2 Kɔlɛŋte 8 - Eka Eswhī

Pɔ́ɔl a á ega eshúŋnɛ ánɛ lemaʼ ncup

¹ Epɔ̄ memía, pek é si ŋkɔ̄ŋɔ ŋ́gɛ, pɛ ezhɛ́ á apɔŋɔ́ ntē te ndhʉ zīi, Ndém a le tswī ánɛ melúŋ epuɔ Yɛɛ́so, á apak ŋgɔŋ Maseduan.

² Ntií ntiī ŋgʉɔ̄ʼ e le shʉ̄ʼ ánɛ pɔ́p, táʼ, lekāk tsīi é ntē pɔ́p, é zá nzíʼ ndhʉ, pɔ́ tswi á légɛ, pɔ́ zhɛɛ́ á lewɛ azō, ŋ́gyá á ŋiŋ, tɛ mbɔɔ páʼ, pɔ́ é kwaʼ wɔ te kuʼ ánɛ azō.

³ Meŋ shúŋɔ, ŋ́gɔ́ á njhʉɛ‑njʉɔ́. Pɔ́ le fhó ánɛ ajū mīi pɔ́ kuūʼ éwú, ŋ́gyá azō ndɔk mbʉ́ʼte afaʼ Ndém, ŋ́gyá tɛ á zá ntɔ́k. Ŋ́gyá páʼ á kɔ́ʼ á ntē pɔ́p.

⁴ Pɔ́ le zɛtté á wék ŋŋiŋ ŋiíŋ ŋ́gɛ, pek lɛ mvéŋ, pɔ́ enéŋ azɔ́p apū, ńdɔk ntswíte epuɔ Ndém.

⁵ Ajū mīi pɔ́ ke ghʉ̄ʉ̄, á ke tɔ́k azi pek ke nɔ̄ŋ nzwíʼtɛ. Pɔ́ ke pú mmaʼ ŋgua zɔp ŋgyá á mbū Atsyapuɔ, ńzéŋ mmaʼ ŋ́gyá á mbū pek, ánɛ páʼ Ndém a á kɔŋ épúp.

⁶ Aziɛ́ mé ke ghʉ̄ʉ̄, pek swíŋte á Tíit ŋ́gɛ, a ezéŋ mbīŋ nzem á alāʼ pɛ, ńtswíʼte á wɛ́ á lewɛ azō ŋgyá á ŋiŋ, ńdɔk ŋgʉ̄ɔ mé mvhɔ, páʼ á le zī épúp.

⁷ Pɛ wɛɛ̄ ajūɔ tsem, tɛ á zá ntɔ́k: á lefɛ̄ nnɛ̄t ŋgyá á mbū Ndém, á lezhɛ̄ leshūŋ anu Ndém, á lezhɛ̄ anu Ndém, á lekhʉ̄ne ánɛ mefaʼ Ndém ntsem, á lewɛ ŋkɔŋne páʼ pek le ziʼné á wɛ́ épúp. Púp, pɛ ezéŋ ŋkó ánɛ anu jʉɔ mɛ́t, ńtswī á mbɔŋɔ́ á légɛ, pɛ zhɛɛ́ á lewɛ azō ŋgyá á ŋiŋ.

⁸ Meŋ te ndʉ́ɛ́ páʼa, ńdɔkɔ nnéŋɛ mmɔʼ lepé á mbū pɛ ɛ́. Meŋ shúŋɔ á wɛ́ páʼ, emɔ̄ʼ epuɔ Yɛɛ́so é si ŋkhʉ́nɛ á leyā azō á mbū emɔ̄ʼ epuɔ páʼā, ńdɔkɔ efāʼa ŋ́ghʉ̄ áa lɛ, pɛ etswī á kwaʼ ŋkɔŋne zīi, pɛ wɛɛ̄ á mbū emɔ̄ʼ epuɔ.

