŋ ndo esī atsetsáʼ. Pɔ́ té si mvéŋɛ ŋ́gɛ, Yɛɛ́so Klísto a le cʉ́ʼ á ŋiŋnɔŋ, éshʉ̄ʼ á ndo esī atsetsáʼ á. Ntií ŋiŋ jʉɔ mɛ́t, a á si ŋgɔ́ á ŋgaŋ mela, ŋ́gɔ́ á ŋgaŋ mbo Klísto.

⁸ Melaʼ épúp tɛ́, awíɛ a elāk athū zí, ḿbɔ́k á yí á lepī ntaŋá mefaʼ membɔŋ mí. Pɛ elāk athū zɛ́ épúp, tɛ ndáʼ ŋgwɛ̄ ntsɔʼɔ́ mefaʼ membɔŋ mɛ́, tɛ ntsékne.

⁹ Ŋiŋ a tswiʼnɛ azō ánɛ anu zīi, Klísto a le léē, tɛ a te tshí áa ánɛ azi, Klísto a le lé ɛ̄, mbɔ pɔ́ Ndém é té nnɔ ɔ́. Ŋiŋ a piŋɛ ntshí áa ánɛ anu zīi Klísto a le léē, mbɔ pɔ́ a Ndém Mɔʼɔ́ mbɔɔ Mɔ́, é nnɔ.

¹⁰ Ŋiŋ a ge eshʉʼe á mba pɛ, ŋ́gɔ́ éyi, a te ndɔ̄kɔ áa anu zīi Yɛɛ́so a le léē, éshʉ̄ʼɛ, ndɛ́ʼ pɛ ekókne á yí, ndɛ́ʼ pɛ zi mbú ndé á mbū yí ŋ́gɛ, zhɛ́ á leshʉʼ.

¹¹ Ŋiŋ a lʉ́ɛ́ á mbū yí ŋ́gɛ, zhɛ́ á leshʉʼ, ŋgaŋ á lɔkɔ nnéŋɛ azí apū, ánɛ mefaʼ tepɔŋ mí.

Atsaʼte á lelɔk nzōko

¹² Meŋ zɛɛ́t ŋgwɛ menu tɛ nzáne mīi, meŋ gɔ etí eshúŋ á wɛ́. Meŋ ké ka kɔ̄ŋ á gá á letī í, melaʼ mīi meŋ á si ntsáa á gá á leshʉʼ á alāʼ pɛ, anu á tó á nchu meŋ, ŋ́kó á metuúŋ pɛ, tɛ́ ḿpɛ epú ŋkák tɛ ntsékne.

¹³ Ewɔŋkhʉ̄ méŋ mɔ́ wu eyi menzwí yīi Ndém a lē ŋkaŋ, é tsaʼte á wú.