2 Kɔlɛŋte 9 - Eka Eswhī

Ndém a kɔɔ̄ŋ á ŋiŋ yīi, a lɔɔ̄k ntē mbɔŋ, ŋ́gyá á ŋiŋ azō

¹ Éshʉ̄ʼ ánɛ leyā azō ndɔk ntswíte epuɔ Ndém, mbɔ meŋ tíi á mbū pɛ, ńdɔ̄k eshúŋ á wɛ́ anu éwú, á le á wɛ́ tswíte,

² melaʼ mīi, meŋ á si nzhɛ́ɛ á légɛ, pɛ wɛɛ̄ akwaŋte mbɔŋ á lelɔk ntswíte epuɔ. Meŋ ke zéŋ ndɔk á wɛ́ ŋkāʼte, á mvhɔ epuɔ apak ŋgɔŋ Maseduan. Éshúŋ á wɔ́p ŋ́gɛ, tɛ efhó ŋguʼ afʉʼ a, epuɔ Ndém á ntē apak ŋgɔŋ Akayi, é lē ndáʼ mbɛ́tte á leyā azō, ńdɔk ntswíte epuɔ Ndém. Pɔ́ júʼ páʼ pɛ é si ŋkhʉ́nɛ á leyā azō épúp, ńtswiʼne ŋkɔ̄ŋ á leyā azɔ́p azō, ńdɔk ntswíte á wɔ́p.

³ Meŋ ké ntúɔ́ emɔ̄ʼ epɔ̄ memía á mbū pɛ páʼā, ńdɔkɔ efāʼa ŋ́gɛ, pɛ epɛ́tte azɛ́ nnɛ̄t, páʼ meŋ á zi ndé épúp lā, tɛ́ lekaʼte yīi, pek ke lɔ̄k á wɛ́ ŋkāʼte, ánɛ anu jʉɔ mɛ́t, a á le tó ndémndēm ɛ́.

⁴ Pek a epuɔ Maseduan é gɔ́ péʼe, ŋ́gē eshʉʼe, pɛ zɛ́t té pɛ́tte á leyā azō, mbɔ esē é kú á wék ánɛ páʼ, pek le nɔ̄ŋ nzhɛ́ɛ té miʼte á légɛ, pɛ lē ndáʼ mbɛ́tte. Meŋ eké nzéŋ ŋ́gɛ akɔ̄, ánɛ esē á lekū á wɛ́ ɛ́?

⁵ Melaʼ épúp tɛ́, meŋ ke jʉ́ɔ ŋ́gɛ, á mbɔŋ á letō epɔ̄ memía puɔ mɛ́t á mbū pɛ, pɔ́ pik, ńcúʼte ncup zīi, pɛ le laʼnēē. Tɛ meŋ ŋgē eshʉʼe, e egɔ́ mbo poo. A egɔ́ épúp, ńdɔk ntswīi á légɛ, pɛ lɔɔ̄k á lekɔŋ, tɛ́ ŋgyá, mɛ́ té kōne á wɛ́ kone ɛ́.

⁶ Pɛ ekímte á légɛ, ŋiŋ yīi a phiī á kʉɔ́k, a a láʼ ezéŋ efaʼe, a ekʉɔ́k. Ŋiŋ yīi a phiī á zá, a a láʼ ezéŋ efaʼe, a ezá.

⁷ Púp, awíɛ awíɛ a eyá páʼ, ntē yí é si ndʉ́ɛ́ épúp, té zwɛ́tte, té mɛ́ ŋkōne á yí, melaʼ mīi Ndém a kɔɔ̄ŋ á ŋiŋ yīi, a á ge eyá, ntē yí é nɔŋ ŋgáŋtɛ.

⁸ Ndém a kuūʼ á leyā á ntií ntiī etsō mbɔŋ té ndhʉ á mbū pɛ, ńdɔkɔ efāʼa ŋ́gɛ, pɛ egɔ́ efʉʼ metsem, ŋ́gwɛ̄ ajūɔ tsem zīi, á kuʼ á mbū pɛ, tɛ nzéŋ ŋgwɛ̄ azi, pɛ gɔ eyá, ńdɔ̄k ntswíte á leghʉ mefaʼ mbɔŋ ntsem.

⁹ Á gɔ́ páʼ, mɛ́ leé á ntē Aŋwaʼne Ndém ŋ́gɛ: «Apū Ndém, á zaŋneē á leyā azō, á mbū wɔ te kuʼ ánɛ azō. Apɔŋɔ́ ntē zí á té ndáʼa mmī í. »

¹⁰ Páʼ Ndém mé yaá nzwɛt etsō á mbū mbhi‑etsō, ńzéŋ ŋgyá á yí ajū mīi, a a pfɛ́t lā, a a shʉʼ ezéŋ eyá nzwɛt etsō á mbū pɛ, éghʉ, e etswhí, ńzém. Púp, epuɔ menɔŋ e ejhʉ́ apɛ ánɛ apɔŋɔ́ ntē zīi, pɛ wɛ̄ɛ.

¹¹ A a shʉʼ eyá á wɛ́ ajūɔ tsem, pɛ ecʉ́ʼ megaŋ lewūʼ, ńdɔ̄k apɔŋɔ́ ntē, ŋ́gāp ajū mīi pɛ wɛ̄ɛ. Epuɔ pīi pek gapa ecū mīi, pɛ é yá á mbū pɔ́p, e esyákne á Ndém melaʼ etsō mɛ́t.

¹² Pɛ ezhɛ́ á légɛ, ncup zīi pɛ maʼa, e te lɛ ŋgɔ́ áa lelɔk ntswíte epuɔ Ndém ndaʼ á, é si nzéŋ ŋgɔ́ á lelɔk ŋghʉ̄, epuɔ tɛ nzáne é syákne á Ndém.

¹³ Púp, pɔ́ ewūʼ nzwiŋ afaʼ jʉɔ mɛ́t zīi pɛ ghʉɛ, ŋ́gūʼte á Ndém ánɛ páʼ, pɛ kuʼteé ŋke mbɔŋ Klísto. Ńzéŋ ŋgūʼte á yí melaʼ mīi pɛ wɛɛ̄ azō, ŋ́gap ŋgyá azɔ́p, mbɔɔ azi emɔ̄ʼ epuɔ metsem.

¹⁴ A egɔ́ épúp, pɔ́ enáŋa eswíŋtɛ á Ndém á athū pɛ, ńdɔk ntswī á légɛ pɔ́ kɔɔ̄ŋ á wɛ́, éghʉ épúp, melaʼ nda‑jʉ́ɔ apɔŋɔ́ ntē te ndhʉ zīi, Ndém a wɛɛ̄ ánɛ pɛ.

¹⁵ Ḿpɛ esyákne á Ndém melaʼ ajūɔ mbɔŋ té ndhʉ zīi, a le yá mé pímpɛ.