⁹ Pɛ é si nzhɛ́ɛ apɔŋɔ́ ntē te ndhʉ zīi, Atsyapuɔ yímpɛ Yɛɛ́so Klísto a wɛɛ̄ ánɛ pɛ, ajūɔ tsem á lɛ á alá apū yí, á véŋ á lecʉ̄ʼ á te kuʼ ánɛ azō melaʼ mɛ́, ńdɔkɔ efāʼa ŋ́gɛ, pɛ etsīa épúp, ŋ́gwɛ̄ ajūɔ tsem.

¹⁰ Azá akwaŋte ánɛ anu jʉɔ mɛ́t, a ajʉɔ: pɛ pīi pɛ lɛ ŋguʼ afʉʼ páʼa, ŋ́gɔ́ megaŋ mvhɔ á leyā azō, mbɔ pɛ mé nzi ŋgɔ́ megaŋ mvhɔ á lekwaŋte épúp, á mbɔŋ ŋ́gɛ, pɛ eghʉ̄ épúp, ńdɔk ŋgʉ̄ɔ mvhɔ.

¹¹ Tsetsɔŋɔ, pɛ ezōko afaʼ jʉɔ mɛ́t zīi, pɛ le zīī. Pɛ efhó ánɛ ajū mīi pɛ wɛɛ̄, ńdɔ̄k ntē mbɔŋ, ńzōko afaʼ jʉɔ mɛ́t, ńdeŋ ndeŋ páʼ, pɛ le lɔ̄k ntē mbɔŋ, ńzī épúp.

¹² Ŋiŋ a ge eyá azō á mbū Ndém, ńdɔ̄k á taʼ ntē, mbɔ Ndém a a fhó ánɛ ajū mīi, ŋgaŋ a wɛ̄ɛ, évéŋ azō mɛ́t. A á le fhó ánɛ ajū mīi ŋgaŋ a te wɛ ɛ́.

¹³ Á páʼā, meŋ te ndɔ̄kɔ ndʉ́ɛ́ ŋ́gɛ, pɛ eyá azō á mbū emɔ̄ʼ epuɔ, pɔ́ gē elɔk ejúʼ á mbɔŋɔ́, pɛ ekó á ntē mbūŋ ɔ́. Meŋ ndɔkɔ ndʉ́ɛ́ ŋghʉ̄ɛ áa lɛ, pɛ efāʼ eshhʉ̄, tɛ ŋgē ewɛ azō lɛ akɔ̄ lɛ́, emɔ̄ʼ epuɔ e ezéŋ ŋgwɛ̄ azɔ́p.

¹⁴ Á tsetsɔŋɔ, pɛ wɛ̄ɛ azō tɛ á zá, tɛ ŋgɔ́ yīi pɛ gɔ ekūʼ á letswīte epuɔ pīi, pɔ́ é si mbúŋɔ azō. Á piŋɛ efú ŋgɔ́ amɔ̄ʼ afʉʼ, pɛ nɔ̄ŋ mbúŋɔ azō, pɔ́ pīŋ ŋgwɛ̄ azō tɛ á zá, mbɔ pɔ́ e shʉʼ etswíte á wɛ́, a gɔ́ épúp, awíɛ awíɛ a elɔk ŋgwɛ̄ azō.

¹⁵ Á lɔk mbō páʼ, mɛ́ leé á ntē aŋwaʼne Ndém ŋ́gɛ: «Ŋiŋ yīi a le laktē etsō tɛ é zá, a lɛ te wɛ̄ tɛ é tɔ́k tsīi, é gɔ ekūuʼ á mbū yí í. Ŋiŋ yīi a le laktē á méŋ agáʼ, amɔ̄ʼ azō á lɛ te á mbū yí kíŋ. »

Tíit pɔ́ a emɔ̄ʼ epuɔ Yɛɛ́so é gʉɔ mé Kɔlɛŋte

¹⁶ Meŋ á si esyáknɛ Ndém, páʼ a á si ŋghʉ̄ɛ, Tíit á khʉ́nɛ á letswīte á wɛ́, ńdeŋ ndeŋ páʼ pek é si ŋkhʉ́nɛ azék épúp.

¹⁷ Pek le swiŋté á Tíit ŋ́gɛ, a eshʉ̄ʼ á alāʼ pɛ, á véŋ, anu mɛ́t á khʉ́ne á yí khʉ́ne, tɛ́ á lɛ ndū á esī afʉʼ mɛ́t afʉʼ mɛ́t, ŋgʉ̄ɔ mé alāʼ zɛ́.

¹⁸ A lɛ te gʉ̄ɔ yíléyī í, pek le tó á wɔ́p mmɔʼ méŋ mɔ́ yīi a á ega, melúŋ epuɔ Yɛɛ́so ntsem é wuʼ nzwiŋ yí melaʼ afaʼ zīi, a ghʉɛ ánɛ letswi ŋke mbɔŋ.

¹⁹ É té ndaʼ épúp ɔ́, melúŋ epuɔ Yɛɛ́so é le zéŋ ntsɔ́ʼ á yí ŋ́gɛ, a egɔ́ á ŋiŋ nnɔ wek, ánɛ leziŋ ŋghʉ̄ afaʼ a leyā azō, ńdɔk ntswíte emɔ̄ʼ epuɔ. Pek é si ŋghʉ̄ɛ afaʼ jʉɔ mɛ́t, ńdɔkɔ efāʼa ŋ́gɛ, lezēŋ Atsyapuɔ méŋwɛ̄t e egɔ́ ŋguʼte wuʼte. Ńzéŋɛ ndɔkɔ efāʼa á leghʉ, akwaŋte mbɔŋ zīi pek le wɛ̄ɛ̄, á po.

²⁰ Pek é si mbúu efāʼa meshhʉ̄ á lelɔk ŋghʉ̄ tɛ, ŋiŋ a á le kūʼ á lelaʼ á wék ánɛ ntií zīi, pek lɔkɔ mbātɛ ejʉɔ mbwɔʼ ŋkāp á.

²¹ Pek é si efāʼa a leghʉ ajū mīi, á mbɔŋ á mbū Atsyapuɔ. Á le gɔ́ mbɔŋ á mbū Atsyapuɔ ndaʼ á, ńzéŋ ŋgɔ́ mbɔŋ á mbū epuɔ menɔŋ.

²² Pek le tó epuɔ mémpīa pwɔ̄, pɔ́ a mmɔʼ méŋ mɔ́ wek. Á gɔ́ ŋiŋ, mbɔ pek lé zii nzwíʼ á yí ánɛ menu tɛ nzáne, ŋ́gɔ̄ á njʉ́ɔ páʼ, a khʉneé épúp, ánɛ mefaʼ Ndém. A á tsetsɔŋɔ, ŋ́ké ntswiʼnɛ ŋkhʉ́nɛ, ńdɔkɔ ŋgʉ̄ɔ mé mvhɔ, ánɛ páʼ, a á si mbúu mmāʼa ŋgua zi, ŋ́gyáa mé pɛ.

²³ Tíit a á si ŋgɔ́ á ŋgaŋ akhu ga, pek yí é nɔŋ mbútɛ ŋghʉ̄ɛ afaʼ á mbū pɛ. Epi emɔ̄ʼ epuɔ pīi, pɔ́ a pɔ́p é nnɔ, é gɔ́ epɔ̄ memía pék, mbɔ melúŋ epuɔ Yɛɛ́so mé tsɔ́ʼ á wɔ́p, ńtó á wɔ́p. Epuɔ e jʉ́ɔ afaʼ zɔ́p, éwuʼte á Klísto.

²⁴ Púp, pɛ etswī á mbū melúŋ epuɔ Yɛɛ́so á légɛ, pɛ kɔɔ̄ŋ epuɔ puɔ mɛ́t, mbɔɔ á légɛ á té ndémndēm tɛ́, pek lɔkɔ á wɛ́ ŋkāʼtɛ ɛ́.